L2ma.com | لقمة طيبة | L2ma.com | لقمة طيبة | تارت الرز | · , حتى, نضيف, الرز, على | L2ma.com

القائمة الرئيسية

الأكثر تصفحاً

تارت الرز

الكاتب/ dado

02/04/2010

وصفة لذيذة وخفيفة وظريفة.. ممكن تكون غدا خفيف أو عشا أو طبق مكمل على سفرة شي عزيمة. مكوناتها غالبا موجودة بالبيت وما بتاخد وقت تحضير كتير غير وقت الخبز.

الكمية بتكفي 3-4 أشخاص.

كأس من الرز المكسر (إذا لم يتوفر جاهزا من الممكن تحضيره في البيت عن طريق وضع الرز في كيس نايلون وربطه ومن ثم الضرب على الكيس بالشوبك كما هو واضح في الصورة).

حبتان متوسطتان بصل مفروم فرما ناعما.
فص ثوم مهروس
حبة فليفلة حمرا مفرومة ناعماً.
3 حبات بندورة مفرومة ناعماً.
ملعقتان كبيرتان بقدونس مفروم
4 ملاعق كبيرة ذرة
ملعقتان كبيرتان زبدة
ملعقتان كبيرتان زيت زيتون.
8 ملاعق كبيرة جبنة مبشورة "صفرا أو قشقوان أو شيدر"
مرق مغلي أو ماء
ملح
فلفل
direction

·         في طنجرة نقوم بتذويب الزبدة ونقلي فيها نصف كمية البصل حتى يصبح شفافا.. نضيف الأرز ونقلبه لعدة دقائق حتى يتغلف بالزبدة ويصبح شفافا .. نضيف الملح والفلفل والمرق المغلي.. نغمر به الأرز ونغطي الطنجرة وننقص من النار ونترك الرز حتى ينضج ويمتص كل المرق.

·         نشغل الفرن على 180 درجة

·         في هذه الأثناء نقلي نصف كمية البصل المتبقية في زيت الزيتون حتى يصبح شفافا.. ثم نضيف الثوم المهروس ونقلب دقيقة حتى تظهر رائحة الثوم دون أن يحترق.

·         نضيف الفليفلة المقطعة والبندورة والفلفل والملح.

·         نقلب الخضار حتى يجف مرق البندورة تماماً.

·         نبعد المزيج عن النار، وبعد نضوج الأرز نضيف صلصة البندورة مع الذرة والجبنة والبقدونس للأرز المطبوخ.
ندهن صينية فرن متوسطة بالزبدة ونصب فيها مزيج الأرز ونمسد السطح بملعقة خشبية، نغطي الصينية بورق الألومنيوم وندخلها للفرن لمدة 35 دقيقة.

·         نزيل ورق الألومنيوم ونعيد الصينية خمس دقائق حتى يحمر السطح.

·         نترك الصينية تبرد لمدة دقيقتين ثم نقلبها على صحن التقديم.

·         يقدم تارت الرز ساخنا أو فاترا مع سلطة الخضار أو سلطة الخيار بلبن.

أضافة إلى المفضلة (0) |

أقتباس | مشاهدات : 2084

تعليقات (6)

1 الكاتب منى, on 02-04-2010 21:24
دلوش انا او مرة بحياتي بشوف هيك وصفة و منظرهاااا بيشهي و الوانها بتفرفح القلب , سلم ايديكي يا قمر :zzz

عجبني كتير مقطع تكسير الرز , هيك الواحد بيبل قلبوا و بيفشوا بهل الرزات احلى ما يتفشفش بغير شي :grin

2 الكاتب لارا مينا, on 02-04-2010 08:13
ألف شكر للوصفة وأنا سمعت من ناس كثير إن طبخ الأرز بالفرن طيب كثير ومختلف وأكيد وصفة طيبة كثييييييييير والمكتوب مبين من عنوانه .
ومن المقادير واضح هالشيء. ولازم أعملها لأن أهلي من هواة الرز بكل أنواعه وأشكاله وطرق طبخه وأنا على النقيض تماما وما آكل رز إلا إذا مافيه غيره على السفرة مع إني شاطرة كثير بطبخ الرز. يسلمووووووووووا .

3 الكاتب رنا, on 02-04-2010 15:49
شو منى ...انا كمان عجبتني طريقة تكسير الرز وحسيتها حل مثالي لفش الخلق
الهيئة انا وياكي طالع خلقنا :grin

شكررا dadoعالوصفة اللذيذة ...عن جد بتفتح النفس ومابعرف ليش شكلها وطريقتها ذكرتني بعجة المعكرونة

بس شو بدي اسألك هلأ بيمشي الحال استعمال رز عادي ...لانه انا شايفة بالصورة كأنه ببسمتي؟؟
لاحظت بالصورة كمان انه الرز كامل ومو مكسر ..شو الفايدة من تكسير الرز ؟؟؟مابينخبص

على كل الحوال شي مغري جدا للتجريب يسلم هالايدين

4 رز مكسر
الكاتب ميسونو, on 02-04-2010 16:22
سلامات للجميع
وتشكرات للجميع
صحيح صار لي زمان ما شاركت بالتعليق بس ما بيمرق اليوم عندي بدون ما كون داخلة وطالعة كذا مرة عل موقع اللقمات الطيبة.

الوصفة متل ما قلتي يا منى جديدة
بس السؤال للأخت الكريمة شيف دالو
ليش الرز مكسر
يا ترى شو بيصير لو كان الرز صحيح ؟؟؟؟؟؟؟؟؟

5 الكاتب dado, on 03-04-2010 01:35
مرحبا منوش ..
كيفك إنتي والصبايا؟
معكن حق.. مرحلة تكسير الرز مهمة جدا من الناحية النفسية.. إيد بإيد لفش الخلق وتفريخ الشحنات :grin

لارا.. عنجد هالوصفة نصيحة.. وبيطلع الرز مقرمش شوي يعني ما بيشبه الشكل الـ "معجّن" للرز المطبوخ، إذا كان هاد السبب يلي ما بيحببك بالرز.

رنا وميسون.. الرز يلي استخدمته هو رز بسمتي لأنو هو الرز الوحيد الموجود هون، يمكن مو واضح التكسير بالصورة، بس الرز آكل قتلة مرتبة

الهدف من تكسير الرز هو استخراج النشا من الحبات لكون الرز مو منقوع، والنشا بيساعد على تماسك القالب، لو ما كسرنا الرز ممكن يفرط القالب، ولو نقعناه رح يطلع القالب معجن مو مقرمش متل ما هو مطلوب.
انشالله كون جاوبت بشكل وافي.

6 الكاتب رنا, on 04-04-2010 17:18
dado جوابك وافي وكافي كمان الله يخليكي يارب وشكرا الك ...صحي انا كيف ماخطرلي هالخاطر
يلا الي بيعيش كتير بتعلم كتير
سلام

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 02/04/2010 )

< السابق		التالى >

[ عودة ]