L2ma.com | لقمة طيبة | L2ma.com | لقمة طيبة | كبة الرز العراقية | الرز, · , حتى, ملعقة, كبة | L2ma.com

كبة الرز العراقية

الكاتب/ منى

03/12/2008

كبة الرز العراقية

كبة الرز من أشهر الوصفات العراقية اللذيذة , و هي أول وصفة عراقية في الموقع .من النهفات أن كبة الرز في العراق معروفة بكبة حلب أما في حلب الي هي بيت المحاشي و الكبب هذا النوع من الكبب مو معروف و نادراً ما يتحضر .

أخذت وصفة الكبة من صديقتي العراقية بس لما جربتها اتعذبت فيها كتير و صارت تلزق , لهيك استعنت بصديق و هي الأخت ام العريف من منتدى لك و سألتها و كانت اجاباتها كافية و وافية ربي يعطيها الف عافية . الوصفة وصفتها بس بتصرف .

الوصفة مو صعبة متل أي كبة عادية بس لحتى تنجح العجينة معك و ما تلزق مهم كتير انك تفردي الرز على صينية بعد ما يستوي و تخليه لحتى يبرد , والشي التاني انك تهرسي الرز باستعمال هراسة البطاطا لأن بهل الطريقة رح يبقى خشن شوي و بيطلع أطيب و ممكن تفرميه على ماكينة فرم اللحمة القياس الوسط بس باستعمال هراسة البطاطا أحسن بكتير . فيك كمان تضيفي كرفس مفروم للحشوة و كله بيطلع طيب . في وصفة ام العريف استعملت بيضة للرز بعد ما برد من دون الطحين , لعجينتي ما احتجت للبيض و احتجت لكم ملعقة طحين حتى تتماسك معي .

متل أي كبة مقلية كل ما كانت القشرة رقيقة بيكون أطيب و بتطلع كريسبي أكتر و عند القلي تقلي كم قطعة مع بعض لحتى تبقى مقرمشة .

بالصحة و الهنا

2 كوب رز مصري
2 كوب و نصف ماء
ملعقة صغيرة عصفر أو كركم
رشة كاري ( اختياري )
2 ملعقة كبيرة طحين أو نشاء أو حسب الحاجة
ملح

الحشوة :

2 ملعقة كبيرة زيت
ربع كيلو لحمة مفرومة
حبة كبيرة بصل مفروم ناعماً
ربع ملعقة صغيرة بهار مشكل
رشة قرفة و هال مطحون و جوزة الطيب
ربع باقة بقدونس مفرومة
ربع كوب زبيب
ربع كوب صنوبر أو لوز محمص
ØÑíÞÉ ÇáÊÍÖíÑ

·          يقلب البصل بالزيت حتى يشقر . تضاف اللحمة و تقلب حتى يتبخر كل مرقها ثم تتبل بالبهارات و الملح .

·          تبعد اللحمة عن النار ثم يضاف البقدونس و الزبيب , أصبحت الحشوة جاهزة .

·          ينقع الرز لمدة نصف ساعة ثم يغمر بالماء و يسلق حتى ينضج و يمتص كل الماء و الرز يجب أن يبقى طري قليلاً . يضاف لماء السلق القليل من الملح و الكاري و الكركم لإضافة لون أصفر جميل للرز و لا يضاف الزيت أو السمنة .

·          يفرد الرز في صينية و يترك حتى يبرد ثم يعجن باليد أو يهرس باستخدام مهرسة البطاطا , هذه الخطوة أهم خطوة لتحضير كبة البطاطا كي تتماسك معك العجينة و لا تلتصق باليد أثناء التحضير .

·          تقطع العجينة إلى كرات بالحجم الذي تفضليه ثم تؤخذ أول كرة و تفرد بالسبابة على شكل دائرة أو بشكل أقراص و تحشى بحشوة اللحمة و البقدونس ثم تدور بين اليدين حتى تغلق .

·          تقلى الأقراص في زيت غزير و حامي حتى تحمر و يصبح لونها ذهبي ثم ترفع على ورق ماص و تقدم فوراً مع السلطة و الخضار أو اللبن و المخللات .

أضافة إلى المفضلة (0) |

أقتباس | مشاهدات : 2695

تعليقات (32)

1 الكاتب سلاف, on 03-12-2008 10:34
يسلم ايدكي يارب
شكلها بشهي منى اليوم صايمه ان شاء الله بجهزها بالليل واشتغل فيها منى بصير نساويها ونحطها بالتلاجه لتاني يووم ؟؟ كتير مشتهيه عليها اممممم والله مابعرف كيف بدي اشكرك ربي يجعل ايامك كلها نور وسرور ويجعل دعائك بهالعشر المباركات لا يرد وربي يجعلك من كل هم فرج ومن كل ضيق مخرج قولي امين :zzz

2 الكاتب منى, on 03-12-2008 11:13
ااااامين
انا و انت و كل الي عم يقرأ

ربي يتقبل صيامك يا حق بهل الايام الفضيلة , الف شكر الك للدعوات , الشكر وصلني و فوقه مية الف بوسة سلوفة

اكيد ممكن تعمليهم من اليوم لبكرةو حتى فيك تفرزيهم
ان شاء الله تجربيها و تكون على زووءك

3 الكاتب سارونات, on 03-12-2008 12:55
السلام عليكم و رحمة الله و بركاته
شو هالكبة الحلوة انا كنت عم دور عهيك وصفة من فترة ان شا ءالله راح جربها
امين يا رب العالمين و تقبل الله صيامك و طاعتك اختي سلاف و كل اخواننا المسلمين
اختي منى شو قصدك بمهرسة الببطاطا قصدك على اللي بتنهرس فيها البطاطا المهروسةو اللي هي اداة حديدية طويلة
اناشفتها بالتلفزيون بس ما عندي ياها ما بيصير
استعمل شوكة او ما بينفع لان قلتي هالشي احسن من الخلاط الكهربائي
بالتوفيق
سلام

4 الكاتب سلاف, on 04-12-2008 21:17
منى بدي اسألك منشان كعك العيد بصير ضيف كاسة جبنة حلوم للعجينه ولا مابيزبط ؟؟ ومنشان الكبة ماصرلي ساويها صار عندي ظرف بس اعملها بقلك شلون طلعت معي بس حبابه ضروري تردي علي منشان كعك العيد انا بتذكر ماما نفس نقاديرك تقريبا وكانت تضيف جبنه شو رأيك؟

5 الكاتب BaSmAa, on 05-12-2008 00:25
روووووعة
تسلم اديكي يا رب
شجعتيني جربها

null

6 الكاتب منى, on 05-12-2008 11:26
هلا سارونات

مية هلا اختي و ان شاء الله انت و كل عيلتك كمان

أختي استخدمت المهرسة الي عم تقولي عليها , ما أظن بينفع بالشوكة بس ممكن تطحيها على الفوود بروسسر المهم ان ما تطحنيه ناعم كتير و الا بتلزق معك العجينة

7 الكاتب منى, on 05-12-2008 11:29
هلا سلاف

هي اول مرة اسمع ان بينحط مع الكعك جبنة , ليكون قصدك مية الجبنة ؟
اذا انت متاكدة ان ماماتك الله يخليها هيك بتعمل ممكن تجربي

هنا و عافية على الكبة مقدما

8 الكاتب منى, on 05-12-2008 11:31
هلا بسمة

يا ستي نورتي و مية اهلا و سهلا , لازم افرشلك الموضوع ورد و فل و ياسمين

ان شاء الله تجربيها و تكون على زووءك , مية هلا حبيبتي

9 الكاتب سلاف, on 05-12-2008 14:58
كيفك منى ايه والله بتحط ماما جبنه نفس مقاديرك تقريبا بالكعك بس زياده بتستخدم حليب بدل المي وبتحط جبنه مجدوله بدك تقولي شيئ كاسه بتبشرها وبتحطها المهم ياستي بس كانت ماتحط لا شمره ولا يانسون ولا كمون بس محلب ساويته اليوم وضفت دقة الكعك وعجنته بالحليب وحطيت جبنه بس شوو طلع يامنى عنجد بينكتب فيه قصيده :zzz

والله قلي زوجي أطيب كعك بدوقه بحياتي
هدا كعك بمية الجبنه سمعت عنه بس مابعرفه على كل حال يسلم ايديكي باقي نشوف نتيجة المعمول اليوم عجنتها وبكره رح ساويه بس كنت بدي قلك شغله ماما نفس مقاديرك بس بتحط 4 كاسات سميد و1 طحين وكتير بينجح معاها ليش مابعرف وبما انه اول عيد رح اشتغل فيه رح جرب طريقتك وبقلك شو طلع معي :roll

منى انا كمان كنت بدي قلك شغله عادة الحلويات والمعمول كلها باخدها كنت من عند مهروسه بحلب قريت مقادير المعمول كاتب طحين مو جايب سيرة السميد ابد شو رأيك ؟؟

خايفه صيب حالي بالعين من كتر مافرحت لما نجح الكعك معي ان شاء الله بيزبطو المعمولات 00 وعم استنى المربى الله يخليكي منى حاولي قبلي العيد تنزليه ولو بس المقادير والطريقه من غير صوره لاني بدي ضيفه بالعيـــــد
شكرا الك ياعسل

10 الكاتب منى, on 05-12-2008 19:41
هلا سلوفة

خليلي قلبك , فرطت من الضحك على قصيدة , ريتو مية الف عافية و هنا و الله فكرة طيبة كتير الجبنة , رح جربها المرة التانية و مع الحليب اذا الله عطاني عمر

كتير فرحت انها ظبطت معك و عجبت ابو الشباب الله يخليكم لبعض و يباركلكم في بعض :zzz

كلامك مظبوط هلا صايرين محلات الحلويات عم تستعمل طحين بدل السميد , لهيك انا ما بحب الحلويات الجاهزة ابداً , اصوله بالسميد و ممكن الواحد يعمل متل ماماتك , بس مو كله طحين :roll

سمي بالله , و ان شاء الله رح يطلع معك معمول يبل القلب و يرضي الضيوف , و بركي ببعتلك وصفة المربى لان من دون صور ما رح تاخد الوصفة حقها , صح :zzz

11 الكاتب سارونات, on 10-12-2008 21:38
السلام عليكم و رحمة الله و بركاته
اختي منى عندي لحم مفروم كتير يعني اكتر من العادي تقريبا راح يصير لحم للكبة بعتقد فيني استعملو مو هيك

لان لماراح قلبو مع البصل و باقي المقادير راح يصير منيح
بالتوفيق
سلام

12 الكاتب منى, on 11-12-2008 08:15
اكيد بيصير , المهم ان ما يكون لحم هبر كله , لازم يكون فيه شوية صغيرة دهن لحتى يعطيه طعم ,بس كمان مو دهنكتير و الا بينزع الوصفة كلها :roll

13 الكاتب muna.g.7, on 13-12-2008 18:32
الكبه تمام التمام بس حابه اضيف مداخله ممكن اضافة حبتين بطاطس تقطع ارباع وسلق في ماء سلق الرزاو اضافة كوب عدس احمريسلق مع الرز

14 الكاتب منى, on 14-12-2008 05:06
صحيح منونة , و اضافة العدس رح تخليها خفيفة و حلوة

الف شكر الك للاضافة يا عسل

15 الكاتب kuwaiti_girl, on 15-12-2008 06:29
يم يم هالكبه بنساويها كثير وخاصه برمضان ونحنا بنسميها كبه عيش ( عيش= رز)

بس بنضيف شبنت على العجينه مع زرشك منشان الحموضه وحبه بطاطس عشان تساعدنا بالتشكيل

ذكرتيني فيها .. عندي تقريبا كيس من رمضان بقى عندي رح اطلعه على العشا اليوم ان شاء الله

16 الكاتب منى, on 15-12-2008 06:39
هنا و الف عافية مقدماً كوكو , و الف شكر الك للاضافة
هادا الزرشك بحياتي ما دقته , بس اشوفه احيانا في الوصفات الايرانية :zzz

هنا و لااا تنسي تاكلي عني قطعة , اتفقنا

17 الكاتب kuwaiti_girl, on 16-12-2008 07:09
يا حياتي ما طلبتي شي
عطيني عنوانك ورح ابعثلك منه تذوقيه وتذوقين كل احبابك واصحابك وتاخذين فكره عن طعمه

انا احس ان طعمته قريبه الى الكرز المجفف الحامض

نحنا اما بستخدمه مع الرز او بالحشوات مثل كبه الجريش او كبه الربيان وكبه الرز بالشبنت

18 الكاتب منى, on 16-12-2008 07:39
مم , معناها فيه من مزة الحموضة , نفس الفكرة الي احيانا نستخدمها نحنا
نحشي الكبة المقلية مع اللحمة و الصنوبر بفرط الرماان الحامض ..

ممم فرط ريقي من على الصبح

19 الكاتب الدمشقية, on 16-12-2008 11:02
منى حبيبتي باين عليها أكلة لذيذة غن شاء الله بجربها وبقلك شو بصير

20 الكاتب منى, on 16-12-2008 15:26
هلا دمشقية

ان شاء الله تجربيها و تكون على زووءك حبيبتي , مية هلا فيك

21 الكاتب سارونات, on 28-02-2009 20:27
السلام عليكم و رحمة الله و بركاته
اختي منى هل فينا نستغني عن الكركم تماما

ايضا هل ممكن نعوضو بالزعفران شعرة و اذا فينا فمنحط الزعفران بشوية ماء بالاول او عطول منحطو بالماء اللي راح نسلق فيه الرز كمان اذا منحطو بشوية ماء بالاول فهل بيكون الماء بارد او دافئ او ساخن

بالتوفيق
سلام

22 الكاتب منى, on 04-03-2009 17:30
اختي الوصفة بدها كركم مو زعفران , لما تحبي تغيري فيه شي بيكون راجع الك

إذا حابة تستخدمي الزعفرات بتدوبيه بملعقة مي ما بتفرق سخنة او باردة لحتى يدوب و بعدها تستعمليه و الكركم اساسي بالوصفة لان رح يعطيها طعمة خفيسفة طيبة و الاهم هو اللون الي بيشهي

23 الكاتب سارونات, on 06-05-2009 20:44
السلام عليكم و رحمة الله و بركاته

اختي منى انا ساويتها اليوم و حطيتها بالبراد مشان بكرا بدي اسالك هل لازم غطيها بنايلون او ما في داعي و كمان بكرا لما بدي اقليها هل بخليها بالاول تحتى تصير بحرارة الغرفة او على طول من البراد للزيت

ناطرة اجابتك

ربنا يوفقك و يسهل دربك

سلام

24 الكاتب منى, on 06-05-2009 20:47
هلا اختي

الاحسن تغطيها و من البراد على القلي مباشرة و هنا و عافية مقدما

25 الكاتب سارونات, on 08-05-2009 13:29
السلام عليكم و رحمة الله و بركاته

:cry

ما ضبطت معي شكلها طلع حلو بس طلعت
يابسة و ثقيلة هلأ هي هيك بتطلع او شو اما مشكلة اللون فكانت غلطتي لان ما كترت زعفران )) ما عم بعرف اتعامل مع هالزعفران بالمرة بخاف كتير لهيك ما عم يطلع معي اللون ابدا )) اكيد بدي ارجع عيدها مرة تانية لهيك بدي اعرف شو الاخطاء اللي ارتكبتها

بالتوفيق
سلام

26 الكاتب منى, on 08-05-2009 15:54
هلا سارونات

مشان الله مسحي هل الدموع , و الا بقعد ببكي معك :roll

يا ستي بالعكس هي بتطلع خفيفة كتير و مقرمشة و أتوقع المشكلة الي صارت معك مشكلة بالقلي , النار اكيد كانت واطية أو مو حامية لمن قليتي فيها الكبة , النار لازم تكون حامية , الزعفران ما بده شي و حلته بسيطة كتير , بتاخدي الكمية الي بدك اياها و بتدوبيها بشوية مي و نتركها شي عشر دقايق بعدها نضيفها على الوصفة متل ما بدنا :zzz

27 الكاتب سارونات, on 09-05-2009 12:54
السلام عليكم و رحمة الله و بركاته

يخليلي ياكي اختي منى ليكني مسحتهم :zzz

لا و الله ما بعتقد هاي المشكلة لان انا حرصت على ان الزيت يكون كتير ساخن ما عم بعرف شو المشكلة قولك يمكن لان ظلو لفترة طويلة بالبراد يعني شي اربع و عشرين ساعة تحتى قليتهم يمكن هيدا السبب انهم يبسو

كمان بدي اسالك هلأ بعد ما نعجنها كيف بتصير العجينة يعني بيكون الرز مرحي تمام كانه بطاطا مرحية او بتظل فيه قطع صغيرة

بالتوفيق

سلام

28 الكاتب haya, on 30-05-2009 20:03
هلا منى كيفك انا بالصدفة فتحت على الكبة المقلية لأقول النتيجة شو طلعت معي وبالصدفة قرأت عن كبة الرز العراقية هذه يا ستي مثل ما والدتي بتعملها لما بيزيد عندها رز مصري وهي بتحط بيضة معها، وانا بالتالي تعلمتها منها ما بعرف الوالدة من وين تعلمتها بس عند جد كثير لذيذة هالوصفة وذكرتيني اني اعملها لأني كنت ناسيتها بس بدي اجرب اعمل مثل ما قلت استعمل الطحين بدل البيض لأنها كثير بتلزق

29 عزيزتي منى انقذيني
الكاتب عبورة, on 06-09-2009 03:16
اولا يسلم ايديكي على هالوصفة الرائعة

تانيا انقذيني......فيني اعمل كميه واقليها نصف قليه واحطها بالفريز...وانزلها لما بدي استخدمها والا بتخرب

لانو عجبتهم ورايحيين ياكلوني معها...انا اليوم عملت كمية للفطور وقليت مجموعة منها نصف قليه وخبيتها بالبراد للسحور
بس ممكن اعمل كميه ليومين ..تلاتة والا شو؟؟؟

لانو صضار لازم ياكلو كل يوم منها

30 الكاتب منى, on 06-09-2009 15:01
هنا و الف الف عافية يا رب

اكيد فيكي تقليها نص قلية و تشيليها , هلا انا مو مجربة بس نظريا بيصير

31 نداء للأخوات جميعا
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 10-08-2010 12:56
سمعت أن أجود أنواع الكبه التي تعمل من لحم الطيور التي يتم اصطيادها وقالوا لي أنه يتم طحن العصفور بالكامل مع عظمه ويضاف للبرغل.
السؤال هو هل يوجد طريقه لعمل الكبه من لحم الدجاج وبالتحديد من صدور الدجاج؟؟ أرجو ممن لديها الحل أن تسعفني به.

32 الكاتب منى, on 10-08-2010 21:17
:roll

ولي العظم و اللحم , هي اول مرة اسمع هيك شي , و الي بيعيش بيسمع

اكيد فيه و هو انك تحضري عجينة الكبة العادية بس عوض الهبرة استعملي صدر دجاج مشفى و على فكرة هل الطريقة صار كتير عم يحضروها

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 19/01/2009 )