من اكتر الاشيا الي اتعلمتها و الي كانت مثيرة بالنسبة الي هو الخل , صح انو كل الستات الكبارية بيعملو خل , بس و لا واحدة فيهم عطتني طريقة تمامو بالألم نشرح ,و هيك ضعت و ما اتشجعت اني حضره .. مع اني بعرف انو كل الخل الي في السوق عبارة عن مي و حمض الخليك الي هو مادة كيماوية و هل الخل ما اله ايا علاقة بالخل الي وصانا الرسول عليه الصلاة و السلام , و الي في اله كتير استطبابات , بالعكس كله اضرار و بيسبب قرحة في المعدة و بلاوي ما بيعرف فيها غير رب العالمين ...
بس لما نزلت سهى طريقتها في خل العنب من حوالي السنتين , اتعلمته منها و بعدها صار عندي الفهم المناسب لطريقة تحضير الخل . بعملية حسابية بسيطة ضرب الطرفين بالوسطين .... عفوا قصدي بعملية تفكيرية بسيطة قلت اكيد انو الية الخل نفسها في كل انواع الفواكهة من دون اختلاف و هيك جربت خل التفاح و كان رائع , بعدها جربت تخليل غير انواع فواكهة , تقريبا كتير انواع من فاكهة الصيف خللتها , و النتائج لسى ما ظهرت معي ... لسى ما مر الوقت المناسب لافتح المراطبين و شوف شو طلع معي ..
المهم , خبرتني عمتي نهى انو الخل ما بينجح مع كل الستات , لازم تكوني مصفية النية انتي و عم تحضريه و كمان بس ما نجح معك مرة ما بيعود بيصير يمر سنة من دون ما تحضريه و الا بيحرد و ما بيعود ينجح .. هلا سواء هل القصة صح او غلط , هيك حبيتها و حسيت فيها حميمية و الحمد لله نجح معي و الله يديم الصحة و العافية و الرزق الحلال و ابقى حضره كل سنة ..
منجيب التفاحات و مو ضروري يكونوا احسن نوعية , منفسمهم قطع صغيرة , انا هون مقسمتهم ارباع بس اتعذبت بتصفيتهم و لما قطعتهم قطع صغيرة كان اسهل بكتير
منرنبهن بمرطبان و نحنا عم نصفهم منضغط حتى يتكبسوا على بعض بعدها منحط لكل مرطبان من الحجم الطالع بالصورة حوالي معلقة خل قديم و هادا اسمه "الاماية " و اذا ما عندك خل قديم بيمشي الحال و انا مجربة الطريقتين . بعدها منغطيه منيح , هلا هي طريقة سهلة لهون , بس بعدها لما رح تصفي الخل رح ياخد معك وقت في معسه و رح يطلع الخل سميك شوي , بس الطعم بيجنن . الطريقة التانية انك تستعملي ماكينة فرم اللحمة , انا هل الطريقة تعبتني كتير , يمكن لان كانوا تفاحاتي قاسيات و انهد كتفي و انا عم كبس , يعني التوبة ما بقى عيدها . اسهل طريقة هي بعصارة الجزر , بيخلص التفاح بسرعة و يسر , طبعا ما منرمي التفل لان فيه القشرة و الاعواد و هدول لازمين للتخليل , منحطهم في المرطبان مع العصير و بعدها بس يجهز بيصير تصفيته كتير سهلة و قوامه سائل .
اخر شي خل العنب اسهل من خل التفاح و فيه بركة , خل التفاح شوي عصره اصعب و ما بيعطي كمية متل خل العنب . بس خل التفاح فيه منافع و فوائد اكتر
الحمد لله الذي علمنيه من غير حول مني و لا قوة و ان شاء الله تجربيه و يظبط معك تمام التمام و لا تنسي تسمي بالرحمن قبل ما تبدي .
بالصحة و الهنا
تفاح ( الكمية حسب الرغبة )
·تغسل حبات التفاح جيداًو تترك حتى تجف تماماً , تقطع الحبات لقطع صغيرة من دون تقشيرها أو نزع بذرها ثم ترتب بمرطبانات كبيرة جافة مع بذورها و اعوادها بحيث تملئ المرطبان بشكل كامل . يمكن أن تفرم قطع التفاح على ماكينة فرم اللحمة او بعصارة الجزر حسب المتوفر لديك .
·تغلق المرطبانات بشكل محكم و يكتب تاريخ اليوم عليه و لا يفتح أبدا قبل مرور 41 يوم .
·بعد مرور 41 يوم يفتح المرطبان و تهرس القطع باليد ثم يصب المزيج على مصفاية ناعمة مغطاة بشاش نظيف , يترك حتى يصف ثم يكبس بلطف لاستخلاص باقي الخل .
·يعبئ الخل في قناني بلورية و يغطى الوجه بالقليل من الزيت و يفضل حفظه في البراد او في اي مكان بارد .
أفكار : - يمكن ترك الخل اكثر من 41 يوم و ليس بالضرورة فتحه في اليوم 41 و لكن لا يفتح ابدا قبل مرور 41 يوم . انا افتح اول مرطبان و اصفيه و استهلكه ثم افتح المرطبان الثاني , و هكذا . - أفضل و اسهل خل ستحصلين عليه في حالة استعمال عصارة الجزر لعصر التفاح .
تعليقات (20)
