سلطة اليوم هي نسخة الخريف عن سلطتي الفواكة و بحضرها لما بتكون نازلة اكتر خضرة مفضلة عندي و الd هي المنجا أو الخرما او ما بعرف شو اسمها  الحقيقي , المهم انها شي اورانجي قلبها طري و حلو و وقتها بالخريف و ريحتها و لونها بيذكروك بشهر ايلول ... و هي اطيب فاكهة عندي , بوقتها بفطر منها و باكل قطعة بعد الغدا و بتعشى منها , عن جد شغلة نفيسة بس عمرها قليل , متل كتير اشيا حلوة بحياتنا .

من فترة كنا عند امل و اكلت عندها سلطة فواكة و كان حاطة معها عصير رمان عواض عصير البرتقال أو الأناناس , عجبتني الفكرة كتير و خصوصي انو الاناناسات كان صاير لونهم فوشي و اول ما شفتهم قلت الها لاية انو هل الاناناس ما بيصير هيك لونه الا  اذا كان منقوع بمرقة مخلل اللفت   ,  جربته مع سلطتي و كان خيلة , و ما دام عم حضر السلطة الي و  لملذاتي الشخصية فبفضل ما حط الها معلبات , بس وقت الضيوف بلغي البرتقال و بحط عواضه اناناس ..

بالصحة و الهنا

4 حبة منجا , مقشرة و مقطعة
2 حبة تفاح أحمر , مقطعة
2 حبة برتقال أو علبة أناناس , مقطع
3 – 4 موز , مقطع شرائح
2 حبة كبيرة رمان حلو , مفروط
1 – 2 حبة كبيرة رمان حلو , معصور
سكر أو عسل حسب الرغبة
2 – 3 ملعقة كبيرة عصير ليمون

تعليقات (18)

1  الكاتب أم نوران, on 22-11-2011 22:37 يسلمو ايديكي منوش ..انا كمان كتير بحب هالسلطو خصوصا بوقت الرمان يا سلااام بس دايما بحطلا برتقان وفكرة كويسة الاناناس راح جربها ان شاء الله ..انا اوقات برش عليهن شوية سكر بني و شويية مي و بحطن بالبراد و بيطالعو مي يعني ما بحطلن لا عصير و لا شي .. شكرا على الوصفة

4  الكاتب منى, on 23-11-2011 10:51 هلا ام نوران   ان شاء الله تجربي عصير الرمان معها و تحبيه , كان كتير طيب و اشتهيت الحبايب ..     حبيت فكرة السكر البني كتير ,كراميل من دون توفي , بس يا ترى كيف بيطلع اللون

5  الكاتب منى, on 23-11-2011 18:13 هلا فروحة   من زووءك حبيبتي و انت وصفاتك كمان ما شاء الله اول ما الواحد بيعملها بيصير ادمااان معه     يمكن الطريقة الي زكرتها متل هلالوصفة ؟    حبيت كمان فكرة البوظة , يممم , ان شاء الله رح جربها باول ما يصير وقتها مناسب

6  الكاتب منى, on 23-11-2011 18:31 هلا ام نبيل   ياااي عن جد معجزة من رب العالمين , في انواع فواكهة بيحتار الواحد كيف يوصفهم و الرمان و الزيتون من بيناتهم    شو اسمها للمنجا عندكم ؟    الله يسلمك و يخليك و يديم علينا نعم رب العالمين و يعرفنا اياها بدومها و يقدرنا نشكرها متل ما بيحب رب العالمين

7  الكاتب غيث, on 23-11-2011 23:25 سلامة منوش الله يسلم ايديك يا حق يا ستي الرمان ملك وكل شي فيه رمان رائع ما في شك بدي اقلك اسم المانغا هنا بالسعودية بيكتبو عليها كاكااما المانغا اليمني وغيرو فهي المانغا الحقيقية غير الكاكا اللي نحن السوريين نسميها مانغا بالخطـأشكرا منى لكل جديد

10  الكاتب لارا مينا, on 27-11-2011 10:21 أحلى شيء بالدنيا سلطة الفواكه  وأكثر تعليق عجبني تعليق جوجو,  السلطة وين ماحطتيها بتبيض الوجه,      وعندنا الفاكهة مشهورة باسم كاكا ,أما المانجا  فهي المنجة أو المانجو المعروفة ببذرتها الكبيرة ,    والكاكا عادة نجيب كرتون في الصباح , الساعة 7 المساء مابيكون له أي أثر , كنز مابيتفوت...     و عصير الرمان فكرة جديدة ومميزة ,وفيه حاجة دايما بسمعها, إن الناس الكبار في السن يقولوا للشخص لما ياكل رمان إنه ياكلها لوحده وما يخلي أحد يشاركه فيهالأن بداخلها حبة من الجنة والله وحده أعلم.    وبتلاقي الواحد فينا ماسك رمانته وصحنه بالأحضان  وبيكون يوم أغبر لو أي أحد طلب يشاركه فيها

11  الكاتب منى, on 27-11-2011 18:41 هلا غيوثة   بتذكر اول مرة قلتلها لوحدة من رفقاتي انو اسمها كاكا انو رح تاكلني بلا ملح و اكيد اني غلطانة     شكرا غيوثة للتوضيح و شكرا الك للتواجد الدائم و الدافئ و الصادق

13  الكاتب منى, on 29-11-2011 11:39 هلا مرمور   عوافي و الف صحة يا رب على كل شي جربتيه و ان شاء الله بيعجبوكي بقية الوصفات الي حاطة عينك عليها

14  الكاتب منى, on 29-11-2011 11:54 و الله جوجو صح , ماااااشي و على الاربع و عشرين كمان     ان شاء الله تعجبك هل الطريقة و بتمنى اسمع منك اذا جربتيها

15  الكاتب منى, on 29-11-2011 15:15 هلا لاروش   نفس الكلمة الي كانو يقولولنا ياها , لهيك بتلاقيني لما كنت صغيرة افحصن حبة حبة ايا واحدة يا ترى من الجنة     هلا نحنا منسميها منجا , منعرف انو مو اسمها الحقيقي بس هادا الدارج و مؤخرا صاروا الناس عم يسموا الاشيا باسماءها     المهم اتمنى تجربيها و ان شاء الله بتكون على زوءك

16  الكاتب منى, on 29-11-2011 21:12 هلا نوشين   انا ما بحبها لينة ابدا , بحبها يا دوب مستوية و سبحان الله الدني ازواء بس منيح انها بتجي على زوءك و بسعر منيح

18  الكاتب منى, on 21-12-2011 07:41 الف هنا و الف صحة على قلبك و قلبو لابو الشباب , و العسل مع عصير الرمان عم يعملو طعمة طيبة هون     شكرا الك لان جربتي الوصفة و شكرا على ثقتك في

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved