L2ma.com | لقمة طيبة | L2ma.com | لقمة طيبة | مهلبية الرز بالقشطة | الرز, المهلبية, · , حتى, يغلي | L2ma.com

القائمة الرئيسية

الأكثر تصفحاً

مهلبية الرز بالقشطة

الكاتب/ منى

13/06/2007

مهلبية الرز بالقشطة

يمكن كتير منا بيعرفوا يحضروا مهلبية الرز , اغسلي رز و جففيه و بعدها اطحنيه و اطبخيه مع الحليب ..أما في هذه الوصفة رح تعملي العكس , اطبخي الرز مع الحليب و بعدها اطحنيه ,, حتشوفي الفرق بنفسك , حتكون المهلبية طرية ,, يعني هي المهلبية و إلا بلاش ...

اضفت للوصفة علبة قشطة لزيادة غنى الطعم و تستطيعين الاستغناء عنها اذا لم تتوفر

بالصحة و الهنا

3 ليتر حليب سائل
3 فنجان صغير رز مصري
3 فنجان صغير سكر
ماء الزهر
علبة قشطة
direction

·          يوضع الحليب على النار و يترك حتى يغلي .

·          يغسل الرز بالماء البارد جيدا ثم يضاف للحليب و هو يغلي , لا يجب أن ينقع الرز لأننا سنستفيد من النشا الموجود في الرز لتسميك الحليب .

·          بعد اضافة الرز للحليب يترك حتى يغلي مجدداً ثم تهدى النار و يترك لمدة ساعة تقريباً مع التحريك من فترة للثانية بلطف حتى تنتفخ حبات الارز و تنضج , في نهاية المدة سنلاحظ أن المهلبية بدأت تشكل طبقة في قاع الطنجرة و هذا ما سيعطي المهلبية طعمة تشويط خفيفة و لذيذة .

·          يوضع المزيج في خلاط العصير و يهرس تماماً حتى تختفي حبات الرز و الحصول على مزيج متجانس , و يمكن استعمال الخلاط العامودي .

·          ترجع المهلبية للنار ثم يضاف السكر و القشطة و تحرك المهلبية حتى يذوب السكر , يبعد القدر عن النار و يضاف ماء الزهر حسب الذوق .

·          تصب المهلبية في صحون صغيرة و توضع في البراد حتى وقت التقديم .

أضافة إلى المفضلة (1) |

أقتباس | مشاهدات : 6092

تعليقات (14)

1 الكاتب linda, on 14-06-2007 22:33
انا كتير بحبا لهل الاكلة
و ضروري ضروري ساويها
بهل اليومين ان شالله لانو رح يجيني ضيوف
ان شا لله تزبط معي و تبيض وجهي قدام الناس

2 الكاتب منى, on 14-06-2007 21:32
ان شاء الله رح تبيض وجهك ادام الضيوف

ابقي خبريني شو بيصير معك أختي إذا الله راد

3 الكاتب ام نور, on 26-10-2007 19:58
سلام عليكم
زمان ما علقةعلى هالاكلات الحلوة بسبب ضيق الوقت بس كل يوم لما افتح النات بفوت بشوف شو في جديدالله يخليكي اخت منى كلك زوء .
بدي اسألك هلىء هالوصفة ممكن نسميا رز بحليب او هيداك غير طريقة والمهلبية انا بعملا بنشا اكيد في فرق بينا وبين الرز مهاك

انشالله تكون وصلت فكرتي

4 الكاتب منى, on 27-10-2007 11:07
هلا ام نور

نور الموقع بردك الحلو و تواجدك الطيب اختي ..

ام نور الرز بحليب غير شي , منطبخ الرز مع الحليب بمعدل فنجان قهوة لكل ليتر حليب ..
بس ما غلى الحليب منطب الرز المغسول من دون نقع فوق الحليب و منخليه يغلي لحتى تستوي حبة الرز من دون ما تنهمس
و كمان ما منحرك كتير لحتى ما تتكسر حبات الرز و بعد ما بيستوي نضيف السكر على الزوء و منخليه يغلي تقريبا 5 دقايق مو أكتر لحتى ما يتغير لون الرز بحليب
منبعده عن المار و نضيف ماء الزهر ..

المهلية العادية بتنطبخ بنشا , و بتطلع طيبة كتير , بس انا بحب هل المهلبية أكتر
هيك بتكون طرية و غير عن مهلبية النشا
ما فيني اشرح الفرق بالطعم بس في فرق , و إذا بتحبي جربي ليتر واحد و احكمي بنفسك

على فكرة انا هل المهلبية بيطلبوها مني كتير ناس بالتحديد لما بيجوا لعندي , حتى صار اسمها بين القرايبين مهلبية منى

5 الكاتب سارونات, on 25-09-2008 16:51
السلام عليكم و رحمة الله و بركاته
جازاك الله خيرا اختي منى على الوصفة و ان شاء الله راح جربا بس قليلي الكمية اللي ساويتيها لكم شخص
و الرز بحليب كمان بدي ساويه فشكرا على شرح الطريقة و شكرا لاختي ام نور على طرح السؤال
سلام

6 الكاتب منى, on 25-09-2008 22:32
هلا سارونات

الكمية لـ 12 شخص من الضيوف أو 6 من أهل البيت لأن أهل البت أكيد ما رح يكفيهم واحد و رح ياكلوا التاني و الله يستر مو التالت :grin

, الصراحة انا حتى ضيوفي بياخدوا منها أكتر من صحن و هادا الطبق الرسمي الي بينطلب مني في العيد

طريقة الرز بحليب موجودة بالتفصيل على هل الرابطمع الصورة

7 الكاتب سارونات, on 29-09-2008 00:59
السلام عليكم و رحمة الله و بركاته
هنا و عافية على قلوبكم كلكم و ان شاء الله تكتر الطلبات الرسمية كمان و كمان
ستتم التجربة و ببقى خبرك بالنتيجة
اختي منى بدي اطلب منك ازا في وصفات متل المهلبية و الرز بلبن و كمان وصفات تانية تقدم في اطباق فردية و تكون ساخنة بما الجو كل مانو عم يبرد
الله يجازيك كل خير و يجعله في ميزان حسناتك على كل اللي عم تعلميني ياه
بالتوفيق
سلام

8 الكاتب منى, on 29-09-2008 06:37
من عيوني اختي بس هل الوصغات كلها بتتقدم باردة , ألف شكر على الدعوات و الك متلهن يا حق

9 الكاتب روح الجمان, on 05-05-2009 19:34
أكلة كتير طيبة حبيبتي في الله ..
طيب عندي فكرة .. :grin

لأني أحب كثير أخترع وأضيف أشياء غريبة والحمد لله غالبا تنجح .. وراثة :grin

ممكن لما بنضيف السكر والقشطة ونرفع الطنجرة على النار مرة ثانية نضيف :

- كاكاو أو شيكولا ونقلب لحتى تمتزج وأفضل لو نقسم المهلبية لقسمين على طنجرتين ونقلب الشيكولا بواحدة والثانية نتركها بيضا ، وعند الغرف نضع قليل من المهلبية الشيكولا ثم البيضا ثم نضع تزيين للوجه بالمهلبية الشيكولا ..

شو رأيك ؟

- وممكن نضيف ما أدري الأفضل عند وضع القشطة والسكر او عند خفق المهلبية بالخلاط نضع بودرة جيلي فراولة أو مشمش أو :grin

بودرة الآيس كريم كراميل أو فستق أو مشمش أو فراولة ونقلب
وممكن نقسم المهلبية على طناجر بحيث نحصل على عدة ألوان ومزاقات وعند الغرف نضع قليل من كل لون بطريقة جذابة في أواني شفافة مثل التي بالصورة ويزين بصوص الشيكولا أو التوفي

امممممممم شو رأيك ..

أنا جربت ما سبق من قبل على أطباق الأرز باللبن وطلعت جد شهية وجنونية ولذيذة
:grin

10 الكاتب منى, on 07-05-2009 11:36
مممم جمان افكار بتاخد العقل لازم اكتبها و احفظها عندي , كل فكرة احلى من التانية , اتخيل الالوان و الأطفال شو رح يصير بحالتهم النفسية :grin

الفكرة الي صارت براسي و رح نفذها ان شاء الله هي المهلبية مع الشوكولا و الجيلو و التوفي , الوان تحفة و شي بيشهي

سلم دياتك جمان على هل الافكار , ردك أأغنى الوصفة

11 الكاتب ام سيمى, on 30-10-2009 10:30
السلام عليكم
وهذه ايضا تجربة ناجحةلي من موقعك جزاك الله خيرا
عندي لك سؤال ما هي القشطة التي اضفتيها
انا جربتها امس واولادي احبوها الحمدلله
انا اضفت علبة من الكريم السائل هذا الكريم هو الذي اجهز به القشطة
ولك جزيل الشكر

12 الكاتب na3oom, on 02-02-2010 08:54
يسلمو إيدك
أهم شي انها عجبت بنوتي إللي معزبتني بالأكل وصارت تاكل صحن لما ترجع من المدرسة
طبعا بني أنا وزوجي دائما في مسألة السكر أنا الأكل عندي سكرو زيادة وهو سكر قليل

13 الكاتب منى, on 02-02-2010 10:26
هلا ام سيمى

صحتين و الف الف هنا و عافية يا رب , كتير انبسطت انها عجبتهن و عجبتك

اختي القشطة الي استعملتها هي القشطة المعلبة و فيك تستعملي الكريم السائل اكيد , الي متوفر عندك :zzz

14 الكاتب منى, on 02-02-2010 10:34
هلا نعوم

الله يسلمك و الف هنا و صحة يا رب كتير انبسطت انها عجبتك و انتي متل حكايتي بالسكر , انا ما كتير صحبة مع الحلو و بقية العيلة عكسي :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 25/09/2008 )

< السابق		التالى >

[ عودة ]