كوب و نصف حليب
نصف كوب زبدة
نصف كوب سكر
ملعقة كبيرة خميرة

بقية المقادير :

5 كوب طحين , يمكن اضافة نصف كوب أخر .
كوب حليب بودرة
2 بيضة
رشة فانيليا صغيرة
ملعقة صغيرة بيكنغ بودر
ملعقة صغيرة ملح

للحشوة :

سكر بني , و يمكن استعمال السكر الابيض في حال عدم توفر البني
زبدة مذوبة حوالي الكوب الى الكوب و ثلث
قرفة

للتغطية :

كوب و نصف سكر بودرة منخول
2 ملعقة كبيرة زبدة سائلة
2 – 3 ملعقة كبيرة حليب
بشر ليمونة

أو يمكن استعمال الحليب المكثف المحلى

·         توضع مقادير المزيج الأول , ما عدا الخميرة , على نار هادئة حتى يصبح الحليب فاتر و مائل للسخونة و قبل أن تذوب الزبدة تماماً . تضاف الخميرة و يغطى القدر و تترك جانباً لمدة ربع ساعة .

·         يضاف مزيج الخميرة على بقية المقادير و يعجن الكل حتى تتشكل لدينا كرة ناعمة و مطاطة يمكن اضافة المزيد من الطحين إذا كانت العجينة دبقة  , توضع العجينة في وعاء مدهون بالقليل من الزيت , تغطى و تترك في كان دافئ حتى تتخمر و يتضاعف حجمها .

·         تفرد العجينة على سطح مرشوش بخفة بالطحين على شكل مستطيل , تدهن بالزبدة المذوبة

ثم ترش بالسكر البني و القرفة .

·         تلف العجينة متل السويسرول

ثم تقطع لقطع بسماكة 3 سم تقريباً ,

 توضع القطع في صينية مدهونة و تترك لتتخمر مرة ثانية من دون غطاء , اذا اردت أن تكون السينامون رول بشكل قطع , باعدي بين كل قطعة و اخرى كي  لا تلتصق .

بعد التخمير

·         تخبز الصينية في الفرن على درجة حرارة 180 حتى تنضج .

·         تقلب مقادير الصوص ثم يوزع على السينامون رول و هي لا تزل دافئة و تقدم مع الحليب أو القهوة .  

 

تعليقات (75)

3  الكاتب laraye, on 19-02-2010 04:19 شو هاد يا منى و الريجيم وين اروح فيو    كني لازم اجربا على ضيوف مو؟؟؟    مشان حدا يشيل عني كتف  يا ستي من الصورة وصلت الريحة لعندي    الله يسلم اديديكي

4  الكاتب dado, on 19-02-2010 06:25 صباحو يا قمر  من زمااااااان ما تحركشت فيكي   أول شي مشتاقتلك.. وتاني شي.. استنيني عالفطور.. بخلص دوام وبلتحق بالركب.  الوصفة كتير لذيذة وانا بحبها كتييييييير.. بس بصراحة بتخوف.. أول شي قلت نص كاسة زبدة بتمرق.. بعدين لما شفت الكمالة فرملت وقلت لحالي بضل باخدها جاهزة على أساس ما بعرف قديش فيها زبدة       طمنيني عنك منوش

6  الكاتب منى, on 19-02-2010 10:46 سلام ماجي   كلهن نفس الطريقة , المهم المقااادير , و هي الطريقة و المقادير طلعت فيها بعد عشتناعش تجربة .    الف صحة و هنا و فكرة التجميد بتساعد كتير , و خصوصا للمستعجلات , الف صحة مرة تانية و مرة تانية كلي عني كم قطعة

7  الكاتب ام دانية, on 19-02-2010 14:16 واوووووووووووووووووووو والله الصورة عم تحكي لحالا ماشاءالله يسلم هل الديات انا بجيب معي الحليب والكابتشينو بس المهم اخد قطعة يمممممم

11  الكاتب منى, on 21-02-2010 07:14 هلا غيوثة   ايه معقولة انسى , هو انا بتاخر بس ما بنسى     الف صحة و هنا على كل شي جربتيه و طلع متل ما بتحبي , و هادا من زووك يا قمر .    هلا ان شاء الله تطلع تمام و مستاهلة الانتظار و رح استنى رايك

12  الكاتب منى, on 21-02-2010 07:19 هلا لارا     ايه كني مو     الله يسلمك و يخليك و متشكرة هل الرد الحلو عند هل الصبحية

13  الكاتب منى, on 21-02-2010 07:37 دلوش حبيبتي صبحو فل و ياسمين , صباحو احلى من العسل و ابيض من القشطة     يلا رح استناكي , مع اني بتصبح على الاغلب بوج حلو و كربوج و بشرب معه الكابتشينو , بس هو و لا سائل و لا داري     هلا شوفي صحي هنن بيوقفوا القلب هل الكاسة و نص زبدة , بس اذا قسمناهن على 25 قطعة , الي هنن اجمالي القطع , ما رح تطلع الكمية كبيرة , بس بكل الاحوال ما خرج ننبحت عليهن لحتى نحافظ على البرستيج

14  الكاتب منى, on 21-02-2010 07:40 هلا غفران   ان شاء الله تجربيه و يكون طيب و على زووءك , و رح استنى رايك

15  الكاتب منى, on 21-02-2010 07:43 هلا ام دانية   يلا , عم استناكي , الك اكبر قطعة و فيك تني و تلتتي     الله يسلمك يا قمر و سلامي لكل العيلة

16  الكاتب ام جنى عبيدات, on 21-02-2010 14:17 ياسلاااااااااااام هاللاكله شو بحبها وبس باكلها من برا البيت... ما كنت اعرف انها سهله هيك لتنعمل بالبيت انشالله رح اجربها وابعتلك قطعه يا احلى منى

18  الكاتب رنا, on 21-02-2010 15:23 واخيراااا وصفة السينامون ....بتعرفي هالوصفة يامنووشة كتير موجودة هون بالامارات بكل المحلات في اكشاك خاصة باسم هالفطيرة اللذيذة ..ودقته كمان بعدة عزايم وكانت مميزة ولسه بطريقتك اكيد رح تطلع غير   بس شو مشان عشتناعش تجربة ....فرطتيني من الضحك ...ذكرتيني بسائق الاوتوكار تبع المدرسة كان مهووس بكلمة عشدقايق الله يذكره بالخير     شو مشان الفطور انا كمان معزومة ...خلص انا بعمل الكابتشينو لانه بيطلع معي لذيذ جدا بالخلطة السرية هلأ رح تقوليلي انك بتوعدي وبتخلفي بس عن جد خلصت اجازتي بسرعة وماقدرت اتعرف على هالوش الحلو ...خلص شي شهرين وراجعة وانشالله يكون الي نصيب والتقي فيكي ...نسيت قلك ...بتعرفي وحدة اسمها ملكة بكداش \  سلامات منوشة

19  الكاتب منى, on 21-02-2010 17:24 لك رنون انا نسيت كل الحكي و وصلت لعند ملكة , ايه شو بعرفها و ما بعرفها , كانت رفيقتي بدرس الانكليزي سنة كاملة و نحنا اعدين بجنب بعض و لهلا عندي على الدفتر كم كلمة كاتبتلها ياهن على الدفتر و هي عم ترد علي , على اساس لحتى ما نعطل الدرس احلى ايام و الله , سبحان الدايم , ان شاء الله بتعرفيها و صفيتيها على صف بهيجة     تاني شي , شو هادا الكابتشينو بالخلطة السرية يا منظومة , عارفة و ساكتة يعني , يلا عم استناكي و خيرها بغيرها و ان شاء الله تكون النتايج منيحة و ربي يسر

20  الكاتب منى, on 21-02-2010 17:27 هلا نهى   كلك زووء يا قمر , ان شاء الله تجربي هل الوصفة و تحبيها     الحليب البودر بيعطي طراوة للعجينة و اذا مو متوفر بيفع بس بالحليب اطيب بكتير , و كمان بالنسبة للسكر , انا جربتها بالسكر البني و السكر العادي , بيطلع بالابيض طيب كتير , بس بالبني غير

21  الكاتب منى, on 21-02-2010 17:30 هلا ام جنى   يلا رح استنى قطعتي , كبيريها و اذا بتبعتيلي تنتين تلاتة ما بقول لا , خطي مشان الصغار

22  الكاتب أم علي, on 22-02-2010 23:28 ممممممممممممممممممممم شكل ولا اروع لكان كيف الطعمة تسلم ايدك يافنانة بدي اسالك ست منى يمكن استبدال حليب البودرة بشي تاني

24  الكاتب Mays, on 23-02-2010 05:44 صباح السكر و القرفة و الحلو كله    شو هاد يا منوش ، شي بيجنن     يسلم إيديكي و أكيد ع التجريب يوم الخميس    صحيح منى ، أنا بدي اتشكرك كتير ع الموقع الرائع اللي فعلا بيغني سفرة كل وحده فينا.  يا ستي امبارح كان عندي عزيمة ع العشا و عملت كتير وصفات من الموقع، و وصفات أنا بعملها و كانت السفرة بتجنن و كتير اشتهيت صورها بس الضيوف مو كتير آخدة وش عليهن و استحيت صور الأكل إقدامهن ، بس التعليقات كانت كتير إيجابية و كلهن قالوا إنو السفرة للفرجة مو للأكل.  أنا عملت فطيرة الشاورما و صينية التوست و السلطة المقلمة (منظرها فعلا تحفة) و كبة مقلية وسلطة الجرجير و إيش و فتة السبانخ و ميني فطاير كيش و كانابيه مشكل و تكا سمك و حمص و متبل.    مرة تانية شكراكتير ، لإنه الأكلات اللي جربتها من الموقع فعلا كانت مميزة و نالت إعجاب الحاضرين.    بعرف طولت عليك ، بس هاد فعلا لإني كتير ممنونتك.

25  الكاتب رنا, on 24-02-2010 15:12 ياريتني كنت قلتلك بعرف ملكة من زمان مشان تحبيني اكتر   ياستي ايه نعم رح صفها على صف بهيجة خانم ....ياستي ملكة بتكون بنت عمته لجوزي المصون يعني امها بتكون عمته ...شفتي على التحليل المنطقي الرائع ..امها لملكة عندي بزيارة للامارات ...اجت معي من حلب لتزورنا بالامارات ...وبالصدفة كنت قاعدة عالكمبيوتر اجت وشافتني وحكيتلها عالموقع وقديه انا بحبه وبحب صاحبته يلي هي انتي طبعا ...سألتني عن اسمك قلتلها منى صابوني ...قال اوووووف هي رفيقة ملكة وبزمانه حضرت خطبتها   المهم وخلاصة الحديث ملكة هلأ صارت مدرسة ابتدائي وتزوجت وصار عندها تلات ولاد من عشرين يوم ولدت وجابت صبي ...انا الي عرفته انه ماعم تشوفوا بعض بقا مابعرف اذا بتعرفي هالاخبار ولا بايتة

26  الكاتب رنا, on 24-02-2010 15:13 ايه مشان الكابتشينو ...عندي طريقة سهلة وسريعة وحلوة ...يومين وبتكون الوصفة عندك مع الصوووور

27  الكاتب منى, on 24-02-2010 18:33 مممم , رنون انا ماكدة ان كم كلمة تانية رح نطلع قرايبين , و محبتك محفوظة ما بدها مين يزيدها     اكيد كانت بخطبتي و بعرسي كمان , و اخبارها مقطوعة عني من زمااان , بقى اخبارك مو بايتة , اذا صار و حكيتي معها سلميلي عليها و اذا قدرتي بدي رقمها     يلا رح استنى الوصفة

28  الكاتب منى, on 24-02-2010 18:45 ميوسة عزيمتي كانت مع عزيمكت , كان عندي ضيوف يوم الاتنين الماضي و عملتلهم كمان فطيرة الشاورما و صينية التوست و السلطة المقلمة طبعا بجنب الف صنف تانية لان كانوا حوالي 30 شخص     الف صحة و هنا على كل شي جربتيه و طلع طيب و عجب الجماهير و انا كمان ممنوتك لردك و زووءك .    رح استنى الوصفات

29  الكاتب منى, on 24-02-2010 19:06 هلا ام ياسمين   سكر انت و كل كلامك , القلب على القلب يا قمر و و ربي يديم المعروف و المحبة دوما     ان شاء الله تكون هل الغيبة على خير و الحمد لله اطمنت عليك     بوسات كتير لياسمين و عمر

30  الكاتب منى, on 24-02-2010 19:34 هلا ام علي   فيكي تلغيه , بس بالحليب البادور بيطلع مو معقول شو طيب

31  الكاتب منى, on 24-02-2010 19:41 هلا ام تسنيم   انا استعمل الاولى , بس اذا مو متوفرة مو مشكلة , المهم خميرة .    ما عندي فكرة مزبوطة عن الخميرة التانية , بس اكيد بيكون في تعليمات للاستعمل عليها

32  الكاتب منى, on 24-02-2010 20:06 هلا رامو   ان شاء الله تجربيها و يطلع طيب و على زووءك , الف شكر الك للدعوة الغالية و الكريمة يا مزوءة

33  الكاتب منى, on 24-02-2010 20:10 هلا مريم   ممكن بس بالبني بتطلع اطيب

34  الكاتب semo, on 02-03-2010 16:19 مممممممممممممممم شكلا بيشهي    اناكتير بحبها وبجيبها من محل كندي او مريكي هون وبيكون سعرها كتير غالي بس كتير طيب    بس رح جرب طريقتك منوش اكيد يمكن تطلع اطيب وماعود جيب من برا عالاقل بتعرفي بالبيت شو حاطة فيها  وكالعادة منظر مبهر وتناسق رائع بالالوان    فعلا العين بتاكل كمان

35  الكاتب منى, on 02-03-2010 19:43 هلا سمسوم   يا رب تجربيها و تطلع متل ما بتحبي و اطيب , انا هل الوصفة بحسها سهلة كتير مع ان منظرها بيقلك يا لطيف شو اخدة وقت , لهيك بحب حضرها لضيوفي     كلك زووء سمسوم و انا رح استنى رايك بعد التجربة

36  الكاتب شيرين, on 03-03-2010 09:16 سلام لكل الحلوين.شكرا منمنونة عهالوصفة عم استناها من زمان و صرت مجربة طريقتين لها وباءت بالفشل الذريع .و بطريقة منهم مديتها عالطاولة و لزقت وما انلفت و كانت كتير سائلة و خدي ضحك و شماته من جوزي و تعليقات لمدة أسبوع و صرت كل م أدخل المطبخ يقول لي فايتة تعملي أي مصيبة .بس هالمرة رح قوي قلبي و أعملها مادامت مجربة و مضمونة.ادعيلي.شو رأيك أحشيها زبيب و قرفة و سكر بني و عالوجه حط صوص التوفي أو شوكولا بيضا و سودا؟

37  الكاتب منى, on 03-03-2010 11:05 شيرين لازم ترشي الطاولة طحين قبل ما تمدي العجينة على الطاولة و هادا شرط اساسي لحتى ما تلزق معك العجينة و تنلف بكل سهولة     جوزك ذكرني بواحد بعرفه كتير     فيكي تحشيها او تغطيها بشو ما بيجي على بالك , انا بحضرها بالطريقة الاساسية و البسيطة

38  الكاتب ام احمد الغالي, on 05-03-2010 13:01 السلام عليكم  كيفك منى والله اشتقتلك كتير واشتقت للموقع الغالي علي كتير  مع اني كل ما بشوف الاكل صايرة بحس حالي بدي دوخ بفوت عل موقع بعرف الاخبار وما بقدر اقرى الوصفات الله يمضي هالكم شهر تبعات الوحام على خير وارجع طبق وصفاتك الطيبة  اشتقتلك كتيرررررررر :

40  الكاتب Mays, on 06-03-2010 20:57 أنا جربت السينامون ع طريقتك يا منى و طلع كتير طيب و الاولاد كتير حبوه و هاي الصورة    يسلم إيديكي يا رب

41  الكاتب منى, on 07-03-2010 07:10 السلام عليكم ام احمد   تشتاق الك العفية و الحمد لله انك بخير و الله يمضي هل كم شهر على خير و تكوني انتي و البي بي بصحة يا رب     الحمد لله انا منيحة و كتير و شعرات راسي لساهن بمحلهن بغض النظر عن كل الضغوطات الخارجية الي تستدعي ان نتفهن , الله يخلي الاولاد شو بدهن بال طويل و نفس اطول

42  الكاتب منى, on 07-03-2010 07:15 هلا سمسمة   ما كتير فهمت عليك , قصدك انهابتنزل على الصينية و الا شو ؟  ممكن لان الزبدة ما بتكون مدوبة لهيك بتطلع   رح استنى توضيح منك و ان شاء الله بقدر ساعدك

43  الكاتب منى, on 07-03-2010 07:25 هلا ميس   ووواو شي بيشهي و الصورة عم تقلك تعي كليني  الف صحة و هنا على البك و الب الاولاد و بالعافية يا رب

45  الكاتب منى, on 08-03-2010 09:46 ان شاء الله تزبط معك و رح استنى رايك او ايا سؤال عندك

46  الكاتب شفاء, on 10-03-2010 21:26 انا عملتها اليوم لأول مرة وجربتها بالضيوف  هي وكيكة الكراميل    يعني ساويتهم حقل تجارب     بس طلعوا كتير طيبين وبشهوا خاصة انه فيه صينية حشيتها كاكاو مع السكر وجبنا سيرتك كتير بالقعدة  خاصة انهن كلهن حلبيات  بس رح احكيلك كم ملاحظة صارت معي   بلكي بتنصحيني مشان المرة الجاية تطلع تمام    أول شي العجينة ما نفشت ابدا مع انه الخميرة مفتوحة جديد  وحاولت أخليها فترة ومع ذلك مانفشت  الملاحظة التانية انه لزقت بالصينية بشكل كبير  مع انها مدهونة زبدة  وتالت ملاحظة انه الصوص ما طلع ابيض حليبي  وسكر معي مع اني حطيتله كم نقطة ليمون

47  الكاتب منى, on 10-03-2010 23:48 هلا شفاء   هنا و عافية و صحة و منيح الي زبطوا , و لو جزئيا , ادام ضيوفك     نجي للملاحظات , العجينة ما نفشت = الخميرة مو منيحة , ان شاء الله تكون هل الدقيقة لسا شاريتيها , احيانا ممكن تكون خالصة مدتها , احيانا ممكن تكون من نوعية مو منيحة. و ما دام العجينة مو منيحة معناها ممكن تلزق , بس كاحتياط للمرة التانية ممكن تدهني القالب بزبدة اكتر او ممكن تغلفيه بورق زبدة  الصوص اذا سكر ممكن ما يكون استخدمتي سكر بودرة و ممكن انك ما نخلتيه , اما قصة اللون فغريبة , ما عرفت الها سبب     ان شاء الله المرة التانية بتطلع اطيب و اظرف و هنااا على قلبك شفا و على قلب ضيوفك

48  الكاتب بشرى, on 13-03-2010 13:07 يا سلامممم شي طيب كتير كتير يسلم هالايدين الحلوين يارب , كنت أكلها ديماً عند سينابون وأفكر إني إسأله عالطريقة قد ما بحب هالنوع من المعجنات ..   بس خلص تحقق الحلم وهاليومين ان شاء الله عالتجريب لانو عندي كل المكونات ما عدا الحليب البودرة ومتل ما شفتك رادة عالأخوات إنو بينفع مبدئياً ..

49  الكاتب منى, on 13-03-2010 19:51 هلا بشورة   الله يسلمك حبيبتي , يا رب تجربيها و تكوون يممي ..    نصيحة جربيها متل ما هي لان الحليب البودر بيعطي طعمة , يم يممممم

50  الكاتب بشرى, on 14-03-2010 00:34 جربتها من شوي وما حطيت حليب بودرة لانو ما توفر عندي بجد طيبة كتيييير كتير بس حسيتها شوي كرسبي لاني زدت عليها بالخبز ولانو ما حطيت الحليب يمكن .. كنت حاببتها تكون طرية من برا وجوا .. يمكن لازم غطيها بالتخميرة التانية بتصير طرية مهيك ..بس عنجد عند جنان ..  عملت السينامون رولز قطع عديدة مو قطعة وحدة ..    يسلمو ايديكي ياقمر .. جوزي كتير حبها وقلي تعاااااد وهاد أهم شي     وهي صورتها

51  الكاتب بشرى, on 14-03-2010 00:46 منون الصورة الي قبل ما طلعت ما بعرف ليش .. هي رابط تاني للصورة     يسلمو ايديكي مرة تاينة حبيبتي

53  الكاتب اريج الخزامى, on 29-03-2010 05:46 الاخت الغالية منى جزاك الله كل خير على هذه الوصفة اللذييييييييذة   كان امس علي الحلى في المدرسة وعملتها وكل صاحباتي عجبتهم الله يعطيك العافية.

55  الكاتب سعودية بينكم, on 12-04-2010 23:38 اممممممممممممم  شهتيني والله  يسلموووووووا عمري على هيك حلى

56  الكاتب منى, on 13-04-2010 08:29 هلا رلا   ما في مدة محددة , دوما حسب الجو عندك , باصيف ممكن يكفي ساعة و بالشتي بتاخد معي اربع او خمس ساعات   العجينة لازم تكون رقيقة , بحوالي 3- 5 ملم  بعد تقطيع العجين ما رح يكن في الها وج لان الطرفيين رح يكونوا متل بعضهن تمام     الزبدة كميتها مو كبيرة , انا احط كوب و نص لان هل الكمية من الزبدة مع اختيار نوعية ممتازة الها رح تشكل الفرق في السينامون رول   و الزبدة لازم تسيح , انا احطها في الميكروويف على عيار خفيف و اخليها لحتى تصير سائلة متل الزيت    شو كمان ؟ اي نصف كوب زبدة هو 100 غرام     ايا سؤال تاني من عيوني التنتين و انا اسفة للتاخر بالرد

57  الكاتب منى, on 14-04-2010 14:36 هلا اريج     هنا و الف عافية و صحة على البك و الب رفقاتك , الحمد لله انهم نالوا الاعجاب     عوافي و نورتينا اختي

58  الكاتب منى, on 20-04-2010 10:54 هلا ام رومل   المشكلة بالطحين اكيد , بس دوما نصيحة ما تعدلي ابدا بمقدار الطحين و الزبدة , احسن شي تقللي كمية السوائل     ما بعرف حضر مربى الرطب مرة ببيروت دقناه مع القشطة و كان شي بياخد العقل , بس الله كريم , الا ما شي مرة اتعلمه .  الله يعزك اختي بعزه , اللهم صلي على النبي على هل الجيرة , ادعيلي انعزم على الحج او العمرة و على زيارة للنبي و اكيد اكيد رح اعملك زيارة كمان

59  الكاتب منى, on 20-04-2010 11:17 هلا اختي سعودية   انت بين اهلك و ناسك و في بيتك الانترنتي     نورتينا و شرفتينا و اتمنى تجربي الوصفة و تعجبك و كمان اتمنى تبقي معنا على طول

60  الكاتب نهى, on 18-06-2010 16:47 السلام عليكم ورحمة الله وبركاته  هلا منى كيفك.. وحشتيني ووحشنى موقعك  جربته اخيرا والحمد لله بس مش عارفة ليه دايما بتختلف النتيجة حسب المكان  يعنى عملته بالكويت مرتين وطلع طيب كتير  لكن رجعت مصر وعملته لامى حسيت ان كمية الطحين زيادة اوى وملمس العجين كان مختلف كتير وبالتالى طلعت انشف كتير..  مشكلة تانية ان صوص التغطية مش عارفة ليه مش مظبوط!!  بيطلع مرمل ومش سايل ولا لزج.. ممكن محتاج حليب اكتر ولا ايه رايك؟؟  وبس بتقلبي مقادير التغطية من غير ماتحطيها على النار شوية ولا حاجة؟؟

61  الكاتب منى, on 28-09-2010 13:25 هلا نهى     تشتاق الك العافية حبيبتي , ان شاء الله ما بتفقدي عزيز     الي صار معك طبيعي , لان الطحين بيختلف من منطقة لمنطقة و حتى حسب النوعية , لهيك اخر الشي ضيفي السائل حسب حاجة الطحين اله     الصوص ما دامه مرمل معناها بده سوائل زيادة و انا ما بحطه على النار , بس يا ريت تتاكدي كمان من السكر البودرة و من انك تنخليه لان هي خطوة مهمة     صحتين على المرات الي زبط معك و ان شاء الله بيرجع يطلع معك متل ما بتحبي

63  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-01-2011 06:58 كيفك مدام منى وين هالغيبة ليش ماعدتي نزلتي وصفات جديدة بدي اطلب منك ازا عندك وصفة ظريفة للبان كيك الله يوفقك بعرف مابتقصري

64  الكاتب منى, on 09-01-2011 08:17 هلا تالا   الف الف صحة و هنا على البك , الحمد لله انه عجبك و كان على زووءك و كمان اتفنتي فيه , عوافي حبيبتي     بتعرفي شو حبيت اخر جملة بردك , الله يزيدك من نعيمه و علمه يا حق

65  الكاتب منى, on 09-01-2011 08:33 هلا مريم   عم نزل , شو ما عم يعجبوك الوصفات الجديدة     بالنسبة للبان كيك ما عندي وصفة تمام اله , حبيبت ساعدك , يلا خيرها بغيرها ان شاء الله

66  الكاتب TOOLEEN, on 29-01-2011 13:23 تسلميييييييين والله ويجعلها في موازين حسناتك منى ينفع سكر عادي ماعندي بني

67  الكاتب منى, on 29-01-2011 18:29 اي طبعا بينفع   هلا بالبني اطيب بس انا كتيرررر احيان بحضرها بالسكر العادي     ابوس روحك للدعوة الكريمة

69  الكاتب منى, on 17-02-2011 21:55 لا رغودة , شغلتها بالكتير 20 دقيقة و حتى هي مبالغة و الله , بس انا بحب احكي كل التفاصيل

70  الكاتب رغد غسان علاء الدين, on 26-02-2011 12:14 صباحوو     قريتها واستمخيت فيها وقريت كل الردود...الله يديم المحبة بيناتنا وبين كل الهعضوات الحبابات..  يا ستي خلص رح جربها بكرة يمكن..بس بدي أسألك..هيي بتطلع بتشبه شو؟ الكاتو؟ البسكويت؟ الكيك؟ الكروسان؟ يعني متل شو..مشتهية أتخيل شي عنها ..بصراحة أنا ما دقتها بولا محل ولا حتى سمعت عنها..الله وكيلك أول ما قريت أقول يولي..وصلت مواصيلك يا منى تستخدمي السيتامول والبانادول بالوصفات..مشان وجع الراس يعني مثلا ههههههههههههه

71  الكاتب منى, on 26-02-2011 12:51   فكرة ليش لا     يا ستي مين بتشبه , هلا هي عجينة اساسا و فيها صلصة و على وشها صلصة , بقى ما بعرف .  بس لاحظتلك انه بحلب مو كتير بيعرفوها و كل ما حضرها عم يكون كتير في حكي و اعجاب و تقدير من الكل

72  الكاتب رغد غسان علاء الدين, on 27-02-2011 11:17 بتعرفي ميمو شو بيميز هالوصفة؟    إنو فيها سكر بني     حطينا دم قلبنا حقو معقول ما نستخدمو

74  الكاتب منى, on 10-03-2011 13:04 رغودة الخطوات كلها جاهزة عندي و ان شاء الله بعد الغدا رح نزل الصور , هلا بعرف انو متاخرة عليك , بس مشان المرات التانية ان شاء الله

75  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-03-2011 21:47 يسـلم إيدكِ ست منى شكلها بيجنننننن وبياخد العقل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved