هلّ رمضان , ان شاء الله ينعاد علينا و عليكم و كلنا بصحة و خير من برة و من جوى , و ربي يتقبل اعمالنا و اعمالكم و نكون كلنا من العتقاء باخر الشهر , مع أول رمضان بحس ان الصيف خلص , ان الدنيا كلها بتوقف لمدة شهر , أو الدنيا بتوقف عن التنفس لمدة شهر و بعدها بترجع تسحب نفسها لترجع الحياة بطيئة متل ما اتعودنا عليها ,!
الوصفة اليوم مميزة كتير , و انا صار الي عم اتحضر عليها زمااان , بس دوما بحضرها و ما بيصحلي صورها و نزلها , بس هلا قلت خلاااص يا مخلوقة ربك , صار وعدتي فيها اكتر من حدى و هي مو مستاهلة تاخريها كل هل الاد , و بكلمة مو مستاهلة ما بقصد الوصفة نفسها , لان هي مستاهلة و نص و تلات ارباع , انا ااقصد فيها صعوبة الوصفة لان عن جد وصفة سهلة كتير و فيها لعب اكتر ما يكون فيها شغل و انا عني بقيت عم العب بالعجين حوالي الساعة , مع ضحكات الاولاد و بسطهم اتمنيت كون ضاعفت الكمية لحتى اطول هل الساعة السحرية . و لحتى تقتنعي ان الوصفة سريعة كتير و سهلة حبيت خبرك انه في ايطاليا بيعملوا مسابقات في الساحات المفتوحة بين ستات البيوت لحتى يشوفوا اسرع و اشطر ست و الي بتخلص عجيتنها و بترقها , على ايدها , بمدة ربع ساعة بس . هلا لاحكي الصراحة انا رح اطلع بالمرتبة الأخيرة بهيك مسابقة لان ما كتير بحب اشتغل بسرعة , بس و الله عجينتي رح رح تفوز عليهم كلهم كلهم .
الوصفة ممكن تتحضر بالطحين العادي , مو طحين الكاتو و الحلويات , و كمان ممكن يتحضر بالسميد الناعم و اصلها اصولها تتحضر بالطحين الايطالي الي عياره صفريين ‘00’ . بعد التجربة شفت ان هل الطحين مو دوما متوفر و عجينة السميد اقرب اله و بتطلع أطيب من عجينة الطحين العادي الي رح لزجة زيادة عن المطلوب لما رح تدوقيها اما عجينة السميد فهي متل ما بحبها .
الوصفة ممتازة لتحضير عجينة اللازانيا و الفيتوتشيني و الرافيولي و كمان هل المعكرونة الحلوة على شكل فراشة , كل الي علينا نعمله أن تقطع العجينة لمستطيلات بالحجم الي بيناسبنا و بعدها نقرصه بالنص قرصة ليعطينا هل الشكل النعوم
الكمية نوعا ما كبيرة و انا بحضر بالعادة نصها , بس هل المرة كنت ناوية اعمل اكتر من نوع لهيك حضرتها بتلاتة كاسة سميد , و استعملت الي استعملته حسب الوصفة و الي زاد تركته في الصينية على منشفة مطبخ نظيفة لتاني يوم , بيعود بينشف و بيصير متل المعكرونة الجاهزة و هادا فينا نحتفظ فيه لمدة اسبوع بكيس محكم الاغلاق و بخزانة المطبخ .
اذا كان عندك مهارة برق العجائن , متل أيا نانا ايطالية , ففيك ترقي العجينة على ايدك , إذا نو متل حكاياتي فأحسن حل هو ماكينة الباستا و هي بتسهل الشغل كتير و تحضير الباستا عليها متعة .
المعكرونة الفريش بتاخد وقت للسلق ااقل من المعكرونة الجاهزة , حوالي كم دقيقة و بتصير جاهزة .
الوصفة بسيطة سهلة و كتير ممتعة , رح تكون طويلة لان فيها تفاصيل صغيرة مو لان صعبة , اتمنى تجربيها و تعتدديها و بالصحة و الف هنا
3 كوب سميد ناعم أو طحين عادي 4 بيض من الحجم الكبير ملعقة صغيرة ملح ملعقة كبيرة زيت زيتون ربع إلى ثلث كوب ماء
طحين أو سميد ناعم لرق العجين
·يوضع الطحين على طاولة العمل , يفضل أن تكون من الخشب أو الرخام , تعمل فيه حفرة و يوضع فيه البيض و الملح و الزيت و ربع كوب ماء و يخفق البيض بشوكة ثم يضاف الطحين بالتدريج باستخدام الشوكة و يقلب حتى يمتزج قليلاً مع البيض .
·تعجن العجينة باليد حتى تصبحكرة ملساء ناعمة و مطاطية . إذا كانت العجينة جافة يضاف المزيد من الماء , بكميات صغيرة جداً كل مرة , تحتاج حالي 8 – 10 دقائق .
·تقطع العجينة لخمس قطع و تغطى جيداً و تترك لمدة ساعة أو ساعتين لترتاح .
·تثبت ماكينة رق الباستا على منضدة العمل و ترش بالطحين أو السميد الناعم و ترش الطاولة لمنع التصاق العجينة المرققة .
·تؤخذ أول قطعة من العجينة و تعير الماكينة على أكبر عيار , عندي 7 , و تمرر أول قطعة عدة مرات على نفس العيار ثم تطوى و تكرر العملية حتى تتجانس .
·يغير عيار الماكينة على 6 و ترق العجينة , تكرر العملية مع انقاص العيار مرة كل مرة حتى نصل للرق المطلوب , عيار 2 كافي بالنسبة لعجينتي .
·تقطع الباستا بالاشكال المرغوبة و يجب العمل سريعا في هذه المرحلة لان العجينة تجف بسرعة .
·إذا رغبت يمكنك تحضير العجينة و نشرها و تركها حتى تجف ثم تحفظ في كيس محكم الاغلاق لمدة اسبوع في مكان جاف .
·تكرر العملية مع الاربع كرات الباقية , حصيلة العمل و الكمية الناتجة من العيار الموجود في المقادير .
تعليقات (16)
