اذا كنت جديدة على الطبخ فاكتر شي ممكن تخافي منه هو اما المعجنات أو الحلويات , و انا كنت خاف من المعجنات , و لما شوف ماما أو أية عم يشتغلوا فيهم و هنن نايميين , قول لحالي بحياتي ما رح صير متلهم , و لاحكي الحق انا كنت عم احكي حكي نظري , يعني مو انو جربت و فشلت , لا هيك عندي حاجز بيني و بين المعجنات و بس . و كل ما يكون عندي جمعة و بدها معجنات أتصل بـ 911 و قلها , بتذكري لما كنت بنتك ( أو أختك حسب الشخص ) , فورا تقلي خير ان شاء الله كم كيلو عجين بدك .. هيك علموني على الكسل و بمساعدتهم الي كبر الحاجز بيني و بين المعجنات .

بعدها كنت سهرانة مرة برمضان لحالي و عن على بالي شغل المطبخ و كنت بيومتها شايفة وصفة للتوست في موقع لك , الوصفة كانت بسيطة فاتشجعت و حضرتها و  ردود الافعال العائلية شجعتني كتير كتير و الكل على اد ما انبسطوا اتحمست و صرت جرب بهل المعجنات و هيك بديت .
كانت بداياتي ان ااقسم المقدار لحتى اوصل لاصغر شي بقدر عليه , يعني مثلا ثلاث ارباع كاسة طحين و ما كنت افهم ليش ماما تقلب على ظهرها من الضحك كل ما تسمعني عم لت و اعجن بشوية طحين , تقلي لك بنتي هدول برشهن انا رش على العجينة , و الله بيلزقوا بايديك مو مستاهليين . بس انا كنت خاف كبرها و الحمد لله صرت جرب شي جديد من فترة لفترة و صار يطلع معي شي , بس مو لدرجة اني أثق بنفسي بالمعجنات .

بعد بفترة , صار عندي صبحية نسوانية صغيرة و كان من بين الضيوف ستات من برة سوريا و رح يزوروني لاول مرة , يا ربي اعمل و الا ما اعمل , لك يلا يا بنت حضري عجينتك و كنت بوقتها متوصلة لعجينة القطنة من جديد ,  ساويتلي كم نوع . الحمد لله على اد ما انبسطوا الضيوف و حبوا الفطاير عرفت ان المعجنات الي بتعملها الست على ايدها الها سحر خاص و شي بيضيف كتير لسفرتها .

هلا إذا قرات وصفات المعجنات الي منزلتها من زمان , رح تشوفي تفاصيل كتير , و اشياء نوعا ما معقدة و هل الشي مزبوط , و حتى انا لما عم ارجع طبق الوصفات القديمة عم اختصر كتير خطوات , الحمد لله صار عندي اريحية بالتعامل مع العجين و مع هل الوصفة رح اعطيكن وعد , انه رح يتم نفض قسم العجنات باكمله , وصفة وصفة , رح أعيد تحضير و تصوير كل الوصفات و الشي الي ممكن يتبسط رح بسطه و الشي الصعب رح صوره و انا عطيت حالي فرصة لاخر هل السنة , إذا ربنا يسر و راد .

بتمنى انه نحكي و نجرب و نشجع بعض لحتى كل واحدة هون تصير شطارتها متل ما بتحب و تتمنى .

2 كوب طحين
1 بيضة كبيرة , مخفوقة قليلاً بالشوكة
نصف كوب ( 125 غ ) زبدة طرية
ربع ملعقة صغيرة ملح
نصف ملعقة صغيرة بيكنغ بودر
2 – 3 ملعقة كبيرة سكر
فانيليا

التخميرة الأولية :

ملعقة صغيرة خميرة
ربع كوب حليب دافئ
ملعقة صغيرة سكر

الحشوة :

شوكولا نوتيلا

للوجه :

صفار بيضة مخفوقة مع بضعة حبات نسكافييه

للتلميع :

قطر

تعليقات (50)

1  الكاتب أم نوران, on 02-03-2011 01:12 ماشاء الله تبارك الحمن لا و الله شطووووورة الله يبارك فيكي ..انا كتير بحب البريوش و بحب المعجنات و خصوصا ريحتها بالبيت بتعطي دفء و حميمية ,انا الحقيقة متعودة اعجن لانو امي علمتني اعجن من و انا عمري 12 سنة لانو بابا الله يخليلنا ياه بحب خبز البيت الطري .. بس انا تعلمت كتيييير من و صفاتك ست منى الله يجزيكي كل خير,يعني كلما احتار ايش اطبخ حالا على لقمة و بغوص بعالم الوصفات الرائعة وبنسى انا اساسا ليش دخلت   والله اني على كل طبخة بدعيلك لانو هادا اللي بيطلع بايدي   سؤال كالعادة : الخميرة اللي استعملتيها خميرة الحبيبات و لا خميرة العجن العادية ؟؟  والله لا يردلك دعوة ..جزاك الله خيرا

2  الكاتب مزهرة, on 02-03-2011 02:51 ان شاء الله يسلموا هالايدين والله يجزيكي الخير على هالوصفات الرائعة . مابتتصوري شقد سهلتي عليناالحياة فيهم خصوصي نحنا بالغربة بس لما بدخل على موقعك بحس حال بحلب

3  الكاتب منى, on 02-03-2011 13:21 هلا ام نوران   ما شا الله عليك من عمر 12 سنة بالمعجنات معناها هلا خبزاتك قطايف يا ريت تعلمينا طريقتك     ابوس روحك على الدعوات , ان شاء الله الك متلهن و اكتر يا رب     يا ستي الخميرة حبيبات , بس اذا متوفرة عندك الخميرة الفريش احسن و احسن

4  الكاتب منى, on 02-03-2011 10:13 هلا مزهرة   الله يسلمك حبيبتي و ان شاء الله حياتك كلها خير و برطة و يسر     منورة اختي

5  الكاتب omtasneem, on 02-03-2011 11:14 السلام عليكم ورحمة الله وبركاته. كيفك منى والله اني حابة شوفك على قد مالي حاسستك مذوقة ومنفنفة شكلا الوصفة شغلة رهيبة بس متل ماقلت عندي خوف من المعجنات رح جربا وخبرك إن شاء الله فيني احشيا كيري؟؟؟وسلامي لالك

6  الكاتب رنا, on 02-03-2011 13:03 تطبيقك اكتر من رائع ..وانا كنت متلك واكتر بقصة المعجنات كتير بخاف لسه الي خلاني اتكاسل اكتر انه جوزيي شغلته العجاين والفطاير وعجينتهن ماشالله رائعة وكل مابدنا نعمل فطاير بيجيبولنا كبتولة وبقولوا تسلوا فيها ...بس الي كسر عندي حاجر الخوف هو عجينة العشر دقايق لانه ولا مرة لفشلت معي وصرت استخدمها لكل شي تقريبا ..........شكرا الك منى الوصفة بتشهي ولو بضل مية سنة مابطالع متل الي ظاهر عندي بالصورة ...ليكون عم تعدليها عالفوتوشوب بس بتعرفي انا بتكاسل من الاطباق يلي بدها تخمير على دفعات هلأ انتي قديش اخدت معك لتضاعف حجمها بأول مرة ؟؟

7  الكاتب أم نوران, on 02-03-2011 13:18 الله يعطيكي العافية ست منى .. بس بدي اسالك ايمت منستعمل الخميرة الحبيبات و ايمت منستعمل الخميرة الفريش؟؟؟ نحن بالمغرب غالبا منستعمل الفريش خصوصا بخبز البيت بس انا بجيب الحبيبات مشان عجينة العشر دقايق و لانيها بطول بالبراد اكتر ..وطبع عجينة العشر دقايق اخدتا من هون من عندك   انا رفيقاتي كلن خبرتن على الموقع وكتييير عم يعجبن وبسهل عليهن الطبخ ..  يامجيني تقلت عليكي و الله يجزيكي كل خير

8  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 02-03-2011 22:11 كتيييييير مكوناتها بسيطة وسهلة كنت مفكرتها أطعب من هيك .    أختي كانت عايشة بألمانيا وتعلمت هالوصفة هونيك و الوصفة قريبة من هي  من عجينة البريوش بتمدها وبترش عليها سكر وقرفة وبتلفها متل السويسرول وبترجع بتخمرها وبهالوقت بتحرق سكر للكراميل .. وبعد ما تتخمر بتدهنها بالبيض وعالفرن وبعد الخبز بتقلبها على صحن التقديم والكراميل عم يشرشر منها هههههه

9  الكاتب gsm, on 02-03-2011 23:48 lما شاء الله شي روعة خلص ان شاء الله من كل بد رح اجربها بس رح احشيها جبنة بس سؤال على السريع هلق كيف لازم يكون قوام العجينة متل عجينة ال عشرة دقائق ولا لحتى العجينة تبطل تلزق بالصحن؟وياريت لو تحطيلنا كمية الحليب بالزبط يعنى لحتى عرف النسبة على المزبوط يسلموا ايديك وعك استنى ردك لأنو ناوية اعملها بلكي بكرا ويعطيك الف عافية

10  الكاتب gsm, on 02-03-2011 23:52 صحيح كان بدي اسالك اخت ام نوران انا فيك تقولي من احلامثي انو اخبز خبزاتي بالبيت وجربت شي خمسين طريقة وما في شي زبط معي بقى لو تتكرمي علينا وتنزليلنا طريقة الخبز المنزلي اكون لك من الشاكرين

11  Alea الكاتب أم نوران, on 03-03-2011 12:30 اختي عليا الطريقة اللي بتستعملا اختك هي طريقة السينامون رول يعني رول القرفة كمان كتير طيبة و في اللي بيحط كراميل على الوج و في اللي بحط ايسنج وفي اللي بيحط توفي انتي و رغبتك   وفي رابط بالموقع لهي الوصفة :  http://www.l2ma.com/content/view/735/2/  وعلى فكرة كتير شهيتيني عليها

12  gsm الكاتب أم نوران, on 03-03-2011 12:32 أختي ان شاء الله بنزل الطريقة ليستفيد منا الجميع بس الخبز اللي منعملو بكون شوي سميك يعني مو رقيق متل الخبز العربي ..  بس مو شي صعب عن حد ابقي تحضري نفسيا لحتى ابعت الوصفة للست منى

14  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-03-2011 22:12 ممكن تكون نفس المبدأ بتغييرات بسيطة وشكلها بيكون حلزوني غير الرول ..    والله وأنا كمان مشتهية عليها

15  الكاتب gsm, on 04-03-2011 00:20 السلام عليكم منى عم احاكيك من الحدث في موقع الحدث حاليا البريوش صار بالفرن بعد ما خمرته للمرة التانية وجهزت القطر الله يستر ببقى بخبرك شو بصير معي

16  الكاتب مريومة, on 04-03-2011 07:50 ياي على هالوصفة يتجنن وبكرة ان الله راد بدي جربها رايحة احشيها تمر اكيد بيمشي الحال بس بدي اسالك بحسن اعجنها بزيت بدل الزبدة لانو بحس الزبدة بتعطي نشفان للعجين

17  الكاتب منى, on 04-03-2011 10:43 هلا مريومة   اي بيصير , انا بحس بالزبدة تعطيها طعم طيب و غني , بس فيك تستعملي الشي الي بيناسبك

18  الكاتب منى, on 04-03-2011 10:47 هلا غفران   اتاخرت عليك , بس الحمد لله ماشي حالك     يا ستي العجينة لازم تكون متل عجينة العشر دقايق بس على انعم و اطرى و الحليب حوالي النص كاسة اضيفها بالتدريج     يلا رح استنى اخبار منك

19  الكاتب رغد غسان علاء الدين, on 06-03-2011 17:24 وااااو ما شاء الله لا قوة إلا بالله..شي بيغرف القلب..تسلم إيديكي..بس كان لازم تسميها خلية النحل بالنوتيلا

21  الكاتب gsm, on 07-03-2011 11:34 سلام عليكم منى تأخر عليك ما تواخذيني بس والله كل ما بجي بدي أرد عليك إبني الله يسلمه بيعملي شي مغامرة من مغامراته وتعي إركضي وراه الله يسلمه بهل العمر كتيير بدن ركض يا ستي نجي على البريوش عملته وساويته متل قوام عجينة ال عشر دقائق بس انا على قد ما كنت آكلة هم زنخة البيض كترت الفانيلا وصارت طعمتها واضحة كتيير وشغلة تانية لما حطيت النسكافيه مع البيضة حسيت اللون غمق كتيير عم افكر المرة الجاي ما أحط نسكافيه بس أحط البيضة على وجها بس بشكل عام طلعت طيبة كتيير   بس بدي أسألك   ما في مجال أستغني عن الزبدة بالزيت يعني بتبقى أخف شو رائك؟

22  الكاتب محبةالمصطفى ملك, on 08-03-2011 18:47 لك شو هلاإبداع كله منوووشة و الله رح يطب قلبي عالصورة..و عم أكتبلك الرد قبل ما أعرف تفاصيل الوصفة بس إن شاء الله تكون سهلة لاني متل ما قلتي بخاف من المعجنات

23  الكاتب larooo, on 09-03-2011 09:27 صباح الخير منوش ..وكل الصبايا   امبارح جربت الوصفة العظيمة هي ..والشكل طبعا طلع راااائع .. بس العجينة حسيتها ناشفة شوووووي مو كتير .. يمكن كمان حسيتها كان لازم اعجنها اكتر مشان تطلع انعم ..كمان سؤال ..هلأ انا دهنتها بالعسل بدل القطر ممكن يأثر .؟؟ يعني السبب من القطر لمعة بس ولا مشان يمتص منه وماتطلع ناشفة ؟؟  بس ان شاء الله بدي ارجع عيدها لأنو بتستاهل   الله يجزيكي الخير منوش

24  الكاتب منى, on 09-03-2011 11:35 هلا لاروش   صحتين و الف عافية يا رب , ممكن العجن يكون سبب , اذا حاببتيها تكون اطرى فيك بس ما طالعتيها من الفرن و خفت حرارتها تغطيها و تتركيها شوي .  ما اله علاقة العسل او القطر , لان هو بس للمعة   ان شاء الله تجربيهال و تطلع متل ما بتحبي     لاروشة اشتهيت اني شوفك باخر زيارة , يلا ان شاء الله خيرها بغيرها , اشتقتلك كتير

25  الكاتب منى, on 09-03-2011 11:41 هلا ملك   لا الوصفة سهلة كتير , ان شاء الله بتعجبك و تكون يمييي

26  الكاتب منى, on 09-03-2011 11:47 هلا غفران   فيكي تسستغني عن النسكافيه بس بيعطيها لون حلو و ما بيخلي للبيض ريحة , و كمان فيك تستبدلي الزبدة بالسكر , بس ما رح تصير بريوش بريوش   صحتين و هنا يا رب

27  الكاتب larooo, on 09-03-2011 17:16 منووش ..شكلك خربطي بيني وين حدا تاني   بس فال خير بلكي بنجتمع سوا شي يوم ..أهلي مقيمين كمان حاليا بحلب

31  الكاتب بشرى, on 10-03-2011 16:57 هي تطبيقي للوصفة .. تسلم إيديكي يا منوشة .. المقادير مزبوطة بطرقة مريحة كتير والعجينة كتير حلوة وسهلة وطرية .. زمان ما زبطتت معي هيك عجينة بهالروعة ..    وما أحكيلك عن الطعم .. يمييييي .. بقي أربع قطع بس     وهي صورة التطبيق

32  الكاتب larooo, on 10-03-2011 20:26 يالله يامنى انا حزينة كتييير   هلأ رجعت جرب الوصفة مرة تانية وعلى اساس بدي انتبه تمام وتطلع احسن من هديك المرة ..وبعد ماعجنتها وخليتها شي 3 ساعات واذذذذذذ اكتشفت اني نسيانة البيضة برا وماحطيتها   بقى قولك كيف ممكن تطلع ومانفشت كتير اكيد   بس رح كملها هلأ شو بدي اعمل

33  الكاتب منى, on 10-03-2011 20:35 لاروش و لا يهمك , بتطلع منيحة , بس ما دام ما نفشت معناها لسا بدها تخمير كمان , يا ترى في مجال تضيفيها هلا , قصدي العجينة ناشفة شوي و بتتحمل و الا نو ؟؟ اذا حاسة انو بيمشي حالها ضيفيها و اذا شايفة انها رح تعزبك اتركيها

34  الكاتب larooo, on 10-03-2011 21:12 لا ماكأنو خرج حطلها بيضة بتصير يمكن طرية كتير .. رح قوم احشيها مشان تلحق تتخمر مرة تانية واخبزها قبل مانام   بس ان شا ءالله خير ..انا متفائلة

35  الكاتب منى, on 10-03-2011 22:13 و انا كمان

36  الكاتب محبةالمصطفى ملك, on 11-03-2011 03:51 منووشة أولا اذا عملت البريوش سادة بدون حشوة بصير؟؟؟  و تانيا عبستناك بصفحة الكاسترد ..يلا لحقيني خيت..  و بصفحة كيك تمر بدون بيض..  و بصفحة بطاطا كوينز..  (ولي ملك كل هدول)

37  الكاتب القانتة لله, on 14-03-2011 11:33 تسلم ايدك يا منى   حابة قلك انو يا ريت تحطي كل وصفاتك بالخطوات المصورة اذا ما فيهاتعب وبنكون ممنونين الك

38  الكاتب foforose, on 15-03-2011 20:46 السلام عليكم اختي منى الله يعطيكي الف عافيه والله وقت شفت الصوره مسكت ايديي مشان ماانسى وحك جسمي لاني حامل   انا عملت خلية النحل مرتين وطلعت كتير طيبه تصوري وقت عجنتها قبل بيوم من جية صدقاتنا عالفطور عيرت الساعه عالسته الصبح عجنتها عجنه تانيه بعدين عيرتها عالتمانه وشكلتها كرات وخبرتها طار عقلن فيها الحمدلله   بس هي باينتها اسهل وكمان اكيد طيبه خلص بدي جربها قريبا لان رح شوفها بنومي اذا ماساويتها.  على فكره انا بشكر كل الاخوات على اسالتن وبشكرك على اجاباتك لان السؤال بفيد الجميع.  فرح

40  الكاتب منى, on 17-03-2011 22:12 هلا ام تسنيم   انتي الي مزوءة و عسل   ان شاء الله تجربيها و تحبيها و فيك تحشيها بالي بيجي على بالك

42  رح أعملها يعني رح أعملها الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 29-03-2011 07:31 السلام عليكم الله يعطيك العافية ست منى أنا من عشاق المعجنات ومن زمان ناوية جربها وفي ليلة من الليالي وبعد ما نيمت الولاد وأبوهن قررت أعملها وبتكون جاهزة ياكلو منها الصبح ولأنو عن جد التيسير قبل التدبير متل ما بيقولوصحي ابني الصغير(7أشهر)وخدي على نقنقة ونغوجة لصلاة الصبح وأنا صرت اشتغل كل طلقة براحةوما لحقت ياكلوها الصبح وما قدرت اخبزها لبعد ما راحو بس اللي واساني انو طلعت ولا أطيب ومنظرها رائع فشكرا كتيير الك وسوري عالمغامرة الطويلة :

44  الكاتب esraooo, on 27-06-2011 22:08 السلام عليكم ورحمة الله وركاته   كيفك ست منى ان شا الله بخير يارب   جربت هالوصفة وطلعت كتيررررررررررر طيبة وكتير سهلة حسيتها اسهل من الكاتويات بكتير ونتيجتها مضمونة اكتر     الله يعطيكي العافية وينولك مراد قلبك يارب   صورة البريوش ع صفحتي ع الفيس بوك     ............إسراء

45  الكاتب منى, on 28-06-2011 18:21 صحتين و الف عافية اسراء الحمد لله انها عجبتك    يا ستي الفيس بوك مو فاتح عنا , يعني رح شوفها ان شاء الله بس حتى اشعار اخر

46  الكاتب منى, on 28-06-2011 18:24 هلا رهف   العجينة لازم تكون طرية شوي بس متماسكة , بقى يمكن انت قللت شوي من الحليب   جربيها و ان شاء الله بتطلع المرة التانية على زووءك تمام

47  الكاتب منى, on 28-06-2011 18:26 هلا bobo   بالعكس حبيت ردك كتير حسي حالي معك و عم وطي صوتي احلى ما يفيقوا     صحتين و الف الف عافية يا رب و شكرا لمشاركتك الحلوة

48  الكاتب منى, on 28-06-2011 18:33 هلا ام عسل   بنتك اسمها بيجنن , اكيد عسل على عسل     صحة و الف الف عافية يا رب و يخليلك ياها هي و اخوتها و يبارك فيهم     منورة

50  الكاتب لانا, on 12-05-2012 17:19 السلام عليكم  انا عضوة جديدة بيناتكن وبتمنى تعتبروني وحدة من اسرتكم وعلى فكرة أنا حلبية وأكلاتك الحلبية كتير بتشبه طريقتنا وبصراحة معجبة كتير بتطبيقك وتصوريك للطبق لانوبيجنن وبيدل على زوؤك وبدي قلك انو   هلأ طلعت البريوش من الفرن وطلع بيجنن   شكرا كتير لالك وامبارح عملت السمك بالتتبيلة المغربية وطلع طيب ورح جرب كتير شغلات أكيد

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved