هي الوصفة من الوصفات الي اتعذبت بصورتها كتيررر , هي تالت صيفية بحضرها و ما بقدر نزلها لان صورتها مو عاجبتني , بتكون هيك مشقرقة على الحقيقة و بتطلع باهتة بالصورة , بس اليوم لما حضرتها كنت مقررة انو رح نزلها لو شو ما كانت الصورة , و هي هي الصورة الي طلعت معي , ما الي رضيانة عنها ابدا  لان الوصفة كتير اشهى من هيك

كتير طيبة و خفيفة و نعنوشة و انا هل الوصفة بحبها اكتر من المتبل لان بحسها باردة و فيكي تاكليها بالخبزة او بالمعلقة و انا كنت محضرة معها خبز بيدا التركي . و ما بتتخيلي الفليفلة المشوية طعمتها ادي طيبة و مختلفة , يمممم .

عم استعمل اللبن البقري , و مع اني من 3 شهور كنت ما حبه ابدا , هلا صايرة ما عم حب لبن الغنم لان على الاغلب عم يكون حامض كتير و عم تطغى طعمته على باقي المكونات , لهيك للارمان بلبن او الشاكرية و اللبنية عم استعمل  لبن غنم و الباقي كله لبن بقر , و هادا اكيد راي شخصي , انت فيك تستعملي الي بتحبيه . عم جفف اللبن شوي لان ما بحب السلطة تكون مريقة , بحبها يكون الها قوام . و كمية اللبن تقريبة , فيكي تزيدي او تنقصي حسب الحاجة .

بالصحة و الهنا

4 حبة متوسطة باذنجان , مشوي
2 حبة فليفلة خضراء كبيرة , من النوع السميك
كوب لبن
فص ثوم مدقوق
ربع كوب جوز , مفروم
ملعقة كبيرة بقدونس مفروم , اختياري

تعليقات (12)

1  الكاتب Rasha33, on 30-10-2011 22:16 كتير شكلها طيبة والصورة حلوة والريحة ع شوي ح شمها منها  انا بحب البيتنجان يكون مشوي عالفحم بس رح جربها هلق بالفرن لانو موسم الشوي راح  تسلم ايديكي يا ميمي

2  الكاتب منى, on 30-10-2011 22:25 الله يسلمك رشوشة , ان شاء الله تجربيها و تحبيها     انا مو حابة الصورة و هلا حاطة براسي انو بكرة رح ارجع حضرها و جرب لشوف

3  الكاتب ام نبيل, on 31-10-2011 12:35 مممممممممممممممم تسلم ايدك ان شاء الله اليوم رح اعملها عنجد حاسة طعمتها بتمي   الله الله شو هالابداع وما في حكي على الصورة ابدا من الصورة حسيت الاكلة طيبة انا مهوسة تصوير ومعروفة بالعيلة بس مو متل ابداعك بالتصوير  وبالنسبة لللبن انا رأي متل رأيك بالظبط وهيك بعمل  رح قوم اعملها وبقلك النتيجة كيف رح تطلع

4  الكاتب ام نبيل, on 31-10-2011 16:08 طلعت السلطة طيبة كتير نعومة الباذنجان والفليفلة وقرمشة الجوز وطعمة البقدونس الفريش ممممم  ما حسنت افرمها ناعمة كتير ولذلك حطيتها بالفود بروسسر وطلعت ممتازة   وزوجي حس اني بدها طحينة فعملت شوي بطحينة طبعا طلعت تقريبا متل المتبل بس كمان طيبة  تسلم ايدك والله يعطيك العافية

6  الكاتب منى, on 01-11-2011 20:40 صحتين و الف هنا ام نبيل , كتيررررر انبسطت انك جربتيها بهل السرعة , بتعرفي بعد ما قرات ردك قمت جربت شوي بالطحينة     التنتين طيبين بس حبيتها باللبن اكتر لام حسيتها اخف و هي ببتاكل بالمعلقة و بتبرد القلب     و انا كمان بحب كتيرر التصوير ’و بالاخير بطلع مصورة شي 50 صورة للعيلة و انا ما الي و لا صورة   اذا بتحبي تصوري الاكل فاهم نصيحة انو تكون الاضاءة طبيعية و يكون الطبق بينك و بين مصدر الضوء و بس

7  الكاتب منى, on 01-11-2011 20:58 حبيبة قلبي ورد , شكرا كتير لردك المزوء و الله اتمنى انو اجتمع بكل الاخوات هون واحدة واحدة , و نكون رفقة بالحقيقة متل مو نحنا هون     الله يسلمك و يخليك لعيلتك و يبارك بوقتك و صحتك

8  الكاتب ام نبيل, on 02-11-2011 11:44 صحتين وهنا على قلب   انا هيك يابجرب الشغلة بسرعة او بتروح علي والله بيعلم ايمت رح تجي الهمة واجربها  وشكرا كتير على النصائح التصويرية الحلوةبس الصراحة قليل ما صور الاكل واكتر شي بصور اذا كانت سفرة معتبرة او صحن فواكة لان ما في احلى من الفواكة والوانها  وانا بختلف عنك بالنسبة لعدد الصور لاني بحب اصور واتصور يعني بهلك ابو نبيل وانا بقلو وقف هون اصورك وبعدين صورني وبالآخر بيطلعو صوري اكتر

9  الكاتب منى, on 02-11-2011 19:43 ان شاء الله دوما همتك عالية   انا بحب كتير صور الاكل و حتى لما بكون معزومة على الزيارات بتمنى تكون كاميرتي معي و صور , بس بعدها بقول كبري عقلك يا بنت     بالهنا حبيبتي و الله يخليلك ابو الشباب و يخليك اله

11  الكاتب منى, on 18-12-2011 12:40 هلا فيك اختي   هو اللبن الزبادي او الروب     بانتظار تجربتك و رايك

12  الكاتب لامي, on 19-12-2011 13:11 ان شاء الله و الله كل الي جربتن من الموقع حبيتن و ما خيبني و لا مرة شكرا كثير ست منى ع الوصفات

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved