وصفة قديمة و تراثية من المطبخ الشامي و التركي كمان , و واحدة من وصفات الصيف المفضلة عندي , لان خفيفة و سريعة و معها لبن عيران بارد بتنعنش القلب ..

اسمها غريب و اصله انه يهود الشام  كانوا يسموها ( مسلم هربان ) و لما دريوا المسلمين  قالوا يا باطل و ردوا عليهم بان صاروا يسموها يهودي مسافر  , و انا حابة الفت انتباهكم لهل الوصفة الطيبة و غير هيك ما كنت جبت اسمهم لليهود هون  .

الوصفة نفسها بتتحضر في المطبخ التركي و الشامي و الفرق الوحيد انو في المطبخ التركي بيضيفوا للوصفة بعد ما تخلص و تفتر بقدونس مفروم , انا اذا في عندي بضيف و اذا ما في عادي و بالطريقتين الطعمة طيبة و كل واحدة الها نكهة مختلفة غير التانية . و كمان ممكن تحضري الوصفة باللحمة , بتقلي البصل مع اللحمة و بعدها بتضيفي البندورة و بس ما استوت اللحمة بتضيفي البرغل و بتخليه لحتى يستوي .. بس انا بحبها نباتية لان سهلة و سريعة و بنص ساعة بتكون صارت على السفرة و بصورة عامة بالصيف بحب الوصفات النباتية اكتر .

بالصحة و الهنا

4 – 6 ملعقة كبيرة زيت زيتون
2 ملعقة كبيرة صنوبر
2 حبة متوسطة باذنجان , مقطع مكعبات
2 كوب برغل خشن
1 حبة كبيرة بصل , مفروم ناعماً
1 حبة كبيرة فليفلة حمراء , مفرومة ناعما
4 حبة كبيرة بندورة , مقشرة و مفرومة
نصف ملعقة صغيرة ملح
نصف ملعقة صغيرة فليفلة حمراء ناعمة
ربع ملعقة صغيرة بهار
رشة قرفة
4 كوب مرق  أو ماء

تعليقات (18)

2  الكاتب غيث, on 25-10-2011 22:07 يعطيك العافية منى كانو اكلتك قريبة من البرغل ببندورة بس مع اضافة خضار باذنجان ةفليفلة ما هيك او قريبة منها الله يسلم دياتك انا زوجي ولهان بالبرغل بالبندورةاكيد ساجربها قريبا جدا صحيح جربت كم اكلة من اكلات الباتنجان روعة بس رح تضحكي لاني ما حفظت اسمهم لاسجلك ياهم لسى بس اخذ لساني عليهم بسجلهم بس جربت كم اكلة والله روعة كلو طيب هلق ما بدي ارجع لاطالع اسمهم من الموقع عذرا مستعجلة شوية عموما جزاك الله خيرا على تعبك وطيبة قلبك واخلاصك بالمعلومات معنا

4  الكاتب ام نبيل, on 26-10-2011 10:37 تسلم ايدك  انا كتير بحب اكلات البرغل بحس انه مفيد وتغيير شكل عن الرز مع اغلب الاكلات  وان شاء الله رح جربها بهاليومين عنجد عبتخليني اتحمس على الفوتة عالمطبخ بس لو قالولي على الموقع اول ما اتزوجت احسن ما قعدت الحق امي بالورقة والقلم واطلب منها كل الطبخات بمقادير دقيقة وهي طبعا خبرة ما بتشتغل على المقادير وكلو على النظر واللي بزعلني اكتر اني بعرفك (طبعا انا زعلانة لأني ما قالولي على الموقع مو لاني بعرفك والله صرعت العالم هون اني بعرفك )  ولو كنت بحلب كنت شفتك الاربعاء الماضي بس للأسف مالي نصيب cry

5  الكاتب ريم ز, on 26-10-2011 16:51 ياستي وانا كمان بقول اجت بوقتها  من يومين شفت مطربان البرغل بالخزانة وزورني  قلت لازم اعملي شي اكلة برغل  وهلق اجت هالوصفة بمحلها انشالله هاليومين بجربها

7  الكاتب farah, on 26-10-2011 23:35 يا عزيزتي طلعت الاكلة روووعة عن جد كتير لذيذة وخفيفة بالذات لما تاكليها مع اللبن والمخلل   على فكرة انا بس ضفتلها سمنة طيبة بالآخر عطت البرغل طعمة يممممممم يسلم ايديكي ياحلوة   على فكرة بلش مسلسل الباتنجان عندي عبيت البراد وعم اعمل كل كم يوم اكلة يخليلي ياكي على هالاكلات الطيبة

8  الكاتب منى, on 29-10-2011 15:20 هلا جوجو   ايه 6 بتنجانات بيطلعوا كمية مع هل الوصفة     شكرا كتير لصداقتك الي اتمنى انها تكون دائمة و الف الف صحة على كل شي جربتيه

9  الكاتب منى, on 29-10-2011 19:02 هلا غيوثة   اي تقريبا نفس الفكرة بس الطريقة بس هل الكم فرق رح يغيروا الطعمة     الله يعافي قلبك و بدنك و الف الف صحة و هنا و عافية على كل شي جربتيه , و لا يهمك حبيتي لما بتفضي تبقى ارجعي و اكتبي شو جربتي لحتى تشجعي بقية الصبايا

10  الكاتب منى, on 29-10-2011 20:55 هلا نسرين   تكرم عيونك نسرين , ان شاء الله بنزل وصفته قريب اذا رب العالمين يسر

11  الكاتب منى, on 30-10-2011 20:48 هلا ام نبيل   الله يسلمك يا قمر , ان شاء الله تجربيها و تحبيها و تكون على زووءك و ان شاء الله دوما همتك عالية و نشاطك تمام على فوتة المطبخ     انا متلك , دوما كنت حاول لاقي مقادير مظبوطة و كله يقلي على النظر و قلهن يا جماعة و الله لسى ما في نظر     اممممممممم , ايا اربعاء و نحنا كيف منعرف بعض شخصي انو شوي مضيعة انا كاني ..

13  الكاتب منى, on 31-10-2011 12:09 صحتين و الف الف هنا حبيبة قلبي , لا عادي لان صاروا كتار و منهم بيشبهوا بعضهم     شكرا لتجربتك وصفاتي و الف هنا مرة تانية

14  الكاتب ام نبيل, on 31-10-2011 12:22 والله كل ما بحتار بطبخة بفكر بهي الاكلة بس زوجي العزيز مو صحبة لامع الباذنجان ولا مع البرغل ولذلك شكلي لما بدي اعملها رح اعمل طبختين   الصراحة اكيد شايفين بعض في احتمالين عند هبة او نور اخواتي  بس لفرق العمر والغربة انا ما بذكر كتير وعالأغلب انت كمان مو مشكلة بأول اجازة على حلب رح شوفك باذن الله   الله يحميك ويعطيك العافية على كل الاكلات الرائعة

15  الكاتب منى, on 31-10-2011 16:01 عن جد هبة و نور خواتك   يا ستي اطيب اكل باكله عند خواتك و عندهن ما بقدر فوت اكلة , كله لازم دوقه و كله بيجنن , تسلم ايدهن و ايدين ماماتك     انبسطت كتير انك اختهن , خلص اكيد لما بترجعي منشوف بعض     بوسات

18  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-02-2012 09:28 شلونج منى حبيبتي مشتاااااقه كثير        ادري تاخرت جدا بالمشاركه بس التواجد ما قل ولله الحمد    مع بدايه السنه قررت اني ابتدي ادخل بنظامي الغذائي جميع الاكل اللي كنت كارهته وانا صغيره او اعتقد اني ما احبه  البادنجان منهم    ما شاء الله تبارك الله شكل الوصفه عجبني وان شاء اله بطبقها قريب بس اشتري المكونات اللي ناقصتني      احب وصفاتج جدا  الله لا يحرمنا منج ولا من وصفاتج والله يحفظ سوريا بحفظه وبعينه اللي ما تنام

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved