طبعا هي الوصفة أنا شفتها مرة بالنت بس وقتها صاحبتها كانت مستعملة خليط الكيك الأبيض الجاهز و ضايفتله الحلاوة.

طبعا أنا ما بطيق طعمة الكيك الجاهز بحس طعمة المواد الحافظة بتكون كتير واضحة فيه فقلت لحالي ليش ما جرب إعمل كيك سادة وضفله الحلاوة بالآخر .

جربته و طلع كتير طيب، ياريت يعجبكن كمان

خمس بيضات من الحجم الصغير أو أربعة من الحجم الكبير( بدرجة حرارة الغرفة)
كوبان و نصف دقيق
كوب سكر
ملعقتان صغيرتان فانيليا
ثلاث أرباع كوب حليب
ثلث كوب زيت
ملعقتان صغيرتان بايكينغ باودر
ملعقة صغيرة قرفة
رشة ملح
200 غرام حلاوة ( تفتت بالشوكة إلى قطع صغيرة)

للصوص:

علبة قشطة ( أنا أضع علبة القشطة قبل الفتح في الفرن و هو دافئ ،طبعا يكون مطفي)
ثلاث ملاعق كبيرة سكر
ثلاث ملاعق كبير طحينة
القليل من الحليب







·         نشغل الفرن على درجة حرارة 180 و نجهز قالب الكيك بدهنه بالزيت و رشه بالدقيق

·         نخفق البيض لمدة دقيقتين حتى تظهر الرغوة الخفيفة ثم نرفع السرعة و نضيف السكر و الفانيليا بالتدريج و نستمر بالخفق حتى يبيض لون المزيج( حوالي 10 دقائق)

·         في هذه الأثناء ننخل الدقيق مع البايكنغ باودر و الملح و القرفة( أنا أنخلهم مرتين حتى يصبح الكيك خفيف و هش)

·         نخلط الحليب مع الزيت في وعاء منفصل

·         بعد النتهاء من خفق البيض نضيف مزيج الدقيق بالتناوب مع مزيج الحليب و الزيت على عدة دفعات و نحرك بملعقة خشبية من أسفل إلى أعلى ( كل ما كلانت الكمية المضافة قليلة و عدد المرات أكتر رح تضمني نجاح الكاتو

·         في الآخر نضيف الحلاوة المفتتة و نخلط حتى نوزعها في المزيج

·         نصب الخليط في القالب و نخبز لمدة 45 إلى 50 دقيقة

·         نخرج الكاتو من الفرن و نتركه حتى يبرد قليلا ثم نقلبه على الشبك و نتركه يبرد تماما

·         نجهز الصوص بأن نمزج السكر مع القشطة الدافئة حتى يذوب السكر ثم نضيف الطحينة و نمزج و نضيف القليل من الحليب حتى تصبح يكثافة تمكننا من صبها على الكاتو دون أن تسيل كثيرا

·         قبل التقديم يزين الكاتو بالصوص و يمكن أن نزينه بالفستق الحلبي المحمص و المدقوق. و صحة و هنا 

تعليقات (25)

1  الكاتب منى, on 27-01-2010 20:40 كتير الكيك سهل و طعمته مع القرفة و لا أطيب , طري و خفيف و طعمته مميزة .    الصوص اترددت حط الطحينة الصراحة , بس بعدها اتشجعت و طلعت طعمته طيبة و مو واضحة أبدا و حتى خواتي فكروا اني ضايفه حليب نسلة , بس كل الصغار حبوا الكيك سادة من دون الكريم .    الف شكر الك ميس على هل الوصفة و الوصفات التانية , و ان شاء الله هي الاولى و خواتها لاحقاتها     هي تطبيقي

4  الكاتب ام نور, on 27-01-2010 21:30 عندي سؤال حبابة لو سمحت بالنسبة لا القشطة قصدك قشطة نستله العلبة الصغيرة

6  الكاتب ام عمر, on 27-01-2010 22:00 تسلم ايد يلي عطت الوصفة وتسلم ايد يلي طبقت

7  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 01-02-2010 15:31 لما قرأت العنوان صارو عيوني هيك معقول في كيك بالحلاوة ، فكرة كتير حلوة خاصة انو مدينتي مشهورة بالحلاوة والطحينه بفلسطين وهالشي بشجعني اطبقها، ان شاء الله بعملها وبجيبلكم الصور . الي ملاحظة صغيرة الموقع كتير بفتحو وبيكون معطل شو السبب؟!! والشغله التانيه النسخ لصق مش موجود يا عمي والله ما بدنا ناخد الفكرة لاي منتدى تاني ابدا، بس اسهل للنقل حطها بملف واحفظها على الموبايل بدل ما انقلها وتتعب ايدي من الكتابة ، فياريت تفعلو هالخاصيه وشكرا كتير الكم

8  الكاتب farah, on 01-02-2010 20:40 شو القصة كأن الموقع كان موقف   يا لطيف شو استفقدتله بهالكم يوم اللي وقف   صدقيني يا منى صرت حس كأني مقطوعة عن اهلي صحيح انا حاليا بين أهلي بس يشهد الله اني بحسك وحدة منهم  بالنسبة للوصفة سلم دياتك يا ميس شكلها طيبة بس كأنها دسمة شوي   بس اكيد بدي جربها

10  الكاتب Mays, on 02-02-2010 07:51 إن شاء الله يكون الكاتو على ذوقكن حبيباتي  freesoul كمان الطعمة طيبة إسأليها لمنى    حبيبتي إم نور ، إي أنا قصدي علبة قشطة نستله و بظن بيجي منها قياس واحد بس.    إن شاء الله تجربي و يعجبك يا ضحى و صحتين مقدما    إختي إم عمر الله يسلمك يا رب و إن شاء الله تجربي و يعجبك ، على فكرة أنا كمان ام عمر    إختي tenderness بصراحة أنا كمان صار فيني متلك أول ما سمعت بالوصفة بس بتستاهل التجربة و فعلا الحلاوة و الطحينة كتير طيبين و نحنا بالعيلة عندنا إدمان عليهن    مظبوط كلامك يا فرح ، لما الموقع بيوقف بصير عندي إحباط خصوصي إذا كان بدي و صفة و ما كون كاتبتها من قبل متل ما صار بكاتو البرتقال  و الله يسلمك يا رب ، أنا ما بحسه كتير دسم يا ريت تجربيه إذا صحلك.

11  الكاتب منى, on 02-02-2010 08:23 هلا فرح الله يخليك اختي و ربي يديم المحبة دوما و الله يخليلك حبابك حولك و حواليك   على فكرة الكيك مو دسم ابدا , بالعكس خفيف و هش         ميوسة الشكر الك للوصفات الطيبة و ان شاء الله دوما مجتمعين على الخير

13  الكاتب dentamaniac, on 02-02-2010 12:57 فكره فعلا جديده  تسلم ايديكي  بلكي بجربها قريبا    منمن  انا صابني اكتئاب بس توقف الموقع  انا كتير بعتمد عليه   و خصوصا لما بحتار شو بدي اطبخ و بكون بدي شي مميز و مضمون

15  الكاتب منى, on 02-02-2010 17:19 هلا حنان   و الله اختي مو عارفة شو قلك , بس هادا الحل الوحيد لحماية وصفات الموقع و الله و الله اذا عليكن انا ما ببخل ابدا , بس القصة اكبر من هيك بكتير و انت ما بتحبي اتضرر , صح ؟    تشتاق الك العافية منال     دكتورتنا الحلوة , الله يخليلي ياكي يا رب يا زووء , خجلتيني يا قمر و هادا من زووءك  على فكرة اليوم شفت وصفة الدجاج بالبرتقال و خرطت مشطي كتيررر , ممم هياتي رح جربها قريب       هلا رامو   الله يسلمك اختي , نورتينا

16  الكاتب farah, on 02-02-2010 21:40 على فكرة اختي منى انا عم احفظ الصفحات على جهازي وصرت عاملتلك ملف فيه عشراااات الوصفات   ما بعرف اذا بتحبي اشرح الطريقة للأخوات ضيفي هالرد واذا بتخافي من القرصنة براحتك بس شفت كتير اخوات متحرقين ليحتفظوا بوصفاتك الرائعة  على كل حال انا عندي المتصفح للنت اسمه mozilla firefox  بفتح بأعلى الصفحة الfile ومنه بضغط save page as..  وهيك بتنحفظ الصفحة كاملة باسم الوصفة وبصراحة بعد ما بسكر النت بقعد بالساعات بفصفصلك هالوصفات وبقرأ الردود كلها اللي حببتني بمعظم الأخوات المشتركات وبسجل الصفات المميزة على دفتر مشان يكون رفيقي بالمطبخ شو رأيك بشطارتي

17  الكاتب منى, on 03-02-2010 10:57 برافو عليك فروحة و منيح الي قدرتي تحفظي الوصفة بطريقة تناسبك و ان شاء الله تستفيد من هل الملاحظة بقية الاخوات

18  الكاتب Mays, on 03-02-2010 11:29 شكرا كتير فرح على هالفكرة  أكيد تحل مشكلتنا إذا كان النت مو شغال و نضطر نعتمد ع الذاكرة التعبانة    شكرا مرة تانية

19  الكاتب farah, on 03-02-2010 21:51 العفو خجلتوني اي خدمة ما بنقصر اذا الله راد

20  الكاتب DOUHA, on 06-02-2010 16:13 جربتوا مبارح طلع طيب كتير بس طلع معي لونو افتح من لون كاتو منى بشوي  ياترى منى ضايفة 1 ملعقة كبيرة قرفة؟؟    والكريمة طلعت طيبة  الغريب اني صار كاتوهات بالكوسا والسبانخ والبادنجان والحلاوة ,,,,,,,, الخ جد شي حلوو     شكرا منى وميس  ممنونة

21  الكاتب منى, on 06-02-2010 19:08 الف هنا و عافية ضحى   ما بذكر اني غيرت شي بالوصفة , بقى اتوقع اني استعملت بس ملعقة صغيرة     ضحى ما في كاتو بانجان , بس الله كريم

22  الكاتب Mays, on 07-02-2010 05:35 إن شاء الله ألف صحة و هنا يا ضحى  كتير انبسطت إنو عجبك   هلق أنا كمان بيطلع معي أفتح من صورة منى ، يمكن الإضاءة إلها علاقة    هلق أنا لسا ماسمعت بكاتو الباتنجان ، بس مرة شفت برنامج بقناة بي بي سي فود عملوا كاتو بالشوندر و على ما أذكر كانت طريقته سهلة و طلع لون أحمر بيجنن  شكلي رح أدور على الوصفة و جربها و بشوف إذا الطعمة متل الشكل ببقى ببعتلكن الطريقة

23  الكاتب منى, on 07-02-2010 07:19 يمكن الاضاءة     انا عندي كاتو شوندر , بيطلع طري بياخد الاعل بس مو لونه أحمر , نفس لون كيك الحلاوة , هو بيكون احمر قبل ما تحطيه بالفرن , بس ما طالعتيه بيتغير لونه

25  الكاتب منى, on 07-02-2010 20:17 تكرمي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved