الحقيقة و من دون مواربات او لف و دوران , كاس العالم ما كتير بيعنيلي لان انا بالاساس مو صحبة مع كرة القدمو كل اربع سنين بيجي ليكون مناسبة الي لاعادة تخطيط و ترتيب حياتي , , و فكر بالي اتغير من اربع سنين لهلاً فيها , و خطط للاربع سنين الي جاية .
بس بما انه البيت كله رياضي , ابتداء بابو الشباب و انتهاء بكريم, قلت بعقل بالي مو حلوة بحقي . و هون بديت اول محاولتي لصير كروية قحية و هادا من باب المشاركة المعنوية لعائلتي .
يشهد ربي علي اني حاولت كتير . ردت ادخل بالمود و حبها لكرة القدم من جوى قلبي , مو تمثيل يعني . حاولت افهم المتعة في انك تشوف 22 لاعب عم يركضوا على طول الملعب و عرضه و عم يلحقوا هل االطابة المسكينة الي لا حول لها و لا قوة . و صرت اجبر حالي اني اتفرج على المباريات و صرت تابع برامج رياضية لحتى بركي افهم من التحليلات الي فيها شو السر؟ و صرت حتى اسال و استفسر , بس بالاخير ما قدرت و اكتشفت ان حب كرة القدم , متل الطبخ , شي بالفطرة و ما خرج الواحد يتعلموا لهيك رفعت الراية البيضا . لهيك خلال المباريات بكون بالاوضاع التالية :
إما أخدة غفلة كاملة و بتلاقيني فجأة صحيت و نطيت من الرعبة على صوت كوووووووول و بقول مع القايلين , الله أكبر .
و إما عيوني مفتحة على الشاشة الخضرا تمام التمام و ابتسامة صفراء على وجهي و عقلي عم ياخد قيلولة رياضية .
و اما شي كتاب بحضني عم اقراه بغض النظر عن الضجة و الضوضاء المحيطة فيني .
و اما سارحة عم فكر شو صار بلقمة طيبة اسمه اخضر متل الشاشة .
بعد دراسة عميكة للموقف اكتشفت اني مشاهدة ( بكسر الهاء )سلبية و عم تصيبني كل اعراض المشاهدين الطبيعيين . فأنا حفظانة عن ظهر غيب اسماء الفرق و الاعبين و مين دخل جول على مين و هل الاعب من وين اصله و فصله و لمين كان يلعب من اول ما قال وق في عام كرة القدم و ممكن في بعض الاحيان اذكر سعره حتى
من بين البرامج الي عم تابعها , برنامج صدى الملاعب , و البرنامج كان منيح لفترة , بس هلا حاسسته صار مبتذل لان مصطفى الاغا ما عم يوفر شي ليلفت النظر لبرنامجه و ما بقي لا رقاصة و لا مطربة ما جابهن , عزى على قولة ام عبدو . و في كمان برنامج الكرة في ملعبك على قناة الدنيا , هادا ما فيه كتير تحليل و الي عاجبني فيه انهم عم يطالعوا ردود افعال الناس على المونديال , و كتير بنبسط لما بشوف حدا متل حكايتي ما اله علاقة بالي عم يصير حواليه
ببرنامج الكرة بملعبك من كم يوم كانوا عاملين مقابلات على السريع مع الوزراء السوريين عن فرقهم المفضلة , جاوب وزير الثقافة رياض نعسان أغا القلعة جواب عجبني لما قال" الجول دخل في غزة "
بغض النظر عن كل شي , الي حاببته بكل القصة ان الناس كلها فرحانة و في حماسة في الاجواء و هل الشي بينعنش الحياة و بينسي الناس همومها , الله يبسط الجميع و يفرحهم من جوى و برة بشي حقيقة . و لما عم نحضر المباريات بالقهاوي او بساحة سعد الله الجابري , حتى انا الي ما لي علاقة عم صير اتحمس متلهم و خصوصا اذا كان الفريق بيهمني امره لسبب او اخر . و مين أغلى من فريق الجزائر بهل الكأس ؟
الي صار باخر مبارة فرح الكل و الي اله او ما اله علاقة تابع المبارة بحماسة كبيرة , و انا , حتى انا , قعدت كل المبارة على اعصابي لحتى خلصت و بالاخير فرحتنا ما كانت بتنوصف , الحمد لله الله يوفقكم يا شباب اليوم , عيونا كلها عليكم و قلوبنا معكم
خلصنا حكي عن المباريات بس لسانا باجواء المونديال و انا رح احتفل بكرة القدم بس على طريقتي , و هي رح تكون اول وصفة خاصة فيه و بديتها بعلم الجزائر , ما عدا ان شكله حلو و بيعبر عن مشاعرنا , الوصفة كمان طيبة كتير و من المطبخ التركي . حدا فيكن قبل هلا جرب طعم الفليلفة المقلية ؟ ما ببتخيلو قديه القلي او الشوي بيغني نكهة الفليلفة و بيخليها شي طيب كتير . إذا ما جربتيها انصحك كتير ان تجربيها المرة التانية مع المقالي لان هل الوصفة ممكن تحضريها بالبانجان او الكوسا او الفليلفة , اي نوع بتختاريه و ممكن تشكيلة منهم مع نفس الصوص . و في كمان صلصة البندورة , رح ضيفه بهل الصيفية ان شاء الله . يعني الوجبة بتكون مقالي مشكلة و معاها اما صوص البندورة او صوص اللبن حسب كل واحد ما بيحب يغمس
بالصحة و الهنا
حساب الوحدات الحرارية من semo :
عدد الحصص : 4 حصص عدد السعرات الحرارية في كل حصة :125 كالوري
·تقلى الفليفلة الخضراء بشكل كامل في الزيت الغميق حتى تشقر , ترفع و توضع في وعاء فيه ورق ماص و له غطاء و تترك حتى تبرد .
·تقشر الفليلفة و تقطع مكعبات و ترتب في طبق التقديم , يخلط اللبن و الثوم و الزيت و الملح و يصب على الفليلفة ثم تزين بالفليفلة الحمراء الناعمة و تقدم مع الخبز العربي .
.
. و في كمان برنامج الكرة في ملعبك على قناة الدنيا , هادا ما فيه كتير تحليل و الي عاجبني فيه انهم عم يطالعوا ردود افعال الناس على المونديال , و كتير بنبسط لما بشوف حدا متل حكايتي ما اله علاقة بالي عم يصير حواليه 
تعليقات (23)
