L2ma.com | لقمة طيبة | L2ma.com | لقمة طيبة | لازانيا على طريقتي | · , اللازانيا, على, صلصة, البيشاميل | L2ma.com

القائمة الرئيسية

الأكثر تصفحاً

لازانيا على طريقتي

الكاتب/ منى

05/05/2007

من المطبخ الايطالي وصفة من أطباق عائلتي المفضلة , اللازانيا الايتايانو أحضرها بصوص لحمة مع خضار مشكلة , مع صوص البيشاميل المميز .. يممي ..

لحتى تطلع معك مظبوطة , يا ريت تتقيدي بمقادير الصوص و كمية العجينة المستعملة.

بالصحة و الهنا

250 – 300 غ من شرائح معكرونة اللازانيا
جبنه موزاريلا أو بارمزان مبشورة
زبدة لدهن الصينية

تمقادير صلصة الخضار و اللحمة :

4 ملعقة كبيرة زيت زيتون
حبة بصل
2 فص ثوم
حبة فليفله خضراء
حبة فليفله حمراء
حبة كبيرة جزر
نصف كوب فطر شرحات
ثلث كيلو لحمة مفرومة
4 حبة بندورة كبيرة ناضجة
مكعب مرق دجاج
ملعقة صغيرة بهارات مشكلة
نصف ملعقة صغيرة قرفة
2 ملعقة كبيرة معجون الطماطم
نصف ملعقة صغيرة دبس فليفلة ( اختياري )
ملعقة صغيرة أوريغانو

مقادير البيشاميل :

6 كوب حليب
6 ملعقة كبيرة طحين أبيض
رشة فلفل أبيض
ربشة جوزة الطيب
4 - 5 ملاعق زبدة
3 ملعقة كبيرة جبنة كريما

طريقة التحضير

تحضير صلصة الخضار و اللحمة :

·          يفرم البصل و الفليفلة الحمراء و الخضراء ناعماً , يبشر الجزر , تقشر البندورة و تفرم ناعماً مع الاحتفاظ بعصيرها , يفرم الثوم ناعماً أو يهرس .

·          يقلب البصل بالزيت حتى يطرى ثم يضاف الجزر و الفليفلة الحمراء و الخضراء و الفطر و تقلب الخضار لمدة 5 – 10 دقائق تقريباً ً ثم ترفع عن النار و توضع في وعاء جانباَ .

·          تقلى اللحمة في مقلاة بالقليل من الزيت و تقلب حتى تنضج و يجف مرقها تماماً ثم يضاف الثوم و البهارات و يقلب الكل لمدة دقيقة .

·          تضاف الخضار و البندورة و مكعب المرق و دبس الفليفلة و القليل من الماء للحمة و تترك الصلصة على نار هادئة مدة ربع إلى نصف ساعة حتى تتسبك , يجب أن تكون الصلصة متوسطة الكثافة و إذا أصبحت سميكة كثيراً يضاف القليل من الماء , ترفع الصلصة عن النار و يضاف الأوريغانو , أصبحت الصلصة جاهزة .

تحضير صلصة البيشاميل :

·          تحضر صلصة البشاميل عندما تكون صلصة اللحمة على النار , تذوب الزبدة على نار هادئة ثم يضاف الطحين و يقلب الكل حتى تظهر رائحة الطحين من دون أن يتغير لون الطحين .

·          تبشر ربع حبة جوزة الطيب أو أكثر حسب الذوق , المهم استعمال بشر طازج .

·          يضاف مقدار من الحليب مع مكعبات المرق و البهارات و يحرك , يضاف باقي الحليب بالتدريج مع التحريك المستمر و السريع  و يقلب حتى يغلي الصوص و يبدأ البيشاميل بالتماسك , يترك على نار هادئة مدة خمس دقائق .

·          تضاف الجبنة و يحرك البيشاميل حتى تختفي و بعدها أصبح البيشاميل جاهزاَ .

تطبيق الوصفة :

·          يجب اختيار معكرونة اللازانيا المصنوعة من سميد القمح القاسي , العلبة الكاملة وزنها 500 غ , سيلزمنا نصفها أو أكثر قليلاً و يمكن الاحتفاظ بباقي العلبة مغلفة بنايلون في الثلاجة لمرة ثانية , تستخدم أوراق اللازانيا بدون سلق .

·          تدهن صينية بيركس ذات حرف مرتفع و أكبر مقاس بالزبدة , يغطى القاع بطبقة خفيفة من البيشاميل وتصف فوقه طبقة من شرائح اللازانيا بحيث يترك بين كل ورقة و الثانية مقدار اصبع تقريباً لأن الشرائح ستكبر بعد النضج .

·          تقسم صلصة اللحمة إلى ثلاث أقسام و يوضع أول قسم فوق اللازانيا ثم توزع طبقة خفيفة من البشاميل فوق اللحمة بشكل زيكزاك ثم يرش القليل من الجبنة فوق البشاميل , ثم تكرر هذه الطبقات مرتان .
يمرر البيشاميل على شكل زيكزاك

·          تغطى أخر طبقة من البشاميل بشرائح اللازانيا ثم يوضع كل الباقي من صلصة البشاميل و يرش الوجه بالجبنة المبشورة .

·          الخطوة التالية هي أهم خطوة للحصول على لازانيا لذيذة , تترك صينية اللازانيا لمدة أربع ساعات على الأقل في الثلاجة قبل خبزها في الفرن و يفضل تحضير اللازانيا قبل يوم من وقت التقديم لأن ورق اللازانيا سيشرب من الصلصة و ستكون النكهة رائعة .

·          تخبز اللازانيا في فرن على درجة حرارة 180 في الطبقة الوسطى من الفرن مدة 45 – 60 دقيقة حتى تنضج ثم تترك لتهدأ مدة 10 دقائق قبل تقديمها .

تنويعات :

·          ممكن دهن الصينية بالزبدة و الثوم المدقوق لإضفاء نكهة لذيذة .

·          إذا أردت تخفيف الدسم في الوصفة يمكن أن تستغني عن الزبدة في صلصة البيشاميل, و يمكن أيضاً الإستغناء عن الجبنة المبشورة بين الطبقات .

·          ممكن أن ترشي على وجه الصينية كعك مطحون ( بقسماط ) لإضافة القرمشة على اللازانيا .

·          يمكن تحضير صينية اللازانيا و الاحتفاظ بها في قسم التجليد في الثلاجة حتى وقت الحاجة .

أضافة إلى المفضلة (3) |

أقتباس | مشاهدات : 10237

تعليقات (35)

1 فكرة
الكاتب ام نور, on 29-08-2007 17:09
الف شكر انا كتير بعمل لازانيا بس بعطل هم لانها بتاخود وقت بس الان عرفت انو ممكن تعمل وتوضع في البراد وهاك ممكن الست تعملا قبل بوقت ومنكم نستفيد

2 الكاتب منى, on 30-08-2007 07:14
هلا فيك أختي ام نور

الازانيا فيها تقعد معك بالفريزر لحتى شهر تقريباً ..

و فيك كمان تعملي حشوة اللحمة و تعبيها و تحطيها بالفريز لوقت اللزوم

نورتي أختي

3 الكاتب سارونات, on 14-08-2008 00:12
السلام عليكم و رحمة الله و بركاته
جازاك الله خيرا اختي منى على الوصفةمن زمان عبالي ساوي لازانيا و هلأ بتبلشالاسئلة كالعادة استعدي

-- الله يعينك -- اولا هل جربتي تساوي عجينة المعكرونة و اللازانيا بالبيت لان لقيت وصفات لتحضيرها على النت و كمان بهالفترة ما فيني استعمل لحمة مفرومة هل بقدرقطع اللحمه شقف زغار و استعملا او بنطر لتصير عندي لحمة مفرومة و كتير فرحت لما قلتي انو فينا نحطا بالفريزر يعني قصدك نحضرا كلا و نحط كل المكونات و بعدين نحطا بالفريزر او في اشياء ما بينفع نحطى
بالتوفيق
سلام

4 الكاتب منى, on 14-08-2008 07:42
هلا أختي

جربت اعمل العجينة بالبيت و ان شاء الله الوصفة رح نزلها قريب في الموقع , و انا قصدي انك بتجهزي الصينية كلها و بتحطيها في الفريز و لما حابة تقدميها بتطالعيها و بتستني يفك عنها التلج شوي و بعدها بتخبزيها في الفرن ,

اللحمة ممكن تفرميها على ماكينة فرم اللحمة ليصير عندك لحمة مفرومة , هل الوصفة ما فيك تحضريها باللحمة الشقف

5 الكاتب سارونات, on 14-08-2008 17:11
السلام عليكم و رحمة الله و بركاته
جازاك الله خيرا اختي منى و حلو كتير انك جربتي العجينة ان شاء الله بتحطي الوصفة باسرع وقت :zzz

مشان ساويها
بالتوفيق
سلام

6 الكاتب منى, on 14-08-2008 17:55
ان شاء الله أختي

و ان شاء الله تجربي اللازانيا و تعجبك

7 الكاتب سارونات, on 31-08-2008 15:10
السلام عليكم و رحمة الله و بركاته
انا ما اشتريت لازانيا من قبل بس شايفتا و دقتا مرة المهم متل ما قلتلك بدي ساوي العجينة بالبيت و راح حاول انطر تحطي الطريقة بس ازا ما قدرت راح ساويها حسب ما لقيت بالنت و ازا بتقدري يا ريت تكتبيلي الطريقة و النصائح المهمة هون لان اكيد ما راح تقدري تساويها قريباو راح كون كتير ممنونة
كمان هل فينا نستغني عن الجبن الكريمي و نحط جبن عادي يعني لافاش كيري مثلا
رمضان كريم و ربنا يتقبل منا و منكم الصيام و الطاعة
بالتوفيق
سلام

8 الكاتب منى, on 01-09-2008 11:07
هلا أختي , الطريقة و النصائح كتير بدها شغل , افضل ان تكون في وصفة مستقلة

الجبنة الكريم الي انا بقصدهاهي نفسها جبنة متل كيري أو لافاش كيري و غيره , هذا اذا قصدك عن الجبنة الي منستعملها في البيشاميل

ااامين أختي و ان شاء الله من عتقائه يا حق

9 الكاتب سارونات, on 01-09-2008 13:41
اللازانيا لما نخليهابالفريزر منخليها متل ما هي او منغطيها بنايلون و هل بتفرق ازا تركناها بس لاربع ساعات و ازا خليناها لايام
كمان شو بالنسبة لشرائح اللازانيا المحضرة بالبيت كمان ما منسلقها
بالتوفيق
سلام

10 الكاتب منى, on 01-09-2008 14:19
هلا أختي , منغطيها أكيد إذا كنا ناوينن نحتفظ فيها لأكتر من 4 5 ساعات , و ممكن نحتفظ فيها بالفريزر لمدة شهر , الازانيا بالعجينة البيتية بدها سلق

11 الكاتب سارونات, on 11-09-2008 23:07
السلام عليكم و رحمة الله و بركاته
اختي منى انا مصرة ساوي لازانيا يا انا يا هي انا لقيت ان العجينة فيها زيت بالاضافة للبيض و الملح و الطحين بكل الوصفات بالنت بس في كتاب لقيتها من دون زيت بقى شو قولك بزيت او منه دون زيت :upset

و هل العجينة بدا عجن او بيكفي بس نجمعها تحتى تصير عجينة كمان هالعجينة لازم تسلق و تستعمل بنفس اليوم او يمكن الاحتفاظ بها و كيف بقصها يعني 10*4 سم متل ماانقال في الكتاب او اقل او اكتر او حسب حجم الصينية تتصير كل طبقة مكونة من ورقة واحدة
بعرف تقلت عليك سامحيني
:cry

بالتوفيق
سلام

12 الكاتب رنا, on 14-09-2008 22:53
والله يامنونة هلأ خلصت منها وحطيتها بالبراد لبكرا قولتك رح تزبط معي

ولا رح يصير وجه زوجي هيك :eek

ياستي انا كل شي ساويت متل ماقلتي بس صوص البشاميل ماطلع مريق وانتي بالصورة مبين انه طالع معك مريق انا طلع معي لاسميك ولا مريق كتير يعني اسمك من الحليب بس اللي حاطتيه انتي كأنه متل الحليب
تاني شي الاازانيا بعد ماطبقتها وحطيتها بالبراد حسيت انه عم يطلع منها ماء البندورة ياترى اوراق الازانيا رح تفشفش ولا شو ؟؟
ادعيلي تطلع ظريفة والله اشتغلت فيها كتير :cry

بكرا بخبرك شو بيصير معي

13 الكاتب رنا, on 14-09-2008 22:58
بتعرفي شو بعد ماخلصت رجعت قريت الوصفة قام لقيت انه اخر طبقة لازم تكون لازانيا وبعدين يشاميل بعدين جبنة
انا حطيت اخر طبقة عادية يعني لازانيا لحمة بشاميل كتيلا بعدين جبنة وخلص
يعني حط بكرا فوق الازانيا جبنة مرة تانية ولا بيمشي الحال؟

14 الكاتب منى, on 15-09-2008 05:54
هلا سارونات

اختي العجينة من دون زيت اكيد, بتخفقي البيض شوية و بتحطيه بنصف الطحين و بتفركيهم بروس صابيعك لحتى تتجمع العجينة على بعضها بعدها بتعجني الكل كتير منيح لمدة عشر دقائق و بتقطعيها لمستطيلات متل ما قال كتابك لتسهيل عملية السلق , لا تنسي تخليها ترتاح شغلة ربع ساعة قبل السلق لحتى تنشف شوي, ما أظن بينفع معها التفريز و الافضل انك تحضريها بنفس اليوم , بعرف اختي مقصرة معك بس سامحيني الوصفات الي عم تطلبيها كلها من العيار الثقيل الي بده تحضيررر كتير :zzz

15 الكاتب منى, on 15-09-2008 05:58
هلا رنونة

أنا البيشاميل طلع معي وسط , ما بعرف كيف بين بالصورة هيك , المهم هلأ أن السماكة تبعة بيشاميلك هي التمام و المظبوطة ..

اذا استعلتي كمية الازانيا تبعة الوصفة ما انصحك تضيفي كمان ورق لازانيا لأن بعدها رح تصير الازانيا ناااشفة و مو كتير طيبة , هلأ اليوم بيمشي الحال و ان شاء الله المرة التانية بتبقي تحطي لازانيا على أخر طبقة , أهم الشي تكوني استعملتي لازانيا مصنوعة من سميد القمح القاسي و الا الازانيا رح تفشفش معك , الله لا يقدر , يلا بانتظار رأيك بعد الفطور و ان شاء الله بتعجبكم

16 الكاتب رنا, on 16-09-2008 07:22
الله يسلم ايديكي على هالطريقة اللي بتبيض الوش

ايه شو لازانيا يعني عن جد كتير ناجحة وكله بفضل نصائحك وتوجيهاتك الله يخليلنا ياكي يااشطر ست بيت بالعالم وعلى فكرة مااثرت اخر طبقة ابدا بالعكس طلعت طبقات وعلى اصلها بس مو خرج ريجيم ابدا خصوصي اني حطيت بقلب البشاميل جبنة ودهنت الصواني زبدة وحطيت فوقها كمان شوية زبدة بس شو عن جد تحفة يسلمو هالايديييييييين

وهي صورتها

17 الكاتب منى, on 16-09-2008 07:46
رنونة ألف ألف ألف صحة يا رب , كتير انبسطت انها عجبتك و كمان فرحت أكتر بصورة اللازانيا , حرام عليك من على الصبح شي بيشهي و غيررر شكل و خصوصا الصورة التانية :eek

أكيدة الازانيا ما الها علاقة بالريجيم , بدها واحد قلبه قوووي و ميت من جوعه :grin

, ان شاء الله هنا مرة تانية و الف شكر ليك على الصور

18 الكاتب سارونات, on 15-10-2008 00:31
السلام عليكم و رحمة الله و بركاته
الله يخليلي ياكي اختي منى لا و الله مو مقصرة انا بعرف انك عم تساوي اللي عم تقدري عليه و يادوب تلحقي بين البيت و الموقع و الاسئلة :upset

و انا عم اتعبك كمان و انت عطول جنبي
و هلأ قربت اللحظة المهمة و راح جربا قريبا جدا بس بدي اعرف شي تحتى اتأكد و هو السؤال المشهور عن قياس الصينية تحتى شوف ازا بساويهابالصينية لصغيرة كتير او اللي اكتر منهالان راح ما راح ساوي كمية صغيرة
انا حسبتها حسب شرائح اللازانيا بس بدي اتأكد من خلال قياس الصينية تحتى يكون كل شي مضبوط و دقيق
بتعرفي اختي منى شو اللي مخوفني هو انها ما تنضج منيح و تطلع معجنة بس ان شاء الله لا و كل شي بيكون تمام
اختي رنا مبروك نجاح الوصفة و من نجاح لنجاح ان شاء الله
بالتوفيق
سلام

19 الكاتب منى, on 15-10-2008 03:55
هلا أختي

الصينية البايركس أكبر قياس و يكون حوافه عالية لحتى يسع لكل المقادير , لا تاكلي هم الاستواء لان رح تظبط اكيد ان شاء الله , بشرط مهم كتير و هو استعمال الازانيا المصنوعة من القمح القاسي , هيك اسمه :zzz

20 الكاتب سارونات, on 15-10-2008 14:45
السلام عليكم و رحمة الله و بركاته
يخليلي ياكي اختي منى
راح ازعجك كمان شوي لا تواخزيني بعرف انها صينية بايركس حجم كبير بس انا ما عندي حجم كبير فما بعرف قديش حجمها فهمتي علي لهيك بدي ياكي ازا فيكي تقيسيها لان راح اقسم المقادير تحتى يطلع كل شي مضبوط
و اخر شي بدي اعرف ازا شريحة اللازانيا كانت اطول من انها تجي بالصينية فيني اقسمها ما هيك
بالتوفيق
سلام

21 الكاتب souha, on 17-10-2008 22:26
هلا منى كيفك صرلي أكثر من اسبوع عم قول بدي أعمل لازانيا و ما عم يصحلي و لما قريت الوصفة حبيتها لكن لفت نظري كمية جوزة الطيب لأنو جوزة الطيب سامة و أنا حذرة باستخدامها و هل المعلومة وجدتها في كتاب الغذاء لا الدواء و كان مكتوب فيه إنو حبة جوزة الطيب تقتل شخص وزنه 70 كيلو و قبل ما أكتب هالتعليق حبيت أتأكد أكتر من المعلومةعن طريق الإنترنت لكن فوجئت بأنها نبات مهلوس أبضاإذا أخذت بجرعة 15-20 غ ممكن تعملي بحث في google عن جوزة الطيب و تتأكدي بنفسك ,آسفة طولت عليكي

22 الكاتب منى, on 18-10-2008 07:12
:eek

لا بالعكس سهى معلومة مهمة كتير , انا سمعت هيك شي بس مو متاكدة , و التأثير كله بقشرة الحبة على ما اعتقد , الف شكر ليك على المعلومة و رح عدل الوصفة ان شاء الله

سؤال : هلأانا كان معي بالصف واحدة الها نفس اسمك الكامل , يس مو متزكرة اذا بالاعدادي او الثانوي , انا كنت بفوزي الجسري و بعدها بنابلس

23 الكاتب souha, on 18-10-2008 10:18
تسلمي يامنى

أنا كمان كنت بفوزي الجسري و بعدها بنابلس و كان معنا حلا صفاف و رزان طاووز إذا بتذكري شي من هالأسماء معناها كنا سوى أنا من مواليد 1977 :zzz

24 الكاتب souha, on 07-11-2008 18:56
شو منى ما رديتي ع التعليق :zzz

شو طلعنا معارف من أيام الدراسة

25 الكاتب منى, on 08-11-2008 05:38
و الله رديت بس ما بعرف ويين طار الرد :roll

اكيد بذكرهم و حتى انت متذكرتك بس خيال , سبحان الله انا ما بحفظ اسماء ابداً بس انت كنيتك باقية ببالي

يا ستي بعد زمان , شو مشتهية اعمل رابطة طلاب فوزي الجسري و نابلس و نشوف بعضنا كلنا مرة تانية :grin

26 الكاتب souha, on 08-11-2008 12:22
فعلاً بعد زمان

صرنا اتنين أنا كمان ما بحفظ أسماء إن شاء الله بيحالفنا الحظ و منتلاقا :zzz

27 الكاتب منى, on 08-11-2008 13:42
ان شاء الله

28 الكاتب سارونات, on 13-11-2008 10:05
السلام عليكم و رحمةالله و بركاته
اختي منى شوفي اللي صار معي اناكنت راح ساويها و حضرت كل شي بس ما اجت فرصة المهم قمت قلت بساوي صلصة اللحمة و حطها بالفريزر فساويتها بس للاسف كل الصلصة تبخرت يعني صارت متل الحشوة مع اني ضفتلها شوية مرق دجاج بالاخير بس مو كافي لان غصير الطماطم تبخر المهم انا فرزتها بس ازا كانت ما بتنفع ساوي فيها لازانيا قوليلي لان مابدي يضيع كل شي و ما تضبط اللازانيالانك قلتي انها راح تتشرب الصوص تتصير طيبة و انا الصلصة صارت متل الحشوة
بعتقد بقدر ساوي فيها موساكا بطاطا و عيد حضر صلصة اللازانيا من جديد و خلي فيها الصوص
انا اصلا ساويت ثلث الوصفة
ناطرة اجابتك
و كمان لما بطالع الحشوة من الفريزر بنطرها تحتى تدوب تماما او ب ستحتى يفك عنها الثلج شوي
بالتوفيق
سلام
سلام

29 الكاتب منى, on 13-11-2008 14:39
هلا أختي

لا تعمليها مرة تانية بس ضيفي كمان مرق و خليها تغلي مع الصلصة مدة 5 دقايق قبل استعمالها

30 الكاتب سارونات, on 17-12-2008 12:36
السلام عليكم و رحمة الله و بركاته
و اخيراااا ساويتها اليوم و طلعت كتير طيبة
جازاك الله خيرا اختي منى و جعله في ميزان حسناتك
بالتوفيق
سلام

31 الكاتب سارونات, on 22-04-2009 14:53
السلام عليكم و رحمة الله و بركاته

اختي منى عندي طلب لو سمحتي و هو حشوات مختلفة للازانيا و بالخصوص حشوة بالدجاج و حشوة السبانخ بلا لحمة و اهم شي بدي حشوة تكون بالخضر و من دون لحمة او دجاج انا عم دور بس لهلا ما لقيت اخر واحدة يا ترى في عندك الهم صفات

بالتوفيق
سلام

32 الكاتب منى, on 23-04-2009 07:40
هلا سارونات

عافية و صحة و الف هنا ياحق .

عندي وصففات كتير , بس من وين بدي جيب الوقت لرتبهم كلهم و نزلهم :roll

, رح اوعدك فيهم بس اذا اتاخرت لا تزعلي

33 الكاتب سارونات, on 23-04-2009 10:29
االسلام عليكم و رحمة الله و بركاته

يخليلي ياكي اختي منى طيب انا ناطرتك و انت و ظروفك :zzz

ربنا يوفقك و يسهل دربك

سلام

34 الكاتب رغد غسان علاء الدين, on 29-01-2011 11:22
يمممممي شكلها بيغرف القلب..هللئ انا عملتها من فترة ونزلت الصورة بألبومي..بس بصراحة أضفتي كم نقطة كتير لفتو نظري..أول شي إنو ما نحطها بالفرن فورا..تاني شغلة الدهن بالزبدة..تالت شغلة..التوم كان رايح عن بالي ..الكعك المحطون.زكتير فكرة لذيذة..يا ستي يعطيكي ألف عافية يارب..ويما يحرمنا منك أبداااا..

35 الكاتب منى, on 29-01-2011 18:51
خليلي عينك رغودة

ان شاء الله تجربيها و تكون متل ما بتحبي او اطيببب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 18/10/2008 )

< السابق		التالى >

[ عودة ]