هالفتة من الأكلات المفضلة عند الكل ودائما بتلاقيها موجودة على السفرة بالعزايم الشامية . وانا من جهتي بعملها احياناً لعيلتي طبق رئيسي من كتر ما بيحبوها  لأن اذا وجدت بيتركوا باقي الأكل وبيصير الهجوم مركز عليها

وهالاكلة بتصير بطريقتين طريقة الباذنجان المحفور والمحشي وطريقة الباذنجان المشروح بالنصف والحشوة على الوجه وانا شخصياً بعتمد الطريقة التانية لأن بلاقيها الذ فأنا من عشاق الباذنجان وما بحب يروح منه أي شي

بتمنى الكل يجرب هالوصفة لأنها بالفعل بتستحق التجريب وهي سهلة كتير

بعملها صيف وشتاء لأني دايماً بحتفظ بالباذنجان بالفريزر اثناء الصيف بحضره بكل انواعه  مع انه ما عاد انقطع من الأسواق بالشتاء بس خضرة الصيف غير شكل

كيلو باذنجان
لحمة مفرومة300 غرام
بصلة صغيرة 
ملح  بهار ملعقة كبيرة زيت زيتون
خبز عربي مقطع ومقلي

صلصة البندورة:

كوبين مرق لحم
عصير تمر هندي
ملعقتين رب بندورة
رشة ملح وبهار

صلصة اللبن:

كوب ونصف لبن
نصف ملعقة صغيرة ثوم ناعم
ملعقة كبيرة طحينة
(تعدل الكمية حسب حجم طبق الفتة يعني لازم الصلصة تغطي الطبق كله)

لوز وصنوبر مقلي
رشة بقدونس للوجه

تعليقات (43)

1  الكاتب منى, on 03-02-2010 11:16 كتير طيبة هل الاكلة و الها شعبية و بتعرفي طريقتك مو بس بتشهي , كان واضحة كتير و تفاصيلها كتير مهمة     انا بستعمل البانجان الصغير للوصفة و بعد القلي بحشيه متل حشوتك من دون البصل و بزيادة فليفلة خضراء , بحب طعمتها كتير و اخر الشي استعمل البندورة الفريش , لان انا ما بحضر هل الوصفة الا في الصيف و احط مع الصلصة بصل    سلم هل الديات فروحة , مممم باين عليك نفسك بياخد العقل و عجبتني كتير طريقتك بالحشو , رح جربها المرة التانية اذا ربنا راد و اكيد ببقى بنزل صورة لتطبيقي     سؤال , كيف بتحفظي البانجان لهل الوصفة بالفريزر ؟     بانتظار وصفات تانية منك

3  الكاتب منى, on 03-02-2010 11:43

4  الكاتب Mays, on 03-02-2010 11:56 سلامتك منى الزعل ، شو بنا نساوي ، هيك الله أراد    إن شاء الله دايما تضلي هيك     و ما شوفك أبدا هيك

5  الكاتب gsm, on 03-02-2010 13:43 مو معقول فتة مكدوس صرلي زمان عم استنى هل الوصفة انا كتيير سمعانة فيها ومؤخرا دقتها بمطعم شامي عندنا هون وكتيير حبيتا وصار فيني بس بدي اعرق طريقة تحضيرها خلص على التجريب فورا وببقى بخبركم عن النتائج بس عن جد يسلمو ايديك يا فرح الطريقة كتيير واضحة

6  الكاتب منى, on 03-02-2010 14:36 ميوسة امين , و ان شاء الله انت كمان و كل حبابك         gsm قديه في اخوات متلك كمان عم يستنوا الوصفة و هي الطريقة ما شاء الله شو بتشهي , ان شاء الله تجربيها و تكون متل ما بتحبي و اكتر

8  الكاتب منى, on 03-02-2010 17:47 الف هنا و عافية غيوثة على البك على الكيك و كل شي جربتتيه او ناوية تجربيه

9  الكاتب ميساء, on 03-02-2010 21:21 يسلم دياتك أخت فرح أنا بعملها بالطريقتين حسب شو متوفر عندي نوع باذنجان و جربي كمان تحمضيها بدبس الرمان بتطلع كمان روعة ألف شكر مرة تانية لكل الوصفات اللي عم تقدميها

10  الكاتب farah, on 03-02-2010 21:43 الحمد لله ان الوصفة نالت اعجابكم والله حسيت حالي كترت حكي فيها بس منيح في ناس متلي بتحب التفاصيل   تسلمي لألبي يا منى والله اطرائك شجعني انزل وصفات كتير ظريفة عندي بس اللي مأخرني ان ما عندي كمرة انزلك صور لذلك يا ريت تتكرمي وتطبقي وتصوري بكون جدا ممنونة بتعرفي عين بتاكل قبل..  وبالنسبة للباذنجان كنت زمان اقليه واحتفظ فيه بأكياس مفرغة الهواء بالفريزر بس مؤخرا اكتشفت فكرة الشوي والله فكرة بتجنن وعم تطلع الأكلات ولا أطيب حتى المقلوبة ما عدت قليتلها البانجان  بيكفي تشويه بالطريقة اللي ذكرتها وطبقي الطبخة متل العادة وممكن تضيفي رشة بهار اكسترا لتعويض طعم القلي للي بيحب فبموسم الباذنجان بعمل رف كامل له بالفريزر وكله مشوي للفتة وللمقلوبة وللمنسفة وللمنزلة حتى بنتي وقت بكون مطلعته من الفرن ما بتستنى وبتكون عملتلها سندويشتين تلاتة منه وبتقول ماما متل المقلي واطيب   كأني استرسلت زيادة بالكلام بس والله بحس احيانا هيك مشتاقة نكون بشي جلسة سوا مع كل هالاخوات الظراف ونتبادل حوار بث مباشر شو رأيكم صبايا؟؟

11  الكاتب farah, on 03-02-2010 21:58 الله يسلمك يا ميس انشاء الله بتجربيها وبتطلع على زوئك    gsm والله حبيبتي حابة اعرف اسمك ما عم يلفظ معي   انشاء الله بتجربي الوصفة وبتطلع اطيب من المطعم والف صحة سلف ابقي خبرينا النتائج مع اسمك       تسلملي عينك يا غيث انشاء الله تجربيها وتنال الرضى  وريتو ألف صحة وهنا عالكيك حالا رحت للصفحة وشفت تعليقك الظريف ودعوتك ربي يكرمك يا رب ويفرحك باولادك

12  الكاتب laraye, on 04-02-2010 00:25 ايه و الله يا منى وانا كمان كنت عم استناها     يسلم ايديكي يا فرح ورح جربا فريبا انشالله     بيني وبينك انا كمان هيك بشوي البانجان بالفرن باغلب الوصفات. اطيب واحسن للصحة    بس عندي سؤال ممكن استخدم دبس الرمان بدال التمر الهندي ؟    شكرا

13  الكاتب نور الأسلام, on 04-02-2010 15:40 السلام عليكم كيفكم جميعا يسلمو اديك كتير على هالطبق انا كمان من زمان حابه جربها وكنت طلبت طريقتعا من منى من فتره وقالتلي رح تنزلها عالصيفيه لكن فينا نستغني عن التمر الهندي

14  الكاتب snow whit, on 04-02-2010 16:07 أول مرة أسمع بفتة المكدوس ..    بس أكيد راح أجربها لأني من عشاق الباذنجان ..    وتسلم إيدك فروحة على الوصفة ..

17  الكاتب شيرين, on 05-02-2010 11:07 تسلم ايديك يا فرح .عن جد من زمان عم استنى هالوصفة اللي بحبها كتير و كنت آكلها عن أصدقائنا الشوام بالسعودية .هلق صار فيني أعملها .طريقتك كتير حلوة و سهلة و صحية كمان.حبيت استعمالك للتمر هندي بالوصفة لأتي بحب الحامض.شكرا إلك. بانتظار المزيد من الفتات اللي بموت فيها.(على قولة منى)نحن شعب بنحب نفت و نلت.سلامي للجميع

18  الكاتب farah, on 05-02-2010 22:53 الله يسلمك يا ميساء اي والله مرة جربتها بدبس الرمان وطلعت روعة والشكر لله انا بس عم شارك بمعلومات بسيطة من بحر غاليتنا منى      حبيبتي لارا اكيد فيكي تستعملي اي حمض تاني متل الليمون ودبس الرمان وحتى الحصرم بيمشي حاله المهم تكون الصلصة حمضها كافي انشاء الله بتجربيها وبتطلع على زوئك والف صحة عالباذنجان المشوي مو فكرة بتجنن     نور الاسلام يا الله شو حلو اسمك ربي يجعلك وذريتك منورين دايما بدين الاسلام حبيبتي اي حمض بيمشي حاله انت وذوقك    سنو وايت اكيد ما بتندمي جربيها وخبرينا النتائج ما دامك من عشاق الباتنجان معناها صرنا صحاب     الله يسلمك يا ام نور اي حبيبتي بدلي الحمض بالنوع المتوفر عندك بذكر وقت كنت بالغربة والليمون كتييير غالي احيانا حتى استعمل ملح الليمون وبيمشي الحال انشاء الله بتطلع ظريفة ومتل ما بدك    تسلمي يا ايمان وربي يكرمك يا رب     انشاء الله الف صحة وهنا عالفتة والتمر هندي كمان انا متلك بحب حمضه بالذات لما بنحطه للمحاشي يمي ما الذه حمضتيلي ريقي على شي كاسة تمر هندي بس هلأ اللي ما بيعرفوه بيفكرو ان بنشربه سادة هو بينضاف له سكر وبيصير مشروب كتير لذيذ بالصيف وبالذات برمضان بتخيل اختي منى اكيد منزلة وصفته بقسم المشروبات اكيد يا نسرين بتشربيه متلي صح؟؟

20  الكاتب منى, on 06-02-2010 18:42 هلا مريم   لا مو كل الوصفات الي منزلينها الاخوات بالموقع مجربتها, الي مجربته كاتبة اني جربته بالردود و كتير احيان بحط صورة لتطبيقي     منال العالم ما في تنين بيحكوا فيها , انا بزمناتي جربت الها كم وصفة , بس ما طلعوا متل ما بدي

21  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-02-2010 00:35 اختي منى شكرا كتيرالك بستنى ردك وانا كتير فرحانة بدي اطلب منك طريقة سينابون القرفة بس ماتكون طعمتها عجين من جوى الله يوفقك عم عزبك معي الله يخليلي ياكي ويجزيكي الخير

22  الكاتب منى, on 08-02-2010 06:53 ايه تكرم عيونك , انا اصلا رح نزل وصفة السينامون

23  الكاتب laraye, on 19-02-2010 04:25 فروحة امبارح جربتا   وكنت خايفة ما تزبط معي او جوزي ما يحبا بس بالعكس كتير طلعت طيبة و خفيفة لان شويت البانجان وحمصت الخبز بالفرن متل ما بتعمل منى   بس عندي سؤال يا ترى فتة الدجاج بنفس الطريقة بس منبدل البانجان بالدجاج الا شو كمان بيختلف؟  شكرا سلفا

25  الكاتب منى, on 07-10-2010 17:21 سلام عليكم فرح   جربتها من يومين و كانت اكثر من رائعة , هلا انا بحضرها بطريقة كتير قريبة الك , الفرق اني بشق البانجان و بحشيه بحشوة من اللحمة و الصنوبر و المرق ما كنت بحمضه بشي .    الي غيرته على طريقتك و حبيته كتير هو التمر هندي بالصوص و البقدونس و اللحمة على الوج بالاضافة للحمة بقلب البانجان , يمم يمم يممم كبيرة     سلم هل الديات و انا بانتظار وصفات اصيلة منك

27  الكاتب منى, on 07-10-2010 12:22 هلا فيك زين   هلا انا جربتها بنوعيين الحمض و طلعوا التنين كتير طيبات , انا كنت ما حمض الصوص , بس طلع هل الاضافة الصغيرة بتعمل كل الفرق     نورتي الموقع , مية هلا فيك

28  الكاتب غيث, on 08-10-2010 21:27 الله يجزي الخير كل مين عم يعطي نصيحة بكل اكلة بتنزل بالموقع انا بشكرك فروحة انت ومنى طبعا لاني جربت هالاكلة ونالت الرضا الله يسلم ايديك يا رب

29  الكاتب farah, on 08-10-2010 22:11 انشاء الله ألف صحة وهنا مابتصدقي شو فرحت لما عرفت انك جربتيها وعجبتك وأعدت اضافتها للقائمة الرئيسية حسيت انك هديتيني أحلى هدية بميلادي اليوم هالصورة اللي حاطتيها بتجنن شهيتيني اطبخها بكرة

30  الكاتب منى, on 09-10-2010 14:06 كل سنة و انت سالمة فرح و ان شاء الله كل ايامك خير و سعادة و انا الي حابة كتير اشكرك مرة تانية و تالتة على الطريقة المفصلة و الواضحة للوصفة , يسلمن

32  الكاتب غيث, on 09-10-2010 15:45 نسيت اقول لك فروحة اني جربتها بحمض الليمون والباذنجان كان مقلي مو مشوي وكتير احببناها الله يجزيك الخير يا رب

33  الكاتب farah, on 11-10-2010 20:30 الله يسلمك يا أحلى منى والشكر حبيبتي الك انك عملتيلنا هالموقع المميز اللي بيحسسني بدفئ العيلة    غيوثة ألف صحة وهنا على ألب الكل ومتل ما قلتلك أي حمض متوفر بيوفي بالغرض وكل شخص بالنهاية وذوقه كتيير انبسطت انك جربتيها ونالت الرضا

34  الكاتب Lost spoon, on 17-10-2010 02:30 Salam all,  My only problem with this dish is:MY GUESTS EAT IT ALL AND THERE IS NOTHING LEFT FOR ME!!!!   The only thing I do diffirent is the way I present it, my egglplants dont always look so happy so I put the bread and sauce, then the eggplants and finally the yougort sauce and top it with the parsly and nuts. The contrast of white and green is so pretty.  Rola.

35  الكاتب farah, on 17-10-2010 23:14 انشاء الله الف صحة وهنا يا رولاعلى البك والب ضيوفك ويا ستي مشكلتك حلها تكبري طبق التقديم شوي وعلى فكرة حتى لما تبات لتاني يوم بتكون كتير لذيذة   وهي باردة  وطريقة تقديمك صدقي كنت زمان هيك قدمها لحتى كنت عازمة ست كبيرة بالعمر ونقدتني قالتلي هيك اصولها   فأنا حبابة سمعت سمعت الكلمة وصرت ساويها بالطريقة الأصولية المذكورة بالوصفة   وهي بكل الأحوال بتصير متل اللوحة الفنية اللي بتزينيها بزوءك وفنك ومشكورة لثقتك بوصفتي وتجربتها

36  الكاتب منى, on 18-10-2010 12:37 صحتين و الف الف هنا رولا الحمد الله انها عجبت الكل و زبطت معك , يا ستي متل ما قالت فرح , حتى الي زاد لتاني يوم طلع خيلة و طيب , ما كنت متوقعة ان الخبز رح يصير هيك طعمته , بيجنن

38  الكاتب منى, on 14-11-2010 06:57 ببعتلك الطريقة بعد العيد ان شاء الله على الايميل , لان مو حابة نزل الوصفة هون من دون صور

39  الكاتب gsm, on 23-12-2010 17:58 السلام عليكم كيفك فروحة واخيرا عملت فتة المكدوس على طريقتك شو طلعت يميييييييييي بس بصراحة انا بس ضفت شغلة وحدة ققلبت فليفل خضرة مع الباتنجان طلعت يميييييي وبالنسب لإسمي هادا الأسم يللي إخترته عبارة عن اول حرف من إسمي الثلاثي يعني انا إسمي غفران سماقية   فرصة سعيدة فرح

40  الكاتب farah, on 01-01-2011 23:11 أهلين حبيبتي غفران عاشت الأسامي يا رب و انشاء الله صحة وهنا على ألبك انتي والعيلة كتير فرحت انك جربتيها وعجبتك وفكرة الفليفلة حلوة واكيد بتعطي مذاق جديد ولذيذ رح جربها المرة الجاية بالفليفلة   ويا ستي انا اسعد بمعرفتك

43  الكاتب منى, on 10-10-2011 07:48 انا جربتها بالمشوي و طلعت طيبة , بعد ما جهزته دهنته بزيت الزيتون و على الفرن , خفيف متل ما قلتي و ما غب زيت و طعمته طيبة كتير

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved