L2ma.com | لقمة طيبة | L2ma.com | لقمة طيبة | الكاتو الرخامي على طريقتي | الكيك, · , على, الشوكولا, ممكن | L2ma.com

القائمة الرئيسية

الكاتو الرخامي على طريقتي

الكاتب/ منى

23/05/2009

كاتو خفيف لطيف و منظره حلو و ما في داعي لتزيينه لان تزينه منه و فيه , بحب كتير قدمه للاولاد الصبح مع كاسة الحليب و هادا عدى عن منظره الحلو , طعمته بتجنن ..

اكيد الفكرة ممكن تطبقيها على ايا كيك انت شاطرة فيه و كمان لمنظر احلى ممكن تقسمي الكيك على تلات اقسام و تتركي واحد ابيض و واحد تلونيه بايا ملون غذائي عندك و واحد تلونيه بالشوكولا , بتطلع النيجة حلوة كتير و بتأثر عيون و قلوب الاولاد و كمان الكبار .

هلا انا اولادي بيحبوا الشوكولا اكتر من الكيك السادة لهيك كترك كمية مزيج الشوكولا , بس للضيوف بالعادة بقسم المزيج على قسمين متساويين بيطلع الكيك احلى

الكيك بالزبدة اطيب و نكهته مو ممكن تقارنيها بنفس الوصفة اذا عملتيها بالزيت , بس احيانا ما بتكون الزبدة عندي فأستبدلها بالزيت , بس هاد احيانا , لان الزبدة بتعطيه طعم غير

بالصحة و الهنا

حساب الوحدات الحرارية من semo :

عدد الحصص : 12حصة
السعرات الحرارية في الحصة الواحدة: 305 كالوري
في حال أردنا تقسيمه ل10 حصص تصبح السعرات الحرارية للقطعة :365 كالوري

4 بيض
فانيليا
كاسة و نصف سكر بودرة
2 كوب طحين
ثلاث ارباع كوب زبدة مذوبة على الميكروويف
كوب حليب دافي
2 ملعقة كبيرة عصير ليمون
2 ملعقة كبيرة كاكاو
2 ملعقة صغيرة بيكنغ بودر
رشة ملح direction

·         يوضع الحليب و الليمون في طبق و يترك جانباً , ينخل الطحين و البيكنغ بودر و الملح مرتان . تدهن صينية متوسطة بسعة 10 كوب بالزبدة و ترش بالطحين .

·         يخفق البيض حتى ينفش , يضاف السكر و الفانيليا و يخفق حتى يبيض المزيج لمدة عشر دقائق .

·         يضاف الحليب و الزبدة و يقلب الكيك بلطف , يضاف الطحين المنخول و يقلب الكل بلطف .

·         يقسم الخليط إلى قسمين قسم يترك سادة و القسم الثاني يمزج بلطف مع الكاكاو .

·         يصب المزيج السادة في الصينية , ثم يصب مزيج الشوكولا بشكل عشوائي فوقه و باستخدام شوكة نمررها في الكيك لعمل اشكال دائرية .

·         يخبز الكيك في الفرن المحمى على 180 و يترك لمدة 45 دقيقة او حتى ينضج .

أضافة إلى المفضلة (0) |

أقتباس | مشاهدات : 5435

تعليقات (42)

1 الكاتب semo, on 09-07-2010 12:30
ياسلام يامنوش هالكيك طاله معك بيطير العقل ماشاء الله وأنا بحب الشوكولاته أكتر من السدة معناها لازم ترفعيلي قطعة

بس أكيد قطاطك أكلوه صحتين وهنا عقلبن وعقلب كل اللي أكل منو أوحتى شم ريحتو

2 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 13:09
الله يعطيكي العافيه ست ايمان كتير حلو وانا بتبع طريقتك بتلوين الكيك وكتير بنال اعجاب الجمهور :roll

3 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 15:58
عفوا ست منى صار خطأ مطبعي فكرت انو ايمان يلي مساويته :upset

4 الكاتب غيث, on 09-07-2010 17:40
يا عين ما اطيب هالكاتو بعمل نفس الشكل باي طريقة كاتو عندي وبقسمه لنصفين قسم سادة وقسم بالشوكولا وبكثر ه اكتر لاننا كلنا من انصار الشوكولا وكتير حلو شكله وطيب شكرا منى

5 شهـــــية جدا
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 18:21
كنت عم أنتظر مقاديرها مع طريقتها من زمان

تضاف إلى قائمة الأطباق المميزة

)

يسلم دياتك منى

6 الكاتب منى, on 09-07-2010 20:41
هلا سمسوم

ايه و الله , الله يرحموا كان طيب :grin

ان شاء الله تعمليه و يكون يمممم و كلي عني كم لقمة

7 الكاتب منى, on 09-07-2010 20:47
هلا فروحة

و لا يهمك , ان شاء الله تجربيه شي مرة بطريقتي و يكون يممي و على زووء الجماهير

8 الكاتب منى, on 09-07-2010 20:52
هلا غيوثة

في حدا بالعالم ما بيحب الشوكولا :zzz

, الف صحة و هنا على الب القطط و تعيشي و تعملي يا حق

9 الكاتب منى, on 09-07-2010 20:55
هلا باتي

ان شاء الله تجربيها و تكون مستاهلة و على زووءك , شرفتي اختي

10 الكاتب semo, on 10-07-2010 17:11
هالكيك مبينتو كتير طيب من الكالوري الكتير اللي فيه
بس بنفس الوقت كتير مغذي وخصوصا للأطفال
الرد الجاية الكالوري

11 الكاتب منى, on 10-07-2010 17:27
سمسوم تناعش حث=صة احسن :roll

كل هل الكالوري بقطعة واحدة , الله ستر اني ما بحب الحلو

12 الكاتب ام خليل, on 10-07-2010 21:12
مرحبا الله ما اطيبه شكرا شكرا على جهودك رائعةانابحبها كتيرماعندي ولا تعليق غير الله يوففك روعة هل كيك تسلم ايديكي

13 الكاتب ام نور, on 11-07-2010 01:56
سلم دياتك منى كتير بيشهي

14 الكاتب semo, on 11-07-2010 13:31
ايه والله منوش كتير دسم وغني بتعرفي الزبدة والسكر والطحين والبيض والحليب وين بدن يروحو :grin

بس بدي اسألك هو طلع 12 قطعةو ولا أقل

15 الكاتب غيث, on 14-07-2010 21:04
الله يسلم هاليدين يا حق انا عملت طريقتك هالمرة وكتير طيبة وسهلة ولذيذة شكرا منى على كل جديد تقديميه لنا ونحن نحب التغيير سلمت هالانامل يا رب

16 الكاتب ام احمد الغالي, on 15-07-2010 20:54
يسلم دياتك منمون عللى هالكيكة جربتا وطلعت لزيزة جدا وانا واحمد قضينا السهرة عليها

17 الكاتب ام احمد الغالي, on 15-07-2010 20:56
انا قللت الحليب شوي وحطيت بشر ليمون بدال الليمون ششو رايك؟

18 الكاتب منى, on 18-07-2010 19:36
هلا ام خليل

كلك زووء اختي و يا ريت تجربيها و تكون يمممم :zzz

19 الكاتب منى, on 18-07-2010 19:39
هلا ام نور

من زووءك يا عسل

20 الكاتب shimOoO, on 20-07-2010 09:50
السلام عليكم كيفكو ياجماعة وكيفك اختي منى انشاءالله كلكو تمام بدي اشكرك كتييييييييير على هالوصفةالرهيبة بجد عملتها 5مرات في اقل من شهر والكل اعجب فيها انشاءالله بفرجيكو اياها لقدام وبدي طلب منك اختي منى تحكيلي كيف احط صور في الرد؟ بلليز ردي بسرعة متشوقة كتيير تشوفي الكيك واخد رايك فيها

21 الكاتب منى, on 20-07-2010 15:58
صحتين و الف الف عافية يا رب على البك و الب كل مين داق

و انا كمان اتحمست شوف الصور , ممكن تحمليهم على ايا موقع لتحميل الصور و بعدها حطي الرابط هون

22 الكاتب الدمشقية, on 25-07-2010 09:20
ما ئاء الله يا ست منى باين عليه روعة
وفعلاً أنا بخلط هيك ساة وكاكاو وبيطلع روعة

23 الكاتب منى, on 25-07-2010 10:55
الله يسلمك دمدومة

بعد زمان القمر ما بان , ان شاء الله خير

ان شاء الله تجربي الفكرة بخلطتي و يكون يمممي

24 الكاتب ايناس حمود, on 31-07-2010 15:24
ما شاء الله يشكله يشهي.. :upset

25 الكاتب منى, on 01-08-2010 08:31
من زووءك ايناس

26 الكاتب عالم آخر, on 14-08-2010 22:52
مرسي ممممممم شي طيب

27 الكاتب منى, on 15-08-2010 10:39
ان شاء الله تجربيه او تجي لعندي لدوقك ياه

28 الكاتب حنان, on 20-08-2010 10:51
السلام عليكم كل عام وانتم بخير ينعادعليناوعليكم بالف خير يارب :zzz

29 الكاتب منى, on 20-08-2010 11:50
و عليك ان شاء الله حنان و انت مر رب العالمين ااقرب و احب

30 الكاتب أجمل أيام العمر, on 25-09-2010 23:20
رهيبة كتير
بس تعبت واني انسخ المقادير والطريقة عشان اكتبها عدي بدفتر لانو الخط صغير ومش واضح

31 الكاتب منى, on 28-09-2010 11:07
اسفة للازعاج , رح كبر الخط من هون و رايح لحتى ترتاوحوا اكتر

مية اهلا و سهلا فيك اختي شرفتينا

32 الكاتب lolli, on 25-10-2010 09:46
مممممممم شو لذييييييذ
ذكرتيني بكاتو ماما نفس الطريقة تقريبا بس كانت تحط مقدار فنجان قهوة زيت نباتي بدل الزبدة
و اكتر الاحيان كانت قبل ما تسكبه بالقالب تضيف عليه ربع ملعقة صغيرة توابل مربى البانجان ....وكان مين ما يدوقه يطلب وصفته
الله يسلم ايدكي شي اكتر من رائع

33 الكاتب إسراء, on 06-11-2010 00:32
مرحبا
ممكن اسالك خمسطعشر سؤال قبل ما اعمل هالكيكة ؟؟؟؟؟؟
هلق شو العبرة من وضع الليمون فوق الحليب لانو مرة شفت نفس الفكرة بس بشي عجينة ماني متزكرة وين بالضبط بس عندك بالموقع
شغلة تانية انا عندي وصفة قريبة كتير على وصفتك عملتني ياها وحدة يوغسلافية بس بتعرف تحكي احسن مني ههههههههه
بس هيي بتغلي شي فنجان او فنجانين صغار مي واخر شي بترش البيكنغ بودر فوق المزيج وبتجيب المي المغلية
بتكتها فوق البيكنغ بودر بقوم بيعمل فقاعات وبفور ولمابخلص فوران منحرك المي مع المزيج ومنقلب المزيج بقالب كيك وبيطلع غيرر شكل
بقا فيني اعمل نفس وصفتك بس اني اخد قسم من الحليب واغليه وصبه فوق البيكنغ بودر ؟؟؟؟
وشكرا كتير

34 الكاتب منى, on 08-11-2010 13:24
هلا لولي

ممممم , البهارات فكرتها حلوة كتير و رح تعمل نكهة اضافية
رح جربها المرة التانية هيك ان شاء الله , نورتي اختي :zzz

35 الكاتب منى, on 09-11-2010 07:04
هلا اسراء

العبرة انه نعمل شي متل الساور كريم بس بمقادير بسيطة و متوفرة في كل بيت و هو رح يخلي الكيك غيررر شكل :zzz

ايه اكيد فيك تجربي الفكرة هون , و الفكرة عجبتني كتير اذا ضبطت ممكن تخبرينيب لان حبيت جربها

36 ممكن كم سؤال
الكاتب حمودي, on 12-01-2011 16:49
كم سعه الصحن ؟
وكمان نخلط الكيك بالخلاط الكهربائي ولا بملعقه خشب
؟
اي لين نخلط الكيك الساده والكاكاو كيف نحرك الشوكه الى اعلي ولا نعمل دوائر
...................
وانا بتشكرك كتير وسامحين ع كتر الاسئله
مع خاااااااااااااااالص تحياتي
Ahmed

37 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-02-2011 12:26
السلام عليكم
عندي استفسار عن درجات الفرن يعني درجة 180 هي وسط لما عالية لما اخف شي وشكرا عالوصفات الشهية والانيقة
:zzz

38 اسف ع المداخله
الكاتب حمودي, on 18-02-2011 15:11
180 هيا الدرجه الوسط بالفرن واول ما تشغليه يصير عاااااااااااالي مره بس اذا بتلاحظي انه في كل وصفه يسجلوا يشعل الفرن قبل بربع ساعه يعني يصير بعد ربع ساعه ع درجه حراااااره لانها تخف شي فشي حتى تصير مظبوطه
.....
ان شاء الله يكون هذا قصدك
وتقبلي خااااالص تحياتي
AHMED

39 دايماً ناجحة ... !!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-03-2011 21:17
السلام عليكم .. كيفكم ؟
ما اشتقتولي؟

صار زمان ما كتبت هون، أنا اشتقتلكم :zzz

.
بس طبعا عم تابع ممارسة الوصفات من هون، لو أن آخر إيام الحمل ما عاد إلي مراء لشي :cry

.

منوشة الحلوة :zzz

هالكيكة بتعقققققققد صار عملتها مرتين وبالمرتين عم تطلع بتجنن وبتسطل وناجحة وكتير طرية وطيبة وغير !
تاني مرة اليوم بدال الكاكاو حطيتلها ملون أحمر وأصانص طعمة الفراولة، بتجنن كمان طلعت تغيير شكل. الأهم من كل شي طبعا انها نافشة وطيبة كتير كتير. يسلمو دياتك

يا معلمتنا.

هلئ بدي اسأل ... ليش بالكاتويات يلي بتنحشى كريما وفواكه منستخدم الوصفة الاسفنجية وما منستخدم هي مثلا؟ :؟ آه ليش ؟

والسلام عليكم

40 الكاتب dado, on 19-04-2011 00:01
مرحبا منى
حابة بس خبرك تجربتي مع هالكاتو الظريف, من فترة كنت قاعدة لحالي وضايجة (تخيلي!) وجاي عبالي اتسلى بالمطبخ بشي شغلة. قلت لحالي وعند منوش الخبر اليقين, فتحت الموقع وبلشت بحبش حتى وصلت لهالكاتو المحترم، عجبني وحسيته بسيط ولذيذ وابن عالم وناس. نطيت عالمطبخ ونخلت الطحين فتحت البراد لطالع زبدة، قمت اكتشفت إنو ما بقيان بالعلبة إلا نتفة زغيرة، قلت يالله معلش بحط زيت نباتي، اجيت بدي اخفق البيض .. طلع ما في غير 3 بيضات ووحدة منهن كان فيها نقطة حمرا من جوا ما ارتحتلها، فـ كبيتها, قلت معلش بعمل نص الكمية احسن ما يطلع كتير. كملت الخفق وتحضير المزيج الأبيض وحطيته بالصينية. فتحت الخزانة ضربت ايدي على علبة الكاكاو.. طلع ماكو كاكاو!!!! :roll

فانطلق البخار من ادنيي، بس ما استسلمت، زدت شوية عصير ليمون وشوية عصير برتقال وبرش ليمونتين، وخبزت القالب، وللمفاجأة طلع اطيب كاتو بسيط بعمله بحياتيّ! وتوتة توتة

41 الكاتب dado, on 23-04-2011 22:55
منى
تجربتي الأولى ما وقفت بطريقي، لأنو هالكاتو مغري كتير.
اليوم حضرت الوصفة المزبوطة وكتير طلع حلو وطيب وخفيف وأنيق,
شكرا منوش

42 الكاتب منى, on 24-04-2011 14:45
دلوش كانو عم شوف شي مشهد من مطبخي حي و مباشر :grin

كتير بتصدف احيانا بتنقص على اكتر من مقدار و طبعا ما بكتشف غير بنص المعمعة و الله يخليلنا عمو الي جنبنا الي بيسعفني بهيك مرات ( عمو الي جنبنا هو الاسم الحركي للسبور ماركت )

برافو عليك انو قدرت تعدلي المقادير لحتى تمشي الحال , صحتين و هنا على المرتين :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 10/07/2010 )

< السابق		التالى >

[ عودة ]