من فترة و اشيا كتيرة شاغلة بالي و شاغلة وقتي , فكرة براسي عم تطن و بجنبها كذا فكرة .

خلونا من افكاري و خلونا نحكي بالمهم , يوم الاربعاء الماضي كان عيد لقمة طيبة التالت , سبحان الله الدنيا عم تمشي . أحيانا منفكرها عم تركض و  احيانا بتوقف كلها عند لحظة . الي عم حسه ان حياتنا كلها هي قطرات مي عم تضرب على كفانا و عم تمرق بين الأصابع من دون ما نقدر نلمها و لا نوقف سيلانها . تلات سنين مرقت كانها لمحة .

أنا بنص هل الافكار اجاني تلفون من جارتي القديمة في بيتي القديم الي كان و لا زال الها معزة كتير كبيرة بقلبي , خالة ام عزت واحدة من الي علموني الطبخ و الي كانت بطولة بالها و حنيتها علي متل امي . كان صوتها كانه حلقة من سلسلة طويلة عم تمر براسي , عن جد صدفة غريبة كتير , اتصالها فيني و انا في منتصف ازمة حنينية انتابتني في منتصف النهار . الغريب انها ما اتصلت فيني من اكتر من خمس او ست سنين . لما سمعت صوتها الهادي حسيت اديه  مشتاقتلها , و اديه ما لازم ناخد الاشيا الي اتعودنا عليها كجزء من حياتنا على انها شي عادي .

يييي , رجعنا لافكاري . خلونا في المفيد احسن  . حكيت السنة الماضية كيف بدي لقمة طيبة و هل السنة رح احكيلكن عن اشيا جديدة صارت معي  بسبب لقمة طيبة

الي اتغير من سنة لهلأ أن الموقع صار اله وجود على أرض الواقع بالنسبة لحياتي , أو بكلام أصح اتعرفت على كتير ناس  معرفتهن أسعدتني جدا عن طريقه سواء بمقبلات شخصية أو باتصالات تلفونية . بداية بالسيد جورج حسني , رئيس الجمعية السورية لذواقي الطعام . الست مارلين مطر , مؤلفة كتب طهي و مقدمة برامج طهي على عدة قنوات لبنانية . الست اعتدال من الكويت . الست أمل من الكويت . الست ايمان من دبي و المجموعة الطيبة الي عم تشتغل على بوابتي و غيرهم من الي ما كتير أفضل أن أذكر اسماهن .

على المستوى الشخصي عم يصير معي قصص كتير , و اكتر قصة اتكررت معي هي اني بكون بزيارة ما بعرف كل الموجوديين فيها , لما بتعرفنا صاحبة البيت على بعضنا بتقلي واحدة من المعازيم  يعني انت منى صابوني لقمة طيبة

مممم , طيب وصلنا للوصفة الي رح نحتفل فيها بلقمة . شايفين  هل الكيك الكبير الي بالصورة . في في المطبخ قالبين تانيين كمان بيقدي الكل و جودي لقمت الشاي و لاحقتني فيه

. الكل اله قطعة و فنجان شاي سخن بالقرفة و انا عم قطع الكيك رح خبركن كيف عملته و ليش هو واحد من وصفتي المفضلة . يمكن اغلب الناس بتحب التشيز كيك , انا كمان بحبه كتير بس احيانا ما بحب هل الطبقة السميكة من الكريمة مع طبقة رقيقة من البسكويت , لهيك خطرر ببالي جرب حضره بالكاتو . جربت الفكرة و حضرته و طلع منظره بيجنن بس بقيت اللمسة الاخيرة في التزيين !
ممم زينه متل التشيز كيك العادي بمربى توت او فريز و الا جرب شي جديد . بعد عصر المخ خطر ببالي زينه بالبسكويت المطحون و بما انها تجربه حطيته بس على طرف القالب . الي صار ان بعد ما الشعب داق الكيك ببسكويت و من دونه طالبني بطحن المزيد من البسكويت و رشه على باقي الكيك .و الكيك كله طلع بيجنن , الكاتو طري و الكريما ناعمة و غنية و التنين عم يكملوا بعض , ممم بيجنن

شو كمان , ايه في مفاجأتين على الطريق . المفاجأة الاولى رح اعلن عنها بعد حوالي الشهر و هي بتهم حلب و اهلها بالدرجة الاولى و المفاجاة التانية لسا بعيدة شوي بس كمان رح اعلن عنها بوقت مو بعيد اذا ربنا راد

pie filling النوع المفضل مثل الكرز او الفريز او التوت
أو بسكويت سادة  مطحون

تعليقات (55)

1  الكاتب فرفوشة, on 08-05-2010 18:09 ياعيني عليك يامنى شو فنانة  ماشاء الله حولك وحواليك  إن شاء الله ألف مبروك وعقبال مية سنة   والله يديم عليك الصحة والعافية وتنورينا بهيك أطباق  كل سنة وكل من شارك بهالموقع بألف خير

2  الكاتب منى, on 08-05-2010 19:20 كيف قفشتيني     لسا مو حاطة الوصفة على الصفحة الرئيسية     ان شاء الله الصحة و الهنا و الرزق الحلال حواليك و عليك , شكرا كتير الك

3  كل عام ولقمة طيبة بألف خير الكاتب لارا مينا, on 08-05-2010 20:54   مساء الخير أخت منى ولجميع الأعضاء الكرام , وإن شاء يكون الكل بألف خير .... كنت حابة أعيد الموقع من يوم الأربعاء الماضي بس قلت أنتظر شوي حتى تكون المعايدة رسمية وعن طريق وصفة تكون خاصة بهذه المناسبة..ويارب تكوني دايما مشغولة بالخير وتاخذي على قد عملك وتفانيك ... وعن جد إحنا مبسوطين لكل خطوة وتقدم للموقع وأهم شيء بالنسبة لنا وفي نظرنا أكيد إنه الموقع رقم واحد ,, وبانتظار المفاجآت على أحر من الجمر حتى لو كنا مش من أهل حلب ,ألف تحية لكي وملتقانا بإذن الله في عيد جديد للقمة طيبة.

5  السلام عليكم ورحمة الله وبركاته. الكاتب omtasneem, on 08-05-2010 21:37 السلام عليكم ورحمة الله وبركاته. والله متل ماقلت الايام بتمرء ومالنا حاسين وعن نفسي مابيجي يوم الا الصبح اول موقع بفتحو عالسريع لشوف شو في شي جديد وسبحان الله اذا عملت شي وصفة من الموقع ولاقت الاحسان بتلائيون مابصدقوا انو من النت الله يلبسك العافية ويديملك زوجك واولادك والله صار عندي فضول اشوفك واتعرف عليك عن قرب وكل سنة والموقع بتتطور وازدهار

6  الكاتب ميساء, on 08-05-2010 22:24 عزيزتي منى كل سنة ولقمة طيبة بألف خير ومن نجاح إلى نجاح بس بدي قلك أنو هالموقع الرائع هو من صنعك أنت وبتوفيق من رب العالمين لما أعطاك الله من موهبة واحساس وشفافية لأنك مو بس شيف رائعةولكن أنت إنسانة مرهفة وأنا دوما بس شوف وصفة جديدة إلك بفرح لأني بعرف حالي بدي أقرأ قبل الوصفة مقدمة أو فكرة أوخواطر كتير حلوة وبتلامس شعور كل واحدة منا في بيتنا اللي أنت جمعتينا فيه ومو بكيفنا لكن اجباري عنا وأنا واحدة من يلي مو ممكن أفتح النت واتصفح أي موقع قبل ما عرج على بيتي الحلو وطلطل على ميمو وأخواتهاوشوف أخبار الكل وأقرأ كل تعليق و كل نصيحة وكل نهفة حتى صرت حافظة أسماء أولادكن وبعرف شو بتحبو و شو بتشتغلو وشو بتدرسو   شكرا كتير منى لمحبتك وقلبك الكبير والله يسعدك ويهنيك بعمرك برفقة عيلتك الحلوة وكل حبايبك يا رب

8  الكاتب فرفوشة, on 08-05-2010 23:05 سبحان الله !!!  من كتر ما حبيت هالموقع صرت أتصفحه باليوم كذا مرة وأشوف شو الجديد(المحبة من الله) شو أعمل مو بإيدي   الله يجزيك الخير ع الدعوات الحلوة ويبارك فيك يارب

9  الكاتب منى, on 09-05-2010 06:57 هلا لارا   مسا الخيرات و الورد البلدي   انا كمان مبسوطة فيك و بتلاقيني بس ما شوف اسمك بين المتصفحين ابتسم لا شعوراياً   الف شر الك لارا و على فكرة الوصفات وصلي و شكلهم مغري كتير

10  الكاتب منى, on 09-05-2010 07:03 هلا ام نور   و انت بالف خير و صحة انت و اولادك و ابو الشباب   متل ما قلتلك الغيبة في وراها قصتين ببقى بخبركن عنهن لما بيجي وقتهن

11  الكاتب منى, on 09-05-2010 07:21 هلا ام تسنيم   و عليكم السلام و اتم التسليم  الله يخليلي ياكي على هل الدعوة الكريمة و الغالية   صحتين و عوافي على كل شي جربتيه و زبط معك و نال اعجاب الجماهير

12  الكاتب بشرى, on 09-05-2010 15:37 الغالية منى .. كل سنة وإنتي ولقمة طيبة بألف خير يارب .. الله يديم علينا هالعيلة الحلوة ويديم المحبة يارب .. سنة مرت وما حسيت فيها بالنسبة إلي .. الله يخليلي ياكن .. وكل سنة والكل بألف صحة وخير ..    ووصفتك أكتر من رائعة .. عالتجريب قريباً إن شاء الله ..    دمت بحفظ الله منوش

13  الكاتب farah, on 09-05-2010 20:48 بصراحة تفاجأت لما لقيت الوصفة بقسم الكاتويات وصار فيي هيك وقلت لحالي كيف نفدت هالوصفة من تحت ايدي وانا تقريبا كل يوم بعمل تفقد للموقع   كأنك ما نزلتيها عالصفحة الرئيسية ؟؟  ياستي ربي يكرمك ويعيد عليكي وعلى كل الاخوات والموقع هالعيد بمزرد من التألق والنجاح والتقدم والارتقاء الى اعلى مستوى بين المنتديات   صحيح انا مالي معكم غير من حوالي 9 شهور بس والله صرتوا بمعزة أهلي واخواتي  وحتى اني غرت من أهل حلب للمفاجأة اللي بدك تخصيهم فيها   بس رح استنى المفاجأة التانية بيجوز يكون النا نصيب فيها   على فكرة وصفتك كتييير عجبتني لأني من محبي التشيز كيك وصايرة بتردد ساويه للسبب اللي ذكرتيه  لذلك قريبا انشاء الله رح جربه تسلم أناملك يا رب

14  الكاتب juman, on 10-05-2010 07:32 مبارك اخت منى وان شالله 100 سنة يا رب,,,حبيت هنيكي واتشكرك عوصفاتك الطيبة,,ويا ريت تعتبريني متل اختك الصغيرة’’لانو اول مرة بجرب وصفات غير وصفات الماما,,,ومنقولة من عالنت كمان خصوصا بالغربة كل شي صعب يحصله الواحد من وصفات ومكونات,,يسلمو كتير وللامام يارب

15  الكاتب منى, on 10-05-2010 08:16 هلا ميوسة   شكرا كتير الك لكل الكلام الي في ردك   تبقي ان شاء الله بخير انت و كل الي حواليك و بقلبك و انا ممنوتك كتير لكل هل المودة الي حاسستها منك و صدق الي قال : القلب عى القلب

16  الكاتب منى, on 10-05-2010 08:20 هلا غيوثة   من زمان ما بنتي و لا طليتي , ان شاء الله تكون كل امورك ميسرة و بخير    كل سنة و انت كمان بخير و صحة انت و اهلك و اولادك و ابو الشباب و كل واحد قريب الك و من قلبك     و كمان الف هنا لكل شي عم تساويه من هون

17  الكاتب منى, on 10-05-2010 08:22 هلا فرفوشة   اي ان شاء الله على طول , و منورة دوما

18  الكاتب منى, on 10-05-2010 08:24 هلا بشورة   ان شاء الله تجربيها و تعجبك و انا رح استنى رايك    كل سنة و انت بخير و ان شاء الله السنة الجاي بتكون تحقق شي مهمو حلو كتير ببالك

20  الكاتب ميس الريم, on 10-05-2010 16:44 كيفك منى  كل سنة وانت طيبة واللقمة من ايدك أطيب و أطيب  الله يسلم ايديك  بصراحه صار عندي فضول لأعرف المفاجأة وعلى فكرة أنا من حلب  وشوشيني شو هي المفاجأة؟؟

22  الكاتب freesoul, on 11-05-2010 12:31 كل عام وانت بخير يا لقمة طيبة .كل عام وانتي بخير يا احلى منى بالعالم  حتى جوزي وولادي بيعيدوكي وان شاء الله ينعاد عليكي بالخير والمسرات.ما فيني انكر فضل لقمة طيبة على كتير .وكان على طول يتنقل معي وين ما رحت من بلد لبلد ويونسني في غربتي.  قد ما كتبت وحكيت ما فيني وفيكي حقك يا منى .انتي احييتي فينا الاكلات الحلبية التراثية وزدتي عليها اطباق عربية وغربية شي منعرفه وشي ما منعرفه  الله يزيدك ويباركلك محبة الناس الك يللي جمعتيهم على الخير والمحبة  واخر شي حابة اقوله انو عيد ميلاد لقمة طيبة بيوافق عيد ميلادي 5.ايار   بس هو صار عمره 3 سنين بس انا عمري صار

24  تابع اقتراحات الكاتب لارا مينا, on 11-05-2010 16:43 3) لو يضاف قسم اسمه ( أجهزة ) ويكون فيه الأجهزة الضرورية جدا جدا جدا ومش حيا الله أي شيء يعني نهتم بالكيف مش الكم وطبعا أنا ما أقصد الفرامة أو الطحانة نهائي ,,,,,,,,,,, مثال عصارة الجزر أحسها ضرورية جدا ويمكن أهم بكثير من المايكروويف لأن والدي جابها من   أكثرمن 15سنة ومن يومها وإحنا نشرب عصير جزر وقبلها ما كنا نشربه أبدا أبدا بصراحة بتخلي طعم العصير وقوامه مختلف وبدون إضافة نقطة ماء وفي خلال 5 دقايق بس بيكون عندك 5 لتر من العصير بيقدي للكل وبيزيد.      4) يضاف قسم اسمه ( طوارئ ) ينحط فيه نوع مشروب أو أكل بسيط جدا جدا ويكون مجرب من معظم الناس يعني متداول, لبعض الأمراض البسيطة وطبعا ما أقصد إن نتعدى على مجال الطب والأطباء وتخصصهم( أعوذ بالله ) ولا أقصد نجربها على الأطفال أكيد يعني شيء خاص بالكبار ... مثلا عندكم مشروب الزهورات مشهور ومفيد ومجرب وعندنا مشروب القرفة الدافئ على طول يعطوه للنفاس والكل بيشربه وما منه خوف وأيضا الأرز الأبيض المسلوق من دون أي إضافة حتى الملح ومعه كم ملعقة زبادي مفيد للإسهال وهذا بينصحوا بيه الأطباء ومن هالوصفات إلي بتكون مكوناتها عادية وأكيد إذا مانفعت مارح تضر بإذن الله وكلنا واعين ومتعلمين ولله الحمد.      وطبعاهالإقتراحات صعبة تعمليها لوحدك أكيد وأنا أفصد إن كلنا نتشارك ونتعاون فيها لحتى نفيد ونساعد الناس ويكون الموقع مثل المرجع أو 911  خصوصا البعيدة عن أمها أو أهلها  ,, وسلامتك .

25  الكاتب منى, on 11-05-2010 21:45 سلام لارا   يا ستي الوصفات بيجننوا متل ما هنن     بالنسبة لاقتراحاتك , اول واحد و التاني سبحان الله كان في الهم مسودة من اول ما تم افتتاح الموقع و نفس الفكرة خطرت الي من كم يوم لنفس السبب الي ذكرتيه و هو اختلاف الاسماء حسب المناطق من جهة و التركيو على اكل الخضار و الفوكاهة بوقتها بس من جهة تانية     الاقتراح 3 كتير مهم , حتى من ابسط شي , ممكن حتى نتناقش في ماركة معينة لحتى الكل يستفاد و الي جرب يخبر الي ما جرب     الاقتراح 4 مميز و اذا بتقبلي انك تكوني المسؤولة عنه , اكيد بمساعدة من الكل , من بكرة بيكون في هيك قسم ..    شو رايك

26  الكاتب منى, on 11-05-2010 21:58 هلا فروحة   هي على الصفحة الرئيسية كيف لكن !    و الله يا فرح ما حسيت انك معنا بس من 9 شهور , حاسة من قبل بكتير , الله يديم المحبة على طول و الله يديم هل اللمة الحلوة     ان شاء الله تجربي الكيك و يعجبك و كمان تكن المفاجاة التانية مستاهلة

27  معايدة متأخرة الكاتب Mays, on 12-05-2010 07:47 ما بعرف كيف راحت عليً المعايدة مع إني من أول شهر أيار ما دخل قلت لازم يكون في شي مميز من منى للمناسبة ، يس مرت الأيام و انشغلت ومع إني من كم يوم طليت على صفحة الكاتو بس ما انتبهت للوصفة     على كل حال كل عام و الموقع و صاحبته و كل العضوات بألف خير و عقبال مية سنة و الله يديم جمعتنا الحلوة على الخير إن شاء الله.    يعنى شو ما حكينا عن الموقع و صاحبته بيضل قليل بالمقارنة بالمجهود الجبار اللي عم يتقدم و أهم ما بيميز الموقع برأي هو حبك للإتقان و إنو يكون كل شي على أصوله و مميز و مرتب و أكيد بيبيض الوجه و هاد الشي أكيد إنعكس على كل الأخوات اللي بيرسلوا و صفات ، بحس إنها فعلا طالعة من القلب و بتوصل للقلب دغري ( و للمعدة طبعا)     و منوصل للوصفة ، الفكرة أكيد مميزة ياستعمال الكاتو بدال البسكوت و خاصة إذا كان على شوكولا.  بس أنا بدي قلك ملاحظة من خلال تجربتي المتواضعة بالشيزكيك البارد ، إنه تستعملي جيليه بدون نكهة و لون حتى تبين طعمة الجبن و الكريم بوضوح و ما يطغى عليها أي نوع تاني.  كمان شغلة ، جربتي مرة الشيزكيك بجبنة الريكوتا، كتير طيب و تغيير شكل و بيعطي قوام مختلف للكريمة و أكيد أخف.    و طبعا مستنين المفاجآت على أحر من الجمر ، مع إني مو نازلة ع حلب بالصيفية  شكلي صايرة كتيرة حكي ، يالله خلصت ، سلامت و كل عام و الكل بخير

28  كل سنة ولقمة طيبة احلى واحلى الكاتب هادينة, on 12-05-2010 13:58 ان شاء الله كل سنة وانت ست منى وكل الاعضاء والمشاركين بالف صحة وعافية والله يديم هاللمة الحلوة ويسعدكن   صار موقع لقمة طيبة من المواقع اللي لازم اتصفحها بشكل يومي ان شاء الله دايما منورة موقعك والك مني هدية وصفتين صغنتوتين وحلوين قريبا ان شاء الله

30  الكاتب نور الأسلام, on 12-05-2010 19:10 السلام عليكم كيفك منى مشتاقتلك كتير كتير انشاء الله تكونو بخير جميعا كل سنه وكل يوم لقمه طيبه بالف الف خير وعقبال المية سنه وانشاء الله ايامك كلها فرح واعيادوسعاده

32  الكاتب منى, on 13-05-2010 12:46 هلا جمان   مية هلا فيك و ان شاء الله يكونوا الصفات تمام و على زووءك و اتمنى تبقي معنا على طول ..    نورتينا و شرفتينا و كل سنة و انت بالف خير

33  الكاتب منى, on 13-05-2010 12:52 هلا سمسومة   يا الله شو حبيت تعبيرك , ايه عن جد حلو كتير و انا كمان بحسه هيك و بتمنى الكل يحسه هيك     خليلي عينك احلى دعوات و الله , ان شاء الله انت كمان     فكرتك حلوة كتير , اذا جربتيها خبريني شو رايك ممم , جعت

34  الكاتب منى, on 13-05-2010 12:53 هلا ميس   و انت بخير ان شاء الله .    لااا ما بوشوش , اصلا التناجي حرام

35  الكاتب larooo, on 13-05-2010 15:55 كل عام والموقع وصاحبة الموقع اللي مافي منها منى   وكل الحبابات والحبابين المشتركين بالف خير  وان شاء الله عقبال المية بس ياريت الاحتفال وقتها   يكون بشي نوع شوربة ..يعني تحسبا لامكانياتي وقتها   عنجد انا كتييير مبسوطة ..وعنا اليوم مطررر كتير حلو بالنمسا ..خرج هيك قطعة مع كاسة شاي سخنة ياسلام

37  الكاتب منى, on 14-05-2010 12:07 هلا كرميلا   مية هلا فيك بالموقع اخت جديدة و كريمة , بيتك و مطرحك متل ما بيقولوا     صار عندي فضول اعرف حدسك     بكل الاحوال الف شكر الك للرد و للكلام الي فيه و اتمنى تبقي معنا على طول و كمان الف هنا على كل الوصفات الي جربتيها

38  الكاتب بشرى, on 15-05-2010 14:31 منمون أديه كمية الكريما الفريش اذا حبينا نستعملها ؟

39  الكاتب gsm, on 17-05-2010 18:19 السلام عليكم منوش من شان الله ما تواخذيني كتيير تأخرت عليك إن شاء الله ألف مبروك للقمة طيبة وإن شاء الله تكبر هل اللقمة الطيبة أكتر وأكتر وتزيد تألق ونجاح يا رب انا تأخرت عليك وصرلي زمان ما عم ادخل على الموقع مرت علي شوية شغلات يعني ولادتي وجيبة حمودة أفندي ويللي قلبلي حياتي رأسا على عقب وما بقى أعرف ليلي من نهاري بقى يا ريت تقبدلي هل العذر ويكون مقبول   نجي على الأكلة   يعني إنتي ما بتعرفي قديش بموت على شي إسمه تشيز كيك وكذا مرة جربت كذا طرية وما عم أوصل على النتيجة يللي بدي ياها بس يني وبينك بدي أأجل أعمل هل الجاتو لأنو أسهم الميزان ما عم تشجع بعد الولادة   بس انا واثقة إنو رح تكون كتيير طيبة لأنو الوصفة أخدتها من أشطر شيف   صحيح نسيت أتشكرك لأنو لو تعرفي قديش هل الوصفات تبعوتك بيضتلي وجي قدام بيت حماي وخصوصي وصفة بسكويت جوز الهند كتيير حبوه ونال إعجابن وكمان كرات الدجاج المقرمشة ووصفات كتييرة ما بقى أتذكرها   انا يمكن طولت عليك بس يعني لأنو عن جد إشتقتلك وإن شاء الله أرجع عما قريب بمشاركات عن أكلات ووصفات تعلمتها بس شي أعرف ليلي من نهاري

40  الكاتب منى, on 17-05-2010 20:25 هلا freesoul   و انت بالف خير , انت و كل عيلتك فرد فرد و كمان كل الغوالي على البك    و انا كتير ممنتك للثقة و مبسوطة اني كون جزء لطيف من حياة كل واحدة فيكن , ربي يديم المعروف و الخير دوما    كل سنة و انتي سالمة , بلاها الاعمار , اصلا انا من بعد 22 سنة عم انسى اكبر

41  الكاتب منى, on 17-05-2010 20:31 هلا لارا     ممكن اتواصل معك على الايميل

42  الكاتب هادينة, on 18-05-2010 17:13 السلام عليكم منى انا بعتلك وصفة على الايميل بس حبيت اسال اذا وصلتك   يعطيكي الف عافية هالوصفة شكلها كتير طيبة متل كل وصفاتك ان شاء الله دايما منورة موقعك

43  الكاتب منى, on 19-05-2010 11:31 هلا هادينة   كل سنة و انت بصحة و االف خير , شكرا كتير لذوقك أختي و ان شاء الله معنا على طول     يا ترى شو الوصفات الي بعتيها

44  الكاتب هادينة, on 19-05-2010 13:21 الوصفة هي سمكة سالمون بالفرن مع وصفة صلصلة الطحينة جنبها بعتتها على ايميلك   اذا ما وصلتك ممكن تخبريني وين لازم ابعتها شكرا كتير

46  الكاتب منى, on 19-05-2010 18:17 تسلميلي يا ضحى   ان شاء الله تجربيه و تحبيه , خبريني شو بيصير معك

47  الكاتب منى, on 19-05-2010 18:23 هلا هادينة   كنت رح ابعت الك ايميل سبحان الله     الوصفات وصلوا , بس ما قدرت افتح الملف , ممكن تبعيهم مرة تانية بس كايميل عادي من دون ملف     عزبتك معي

48  الكاتب منى, on 19-05-2010 18:44 هلا Mays     هي تالت مرة بكتب الرد و لما اجي ابعته بيصير معي شي ,بقى ان شاء الله التالتة ثابتة     بالفعل متل ما قلتي , الاحظ اغلب الاخوات الي بيبعتوا الوصفات بيراعوا التفاصيل , سبحان الله هي شغلة مهمة كتير برايي و خصوصا لما بتكون الوصفة جديدة     ميوسة بتعرفي الجيلو الي من دون نكهة قليل كتير تلاقيه عنا و حبيت تكون الوصفة بمكونات متوفرة عند الكل     ممكن تعلميني طريقتك في التشيز كيك ؟ قصدي طريقة الريكوتا

49  الكاتب منى, on 19-05-2010 18:49 هلا نور   ايامك ان شاء الله كلها خير و افراح و سعادة .    من زووءك نور و انا مشتاقة الك كتير كمان , ان شاء الله تبقي بخير

50  الكاتب سارونات, on 23-05-2010 14:28 السلام عليكم و رحمة الله و بركاته    منوووش اشتقتلك كتير و اشتقت للموقع اللي يمثل بيت انترنتي بالنسبة النا بتحسينا هيك قاعدين مع بعض حوالين الطاولة و عم نحكي   الله يديم هالجمعة علينا يا رب    منووشة أمي بتسلم عليك كتير و الها طلب هي بدها وصفات للبسبوسة بأنواعها يعني اللي بالسميد و اللي بجوز الهند و السمسم لان داقتها و كتير عجبتها اذا فيكي تساويلنا مهرجان للبسبوسة راح كتير تفرحيها و اذا مو ممكن بس وصفة واحدة بتكفي     الله يوفقك و يسهل دربك    سلام

51  الكاتب Mays, on 24-05-2010 09:58 بعتذر منك كتير منى لإني هلق شفت التعليق   و ياستي و صفة شيزكيك الريكوتا كالتالي:   100 غرام بسكويت سادة  50 غرام زبدةمذوبة  ملعقتين كبار قشطة نستلة  توضع مع بعض بالفود بروسيسور حتى تتماسك قليلا    300 غرام ريكوتا بدون ملح أو ملح قليل  4 حبات كيري  بقية علبة القشطة  ظرف كريمة بودرة ( دريم ويب)  فنجان قهوة سكر  ملعقة صغيرة فانيليا  ظرف جيلاتين بدون نكهة مذوب بفنجان قهوة ماء حار جداً    كمان توضع جميع المقادير أعلاه بالخلاط ماعدا الجلاتين اللي منضيفه بعد ما يبرد شوي و منخلط بس خلطة صغيرة  طبعا بدو بالبراد 3 ساعات على الأقل  و نحنا كل واحد بالعيلة ذوقه شكل ، الأولاد بيحبوه عليه صوص شوكولا و زوجي بيحب مربى الكرز و أنا بحبه بدون شي ومشان هيك كل ما بقسم قطعة بحط فوقها الزينة.

52  الكاتب محبةالمصطفى ملك, on 12-06-2010 05:35 كل سنة و انت بألف خير يا منوووووووووووش (معلش لو متأخرة شوي )   و فعلا موقع كتتتتير مميز و حلو

53  الكاتب سانتاريتا, on 15-09-2010 03:37 يسلمو اديكي يا احلى منى والله يعطيكي العافية وكل سنة وانتي سالمة بمناسبة عيد الفطر تعرفي انا من زمان بتابع لقمة طيبة بس اليوم سجلت   ههه خصوصي لاعايد عليكي وان شاء الله في تقدم وتالق دائم حبيبتي وعلى فكرة انا من حلب ومقيمة في ابوظبي وعلى طول بنصح رفقاتي يتابعو موقعك لانهم بيحبو لقمتنا الطيبة الطبخ السوري والحلبي خصاصة  تقبلي مروري وتحياتي null

54  الكاتب منى, on 16-09-2010 12:11 و انت سالمة اختي   نورتي و شرفتي مية هلا فيك و بكل رفقاتك و انا كتير مبسوطة انك سجلتي و شاركتي , ان شاء الله بتبقى على طول معنا     هلا فيك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved