L2ma.com | لقمة طيبة | L2ma.com | لقمة طيبة | تحضير الريكوتا في البيت | على, الريكوتا, الحليب, كتير, الي | L2ma.com

القائمة الرئيسية

تحضير الريكوتا في البيت

الكاتب/ منى

11/10/2009

المونديال السنة غريب و كل الفرق القوية طلعت لبرة و عم تكش واحد ورا التاني , و فريقي ايطاليا طلع بكير . المشكلة كل ما بحط عيني على فريق بيطلع , ايطاليا و فرنسا و بعدها البرازيل و هلا ما بقي غير اسبانيا , فريق العيلة الرسمي , و ان شاء الله هادا رح يبيض وجنا .

هلا كتير بيتهموا البنات انهم بيشجعوا ايطاليا لاسباب بايخة , يعني معقولة انا شجع ايطاليا لان لاعبيها حلويين و سمران و عيونهم خضر و طوال و كلهم عضلات , معقولة تكون اسبابي سخيفة لهل الدرجة !!

لااا , يا جماعة , انا عندي اسباب مقنعة , متل ما شجعت كوريا الشمالية لانها من محور الشر و متل ما شجعت اليابان لان حبيت اليابانيين بعد برنامج خواطر و متل ما شجعت الهندوراس لانه فريق اندبوري و مو معروف قرعة ابوه منين و اضعف فريق في المونديال , كمان شجعت ايطاليا لان الايطاليين بيشبهوا السوريين ,العيلة عندهم نمبر ون و حمقيين و عصبيين و نضايفيين على بيوتهم شو ما كانت حالة شوارعهم بتكب و بتعمي أما أهم سبب لان بحب الطبخ الايطالي و عندي بعد المطبخ السوري و التركي بيجي الايطالي . و بما اني بشجعهم لمطبخهم , حبيت يكون التشجيع على طريقتي و حضرت جبنتهم الريكوتا بقى لو سمحتوا ايا حدى عنده غير فريق لا يورجيني وجه هون , ايواااااا

تحضير الريكوتا على الطريقة الاصلية في البيت , مستحيل نوعا ما , لان بالطريقة الايطالية بيجيبوا كل المصل الي زاد من عمليات تحضير مختلف انواع الجبنة و بعيدوا طبخه على نار هادية كتير لمدة طويلة ( من هون اجى الاسم ) لحتى تظهر على الوج جبنة الريكوتا بكمية بسيطة , لهيك بتكون الريكوتا الاصلية غالية نوعا ما و كمان طعمها غني .

في كتير وصفات بدها ريكوتا من التشيز كيك للرافيولي للازانيا لغيره و العبوات الصغيرة من الريكوتا بحس ان ما فيها بركة لهيل السبب صرت حضرها في البيت و وصفتي هي النسخة السهلة و البسيطة للريكوتا و المبدأ كتير بيشبه تحضير القريشة و الجبنة الروسية و الجبنة الهندية و كتير انواع جبنة بتتحضر في العالم كله على نفس المبدأ باختلافات بسيطة , لهيك نحنا ممكن نستخدم القريشة المتوفرة عنا بالسوق عوض الريكوتا في بعض الوصفات . نكهة الريكوتا الي حضرناها بالبيت رح يكون " حيادي " بيقبل الحلو و بيقبل المالح , لهيك انا ما بضيف ملح اثناء التحضير الا اذا كنت عم حضرها للازانيا مثلا او لشي مالح .

ممكن نحضر الريكوتا بالحليب بس , اما اذا بدنا تكون النكهة مميزة اكتر منضيف نصف كوب من الكريم فريش و نفس الوصفة ممكن نحضرها اما بالحليب بتصير ريكوتا و اما باللبن فبتصير أفرب على القريشة . و انا كل هل الوصفات مجربتها و كلها طيبة و على ضمانتي ان شاء الله , بس ريكوتا الحليب بتناسب كل الوصفات و قريبة على الريكوتا الأصلية اكتر و ريكوتا اللبن بتناسب الموالح و قريبة للقريشة . و انا مرة جربت حضرها بلترين حليب مع كوب لبن و كانت يممممم .

الحليب الي استخدمه هو الحليب الكامل الدسم الي بيجي من المزارع فورا لعنا , و ممكن كمان تاخدي حليب عادي من محل موثوق لحتى ما يكون سايط و بلا طعمة , اما الحليب المبستر فمو مفضل ان تستخدميه هون

الكمية الي بتطلع من كيلو حليب قليلة و هي تقريباً من 150 غ إلى 200 غ في احسن الحالات , لهيك نصيحة ممكن تضاعفي المقدار او حتى اكتر حسب الي لازمك .

حكيت كتير بس الوصفة كتير سهلة و بس ما جربتيها مرة رح تعتمديها ان شاء الله , توفير على الجيبة و مضمونة بمكوناتها و ما أطيبها و هي لسا تازة و دافية شوي مع سلطة فواكة باردة و عسل و جوز و قرفة على الوج , هيك اكلة بسيطة و بتجنن .

بالصحة و الهنا

2 كيلو حليب كامل الدسم
نصف كوب كريم سائل ( اختياري )
3 - 4 ملعقة كبيرة خل أو عصير ليمون
ملعقة صغيرة ملح ( استخدميها فقط اذا كانت الريكوتا للوصفات المالحة )
طريقة التحضير

ü 1 - يوضع الحليب و الكريم و الملح على نار متوسطة و يحرك حتى يسخن , نتوقف عن التحريك و يترك المزيج حتى يغلي .

ü 2 - يضاف عصير الليمون أو الخل و يترك ليغلي على نار هادئة جداً جداً لمدة دقيقة أو دقيقتان أو حتى تتشكل كتل صغير في الحليب , يمكن إضافة المزيد من الحمض إذا لم يتكتل الحليب . ترفع عن النار و توضع جانباً و تترك حتى تبرد .

ü 3 – تجهز مصفاة صغيرة ذات ثقوب ناعمة و تغطى بقماش رقيق , يصب الحليب المتكتل على المصفاة و يترك ليصفى مدة ربع ساعة .

على الشاش بانتظار ان تخلص من المي الزايدة

ü 4 – تجمع القماشة بلطف على الجبنة و تكبس بلطف بين اليدين للتخلص من كمية الماء الزائدة .

ü – تستعمل الجبنة حسب الرغبة و يمكن حفظها في البراد لبضعة ايام حسب درجة الحرارة . و هذه الكمية تعطينا ما بين 300 – 400 غرام أي ما يقارب الكوبين أو أقل .

ü 6 – ما تبقى من الحليب ( المصل ) يمكن الاستفادة منه عوضاً عن رميه و استعماله لتحضير عجينة رائعة أو طبخ الرز أو لتحضير شوربة بالخضار , اختاري ما يناسب عائلتك .

أضافة إلى المفضلة (1) |

أقتباس | مشاهدات : 4087

تعليقات (25)

1 ...........
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-07-2010 20:24
بتعرفي؟
أنا هالطريقة بستخدما مشان الحلويات
لأنو هون ببريطانيا منحتار بشو بدنا نحشي للحلويات :upset

مرة ساويتا و حشيت فيا حلاوة الجبن بس بعد ما خلطتا بشوية قشطة و طلعت طيبة ما إشبا شي
الحاجة ام الاختراع متل ما بقولو

يسلمو كتير عالوصفات الطيبة

7ayah Dayyen

2 الكاتب gsm, on 08-07-2010 22:09
مو معقولة يا منى
انا على طول بعمل هل الطريقة وبخلط هل الجبنة مع علبة قشطة من شان الحشي للقطايف والشعيبيات وانا متعلمة هل الطريقة من ماما الله يخليلي ياها بس انا ما بحط كريمة بس حليب
أتاريني عم اعمل جبنة ومالي خبر هههههه
يسلموا إيديك كتيير منوش

3 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 01:25
الله يعطيكي العافيه والله فكره حلوه.
بس حبيت اسال 7ayahوسلم عليها هلق انت وين ببريطانيا ليكون قريبه عليي

انا عايشه بادنبراوبتمنى انو نزور بعض وهي منكون تعرفنا على بعض عن طريق المدام منى الله يحفظها

4 الكاتب gsm, on 09-07-2010 11:08
لك عن جد انا كمان ببريطانيا بس بمانشتر ؟ قريبة علي ولا لأ؟؟بلكي بنتعرف على بعض شخصي :zzz

5 الكاتب semo, on 09-07-2010 12:34
فعلا كتير سهلةو متل ماقالت الأخت gsm بتنعمل للقطايف كمان وعجبتني فكرة المي اللي بتبقى أنو بنقدر نستفيد منها لأنو مستحيل كانت تخطر ببالي يعطيكي ألف عافية منوشتنا الحلوة

6 الكاتب foforose, on 09-07-2010 13:01
يعني بدك تقولي شي اربع ساعات بالقطار بس كيف بدنا ناخد ارقام بعض

انا بتشرف والله

7 يي في آية تانية بالموقع؟
الكاتب AYAH, on 09-07-2010 13:01
أنا كمان آية ومن بريطتنيا
يمكن اسمك هيا صح؟
فوفو وأنا بادنبرا
شلونك خيت انتي وين ساكنة؟
محسبة حالي بعرف كل السوريات هون
قليلي لشوف عرفتيني؟
ما غيري

8 الكاتب AYAH, on 09-07-2010 13:04
هنادي تسلمي عالوصفة أنا كمان دائما بعملا وبخلطا مع القشطة وبحشي فيا الكنافة بتطلع بتجنن
وكمان للقطايف والوربات
فعلا الحاجة ام الاختراع
بس للتشيز كيك بستعمل جبنة مسكربوني كتير طيبة

9 .....
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 13:51
يا سلام على هالصدف الحلوة :zzz

بس للأسف أنا بعيدة عنكن للجنوووووب :upset

أنا بــكارديف عاصمتا لـــويلز
يمكن اسمعتوا عن ويلز...بقولوا عنا إنّا مقاطعة قروية لأنو فيا مزارع كتير و ما فيا كتير سكان...مشان هيك هيي كتير حلوة و هادية

و عندي إخت عايشة بـــلندن عاصمتا لــانجلترا
أكتر مدينة معجوقة بالدنيا كلها :eek

كنت بتمنى تكونوا قريب مني :cry

7ayah Dayyen

10 .......
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 15:09
لا أنا مو آية
أنا حياه
رقم سبعة هو حرف الـحاء بقاموس المسجات :grin

و إذا بدي كون دقيقة أكتر
حياه اسم بنوتتي إلي لسة ما إجت

لأنو أنا متزوجة جديد و من أنا بنت و أنا حابة هالاسم

7ayah Dayyen

11 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 15:36
لك اهلين ايه انت زوجك شهم؟
انا زوجي مهند عرفتيني

اهلين اختي 7ayah اي لكن بسمع بكارديف وبقولو انها حلوه,يلا انشاءالله منتعرف على بعض قريبا وكمان ادنبرا كتير مدينه حلوه شرفينا بزياره.

12 الكاتب AYAH, on 09-07-2010 16:21
لك فوفو هاد انتي يعلى قطاطك تاركة بنوتتك عم تبكي وقاعدة عالنت؟.....متلي يعني قاعدة بمخبر الجامعة وعم قلب بلقمة طيبة بدل ما ألتفت لدراستي ههههههه
اهلين عزيزتي حياة الله يبعتلك حياة حلوة ومليانة حب ويلز حلوة بس والله بعيدة عن كلشي
تفضلي لعنا ادنبرا كمان كتير حلوة أنا بحبا لأنا بتجمع بين الريف والمدينة سوا
على فكرة أنا وفوفو بيناتنا شارع
نحن هون متل العيلة وكلنا بنعرف بعض
الله يوفق منى ويسلما يا رب ولا تآخذينا صار موقع تعارف بس عالخير ان شالله
:zzz

13 ...........
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 16:38
ان شاء الله...
و انتو كمان شرفوني مشان تشوفوا كارديف

كنت بدي اسألك منى
فيكي تحكيلنا أكتر عن استخدامات المصل

لأنو أنا دائماً بكبو و ما خطرلي اني استخدمو بشي
بس مرة سمعت من وحدة حلبية عنا بكارديف إنو بحلب بستخدموه لعجن عجينة المعمول :roll

هالشي صحيح يا ترى

7ayah Dayyen

14 الكاتب منى, on 09-07-2010 20:39
سلام صبايا :grin

حاسة حالي جوى صبحية نسوانية , و انتو اخدكم الحديث و انا جوى في المطبخ عم حضر القهوة , و لا كلمة لوقت ما اجي و ركز معكم

اتفضلوا , قهوتكم سادة و الا بسكر

15 الكاتب منى, on 09-07-2010 20:43
هلا حياة

ما في حكي اكتر من الي قلته , ممكن تستعمليه و بيطلع خطير مع العجائن , و ممكن تجربي تحضري فيه شي وصفة , بس ممكن تتغير شوي طعمتها لهيك انتي و زوق عيلتك

يمكن قصدك مية الجبنة لحضير الاقراص بعجوة :roll

16 ........
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-07-2010 21:25
أها
ممكن :roll

شكراً كتير منى

و شكراً للصبايا كمان
كانت جـَمـْعة نسوانية حلوة :grin

7ayah Dayyen

17 الكاتب الدمشقية, on 28-07-2010 13:24
عزيزتي منى سلم ايدك
بس هي نحنا منسميها قريشة أو بيقولو فرط الحليب

18 الكاتب منى, on 29-07-2010 18:00
تمام دمدومة

هي نوع معروف بكل العالم و كل بلد بيسميها شي

19 .............
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 13-11-2010 19:38
اتذكرت شغلة ممكن تنعمل من الحليب المفروط
ممكن نعمل منـّا جبنة دهن متل جبنة كيري أو بوك تقريباً
هالطريقة علمتني ياها اختي من زمان
بس ما بعرف كيف ما خطرت عبالي لهلأ
المهم
أنا فرطت تقريباً لترين حليب
(عم قول تقريباً لأنو شربت منن كاسة قبل ما اغليون :grin

)
و بعدا صفيتون بس مو للآخر و حطيتن جوا آلة الفرم إلي انتي حاطة صورتا بهاد الرابط
آلة الفرم
و حطيتن معن و هنن سخنين شي 50غ زبدة مع رشة صغيــرة من الملح و رشة صغيـــرة من البيكنج باودر و نــخــلــط حتى نحصل على خليط ناعم جداً
و نضع الخليط في مرطبان زجاجي و نضعه في البراد
و أهم شي انو ما يوصل للجبنة ماء لأنو بتخرب بسرعة
و المعلقة الي منصب فيا لازم تكون نظيفة و ناشفة
وهاي صورة للجبنة الي عملتا أنا
[http://www.l2ma.com/content/view/274/25/img]null[/img]
و هاي صورة تانية
http://www.l2ma.com/content/view/274/25/

و هيك منكون عم ناكل جبنة و نحن منعرف شو حاطين فيا

ما بعرف اذا رح يزبطو الصور لأني نسيت كيف منزلن هون

7ayah Dayyen

20 الكاتب منى, on 14-11-2010 07:09
يييي , حياة الطريقة سهلة كتير و مقنعة ’ ممكن تبعتيلي رابط الصورة لان حبيت نول هل الرد بوصفة لحالها

21 ..............
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-11-2010 14:53
اوك
هاد الرابط الأول
http://www10.0zz0.com/2010/11/13/18/320720692.jpg
و هاد الرابط التاني
http://www10.0zz0.com/2010/11/13/18/777861148.jpg
(أنا هلأ عرفت ليش ما طلعو الصور

الروابط كانو خطأ :grin

)
و بدي ضيف ملاحظة صغيرة
إذا بدا الجبنة تطلع أطرى شوي أو مريئة أكتر منضيفلا شوي من المصل مو ماء ...المصل الي طلع من التصفاية...و بس

و شكراَ إلك منى
سلامي

7ayah Dayyen

22 ما كو حليب تازا !!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-01-2011 21:37
السلام عليكم

منوش :upset

يعليكي

ليه ما بتزبط بالحليب المبستر ؟؟
شو ها ... مافي شي بيزبط فيه .........
من وين بدي جيب حليب تازا ؟ :sigh

.. واااع

والسلام عليكم

23 الكاتب منى, on 19-01-2011 12:44
لا اذا ماكو مشكلة :grin

و الله ما بعرف بيصير تزبط , هلا اصولها عيك بس هي ما بدها تخمير فاتوقع انه بيصير يمشي حالها

امبارحة لسا عامتها للريكوتا , بتعقد اطيب من الجاهز بترليون مرة

24 الكاتب DOUHA, on 24-07-2011 00:28
على الاغلب رح جربا برمضان ,,,,
هون برمضان في محلات بتعمل هل الجبنة مشان الكنافة
يلا بعملا انا
سؤالي هون الكريم فريش في نوع للطبخ وللحلو معناها اذا بدي اعملا للحلو حط الكريمة الحلوة مو؟

بعرف سؤال بديهي بس يلا معلش ههههه

25 الكاتب منى, on 24-07-2011 09:57
اشتقتلك

انا بستعمل دوما الكريم العادي المخصص للطبخ , بحب طعمته و سماكيته اكتر من كريم الحلويات

كل سنة و انت بخير و ينعاد علينا و نحنا احسن من هلا بكتير

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 09/07/2010 )

< السابق		التالى >

[ عودة ]