الناس هلا بديانة تنتبه على اكلها , و كتير عم يحاولوا يخففوا من المعلبات و هل القصص ..الحمد لله انا من اول دقيقة بحاول قدر الامكان انو كلو يكون شغل ايدي , على اد ما بقدر او بعرف .
و اذا كنت بشتري اشيا جاهزة , ففي اشيا ما بشتريها لو بدي موت من الجوع .. متل صلصات السلطة الجاهزة , البيستو , الفلفل الاحمر المشوي و هل النوعية من المرطبانات .. ما بتقبل فكرة اني تبل سلطتي بصوص محضر من 6 شهور في بلاد الفرنجة , الله لا يعيزنا و لا يروينا
صلصة الرانش واحدة من الصوصات الجاهزة الي بتلبق مع كل نوع سلطة بيخطر ببالك و هل الوصفة رح تعطيكي صوص طيب كتير و قريب على الصوص الجاهز, و انا بشوفه اطيب من الجاهز . معه تشكيلة خضرة و فطر فريش و كل هل التوليفة مع بعضها رح تعطيكي سلطة بتاخد العقل و كل ما بحضرها بتكون اول طبق بيخلص على السفرة , الحمد لله اولادي مغرمين بالسلطة طالعين الي و ابو الشباب كمان مغرم بالسلطة , انعدى مني.
لما بيكون البقدونس بوقته بتصير طعمته طيبة كتير و مميزة , بس بهل الوقت من السنة بضيف لنفس الوصفة ملعقة كبيرة منه مفروم ناعم كتير , و في حال ما كان عندي كريم فريش ببدله بنص كاسة لبن بقري , كمان بيطلع يمممم . بحط لبن على قماشة بيضا على مصفاية لمدة ساعة و هل اللبن المنشف استعمله عواض الكريم , صاير بين اللبن و اللبنة ..
بالصحة و الهنا
نصف حبة خس , مقطعة باليد لقطع كبيرة باقة جرجير , مقطع حفنة زعتر أخضر أو نعناع أخضر طازج , مقطف 6 – 8 حبة فطر طازج , مقطع شرائح
صلصة الرانش :
نصف كوب كريم فريش ( يمكن استبداله بنصف كوب لبن بقري ) نصف كوب مايونيز 1 ملعقة كبيرة خل 1 – 2 ملعقة كبيرة عصير ليمون 1 فص ثوم صغير , مهروس ربع حبة صغيرة بصل , مفرومة ناعماً جداً أو مبشورة , حوالي ملعقة كبيرة ملعقة كبيرة شبت , مفروم ناعماً ملح رشة فلفل أبيض
·تخلط مقادير الصوص في مرطبان و تترك جانباً لمدة ساعة حتى تتمازج النكهات .
·يوزع الخس و الجرجير و الزعتر الاخضر او النعناع في طبق , توزع شرائح الفطر و الصوص و تقدم .
تعليقات (4)
