L2ma.com | لقمة طيبة | L2ma.com | لقمة طيبة | الكبسة السورية | الكبسة, على, الرز, الدجاج, ملعقة | L2ma.com

القائمة الرئيسية

الكبسة السورية

الكاتب/ منى

14/03/2010

اليوم وصفتنا كبسة , بس مو الكبسة السعودية المشهورة , كبسة على طريقتي لهيك فيكي تسميها كبسة سورية . في عدة اختلافات عن الكبسة السعودية , اولها اني لاحظت ان أغلب السوريين ما بيحبوا نكهة اللومي و انا بدي نكهة حمض بسيطة جداً في الكبسة لهيك استبدلته بعصرة ليمون صغيرة , بقى اذا كنت من محبي اللومي استخدميه و اذا نو استبدليه بعصرة ليمونة و انا بحضرها بالعصرة لحتى توافق الراي العام العالمي عندنا , شي تاني أن الكبسة بتتحضر باللحم أو الدجاج المسلوق مع المنكهات و البهارات و بعدها منشوى الدجاجات أو اللحمة للحصول على اللون الذهبي الشهي , لاضافة اللمسة السورية استخدمت دبس الفليلفة و هو ما عدا اللون رح يعطي طعم بيجنن .

انا بشوف أن الكبسة باللحمة أطيب و أوجه للعزايم و لما تجي تحمري قطع اللحمة لازم تنتبهي لحتى ما تنشف أما اذا رح تستخدمي الدجاج فلازم يكون الجلد مواجه الشواية لحتى يحمر و يصير متل ليلى الحمراء على قولة ماما . أخر الشي من أسرار كبستي انك تستخدمي الزيت لتقلاية البصل و الفليلفة لحتى ما يتكتل الرز على بعضه و بعدها تستخدمي السمنة البلدي لاضفاء لمعة على الوج و نكهة طيبة لان الرز ما بتكتمل نكهته الا بالسمنة و السر التاني هو اضافة الزعفران المنقوع بالمي , يممممم و لافضل طعم و نكهة انصحك انك تنقعي الزعفران قبل بيوم بشوية مي دافية .

بهارات الكبسة الي استخدمها على نوعين , البهارات الكاملة و هي لسلق اللحمة أو الدجاج و البهارات الناعمة و هي الي استخدمها لتتبيل الرز و هي اذا كان فيكي توصي عليها حدى من السعودية بيكون كتير منيح و إذا ما فيكي فهل البهارات متوفرة عند العطاريين في المدينة أو البزورية و المحل الي جربت بهاراته و كانوا طيبين و متل ما بدي هو ابو زياد الهلالي , انت فيكي تشتريها من ايا محل بس لازم قبل ما تشتري تشمي ريحتها و تدوقيها بطرف لسانك , اذا عجبوكي اشتري و اذا لا دوري على غير محل . أنا لما اشتريت بهارات الكبسة اول مرة شميتهن و ما حبيت الريحة ابداً , بس بعد اصرار البائع ان بهاراته هي بهارات الكبسة الاصلية اشتريتها و كانت النتيجة ان الكبسة الي حضرتها بهل البهارات طلعت مو طيبة ابدا , لهيك دائما ثقي في حدسك .

خلصنا حكي عن الكبسة و هلا رح خبركن اخر اخبار الموقع متل ما كلكن شفتوا , انضم لقمة طيبة لأسرة بوابتي , بوابة سورية لتصفح الانترنت الامن و هي موجهة للشباب و الصبايا الصغنونين و الي هلا بديوا يكتشفوا النت , الفكرة بتجنن و انا اجت الي بالوقت المناسب لان بالوقت الي سمعت عنها أول مرة كانت بنتي الكبيرة عم تسالني اذا فيها تدخل على النت لحتى تجيب معلومات عن موضوع طالبينه في المدرسة و مدّرستها طلبت من الجميع ان يبحثوا عن المعلومات في النت . صراحة لولا بوابتي ما كنت رح كون مرتاحة , لان متل ما بتعرفوا النت عالم كبير فيه المنيح بس للاسف فيه كمان شي بشع كتير و نحنا مهمتنا كاهل نحمي اولادنا و بنفس الوقت ما فينا نمنعهن من شي صار اساسي بحياتنا. الشباب الشغالين على بوابتي من الشباب المتميزة جدا , برافو عليكم و ان شاء الله سوريا رح تصير احسن و احسن طول ما فيها ناس شغالة بضمير و بتفكر دوما بغيرها .

بالصحة و الهنا

لطبخ الرز :

6 – 7 ملعقة كبيرة زيت نباتي
بصلة كبيرة , مفرومة ناعماً
2 – 3 فلفل أخضر حرّ
3 كوب رز بسمتي , منقوع بماء بارد و ملح لمدة ساعة
ربع ملعقة صغيرة بهار مشكل
ملعقة كبيرة بهارات الكبسة
نصف ملعقة صغيرة كركم
2 - 3 قرنفل
نصف ملعقة بهار حب
3 حبة هال صحيح

لسلق اللحم أو الدجاج :

2 كيلو دجاج , صدر و فخذ , كامل مع الجلد و العظم
2 ورق غار
ملعقة صغيرة حب فلفل اسود
2 زنجبيل كامل
2 عود قرفة
ملعقة صغيرة حب الهال الكامل , يضرب بخفة كي تفتح الحبات و نحصل على نكهته
4 – 5 قرنفل
حبة جوزة الطيب
حبة كبيرة بصل مقطع أرباع
ملعقة صغيرة كركم

لتحمير اللحمة أو الدجاج :

2 ملعقة كبيرة دبس فليلفة
ملعقة كبيرة معجون الطماطم
نصف فنجان صغير زيت زيتون
1 – 2 فنجان صغير مرق السلق
نصف فنجان صغير ليمون
نصف ملعقة كبيرة بهارات الكبسة

سر الكبسة :

ربع ملعقة صغيرة زعفران شعيرات
نصف فنجان صغير ماء دافئ

2 ملعقة كبيرة سمنة بلدي او زبدة
كاجو أو لوز
direction

·         ينقع الزعفران بالماء الدافئ و يترك حتى إعداد بقية المقادير و يمكن تحضيره قبل بيوم .

·         يغمر اللحم أو الدجاج بالماء و بعد أن يغلي ترفع الرغوة , ثم تضاف البهارات و البصل و يترك حتى ينضج , يضاف الملح و يترك ليغلي لمدة ربع ساعة , يرفع اللحم أو الدجاج من مرق السلق .

·         يحضر الرز يقلى البصل بالزيت حتى يشقر , تضاف الفليلفة و تقلب لبضع دقائق ثم ترفع الخضار بملعقة ذات ثقوب على طرف .

·         يضاف الرز لنفس الزيت الذي تم تقليب الخضار فيه مع بهارات الكبسة و البهار المشكل و البهارات الصحيحة و الكركم و يقلب الكل بلطف لبضع دقائق .

·         يضاف مرق سلق اللحم و الدجاج بعد تصفيته , لكمية 3 أكواب من الرز البسمتي يلزمنا ثلاث أكواب و ثلاث أرباع الكوب من المرق , بعد أن يغلي المرق مجدداً نضييف قلية الخضار و يغطى القدر و يترك حتى يمتص الرز المرق و ينضج .

·         يضاف الزعفران المنقوع و يترك الرز ليتهدى لمدة ربع ساعة , يقلب بالشوكة و ترفع حبات الهال و حب الفلفل حسب المستطاع .

·         تخلط تبلة التحمير و يضاف من مرق السلق ما يكفينا لتكون الصلصة قابلة للدهن ثم يتبل اللحم بالصلصة و يرتب في صينية مغطاة بورق المنيوم و اذا استخدمنا الدجاج يراعى أن يكون الجلد للاعلى . تشعل الشواية من فوق و يترك حتى يحمر .

·         يسكب الرز في طبق التقديم و يوزع فوقه الدجاج المحمر .

·         يقلى اللوز أو الكاجو بالسمنة حتى يشقر ثم يوزع مع السمنة على الكبسة و تقدم فوراً مع سلطة الكبسة .

أضافة إلى المفضلة (2) |

أقتباس | مشاهدات : 7797

تعليقات (25)

1 الكاتب semo, on 14-03-2010 21:59
مممممممممممممممممممم بتشهي وريحتا وصلت لعندي الله يعططيكي الف عافية انا اختصاصي كبسة سعودية وكتير قريبة من طريقتك
والمرة الجاية رح جرب طريقتك لأن جوزي من عشاق كل انواع الرز وخصوصا الكبسة

مبروك على بوابتي وفعلا شي كتير منيح الله يحمي هالشباب وان شا الله سوريا من حسن للاحسن

عفكرة انا عم انتظر ردك بوصفة الباشاميل والفلافل

2 الكاتب ام الفوارس, on 15-03-2010 20:32
السلام عليكم
كيفك يا منى انشالله تكوني انت و اهلك بخير
و شكرا كتير لانك نزلتي طريقة الكبسة شكلها بيشهي و تغيير عن الكبسة السعودية انا بساويها من اختراعي لاني بالغربة و حبيت جربها بحطلها بهارات مشكلة و هيل و طبعا بهاراتها الخاصة بس حابة جربها بطريقتك انشالله لانو شكلها يا سلام روعة
بس سؤال شو هاد اللومي ما بعرفه
اسفة طولت عليكي

3 الكاتب ام الفوارس, on 15-03-2010 20:45
صح نسيت مبروك على بوابتي و انشالله الله يهدي هالشباب و البنات
عم استنى روزاليتا انشالله منك لانو باين عليها بتجنن
:zzz

4 الكاتب snow whit, on 15-03-2010 22:54
و أخيرا نزلتي الوصفه ..

راح جربها في أقرب وقت

بس سؤال ..ممكن نسبدل دبس فليلفه بشي ثاني

لان انا ماعمري سمعت فيه حتى الاهل مانعرفه أبدا ولا نستخدمه ...

وشكرا كثيييير ع الوصفه

سلااااام

5 الكاتب تورتاية بالكريز, on 16-03-2010 07:24
تسلم الايادي منمون الغالية
من اول ماشفت العزومة اكتر شي شدني شكل الكبسة ماشاء الله تبارك الله
كل شيء متوافر عدا الزعفران للاسف دورت على انواع اصليه تعطي نكهة زعفران السعودية التي تذوقتها منذ سنوات فلم اجد الا الانواع التي تعطي لون بلارائحة ونكهة الزعفران المميزة
الف الف شكر حبية قلبي على الوصفة الحلوة المرتبة جعلها المولى بميزان حسناتك يارب وان شاء الله متجمعين على الفرح والخير دايما ياقمر

6 الكاتب ام نور, on 16-03-2010 11:48
شو هالكبسة لملوكية يا منى شي بيشهي وطريقة مميزة كلك زوء حبيبتي سلم هالديات والله يبارك فيكي وفكرة تحمير الجاج كتير عجبتني ممكن نستعملها لا غير الكبسة ايا وصفة بتحتاج لا دجاج محمر

شو رايك ما بيمشي الحال

7 الكاتب huda81, on 17-03-2010 05:05
الله يسلم هل ادين... أنا كتير ممنونه لإلك يا منى، شكرا كتير على هلوصفات الروعة... :zzz

8 الكاتب منى, on 17-03-2010 08:38
هلا سمسومة

ممممم , انا كمان بحب كل انواع الكبسة , لان ما كتير بدها شغل و بتطلع بتشهي على السفرة , و اذا ما في صعوبة عليك بدي منك طريقتك في الكبسة :zzz

الله يبارك بعمرك يا رب

يلا لاحقتك :grin

9 الكاتب ميساء, on 18-03-2010 08:29
تسلم ايديكي شي بيشهي هالكبسة وشكرا لكل ملاحظة وتوجيه عم تفيدينا فيه يا أميرة أنت يا ست الحلوات :zzz

وهلأ أنا بانتظار أتعرف على الست روزاليتا ما بعرف ليش حاسستها لذيذة وقمورة وبنت عالم وناس

شكرا مرة تانية والله يوفقك ويسعدك أنت وكل أحبابك يا رب العالمين

10 الكاتب نور الأسلام, on 21-03-2010 21:06
السلام عليكم كيفك منى وكيفكم جميعا يسلم دياتك يارب

شي طيب وبشهي انا مفتوحه نفسي على الاكل بالشهر الاخير من الحمل وحاسه وزني صاير زياده ومع هالطبق يامنى شهيتيني وانا عم حاول اخفف لكن :roll

11 الكاتب رنا, on 22-03-2010 14:11
ايه شو هالكبسة هي ...ياخيتووو غير شكل ...طريقتك نفس طريقتنا تمااااام بس عندك بالوصفة تحمير الدجاج كتير روعة وهو الي رح جربه المرة الجاية

مبروك انضمام الموقع لشبكة بوابتي وانشالله من تقدم لتقدم يارب ...وبعدين فرحت بشغلة انه خلي هالصغار تتعلم الطبخ والنفخ ...لانه شي كم سنة تانية رح ينقرض الطبخ :grin

12 الكاتب منى, on 01-04-2010 20:31
هلا ام الفوارس

ان شاء الله تجربيها و تطلع طيبة و متل ما بتحبي

اللومي هو الليمون المجفف بيكون لونه غامق و على بني و فيه طعمة حموضة و متل ما قلتلك اذا مو متوفر او ما بتحبيه فيك تحطي عصرة صغيرة ليمون

ايا سؤال تاني من عيوني

13 الكاتب منى, on 01-04-2010 20:36
هلا اختي سنو وايت

يا رب تجربيها و تكون طيبة كتير و على زووءك .
دبس الفليلفة اذا مو متوفر فيك تلغيه من الوصفة , هلا هو رح يعطي طعم و لون مميز بس بتطلع من دونه كمان طيبة

اذا بتحبي مكن تطلعي على قسم اسئلة و احوبة لحتى تشوفي دبس الفليلفة و تحضيره بطريقتين

14 الكاتب منى, on 01-04-2010 20:59
هلا حبيبتي ام ياسمين

للاسف حبيبتي , هو صح بتطلع الكبسة طيبة بس الي رح يميزها هو الزعفران :roll

الف الف شكر الك للدعوة الكريمة , يا رب الك متلها و اغلى من قلب محب و صادق

15 الكاتب سارونات, on 14-04-2010 22:16
السلام عليكم و رحمة الله و بركاته

من زمان بدي جرب الكبسة بس بدي اعرف اذا ممكن عمل بهارات الكبسة بالبيت

بالتوفيق

سلام

16 الكاتب منى, on 15-04-2010 14:18
هلا سارونات

ما عندي مقادير لبهارات الكبسة :roll

حبيت ساعدك اكتر , بس خيرها بغيرها :zzz

17 الكاتب منى, on 20-04-2010 10:54
هلا ام نور

اكيد بيمشي مع ايا نوع , و حتى البهارات ممكن تعدليها حسب زوءك و نفسك و طلب العيلة عندك

ان شاء الله تجربيها و تكون متل ما بتحبي و اطيب :zzz

18 الكاتب منى, on 20-04-2010 11:12
هلا هدى

من زووءك اختي مية السلامة فيك و ان شاء الله تجربيها و تعجبك :zzz

19 merci
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-04-2010 16:26
merci pour ce site ulite

20 الكاتب منى, on 22-04-2010 07:20
الشكر الك اختي

نورتينا و شرفتينا مية اهلا و سهلا :zzz

21 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-04-2010 11:22
shkrn ktir madame mouna

22 الكاتب منى, on 26-04-2010 09:37
مية هلا فيك

الشكر الك اختي لتواجدك في بيتنا

23 الكاتب منى, on 26-04-2010 09:45
هلا ميوسة

الله يسلمك يا رب و يخليك و اتمنى تجربيها و تعجبك :zzz

دعواتك كتير غالية على البي و كتير بحس فيهن انه عم يوصلولي , ان شاء لله انت كمان و كل واحد قريب على البك و الف شكر الك

رح استنى رايك اذا جربتيها :zzz

24 الكاتب areej, on 19-06-2011 19:03
كتيييير طيبه والله يامدام منى تسلم ايدكي جربت الكبسه وطلعت معي رائعةأناكتيييير حبيت الموقع واستفدت منو خيرات الله ....الله يجزيكي الخير

25 الكاتب منى, on 20-06-2011 20:02
صحتين و الف الف عافية اريج

الحمد لله انها عجبتك و منورة يا قمر

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 17/03/2010 )

< السابق		التالى >

[ عودة ]