كأس نسكافيه من النوع الفاتح Gold
كأس ماء بارد
كأس سكر







نضع النسكافيه والسكر والماء البارد في الخلاط ونشغل الخلاط لمدة دقيقتين حتى يسمك المزيج ويتكثف ويصبح كالكريما ..نضع المزيج في عبوة شفافة ونضعها في الفريزر لوقت الاستعمال (نصف ساعة في الفريزر على الاقل )وسيصبح المزيج مثل الايس كريم

لتحضير كوب كابتشينو:

نسخن كوب من لحليب في المايكروويف جيدا حتى الغليان (انا اضعه في المكروويف دقيقة كاملة )ثم نضع ملعقة كبيرة واحدة من مزيج الكابتشينو وبدون اضافة السكر ويحرك جيدا ..وستلاحظين الرغوة اللذيذة التي ستعلو كوب الكابتشينو ...واخيرا يرش وجه الكوب بالقرفة او الكاكاو او الفانيليا  وصحتين وعافية  ;)

ملاحظة:

يمكن اضافة سكر بعد التذوق لمحبي الحلاوة الزائدة 

تعليقات (43)

1  الكاتب منى, on 16-06-2010 12:55 سلم ايدك رنونة     انا هل الطريقة شفتها بالنت من زمان و جربتا بنسكافيه رد مج , كانت طيبة بس مو الي ببالي , هلا رح ارجع جربها بالغولد , و ان شاء الله تزبط معي لان انا كتلك , الكابتشينو هو مشروبي المفضل     الفيس بوك عم يموت عندي لهيك ما قدرت حمل الصور , بس ما صار رح ارجع عدل الوصفة

3  الكاتب farah, on 16-06-2010 17:22 هالطريقة جديدة أول مرة بسمع فيها معقولة تتجرب بس يا ترى ان نفرز الكمية كلها وانا حابة اعمل كوب واحد فكيف ؟؟   سؤال ممكن بعد ما اخلط الكمية اسكبها بقالب تجميد الثلج ويصير عندي مكعبات تستعمل كل مكعب لكوب ؟؟ بهالحالة بحتفظ بالمكعبات بعد ما يجمدوا مزبوط بكيس نايلون محكم الاغلاق شو رأيك ست رنا بتصير هالفكرة ولا لأ

4  الكاتب نور الأسلام, on 16-06-2010 18:55 السلام عليكم يسلمو اديك رنا شهيتيني كاني انا كمان شايفتها مرة عالنت بس ما جربتها لكن بما انك جربتيها واعتمديها رح جربها انا كمان

6  الكاتب ام نور, on 17-06-2010 14:10 السلام عليكم اخواتي الاعزاء  مبارح شفت الوصفة بالليل فما حبيت علق قلت بوقرة بساوي الوصفة وبخبركون شو بدي خبركون رهيب هالكابوتشينو بنصحكون دغري تجربوا ما بدها انتظار الشغلة انا استعملت ماركة شبيهة لا النسكافية غير شركة ونوع جولد عوض الماي تلج طحنتوا بالخلاط وحطيت نص كوب سكر لان ما بحب السكر كتير لما خفقتون مع بعض صاروا جامدين متل الكريما فعلا وحطيطون بالتلاجة صاروا متل البوظة ولما عملت فنجان طلعت الرغوة رهيبة مع شوية كريم شانتيه عالوج شغلة فالف شكر لا رنا الله يبارك فيكي ويخليلك عيلتك وسلم دياتك

7  الكاتب منى, on 17-06-2010 19:41 عوافي يا جماعة   و انا كمان رجعت جربته امبارحة , و المزيج بالخلاط صار متل كريما , استخدمت هل المرة ماتينال من نسكافيه , و كان طيب كتير كتير و طعمته بتجنن , بس سكره شوي زيادة على زووءي , مرة تانية رح خفف شوي ان شاء الله    الف شكر الك رنونة و بكرة ان شاء الله رح صور كاستي النسكافيه و حط الصورة

9  الكاتب منى, on 20-06-2010 11:04 هلا منولة   مين قال شوب , ستي الجو عنا ربيع و اخر حلاوة و ما في شوب و درجة الحرارة مة 36 ابدا , هي كلها اشاعات       امين يا رب , كلنا و نكون من عتقاء الشهر

10  الكاتب semo, on 20-06-2010 13:07 شو هالكابوتشينو اللي بياخد العقل ماشاء الله لازم جربه أنا من عشاق الكابتشينو  من زمان مادخلت الموقع عندي ظروف شوي صعبة ادعولي الله يفرجها  بس بصراحة لما دخلت عالموقع صارت ابتسامتي مرسومة عوجهي ورح جرب وادعيلك بكل نقطة بس لجيب النسكافيه

12  الكاتب منى, on 20-06-2010 19:17 سمسوم بقيتي بالي     ان شاء الله خير و ربي يفرجها عليك و على كل امة محمد , ان شاء الله معداية حبيبتي     طمنينا عنك ايه و الف الف شكر لعذابك و وقتك

13  الكاتب farah, on 20-06-2010 22:38 شو رأيكم بفكرتي ما حدا جاوبني جربها ولا كيف انتوا بتفرزو كل الكمية؟؟   حبابة منوش شو نسيني جوزاتي ما بدك تطمني عالنتيجة مستنيتك

14  الكاتب رنا, on 21-06-2010 06:03 مرحبا ااحلى ستات بالعالم ...كيفك منى انشالله منيحة ...حضري حالك رح نعملك كبسة على بيتك هالكم يوم انا وعصابة من البنات ...بتستقبلينا ...نحنا عزمنا حالنا بلا ماناخد موعد .....ياستي مالك بطول السيرة ههههههه شكرا كتير الك على تنزيل الوصفة واسفة على انقطاعي عن هالموقع الغالي بس والله لظروف قاهرة جدا جدا وسببها الرئيسي الدراسة العويصة الله يخلصني على خير عندي عشر مواد ادعولي   هلأ بقا مشان الكابتشينو ...عن جد صارت وصفتي المفضلة والسهلة والسريعة واحلى شي الرغوة اللذيذة يلي بيشوفها بفكرني كتير بروفيشينال تذكرت اول مرة عملته وضيفته لزوجي قعد ساعتين يشكرني ويقلي يسلمو ايديكي اكيد تعبتي كتير وانا عم بضحك وقله شفت شلون انا شطوووووورة ولما عرف الطريقة تفاجأ كتير لانه انا اول ماجربت ...جربتها بمقدار قليل وتوقعت انه رح ارميها بس الحمد لله مشي حالها     عزيزتي ريم ...الوصفة الاساسية نسكافيه غولد ...انا جربتها بالنسكافيه الغامقة ماعطتني الطعم اللي بدي ياه ...انا احيانا برش على وجه الكوب نسكافيه غامقة مشان تعطي طعم مرار لذيذ..فيكي تجربي باي نوع بس ماتنسي تخبريني النتيجة     اهلا مدام فرح ...مابعرف شو بدي قلك بالنسبة لقوالب التجميد مارح تزبط ...لانه المزيج رح يكون كريمي ومارح يوصل للحالة الصلبة ابدا ...رح يضل كثيف بكثافة العسل تقريبا حتى لو ضل بالفريزر ...انا بحطه بمطربان زجاجي بالفريزر وبستعمل كل مابدي بسهولة وشكرا الك لاهتمامك

15  الكاتب رنا, on 21-06-2010 06:14 نور الاسلام ...انشالله تجربي الوصفة وتعجبك ومية هلا فيكي       دمدوم  شكرا للتجريب السريع للوصفة وبتمنى تضلي على تواصل معنا حتى تكبر عيلتنا اكتر واكتر وصحتين وهنا على قلبك بالكابتشينو       ام نور  دائما بكل وصفة الا ماتضيفي لمسة خاصة ,ماشاء الله ست بيت ممتازة ....شكرا لالك على تجريبك للوصفة ...وبصراحة انا تلميذة صغيرة جدا امام خبرتك انتي ومنى ...الله يخليكم يارب...فكرة التلج كتير حلوة ومعقولة ان شاء الله رح جربها بالمرة القادمة        منى, عن جد شكرا لانه فتحتيلي ابواب الشهرة هههههه بكرا العالم بنادولي رنا كابتشينو ...حلو هالاسم ها ...ياستي صحتين ع قلبك الكابتشينو اكيد سكره زيادة عليكي لانه ماشاء الله عنك حلاوتك بتكفي           منال,  شكرا لتجريب الوصفة والله يبارك للجميع بالشهر الفضيل       semo  تسلمي يااحلى اخصائية تغذية ...بس بتعرفي انصدمت بعدد سعرات الحرارية للكوب ...لانه هالاشياء انا مابحسبها ...عالبيعة يعني صحتين وهنا على قلبك اذا جربتيه وشكرا الك لاغناء الوصفة                بس نسيت قول شغلة ...بدي اشكر منى لانه ضافت صورة من عندها ...لانه بصراحة صوري ماكانوا زابطين ...ووقت شفت صورة تطبيق منى تمنيت هلأ ارجع اعمله ودوقه على طريقتها ...بكاسة شفافة حصرا

16  الكاتب منى, on 21-06-2010 10:51 رنون انا حطيته بكاسة شفافة قصدا لحتى تبان الرغوة المغرية و الي بتقلك تعى لحوسني     شكرا الك لان نزلتي الوصفة , انا متل ما قلت جربتها قبل هلا و لما ما زبطت معي غضيت نظر عنها , هلا اتكرت اني لما جربتها جربتها بحليب عواض المي , قصدي باول خطوة , و كمان بنسكافيه رد ماج , كانت فاشلة .    هلا مع طريقتك رجعت نجحت معي , هلى راسي احلى رنون كابتشينو .    انا بستناكي , و بتشرفي انتي و الصبايا كلهن , بس لازم تعطوني خبر لحتى اعملي قالب كاتو و اعزم صبايا الموقع الحلبيات , لحتى نتعرف على بعض   مو حلوة ضيفكن بس نسكافيه

20  الكاتب larooo, on 22-06-2010 14:34 مساء الخير ..انا امبارح جربتها والطعمة كتير طيبة ..بس ماطلعت كمية الرغوة متل الصورة   ياترى التحريك لازم يكون فترة معينة او بسرعة  بدي رغوووة انا كمان   يعطيكم العافية منى ورنا

21  الكاتب منى, on 22-06-2010 15:02 لا لاروش حركته عادي و هي الرغوة كلها بالمزيج المتلج , بدوب و بتطفى على الوج     ما بعرف شو الي صار , بركي رنون بتساعدك

23  الكاتب hajar, on 22-06-2010 18:12 انا بعرف انو هي طريقة الكافي لاتيه بس الاختلاف هون انو بتنحط بالفريزر اممممممممم يسلمو عالوصفة

24  الكاتب منى, on 23-06-2010 12:52 لارا عصرت مخي و اتذكرت اني سخنت الحليب على النار لان ما بحب طعمته بالمايكروويف , ممكن يكون هادا هوالفرق , لان بس ما غلى لحاله عمل رغوة و لما ضفت عليه المزبج المجلد زادت كتير

25  الكاتب tota2010, on 23-06-2010 17:10 مرحبااااااا صبايا كلكم  انا بصراحة بمووووت بلقمة طيبة ومن زمان بحاول سجل بس ما زبط  اليوم اخييييييرا والحمدلله سجلت وانشالله بكون مع احلى عيلة بالدنيا  (اذا قبلتوني طبعأ)  وسلامي خصوصا لصاحبة احلى موقع منى الأمووووورة)  هلأ نيجي للكابتشينو  صراحة انا كمان قرأت الوصفة من فترة وكانت مع صور تفصيلية  شكلها كان روعة بس ما تشجعت اجربها لأنه ما كان عندي الجولدوصاحبة الوصفة كانت كاتبة انو ما بتطلع طيبة بالغامقة   انا كمان يومين نازلة اجازة و رح جربها عند أهلي   ومرة ثانية سلاااااااااااااامي للجميييييييع

26  الله يسلم ديات هالصبايا كللون الكاتب AYAH, on 23-06-2010 17:36 الحمدلله بطمنك مدام منى أخيرا مشي حال التسجيل  كتير انبسطت بحكياتك بالايميل بس للأسف الصبايا الي ذكرتيون ما بعرفون كون علاقاتي الاسرية متواضعة نوعا ما لأني عشت نصف حياتي بالامارات وقضيت البكالوريا والجامعة بحلب ولما تجوزت بوشي على بريطانياههه  بس متل ما قلتي صحيح بقولو عيلة وحدة بس مشتته هههههه  تعيشي وتترحمي الله يرحملك الوالد ويخليلك الوالدة يا رب   بصراحة الصبايا هون بطيرو العقل والاخت رنا أسرتلي قلبي بهالوصفة كون انو القهوة بانواعا هي صديقة أحزان الغربة والدراسة   بس سؤال بسيط بصراحة أنا ما بحط سكر ولو حطيت بكون سكرين فشو رأيك بيمشي الحال؟   أنا جربتا فعلا رائعة بس وقفني موضوع السكر  شكرا على اهتمامك وان شاء الله بنضل على اتصال عبر هالموقع الحلو

27  الكاتب tota2010, on 23-06-2010 18:33 هلأ ما بعرف قديش رح استنى حتى يبين تعليقي عالوصفة بس كنت بدي اشكر رنا وخبرها انه وصفاتها كتييييير طيبة

28  الكاتب larooo, on 23-06-2010 22:21 هههههه كتير مفيد عصر المخ ..بس انا حاسةانو المشكلة من الفريزر الفخم اللي عندي  عم يجمد زيادة عن اللزوم يمكن ..طلع اقسى من قوام البوظة ..او بالاحرى البوظة كمان بتطلع عندي قاسية مع انه اخف عيار ..رح جرب الحليب عالنار .مع اني   مابحب اجلي الركوة بعد غلي الحليب   ورح جرب الحليب البودرة .. لأنو كتير نال اعجاب  ابو الشباب ..لازم يزبط   ان شاء الله

29  الكاتب فرفوشة, on 23-06-2010 22:22 فعلا شي مغري...   يعني اللي ما بيشرب قهوة بيشتهي يجرب هالوصفة على قد ماهي سهلة   الله يسلم إيديك يارب ويعطيك العافية   والله يجزيك الف خير منى   يعني صحي بنطول الغيبات بس ما إلنا إلا لقمة طيبة   الله يسعدك ويبارك فيك ولا يضيع لك تعب

30  الكاتب منى, on 24-06-2010 07:30 هلا توتا   البيت بيتك و انت بس ما فتي بتصيري من العيلة فورا مية اهلا و سهلا فيك اختي     ان شاء الله توصلي بالسلامة و بخير و صحة و اذا جربتي الوصفة خبرينا

31  الكاتب tota2010, on 24-06-2010 09:31 والله عنجد انا من زمااااان متابعة الموقع وبحس انكم عيلتي حتى لو ما شفتكم بعيوني بشوفكم بقلبي   انا جربت كتيير وصفات واولهم السمبوسك ما بتذكر ع شوكنت بدور وقتها بالنت قام طلع الموقع بوجهي وضليتني اقرأ فبه وما قمت لحتى اجى ابوالشباب وتاني يوم قمت لجرب السمبوسك بنص الكمية وانا صراحة مترددة (مابتعرفي شو وصفات النت عملت فيي مقالب) تشجعت اجربها للانك كاتبة كل شي بالتفصيل عدا عن التعليقات والردود اللي بتزيد التوضيح وبتظهر النتائج وبس قليتها اول وحدة طلعت من المقلاة على تمي دغري ويمممممييي شو مقرمشةومن وقتها وانا بجرب كل شي عالغميض وطبعاهلأ ابو الشباب كل ما اعمل شي جديد بقوللي لقمة طيبة صح؟؟ ومرات بيتفرج معي عالموقع وطبعا كل صحباتي وجيراني وقرايبي عرفوا بالموقع اللي بضلني احكي عنه وين ما رحت واخيرا وليس اخراحبيت اشكرك ع اكلاتك اللي بتشبه اكلاتناممممممم كتييييير طيبة   واسفه عالرد الطوييييل بس هادا اللي كنت بدي احكيه وفيه اكتر من وقت ما صرت تابع الموقع

33  الكاتب منى, on 26-06-2010 20:12 هلا توتا   الف الف صحة و هنا و عافية على السمبوسك لان حبيتيه و زبط معك و كمان على غير وصفات   مرة تانية نورتي بيتك

34  الكاتب رنا, on 26-06-2010 22:29 اول شي عزيزتي لاروو اسفة كتير للتأخير بالرد بس والله عندي فحص وعشر مواد يعني صارت اعصابي مو بس بدها كابتشينو ...بدها قهوة سادة وبكل الانواع  بالنسبة لسؤالك ...ماطلعت رغوة لان الحليب بارد وهاد السبب كل ماغليتي الحليب وسخن منيح بتتطلع الرغوة اكتر انا لما بسخن الحليب بالمكرويف بطالع المزيج من الفريزر مباشرة (من الفريزر للكوب فوووورا)بتطلع على وجهه الرغوة حتى بدون تحريك انشالله تجربيه ويعجبك مرة تانية وعوافي على قلبك عزيزتي     حبيبة قلبي فرح شكرا الك عالرد ...ساهمتوااا برفع المعنويات بشكل ملحوووظ بعد ماصارت المعنويات بالارض من ورا الفحص       اهلا وسهلا فيكي توتا بعيلتنا المطبخية الالكترونية     اهلا وسهلا فيكي اية (اسرت قلبك الوصفة)تعبير رائع جدا اخدني لجو رومانسي جميييييل   انشاللهتجربي الكابتشينو وتحبيه والله يرد ك لبلادك سالمة غانمة يارب      بس برجع بذكر قوام المزيج رح يكون سميك ومتل الكريم شانتيه..وقت بكون بالخلاط ووقت بتحطيه بالفريزر مارح يتجمد رح يضل على وضعه بس طبعا رح يبرد...بس انتبهوا انه ماتزيدوا فترة الخلط بالخلاط او تنقصوها ...بس بتكاثف كله بوقف الخلاط

35  الكاتب منى, on 27-06-2010 08:25 هلا اية   الحمد لله زبط التسجيل و انا اسفة للمشكلة الي صارت   الله يوفقك بدراستك و يبعتلك مين ينسيك احزانك     و انا كمان انبسطت كتير بايميلك و مية هلا فيك هون

40  الكاتب منى, on 08-09-2010 00:06 الله يديم المحبة و الود دوما نعووم       ان شاء الله تجاوبك رنوش

41  الكاتب رغد غسان علاء الدين, on 27-01-2011 10:00 ممممممممم شكلها مغري الصراحة..رح جرب وخبركن بالنتائج

42  الكاتب MAIS911, on 16-04-2011 02:41 شكرا اخت رنا علا الوصفه بصراحه انا كتيير بحب الكابتشينو وصرلي زمان ما شربتو علا اصولو لان هون بكندامادقت كبتشينو طيب المهم هلا انا جربت الوصفه بس بنسكافيه بني اسمها ريتشي ريتشي بالرغم من انو طعمتها كتييرقويه بس طلعت بالكابتشينو كتيير خفيفه يعني كاني عم اشرب كاسة حليب عادي شو سبب برأيك معقوله من نوع القهوه ولا شو ؟وشكرا مرا تاني عم نعزبكون معنا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved