L2ma.com | لقمة طيبة | L2ma.com | لقمة طيبة | كبة نية على طريقة الست غالية | الكبة, البرغل, صغيرة, النية, الريحان | L2ma.com

القائمة الرئيسية

كبة نية على طريقة الست غالية

الكاتب/ منى

04/02/2010

كبة نية على طريقة الست غالية

من كم يوم كنت بجمعة حلوة , صغيرة و منمنة و التقيت فيها بواحدة من رفقات و قريبات ستي , الست غالية , و هي من الناس القليلة الي بتأثر فيك من أول لقاء و كل مرة بتضيف الك شي .

المهم , بصورة عامة حديث النسوان لازم يوصل على الأكل و الطبخ و النفخ , و هو كمان علمتي الست غالية كتير اشياء , لحتى ماما قالتلي لا تخجلي منى منعرف بعض روحي جيبي ورقة و قلمة
علمتني كبتها النية و الي لفت نظري اتها اول ست حلبية بعرفها بتستعمل الريحان لوصفاتها , من طريقة شرحها و وصفها , رح موت من جوعي و قلت لازم جرب الوصفة بس ما ارجع .
كمان علمتني كيف ازرع الريحان و البقلة و النعناع , بطريقة كتير بسيطة , بعد ما ينشف الريحان بيكون بقيان فيه ورد ابيض صغير , هل الورد بتخبيه و بتتركه للربيع , بس ما وصل ربيع باشا منطالع زهراتنا و منهزهن هزة صغيرة بيطلع عنا بذر اسود صغير , هذا البذر نوزعه على التراب و بس , خلصت القصة . بقى ناوية جرب و اذا نجحت معي رح ورجيكن ريحاناتي ان شاء الله . أما البقلة و النعناع , لما نشتري باقة منهم بيكون كم واحدة في الهن جذر , هذا الجذر نشكله في التراب و نحنا عم نسمي بالرحمن و نستنى شوي و بعدها بيطلعوا .

ايه , نرجع للكبة , بس ما رجعت للبيت نقعت البرغل و حضرت الكبة و كتير كتير طيبة و سهلة و المميز فيها انها بتنقع البرغل بالبندورة و مرقتها من دون مي و كمان رشة صغيرة قرفة رح تعطي نكهة طيبة .. مممممم . البرغل اخد من طعمة الاشياء الي انتقع فيها و طعمته صارت بتجنن . أنا ضفت من عندي شوية ريحان مجفف و كمان رشة من بهارات الكبة النية الي اشتريتهن من المدينة بزمناتي . عندي بالبيت كلهن حبوها كتير , الكبير و الصغير . و انا عني حبيتها اكتر من الكبة النية بزيت الزيتون , سلم دياتك يا ست غالية . ان شاء الله تجربييها و تحبيها بس اكيد الطعمة مو متل الكبة النية العادية الي فيها هبرة .

بالصحة و الهنا

3 كوب برغل ناعم
3 – 4 حبة كبيرة بندورة , مفرومة
1 حبة بصل , مقطعة ارباع
ملعقة كبيرة معجون الطماطم
3 ملعقة كبيرة دبس فليفلة
ملح
رشة قرفة
نصف ملعقة صغيرة ريحان مجفف
رشة بهارات الكبة النية , و اذا لم تتوفر يمكن استبدالها برشة فلفل اسود و مردقوش , رشة صغيرة
6 – 7 ورق ريحان طازج
direction

·         نغسل البرغل و نضيف عليه كل المقادير ما عدا الريحان الطازج و يترك حتى تمتص حبات البرغل مرق البندورة و يطرى , لمدة 30 – 45 دقيقة .

·         يطحن البرغل و الريحان الطازج على ماكينة فرم اللحمة ثلاثة مرات ثم تبلل اليدان بالماء البارد و تدعك الكبة لمدة عشر دقائق , يمكن إضافة المزيد من دبس الفليفلة و معجون الطماطم حتى نحصل على اللون المطلوب .

·         تقطع الكبة النية لقطع صغيرة و يضغط عليها لتاخذ شكل اصابع اليد و تصف في طبق التقديم و تقدم و بجانبها طبق زيت زيتون للتغميس فيه لمن يرغب .

أضافة إلى المفضلة (2) |

أقتباس | مشاهدات : 6443

تعليقات (37)

1 الكاتب omtasneem, on 04-02-2010 11:25
السلام عليكم ورحمة الله وبركاته. يسلمو ايديك وايدين ست غالية ببقوا ستات زمان الن نفس طيب عل الاكل بس بصراحة مالي صحبة مع الريحان مع اني الالمان بيحطوا بكتير اكلات هون سبحان الله لكل شخص ذوق معين شكرا الك

2 الكاتب ميساء, on 04-02-2010 12:14
مرحبا أحلى ميمو

يا ستي هالكبة بتعملها حماتي وخاصة أيام مونة دبس الفليفلة والله بتاخد العقل كتير كتير طيبة الله يسلم دياتك الحلوة اللي بتنلف بحرير :zzz

3 الكاتب منى, on 04-02-2010 18:06
و عليكم السلام ام تسنيم )
ايه و الله هنن الخير و البركة , و اد ما تعلمنا بيبقى بدنا فت خبز كتير ادامهن :zzz

مممم , اذا ما بتحبي الريحان ممكن تجربيها من دونه اذا جاي على بالك .
نورتي يا قمر

4 الكاتب منى, on 04-02-2010 18:11
هلا ميوسة

الله يسلم دياتك و ديات حماتك , عن جد طيبة كتير و مستاهلة , على كل لما بتعمليها مرة تانية لازم تاكلي عني شوي :zzz

5 الكاتب ام نور, on 04-02-2010 20:49
مشكورة منى انت وست غالية الله يطول بعمركون ويبارك فيكون لون هالكبة كتير طالع حلو وبيشهي انشالله رح جربا بس على فكرة منى نحن كتير منستعمل الريحان منسمي الحبق بالكبة النية مع اللحمة وبالسلطات وهو واخضر طعمتو اطيب من اليابس بس اذا مش متوفر اخضر منحط يابس

6 الكاتب منى, on 04-02-2010 21:12
و انا البهارات الي اشتريتها للكبة اسمها بهارات كبة لبنانية :zzz

, ام نور بتبقوا انتو اهل البة النية , و انا اد ما دقت ما رح دوق اطيب من الكبة الي دقتها ببيروت

7 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-02-2010 04:47
الله يسلم ايديكي يا منى وايدين الست غاليه. وصفه جديره بالتجريب. صارلي فتره و نفسي اجرب كبه البندوره و كبه العدس. بس هلاء خلاص بعد وصفتك لازم بكره تكون عالغدا باذن الله.

8 الكاتب منال, on 06-02-2010 18:38
السلام عليكم هل وصفه كتير ظريفه الله يخلليلنا هل الكباريه هن البركه في حياتنا انا بساويها ايضا بدون لحمه يا منى بس بحط حبه بطاطا مسلوقه معهم وبتلطع كتير طيبه

9 الكاتب أم علي, on 06-02-2010 23:13
ممممممممممممم شكلها بيشهي كتيير :zzz

زكرتيني بكبة عمتي الله يزكرها بالخير لمى كانت تعملها نجتمع حوليها انا واخواتي ونستنا لحتى تخلص وناكلها

تسلم ايدك يااحلى فنانة

10 الكاتب Mays, on 07-02-2010 06:35
يا عيني

منظر هالكبة بيشهى

لازم و لابد جربها بس يخلص هالأكل اللي بالبراد.

صحيح منى بدي إسألك سؤال

أنا كان عندي عزيمة و كان فيها مشاوي ، و للأسف زاد عندي كتير بيواظ ، يمكن شي خمس باقات بقدونس :eek

شو برأيك ممكن إهمل فيه ، أحسن ما أكبه ، حرام :sigh

11 الكاتب رامو, on 07-02-2010 14:22
السلام عليكم ورحمة الله وبركاته عنجد تسلم ايديكي ياست منى شكلها بيشهي واناكتير بحب الكبة نية وطريقتك متل طريقة الماما الله يخليلنا ياهابس المامابتعمل جنبها صوص للتغميس فيه بدل الزيت وطبعا تعلمنا منها ودائما بساويها مع الصوص تبعهاوكتيير طيبة بتطلع

12 الكاتب منى, on 08-02-2010 07:13
هلا امون

ان شاء الله تجربيها و تكون طيبة , انا النوعين الي ذكرتيهن من انواعي المفضلة و لان بحب الاشيا الخفيفة و النضيفة :zzz

عم استنى رايك

13 الكاتب منى, on 08-02-2010 07:27
هلا منال

ايه و الله و نحنا من دونهن ما النا بركة .

بتعرفي منال مرة حماتي علمتني كبة نية و بطاطا معها و قالتلي انها كتير طيبة , ذكرتيني فيها , ان شاء الله بقى بجربها

14 الكاتب منى, on 08-02-2010 07:39
هلا ام علي

بعد زمان و تعيشي و تتذكري و تكوني دوما باحسن حال
الله يسلمك و يخليك و الف شكر للمرور

15 الكاتب منى, on 08-02-2010 08:08
هلا رامو

و انا متلك بحبها كتير كتير و هلا من دون هبرة صار فيني اكلها و انا مرتاحة :zzz

ممم , يا ترى شو هو الصوص ؟

16 الكاتب منى, on 08-02-2010 08:19
هلا ميوس

ان شاء الله تجربيها و تطلع يممي

حيف على البيواظ :sigh

, يا ترى انت محمضته بدبس رمان و الا شو , اذا لا فيك تعمليه عجه :zzz

17 الكاتب Mays, on 09-02-2010 05:40
حبيتي منووش
شو هالتوارد الأفكار الخطير هاد
أنا فعلا عملته عجة ، كانت حاطة عليه رشة سماق خفيفة و ما كتير أثرت ع الطعمة.
طلعت عجة مفتخرة.

18 الكاتب منى, on 09-02-2010 14:16
:grin

هو انتي ما تعرفيش اني انا ااقدر اقرا افكاري , و من ردودك ااقدر اعرف كل اسرارك :zzz

هنا و الف عافية , ما في احلى من ست البيت المدارية و الي بتحفظ النعمة , الف صحة يا رب

19 الكاتب Mays, on 11-02-2010 05:19
الله يعافي قلبك يارب
ياستي شكراَ، و هذا بعض مما عندكم.

20 الكاتب منى, on 11-02-2010 07:38

21 الكاتب رامو, on 11-02-2010 15:14
حبيبتي ست منى لاتواخذيني تاخرت بالرد عليكي بس بتعرفي اختبارات الاولاد ولوشتها والحمد لله هلق خلصو وعنا راحة ل10 ايام

المهم منرجع للصوص تبع الكبة نيةهو عبارة عن بندورة وبصلة وفليفلة خضراءوزيت زيتون وكمون ودبس الرمان وملح وخل واللي بيحب الحراق بيحطلها شوية دبس فليفلةوبتطلع كتييييييير طيبة مع الكبة نية وبتمنى انك تجربيها وتعطيني رايك فيها وصحتين وهنا سلفا لاتواخذيني طولت عليكي

22 الكاتب منى, on 11-02-2010 19:57
ممم , هياتها بتجنن , اكيد رح جربها , و الله لو مو الساعة هلا 9 بالليل كنت قمت و ساويتها , يممم .. بحب الكبة النية

الله يوفق الاولاد و ان شاء الله تكون النتائج منيحة

23 الكاتب ام ضحى, on 08-03-2010 21:11
حبيبتي منى يعطيك الف عافية ويديم عليك الصحة انت وامك الغالية ست الحبايب، انا امي سورية بس اول مرة بعرف انه في كبة نية من غير لحمة ، انا لسه ما سويتها بس لما اسويها راح اعطيك راي بس شكلها حتطلع حلوة كثير من مكوناتها وبعدين ما شاء الله حولك كل اكلاتك بجربها بتطلع طيبة . يعطيك العافية ويسلموا هالايدين واللي علمهم.

24 الكاتب منى, on 09-03-2010 07:49
هلا ام ضحى

هلا كتير ناس ما عم ياكلوا الكبة النية العادية , اما لان ما عم يتقبلوا اكل لحمة نيةو اما بسبب امراض و غيره لهيك كتير في ناس بتحضر كبة نية من دون هبرة , الطعمة مو نفسها بس طيبة كتير , اعتبريها وصفة تانية

رح استنى رايك بعد التجربة

25 الكاتب ام رومل, on 09-03-2010 19:08
السلام عليكم يسلمو ايديكي منه كبه نيه بتجنن تعرفي مشتهيه عليها من رمضان لانو اجيب الهبره معي منسوريه شي يكفيني طول شهر رمضان بالسعوديه لانو اللحمه هون مو مضمونه تتاكل ني
بس مع هالطريقه مافي مشكله ايمت الواحد مااشتهى احلى كبه نيه بيعمل الله لا يحرمنا افكارك

26 الكاتب منى, on 09-03-2010 23:26
ان شاء الله تساويها و تطلع متل ما بتحبي

انا عني بمووووووت عليها :zzz

الله لا يحرمني من هل الاخوات الحلوات الكريمات , نورتي اختي

27 الكاتب ام ضحى, on 12-03-2010 16:46
اهلين حبيبتي منى تسلميلي على الرد انا لسه ما جربت الكبة بس ان شاء الله عن قريب عندي عزيمة بدي اعملها، بس في سؤال شو هوه البيواظ اول مرة بسمع فيه ممكن اعرفه لو سمحت
مع جزيل الشكر

28 الكاتب na3oom, on 29-03-2010 05:18
يسلمو إيديك منوش شكلها طيبة بس بتصير من غير ريحان طازج للأني عندي عقدة منو ما عم اعرف أشتريه ونفسي أعمل اكلات كتير فيه وخصوصا البستو
المهم شو الفرق بين الريحان والحبق أنا بعرف الريحان ورقته عريضة واللي بشوفو في السوق ورقته نحيفة وطويلة وصغيرةمو كتيير
وش أسمه بلانجليزي مو هو ال
basil

29 الكاتب Mays, on 06-04-2010 06:02
يعني فعلا هالكبة غير شكل

انا كتير حبيتها

بس لسا حاسة في مشكلة بلونها ، يمكن دبس البندورة اللي عندي مو تمام ، و ما بدي كتر منه حتى ما تنزع الطعمة
بس فعلا رائعة ، شوفوا صورتها الحلوة:
http://www.facebook.com/photo.php?pid=3903139&l=466e93ce69&id=700637010

30 الكاتب لوولو, on 07-04-2010 02:30
مرحبا منى
أنا ترددت أسجل في الموقع بس توكلت على الله وقلت زي ما تجي تجي
البارحة بس اللي اكتشفت الموقع
وحسيت بإحباط واكتئاب لسببين
1) لأن طبيخي تعباااااان وما شاء الله الله يحميكم
2) لأني اكتشفته مرررة متأخر

طلب وياريت ما تكسفوني
ياريت تشرحوا لي طريقة الكبة العادية

أسوأ شيء في الدنيا اللي تتزوج وما بتكون شاطرة بالمطبخ :cry

31 شو صار ؟؟؟؟؟؟؟؟؟
الكاتب Mays, on 07-04-2010 09:25
ليش هيك ما طلعت الصورة

راح أجرب مرة تانية

32 الكاتب منى, on 10-04-2010 11:32
هلا ام ضحى

ان شاء الله تجربيها و تطلع طيبة متل ما بتحبي

البيواظ هو سلطة بتتقدم مع المشاوي , موجودة بقسم السلطات و هي عبارة عن بقدونس كتير و بصلة و بندورة شوي و بعدها بتحمضيها بدبس رمان و زيت . بتجننننن :zzz

33 الكاتب منى, on 10-04-2010 12:11
هلا نعومة

اكيد بتصير من دون الريحان , مع ان طعمته بالاكل بتطلع بتشهي و مميزة .

هلا الريحان و الحبق نفس الشي و الاسم بالانكليزي Basil , بس في اله نوعين , نوع ناعم كتير و هادا استعماله للزينة و نوع ورقته عريضة و هادا الي استخدمته لهل الوصفة .

على كل اذا كنت بسوريا فالنوعين متوفرين بشتلات بتناع و بتتركيها عندك في محل مشمس و كل ما بتلزمك بتاخدي كم ورقة

34 الكاتب منى, on 10-04-2010 11:57
هلا ميوسة

الف الف رصحة و هنا يا رب , الصور ما طلعت عندي , رح اطلع عليها بالفايس بوك و ظبطها ان شاء الله

اللون معناها اكيد من دبس البندورة , انا الدبس الي استعمله توصاية من الضيعة , لهيك بيكون ممتاز :zzz

الف الف هنا مرة تانية و ان شاء الله تكوني اكلتي عني كم قطعة

35 الكاتب منى, on 10-04-2010 12:05
هلا لولو

ليش التردد , انت وصلتي لبيتك النتي , مية اهلا و سهلا فيك , و ان شاء لله تبقي معانا دوما و تجربي من الوصفات و يكون يممي

رح نزل صور تفصيلية لتحضير الكبة لعيونك ان شاء الله .

اما قصة طبخك تعبان فهادا شي عادي و خصوصا اذا كنت جديدة على المطبخ , لازم تجربي و تجربي و تجربي لحتى تظبط الاكلة بالاخير على كيفك

شرفتينا اختي و ايا سؤال لايا وصفة انا تحت امرك

36 الكاتب رغد غسان علاء الدين, on 25-02-2011 09:14
م بالصورة كتير شكلها مغري..بس سبحان الله..أنا هيك الأكلات الأصلية بحبها متل ما هيي..يعني مرة دقت الكبة بزيت عند جماعة.زحرام طيبة وفيها نفس..بس بضل الحب الأول وبالاخير لإم الهبرة..تسلم أناملك ويعطيكي العافية..

37 الكاتب منى, on 25-02-2011 10:54
صح رغود , بس الي ممنوع من اللحمة الهبرة وين يروح بحاله

انا عني بحب هي بما لا يقل عن الاصلية لان كل شي اله لذته و اله وقته

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 04/02/2010 )

التالى >

[ عودة ]