L2ma.com | لقمة طيبة | L2ma.com | لقمة طيبة | كب كيك الخمس دقايق | على, كوب, نصف, ملعقة, كيك | L2ma.com

القائمة الرئيسية

الأكثر تصفحاً

كب كيك الخمس دقايق

الكاتب/ منى

13/03/2011

يعني لسا ما لقفتها بس على وشك ..

أخدناها للمسكينة لعند الدكتور , و كانت القصة على اساس قسطرة , شغلة بسيطة , بس بعدها طلعت الشغلة معقدة كتير و بدها فتح و تغيير شبكة , و ما منعرف شو رح يصير معها , ااايه

عم احكي عن خفاقتي الكاتو , الله وكيلكن كرهت شغل الحلو على ايديها , بتكون شغالة متل الصلاة على النبي , فجاة بتصير تعن , قام شو قال الدكتور , قصدي المصلح , قال انو عم نخفق عليها كمية كبيرة , قلتله و الله يا اخي كل عياراتي كاستين او ااقل , بنظرة تانية و متفحصة , الحقها بنظرة العارف ببواطن الامور , قالي طيب معناها اما بدك تكبيها و خليني جرب فيها او اذا متمسكة فيها اتركيها , قلتله لا خليها عندك , يا بكبها و برتاح يا بتصير خلق و عالم , ترى انا ما معي مزح ابدا ....

و بعد ما كانوا الجيران يتعزلوا بروايح كاتوياتي , اعلنا القحط العام . قالي ابو الشباب اي الغزالة بتغزل على عود , طبعا احمروا داناتي و كنت رح رد , بس بعدها قلت اي عن جد , خليني حضر كيك من دون خفق , لشوف شو بيطلع معي . و الي طلع شي بيجنن . سهل كتير لحتى بنتي الصغيرة صار حضرت الوصفة اكتر من مرة لحالها و الطعمة طيبة كتير و هلا احلى شي انه ما بده جلي , يعني طبقين كبار و مضرب سلك و منخل و معلقة للقياس و كاسة شرحه و قوالب الكب كيك و بس , المطبخ نضيف بعد الكيك , على قولة سمسومة , هادا كب كيك احلامي ... لا و الالذ انو لما جربت اخفق البيض نظامي ما طلع بطيابة و لذة الي ما خفقته , ادامي هل الزلمة . يا جماعة كتابة هل الوصفة اخد وقت اكتر بكتير من تحضيرها . يلا ادامي على المطبخ و عيروا الساعة و رح تشوفوا انها رح تاخد 5 دقايق او ااقل لتصير بالفرن .

أخر شي اذا خليتي الكيك ليبرد و غطيتوه و خليتوه كم ساعة بيطلع اطيب بكتير .

بالصحة و الهنا

2 بيض
فانيليا
نصف كوب ( 125 غ ) زبدة سائلة
نصف كوب ( 125 مل ) لبن
نصف كوب ( 125 مل ) حليب
ملعقة كبيرة عصير ليمون
كوب و نصف ( 200 غ ) طحين
كوب سكر عادي
2 ملعقة كبيرة كاكاو بودرة
نصف ملعقة صغيرة بيكربونات الصودا
نصف ملعقة صغيرة بيكنغ بودر
ربع ملعقة صغيرة ملح
direction

·         يحمى الفرن على درجة حرارة 160 درجة مئوية .

·         يخفق البيض و الفانيليا بمضرب سلك لمدة دقيقة , يضاف اللبن و الحليب و الزبدة و عصير الليمون و يقلب حتى يتجانس المزيج .

·         ينخل الطحين مع بيكربونات الصوديم و البيكنغ بودر و الكاكاو و الملح ثم يمزج مع السكر و يضاف لمزيج البيض و يقلب بلطف .

·         يصب المزيج في قوالب الكب كيك بحيث يملئ ثلثي القالب و يخبز في الفرن لمدة 20 دقيقة تقريباً أو حتى ينضج .

أضافة إلى المفضلة (1) |

أقتباس | مشاهدات : 5758

تعليقات (29)

1 الكاتب DOUHA, on 13-03-2011 00:29
بيجننن شكلو
تسلم ايديك

2 الكاتب ام جنى عبيدات, on 13-03-2011 00:33
يعني بالاول وئتي ألبي فكرت حدن صايرلو شي ( من غير شر ) وماخدينو دكتور.... ياستي تؤوم بالسلامه الخفائه.. وبالنسبه للوصفة مع انها 3:30 فجرا بس اناهلا رايحه اعملها ومعي بنتي اللي عمرها 3 شهور اللي ما بتنام ابدا

وبخبرك بالنتيجه انشالله .. يسلمو دياتك

3 الكاتب أم نوران, on 13-03-2011 13:51
ههههههههههه و الله ضحكتيني بعد ما رعبتيني ...
والله هالماكينات ما النا غنى عنهن بس و الله اهل زمان كانو يعملو كاتو وما في لا ماكينة و لا خفاقة هه ايه سبحان الله الحاجة ام الاختراع ..
كتييير الوصفة مبينتا \يبةو سهلة يا الله شو بحب الكب كيك بس ما عندي القاالب اهئ اهئ اهئ
بس بتعرفي شي كتيييير حلو انو بنتك الله يخليلك ياها هم تساعدك كتيير بحب هالشغلة بحسا كلا انوثة و حنان و حب من طرف الام و البنت الله يخليلك ياهن و تشوفيهن عرسان و عرايس يا رب
طولت عليكي بس قلتلك انا غرارة و ما بشبع من الحكي ههه الله يستر :grin

4 الكاتب منى, on 13-03-2011 14:35
هلا ضحى

الله يسلمك و يخليك , رح استنى تجربيها

5 الكاتب منى, on 13-03-2011 15:52
هلا ام جنى

هي اصول الاكشن اتعلمتها من دان براون :grin

خبريني كيف طلعوا كب كيكاتك , ستي امرك لله الله لا يحرمك الاجر يا رب , ما بيكبروا الا ليفنى الجسد :roll

6 الكاتب لارا مينا, on 13-03-2011 17:03
أنا مثلك بيحمروا داناتي وعيوني لما يصير شيء ناقص بالمطبخ سواء مقادير أو أجهزة عطلانة :grin

بس على قولة حورية المطبخ .. ست البيت الشاطرة مافيه شيء بيوقف في طريقهاوتقول ماعندي وماعندي

وحدة من إخواتي لما يكون البيت فاضي من المقادير بتعمل سفرة مليانةمن لاشيء, حتى مرة عملت مكرونة بالبشاميل بالطحين الأسمر وطلع أحسن من الأبيض.

الكب كيك واضح إنه سهل جدا ومافيه عذر للواحد مايجربه , عالتجريب أكيد , وتسلم إيديكي

7 الكاتب غيث, on 13-03-2011 19:37
الله يسلم ايديك بكرة على التجريب سبحان الله من كم يوم اشتريت قالب الكب كيك ولسع بدي احضر شي فيه وهلق اجت على رجليها شكرا ميمو

8 الكاتب gsm, on 13-03-2011 23:07
يمييييييييي شكلها كتيير طيبة بس عندي شغلتين ما بصير احط الخلطة بورق الكب كيك من غير القالب لأنو ما عندي :sigh

والشغلة التانية فيني استبدل الزبدة بالزيت على اساس اخف :zzz

9 الكاتب Lost spoon, on 14-03-2011 03:54
يا ستي، انشالله تقوم بالسلامه إلا إذا عمرا خالص ولازم تعملي مشوار لمحل كهربائيات. أنا الخلاط تبعي ماشي حالو، بس قصة الجلي ولوقت خلتني من زمان أصدقاء انا ومضرب السلك، و مضربي أحمر وغير شكل. ومتل ما بقولو: الفرس من خيالها يا منى....
Now back to english becuase it is hard to wrok on that yamli.com thing
:roll

I had couple of things to ask you: one: do you do rice stuffed chicken? I am dying to make one and always afraid of a the chicken being angry and running away from me! the other thing: since you are so gifted mashalla in the kitchen, what do you think about making differnt lists of foods that would go together for different occasions so we all have ideas what to serve when we have a breakfast gathering, , iftar, or mbarakeh. sometimes my brain goes blank and would love new ideas and suggestions. Sorry I take forever, but you make us feel like long time friends...thanks.

10 الكاتب areej, on 14-03-2011 14:40
تسلم ايديكي بس بدي اسألك القوالب مابتحطي فيها شي قبل ما تصبي الخليط

11 الكاتب مريومة, on 14-03-2011 16:59
كتييييييييير طيبة هالوصفة وسريعة يسلم دياتك يامدام منى على هالوصفة جربتها وكتير سهلة مارديتي علي ماوصلوكي وصفاتي عادي لو ماعجبوكي حابة شارك معك لوبوصفات تانية :sigh

12 الكاتب محبةالمصطفى ملك, on 14-03-2011 20:05
منووشة و قبل ما أقرأ الوصفة..
بس لما شفت الصورة دخلت لأكتبلك رد فورا..
لأني شفت صورة الكب كيك على الفيس بوك و ما شفت الطريقة....
و سألتك عليه بس يمكن ما شفتي مشاركتي :roll

المهم يسلم دياتك خيت و يلا حطي الباشيه و دوري على مشاركاتي و ردي عليهم

بانتظارك منوش

13 الكاتب محبةالمصطفى ملك, on 14-03-2011 20:10
منووشة انا هلأ قريت الطريقة..
هلأ انت كنت دائما بتستعملي خفاقة الكهربا قصدك ما..
بتعرفي أنا ما دائما بعمل كاتو متلك(ما شاء الله)
بس لما بعمله دائما بالطريقة يعني مضرب سلك عادي لا آلي و لا شي و ما بطول و دائما بيطلع الكاتو طيب كتيير و مرة أرسلتلك الطريقة بس يمكن ما وصلت.
رح أرجع أجرب أرسلها..
أنا بعمل كيك السفن أب
و كيك البرتقال و التنين كتير طيبين..
حتى منت عم أفكر أشتري خفاقة بس بعد كلامك بطلت

آسفة طولت عليك كتير ..
آه نسيت أقول لك يسلمو كتير على طريقة الكاسترد طلع طيب كتير و و لا أسهل

14 الكاتب محبةالمصطفى ملك, on 14-03-2011 20:21
منوووشة رح أهلكك اليوم طولي بالك علي :zzz

أنا قرأت الوصفة بتمعن و اشتهيت أعمل هالكيك اللي منظره بشهي..
و أنا عملت مرات كب كيك بس بالبرتقال و كان طيب..
بس مرة عملت كب كيك بالكاكاو..حسيت طعمته خفيفة و كمان لما بنقشر الورقة بيكون لزقان شوي على الورقة...
لذلك ممكن تقوليلي شو أعمل حتى مايلزق عالورق و ما في طريقة كريمة بالشوكولاتة لأن أكيد بيطلع أطيب..

15 الكاتب ream, on 14-03-2011 21:21
تسلم ايديكي اول ماشفت الصورة كتييييير تشجعت جربن وطيران عالمطبخ وطريقتن كتير سهلة وطلع هش وطري ورجعت فورا عملتن مرة تانية وضفتلن ملعقة صغيرة نسكافيه حسيت انه النسكافيه ضافت نكهة

16 الكاتب منى, on 14-03-2011 21:27
هلا ام نوران

سلامتك من الرعبة يا جميل
و الله انا مرة حكتلي قرايبة حماتي انهم كانو يخبزوا الكيك بالطنجرة على الفرن من فوق عادي , قالتلي بنتي لكن بدنا ننحرم الكاتو لان ما في عنا افران بالبيوت :eek

ما شاء الله عليهن
على فكرة هي " اهيء اهيء اهيء " نقطة ضعفي لانها كلمة واحدة من اعز رفقاتي

شكرا كتير لردك الطويل, ردودك بتبل القلب و انا بحب هيك :zzz

17 الكاتب om nabeel, on 14-03-2011 22:31
ما شاء الله عيكي يامنى
عن جد مبدعة انا بخاف اعمل كاتو بخاف من شغله
رح اجربه قريباان شاء الله مادام ما بياخد وقت
تسلم ايديكي

18 الكاتب mays salem, on 14-03-2011 23:17
يااااااااي على اكلاتك الطيبين يامنى شي ناهي والله
من اكتر من سنه وانا بتابعك وبتابع وصفاتك الطيبين وصرت مجربه كتير منن
واليوم شفت الكب كيك وبتمنى انو يزبط معي من زمااااااان
وهلأ اجاوقتو مع قرب عيدالام منشان ساوي اصناف كتيره وراح يكون اول صنف

ويسلمو ايديكي مرا تانيه

19 الكاتب mays salem, on 14-03-2011 23:18
يااااااااي على اكلاتك الطيبين يامنى شي ناهي والله
من اكتر من سنه وانا بتابعك وبتابع وصفاتك الطيبين وصرت مجربه كتير منن
واليوم شفت الكب كيك وبتمنى انو يزبط معي من زمااااااان
وهلأ اجاوقتو مع قرب عيدالام منشان ساوي اصناف كتيره وراح يكون اول صنف

ويسلمو ايديكي مرا تانيه

20 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-03-2011 23:36
شكلها كتير طيب :zzz

ست منى شو الفرق بين الكب كيك والمافن

21 الكاتب منى, on 15-03-2011 21:14
اخ يا لارا

زعلانة على خفاقتي و كل ما عم انزل للسوق عم احتار و ما عم اعرف شو اشتري .

بتعرفي انولطحين الاسمر ما منلاقيه عنا الا بطلوع الروح , هلا ما الها هل الشغلة علاقة بالموضوع , بس كمان انا معصبة على اد ما دورت و ما لاقيت و لما لقيت كان السعر مضروب بعشرة يا بعدي :roll

ان شاء الله تجربيه و يعجبك و سلام لكل العيلة

22 الكاتب gsm, on 16-03-2011 00:40
لا تزعلي منوش سلامة قلبك من الزعل ما بعرف بس لو في عندك حدا بالإمارات فيك توصيه عليها هونيك التشكيلة اكبر وارخص

23 الكاتب amoula, on 16-03-2011 05:27
صباح الخير

انا شايفة الكل عم يعلق وما حدا جرب فانا رح اقلكم جربوا لانو النتييييييييجة مذهلة لسا هلأ خلصته وما استنيته لحتى يبرد اكلتلي وحدة عالسريع والله يستر شكلها اول وجبة رح تروح على الدواقة :grin

بس انا هلأ لازم اعترفلك يا اختي منى باعتراف خطير انو انا كنت على طول اقول كل شي بجرب من الموقع عدا الكاتويات بخاف لانو هدول اي غلطة خلص طار القالب, بس من شوي عند صلاة الصبح زوجي فاق وقالي جوعان واكل شو ما كان ونام وزعلت عليه :sigh

وانا الي يومين هالكاتو ببالي

قلت با بنت ما بدها قمت عملته الساعة السادسة صباحا ههههه والنتيجة بتجنن بس انا يمكن نوع الكاكاو عندي هون غير اللي عندكم فانا بيستحمل كمان معلقة وهاد بكل الاحوال بيضل حسب الرغبة
عن جد يسلموووووووووا كتير والله يجزيكي الخير ياارب لانو زوجي رح يفيق ويتفاجئ وينبسط

صحي حطي ميزة من ميزات هالكاتو انا استفدت منها انو ما بيطالع صوت ههههه
وانا مبسوطة مافي جلي صينية
عفكرة للصبايا اللي قالو ما عندهم صينية وانا ما عندي بس جبت الورق سيلوفان وثابت وحطيتيه بصينيةبناء علىنصيحة حماتي
انا حكيت كتير آسفة بس لانو مبسوطة انو تعلمت كاتو جديد غير الكاتوالوحيد اللي بعرفه :zzz

24 الكاتب مريومة, on 16-03-2011 18:41
كيفك مدام منى بيليز بدي اطلب منك طلب بدي اكلة حلو بالمارس تكون مميزة منشان عيد الام انا سويت وصفاتك يلي بالمارس حابي اعمل شي جديد الله يوفقك ازا بتحسني تساعديني :cry

25 الكاتب منى, on 16-03-2011 20:34
هلا مريومة

صحتين و الف عافية يا رب على البك , الحمد لله انهم عجبوكي
يا ستي الوصفات وصلوا اكيد يسلم هل الديات و بانتظار اشيا تانية منك

بالنسبة لوصفات المارس ما عندي شي جديد , الوصفات الي منزلتهن هنن الي عندي بس :roll

26 الكاتب violet, on 16-03-2011 22:02
هلأ ست منى بدي أسألك القوالب امستخدمة كيف شكلا يعني بشوف بالمحل قوالب مشكل ملون بس بحسن مابيظبط ولا واحد منهم
وأديش لازم تكون الحرارة بالنسبة لفرني العالي واطي

27 الكاتب غيث, on 18-03-2011 22:59
اخيرا اليوم لجربتو رائئئئئع والله واخيرااتجرأت وخليت بنتي(8سنوات)الكبيرة هيه عندي طبعا خليتها تعملو وفرحت كتير شكرا منى والله يخليلك الغوالي يا رب

28 Noora
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-03-2011 16:55
يسلم أيديكي منى على هل كيك السهل وبدي أسألك على طريقة صنع الكريمة في المنزل إذا بتعرفيها يا ريت تفيديني

29 كب كيك الخمس دقايق
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-04-2011 13:25
رووووووووووووووووووووووووووووووعة عملتهم وطلعو جنان

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 13/03/2011 )

< السابق		التالى >

[ عودة ]