اليوم كلنا معزومين على سفرة دالو , و هي واحدة من العضاوات عنا بالموقع

طبخها بالنسبة الي , و بعد ما جربت اكتر وصفة من وصفاتها , هو طبخ مميز كتير فيه نكهات كتيرة و نعنوش لان دايما فيه شي جديد و طيب كتير بيخليني قول , يا حرام كيف لليوم اكتشفت هل الطبق .

دلوش كريمة و نحنا منستاهل , سفرتها منوعة و بترضي كل الاذواق . قدمتلنا اكتر من طبق مغربي , هلا هي مو مغربية بس وصفاتها اصلية و متعلمتها من أم زوجها المغربية , يعني دوما شعرنا لا يمس : الأكل على اصوله

من سلطة لمقبلات خفيفة للريزيتو الايطالي , تارت الرز و كمان دجاج بطريقة سهلة و جديدة .

سلم دياتك دلوش عى كل وصفة و كل صورة و هلا صبايا  بسم الله الرحمن الرحيم . يا بتلحقوا يا ما بتلحقوا . انا وصلت اول واحدة و ناوية ابدا بالسلطة , بقى اعزموا رفقاتكن كلهن لان الاكل كتير و بيكفي الكل ..

نبداها بشرايح الخبز بالبندورة و التوم

سلطة الخس و الجوز




تارت الرز , بيشهي






من المغرب وصفة مميزة جداً : الكسكسي المغربي






بعدها وصفة جديدة و طيبة : دجاج بالفطر





و الي حابب وصفة سهلة و طيبة في الريزيتو



و بالاخير عندنا البغرير , مممم





سلم هل الديات دلوش و ان شاء الله دوما بيتك عامر و الله يخليلك ابو الشباب و يديمكم لبعض

تعليقات (38)

2  الكاتب لارا مينا, on 02-04-2010 09:08 ألف ألف ألف شكر للوصفات ولو كنا في مسابقة كان أخذتي المركز الأول من دون مايكون فيه تصويت .  فعلا إنتي كريمة جدا وخليكي على طول هيك ولا تحرمينا من وصفات مميزة بهالشكل.  والصور رائعة جدا وحمستيني للكتابة مع إني من  فترة ماكتبت بس عيب علي وعار لو ماكتبت   أكيد تعبك ومجهودك تشكري عليه ومنه سهل ابدا .    صباح الخير أخت منى جمعة مباركة كيفك وكيف الأولاد ... لاتفكري إني نسيت الطقة بنسى دروسي بس مابنساها.. ويلي مأخرني كاميرتي فارقت الحياة من فترة ووصيت على كاميرا جديدة رح توصل خلال هاليومين بإذن الله مابقى إلا القليل وبيكون كل شيء جاهز .  سلامي وتحياتي إلك .

3  الكاتب منى, on 02-04-2010 12:06 هلا اخت وداد     تكرم عيونك على الوصفة , جاهزة عندي بس من دون خطوات تفصيلية

4  الكاتب منى, on 02-04-2010 12:09 هلا لارا صباحك مبارك ومعطر بالصلاةعلى النبي   بعرف انك مو نسيانة , انا معك مطمنة و يا ريت تتعلمي من دااالو , هيك الطقات او بلا     عم امزح معك   خليلي عينك لارا و الله يحفظ الود دوما و الخير

5  الكاتب بشرى, on 02-04-2010 14:17 ما شاء الله لا قوة إلا بالله ..    فعلاً بتستحقي 11 من 10 , شو هالمينو الحلو والمنوع والغريب .. أول مرة بسمع بكل هالكلات ما عدا الكسكسي ..     يسلم ايديكي وفعلاً شي ظريف كتير والكرم واضح , بالتوفيق إلك والله يعطيكي العافية إنتي وأم زوجك ..     رح جرب على غدا بكرا الدجاج بالفطر لانو مكوناتو متوفرة عندي , وقريباً رح جرب تارت الرز والكسكسي .. يسلمو مرة تانية , والشكر لمنونة كمان من غيرها ما كنا تعرفنا على هالناس الطيبة ..

6  الكاتب لارا مينا, on 02-04-2010 15:19 مادامك نطقتيها شكلي رح أعمل طقة بس سعودية بحتة وأتوقع إنها مارح تكون مفهومة أبدا ورح تقولوا يامحلى المغربي   ومنك مابزعل أبدا ولو شو ماكتبتي وقلتي تحياتي .

8  الكاتب marim, on 02-04-2010 19:51 يالله حلوة هالاطباق تسلم دياتكن بس زعلت لاني وصلت اخر وحدة

9  الكاتب منى, on 02-04-2010 21:26 مريمة ما وصلتي اخر واحدة , بالعكس لسا الموضوع تااازة"    لارا يلا رح استنى الطيب منك يا طيب يا حلو انت يا قمر

10  الكاتب ميساء, on 02-04-2010 22:28 يا الله وصلت متأخرة بس والله ما صار لي وقت أفتح النت خصوصي يوم الجمعة بكون هيك من العجقة وعلى طلبات و تفقيس وهلق خلينا بهالسفرة الملوكية فعلا شي بيشهي والأخت دالو دائما أطباقها مميزة بالنسبة الي وكتير ذوقها بالطبخ بيتناسب معي لأني من الناس اللي بتفضل الأكل النباتي والصحي يسلمو دياتك مو عرفانة من وين بدي ابدأ بالتطبيق كلو بيجنن   شكرا ميمو الحلوة الله يديمك النا أخت حنونة و غالية

12  الكاتب بشرى, on 03-04-2010 04:16 يا ريت يا لارا لو تعمليلنا طقة سعودية , حابة كتير اتعلم كم طبخة بس مافي حدا قريب إسألو , بانتظارك

13  الكاتب منى, on 03-04-2010 10:45 ميوسة لسا القعدة باولها , يا دوب راح عليك اول فنجان قهوة , هي رح اغليليك واحد تاني و منتني على الصبايا كمان       ميادة صعبة هي , من وين لوين انا بدي اعرف تحضيرها       بشورة اضم سوتي لسوتك , ان شاء الله تسمعنا لارا

14  الكاتب Mays, on 04-04-2010 06:25 صباح الخير على هالجمعة الحلوة و إن شاء الله دايما ع الخير.    يسلم إيديكي يا داللو ع هاسفرة ، مبين إنو نفسك كتير طيب بالأكل و الوصفات فعلا كتير مميزة.  أنا راح إعمل متل منى و أهجم ع السلطة لإنو باينتها غير شكل.

15  الكاتب سمسمة, on 04-04-2010 08:43 ياعيني عالأكل المغربي بياخد العقل جربت كتير أطباق مغربية وكلهاطيبة   يسلموا ايديكي كل طبق أحلى من التاني

16  الكاتب لولا, on 04-04-2010 12:48 واو شو هالاكلات الروعة   نحن عنا هون بجدة مافي مول إلا وفيو المطبخ المغربي   بس الأشهر عنا هوووون الشاي المغربي ياسلام على نكهتو بيعملو ذواقة غير شكل إذا فيكي أختي تشرحيلنا طريقة إعداده انا سمعت بنقعو وبحطو نعناع والله مابعرف إذا فيكي تفيدينا   وسلام للجميع

18  الكاتب رنا, on 04-04-2010 17:16 الله يسلم دياتك يا dadoشي بياخد العقل والله ....حسيت الدجاج بالفطر سهلة وتغيير عن صينية الفروج الي متعودين نعملها       انشالله من تقدم لتقدم يارب ولا تنسينا من الوصفات الحلوة

22  الكاتب منى, on 05-04-2010 13:53 يا سلااام لولا من الحكي جعت , بقى كيف لدوق ..    بس وين , نحنا ا بتروح دقونا مرش , طقة انت طقة لارا     عن جد اتمنى تشاركي معنا بوصفات سعودية و تكون اصلية و الف الف شكر الك للمعلومات و للتواجد الطيب و شرفتينا اختي      هلا دندونة   ان شاء الله جازة الدهر يا رب , ايا خدمة او سؤال من عيوني و انا معك لحتى تصيري متل ما بدك و احسن و اذا حابة شي سؤال خاص ممكن تبعتيلي عن طريق اتصل بنا       شرفتونا صبايا , مية اهلا و سهلا فيكن , هل السفرة عم ينحكى فيها و الله , صار كنت باكتر من جمعة و كلهن عم يقولولي شو هل الوصفات الغير شكل .    شكرا دالو

23  الكاتب dado, on 05-04-2010 14:08 مرحبا منوش  خجلتيني كتير، وفرحتيني كتير بهالمفاجئة.أنا كنت عم قول لحالي الله أعلم منى شو عم تعمل بالوصفات   شكرا لألك.  صبايا شكرا كتير الكن وحدة وحدة, ما توقعت إنو الوصفات يلاقوا هيك صدى، انا بعتبر حالي بجرب تجريب.. وأكيد كلكن بتوافقوني إنو ما منطلع شي قدام شطارة منوش   يمكن نحنا بعاد عن المطبخ المغربي لأنو مطبخنا كتير غني ولذيذ، بس مختلف عن الأكل المغربي المليان بالنكهات والبهارات والألوان.  بالنسبة للشاي المغربي كتير لذيذ وكتير سهل .. بس لحتى يطلع على أصوله لازم تقوي قلبك بالسكر، يعني إذا كنتي بتحطي للكاسة معلقة زغيرة,, بالمغربي بتصير تلاتة   يالله بسم الله:  المقادير:  نصف لتر من الماء المغلي  حفنتان من النعنع الأخضر الطازج (تقريبا كاسة كبيرة)  4-5 ملاعق كبيرة سكر  ملعقة زغيرة حبيبات شاي أخضر.    الطريقة:  يغسل النعنع جيدا ويوضع على مصفاة حتى يجف.  في إبريق نضع الماء والسكر ونتركه حتى يغلي ويذوب السكر تماما، نضيف النعنع ونتركه يغلي لمدة دقيقتين. نضيف حبيبات الشاي ونتركها تغلي غلوة واحدة (يعني مو أكتر من دقيقة). نبعد الإبريق عن النار ونتركه لمدة خمس دقائق حتى يختمر، ثم يقدم.    * سر تقديم الشاي المغربي هو رفع الإبريق عند الصب حتى تتكون رغوة على سطح الكأس, وصحة وهنا.  هي الصورة من النت ، وبس حضره انا ببعت الصورة لمنوش

24  يمي يم الكاتب souha, on 05-04-2010 18:08 هلا دادو تسلم دياتك على هالأكلات الظريفة بصراحة أنا مو سمعانة غير بالكسكسي و تارت الرز من حورية المطبخ و هلأ صرنا مثقفين بالمطبخ المغربي الله يعطيك العافية أنت و حماتك الله يمدها بالصحة و العافية و تضلو تعلمونا من كنوز المطبخ المغربي

27  الكاتب ام عمر, on 06-04-2010 18:09 لك يشلم دياتك منى انت ودالو ما شاء الله شي بيشهي

28  الكاتب لارا مينا, on 06-04-2010 19:38 رجعت مرة ثانية     الأخت منى والأخت بشرى والأخت لولا إن شاء الله يارب أعملكم طقة سعودية وبصراحة الوقت هو مشكلتي وماعداه بيهون بس إن شاء الله أشد عزيمتي وأنظم وقتي .. وأخواتي وعدوني إنهم يساعدوني.    بالنسبة للأخت لولا الأكلات إلي ذكرتيها فيها كم أكلة من السعودية أما الباقي قصته قصة .    وهي كأصول ماتعتبر أكلات سعودية لأنهاوصلت لمكة وجدة والمدينة عن طريق الحجاج والمعتمرين من مختلف دول العالم إلي استقروا بالمنطقة من مئات السنين وماعاد رجعوا لبلادهم ونشروا عاداتهم وتقاليدهم وثقافتهم سواء الغذائية أو غيره .    عشان هيك إلي بيروح جدة أو مكة أو المدينةبيشوف أكل متنوع وأسماء غريبة لاتمت للغة العربية أو الشعبية بصلة وممكن تقابلي أشخاص هيئته وكلامه سعودي ولما يتكلم مع احد من اقربائه يتكلم بلغته الأم .    وغالبا بعض الأكلات مابتلاقيه إلا بهالمنطقتين بس والبعض الثاني انتشر وصار ينعمل بباقي المناطق السعودية.    مثلا خبز التميس خبز افغاني بحت وأفضل من يعمله يااما الأفغان الموجودين عندنا أو سعوديون تكون أصولهم الحقيقية أفغانية أما غيرهم يعملوه بس مش ميه ميه.    اللدو هو حلو هندي وإن شاء الله بجيب طريقته لكم من صديقتي هندية كثير شاطرة بالطبخ بس ظروف شغلي وشغلها ماتخلينا نتقابل كثير.    البرياني اصله هندي والمندي أصله يمني والكابلي مش متأكدة منه مزبوط .    أما المنتو فهو من تركمانستان وأظن  (الفرموزة واليغمش )من نفس البلد,, ولما تاكليه من التركمان أشهى وألذ ,, مع إني بعمله على اصوله والوصفة سبحان الله مسويتها ومصورتها من فترة طويلة ورح انزلها.    , ونفس الوصفة تمام بالشكل والمضمون وبكل تفاصيلهاالدقيقة تسمى في كوريا (ماندو) وفي الصين( مومو) وفيه مطاعم كبيرة جدا ومشهورة عندهم وزوارها بالملايين سنويا , بس عشان هاذي الأكلة واليوم إلي نسوي فيه منتو يعتبر عندنا عيد من كثر ماهو لذيذ.    وشراب السحلب من مصر..والعصيدة فيه نوعين عصيدة سودانية وفيه يمنية حتى الكبسة طلعت من أدغال أدغال أفريقيا بس الإسم مختلف   ونوعية الرز فقط .     والعادات إلي ذكرتيها مش موجودة في اغلب المناطق لأنها جات مع أصحاب الأكلات الحقيقين.  طولت عليكم بس حبيت أوضح لكم ... تحياتي.

31  الكاتب منى, on 07-04-2010 19:41 هلا ميادة   وصفتي طيبة , بس ما بعرف اذا متل سلورة و الا لا     متل ما قالت رنونة عم تصعبيها علي و ا نا الطبخ عندي هواية , يعني مو اخدته من معلمين

32  الكاتب منى, on 08-04-2010 08:06 هلا لارا     ممم , شكرا للتوضيح , بتعرفي سبحان الله بالاخير الطبخ كله بحسه تمازج حضارات و ناس بتعلم بعضها ..    ردك فيه معلومات كتيرة اول مرة اسمع فيها , بس اكتر شي لفت نظري ان الكبسة طلعت مو سعودية     ممنوتك لارا و رح استنى الطقة و الف الف شر الك مسبقا

33  الكاتب Eman, on 09-04-2010 15:24 يسلمو دادو على الوصفات الحلوة ،وشي بحير بمين بدنا نبلش أول!     على سيرة أصول الأكلات :الأرز الكابلي أصله من مدينة كابل بأفغانستان ،أول مرة بعرف هالمعلومة لما طلبته من مطعم أفغاني ،وأنا كنت أفكره سعودي   منى الكبسة أعتقد سعودي ،بس البرياني هندي ،وباين من اسمها بكبسوهابطنجرة الضغط

34  الكاتب منى, on 09-04-2010 18:26 ممم , فكرة ان يكون اسمها من الكبس بطنجرة الضغط , بس هادا معناها ان هل الطبق مو قديم , مو هيك

35  الكاتب DOUHA, on 12-04-2010 17:43 شو هاد شي بيشهي كتير جد يسلموا ايديك ورح مر على كل وصفة ان شاء الله

36  الكاتب رنا, on 12-04-2010 19:26 كبسة بطنجرة الضغط ...؟؟؟!!!شو صاير بالدنيييييييييييييااااااااااااااااا    انا بقول الكبسة اختراع شي زوجة محتارة طبوا عليها ضيوف بساعة متأخرة بالليل وماعندها غير لحمة ورز ...ف عملت كبسة ...بماأنه الضيوف كبسوا عليها بفرد كبسة وبدون مقدمااات

37  الكاتب منى, on 13-04-2010 07:15     معقول كتير و الله لان الفكرة منطقية على انعبار ان اخوتنا السعوديين مشهوريين بالكرم         على كل انا سمعامة كتير بالكبسة بطنجرة الضغط و في كم وصفة عاجبيني اوي و مشتهية جربهن

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved