L2ma.com | لقمة طيبة | L2ma.com | لقمة طيبة | سهرة العيد الكبير | الله, كان, شاء, قبل, اكتر | L2ma.com

القائمة الرئيسية

الأكثر تصفحاً

سهرة العيد الكبير

الكاتب/ منى

21/12/2009

السلام عليكم يا ستات و يا صبايا , ان شاء الله الكل يكون بخير و فضل من الله .

اليوم لقطات من أخر جمعة عندي ,الاهل و الحبايب و كان عندنا اكتر من مناسبة , الله يديم الافراح دوما .

ما شاء الله لا قوة الا بالله , اللهم ادمها نعمة و لا تجعلها الى زوال , الحمد لله الذي اطعمنيه و سقانيه من غير حول مني و لا قوة . هي الصورة الوحيدة للسفرة و هي قبل ما تجهز على الأكمل كان لسا بقيان الكبب و الحلويات , بقية الصور طارت , الحمد لله على كل شي .

الوصفات من القريب للبعيد

بيتزا , بصلصة جديدة

سلطة الزعتر الأخضر و الجبنة

محمرة

سلطة الجرجير و الرمان

سندويش الدجاج

صينية توست

سلطة الدجاج بالكاري

يالنجي ملفوف

فريكة

السلطة المقلمة

سندويش بطاطا

حمص

فطيرة الشاورما

قرنبيط بطحينة

هلا خبرتكم ان هي صورة للسفرة قبل ما تكمل , كان بقيان

الكبة دراويش

و كبة , جديدة

و الحلويات :

أطيب كاتو شوكولا

كاتو البرتقال

اذا انتبهتي ان في كتير وصفات من وصفات اخر عزيمة , هيك ربنا يسر و حبيت عيد الانواع لان في ضيوف جدد هل المرة , كمان شغلة تانية عجينة البيتزا جبتها جاهزة من محل فطاير بالخالدية , ما كان عندي مروة ااقوم الت و اعجن . كمان في الحمص جاهز و اللقم .

الوصفات الناقصة رح نزلها بالموقع قريب باذن الله , هنن أربعة بس , صلصة البيتزا السريعة و سلطة الجرجير و الرمان و يالنجي الملفوف و الكبة

قبل ما روح رح ذكركم بجروب لقمة طيبة على الفيس بوك , اتمنى الكل يشترك بالجروب لحتى نقرب من بعض اكتر و اكتر .

ان شاء الله تكون السفرة عجبتكم و لطشتوا كم فكرة منها , دمتم بخير

أضافة إلى المفضلة (0) |

أقتباس | مشاهدات : 8128

تعليقات (46)

1 الكاتب ام احمد الصغيرة, on 21-12-2009 17:38
ياييييي هالمرة اول مرة رح رد والي الشرف عنجد
ماشالله شي بيفتح النفس ربي يديمها نعمة ويبارك فيكي وباهل بيتك وبيتك
الله يعطيكي العافية

2 الكاتب ميساء, on 21-12-2009 18:09
و الله اشتقنا يا منى شو هالسفرة التحفة الله يسلم هالايدين الحلوين والله شي بيشهي الله يعطيكي العافية ويرزق صاحب بيتك وصحتين على قلب ضيوفك

3 الكاتب رنا, on 21-12-2009 18:34
ايه شو هاااد ...شي كتير حلو ومتعوب عليه..
الله يقويكي ويزينك بصحتك وعافيتك..
بالنسبة للفيس بوك انا بعتت طلب للانضمام للجروب بس مابعرف كأنه ماوصلك :zzz

بدي اعمل جية لعندك بس مابعرف عنوانك ..اذا بتستقبليني خبريني :grin

يلا سلام

4 الكاتب منال, on 21-12-2009 18:38
سلام عليكم من زمان ما نور الموقع بعزايمك الحلوه منيح ماني ساكنه بحلب كنت لزقت عندك :grin

لا تقطعينا على طول خليك منوره

5 الكاتب ام محمد, on 21-12-2009 18:44
ماشاءالله لا قوةالا بالله
يسلمو منى يعني بعد هاالغطةجيتينا بهل السفرة يلي بتشهي ومثل ما بقول المثل صبرنا ونلنابس
بالنظرموبالاكل :grin

ان شاء الله صحة وهناعلى قلب الكل واكيد الله يعطيك الصحة والعافية على مجهودك بالعزيمة ومعنا :zzz

6 الكاتب سوزان, on 21-12-2009 21:03
يسلم ايديك شي بيفتح النفس يعني هيك الواحد ما بيحتار شو يطبخ لما يكون عندو عزيمة يعني اذا عملنا نص هالمنيو بيكفي الله يهنيك يا ستي وصحة وهنا على قلب مين اكل

يعني انا يوم الخميس عيد ميلادي ورح اعمل كم صنف حلو بس لأنو الحفلة لجوزي وولادي بس فكرت اعمل كاتو كلاس وكاتو اسفنجي رح زينو وزبطو وبسكويتات وهيك شغلات وهلأ طالعت من الفرن كاتو الطبقات الخيالي وكان طعمتو روعة صعي ما نفش بس طيب كتير وهي تجربة قبل يوم الخميس :roll

بس بدي اسألك عزيزتي ممكن يكون فرني مو منيح مشان هيك الكاتو ما بينفش معي؟؟؟؟؟؟؟؟ :cry

واذا جبت فرن كهربا بيكون احسن للكاتويات والمعجنات؟؟؟ :zzz

7 الكاتب نادين, on 21-12-2009 21:48
شو من شان اذا وحدة حامل واشتهت على كل هالاكلات ؟؟؟ شو اعمل

8 الكاتب ام جنى عبيدات, on 22-12-2009 00:06
يسلمن يامنى.. بجد شي ما شاء الله بياخد العقل بس شوقتينا نعرف متى بتنزلي الوصفات التانيه وخصوصا يالنجي الملفوف

بستناكي ياقمر لا تطولي علينا :zzz

9 الكاتب farah, on 22-12-2009 00:21
سلمت أناملك يا منون والله شي بيشهي انشاء الله عقبال ما تعملي بوفيه أفراح اولادك
حبيبتي انا نزلت كيكة الموز بالمايكروويف بس كأنك ما شفتيها شو القصة؟؟

صار لها اكتر من اسبوع
والله يا ريت تجربيها وتصوريها وتصبي الصوص عليها طبعا قبل لأن الصورة بتغني الوصفة بدي صير حاول صور وصفاتي بس ما بعرف اذا رح تزبط هالقصة معي
لأن عندي كتير وصفات جديدة

10 الكاتب منى, on 22-12-2009 07:15
هلا ام احمد

الله يسلمك اختي الف الف شكر الك للدعوات الكريمة , ان شاء الله انتي كمان

11 الكاتب منى, on 22-12-2009 07:32
هلا ميوسة

ااامين يا رب , ان شاء الله الك متل هل الدعوات الحلوة و اكتر يا مزوءة , و يا رب تكون السفرة عجبتك

12 الكاتب منى, on 22-12-2009 07:48
هلا رنونة

ما بدوا طلب , انتي بتفتحي الباب و بتفوتي فورا :zzz

رنون صدر البت الك و العتبة الي , شو هل السؤال :roll

و جيبي معك ندوش و بشرى و خلينا نشلي على الدكاترة بالجامعة , صحي قال صاروا كل المواد اتمته , فقسوه لحج محمد :grin

13 الكاتب منى, on 22-12-2009 09:24
هلا منولة

خليلي عينك بتنور حلب حبيبتي , نورتي الصفحة :zzz

14 الكاتب منى, on 22-12-2009 09:37
هلا ام محمد

كلك زووء يل عسل , يا رب تكون عجبتك و لطشتي منها كم فكرة .

على فكرة انا متلي متلك لان ما نابني من هل السفرة النظر و كم لقمة فريكة :zzz

15 الكاتب gsm, on 22-12-2009 11:35
بسم الله ما شاء الله شي بشهي عن جد بس بتعرفي هيك سفر حلاتها بالجمعة والكترة انا من يومين عملت عيد ميلاد لزوجي وحاولت اشكل بس ما اكتر الكمية باعتبارنا شخصين طلعت السفرة حلوة كتيير بس المشكلة وين بقى بدي اروح بهل الاكل يمكن رح يضل عندنا لشي جمعة شو بدنا نعمل بعينا الله
يسلموا ايديك ياحق والله يجعل بيتك دايم عامر بالافراح والمناسبات الحلوة وعقبال ما تفرحي باولادك :zzz

16 الكاتب بشرى, on 22-12-2009 14:27
يا سلاممممم يا عيني شو هالسفرة الي بتشهي ,, يسلم دياتك يارب شي لذيذ وسفرة للنظر مو للأكل والله .. كم يوم ونازلة عحلب ورح اشبع عزايم هههه :grin

ومشان دكاترة الجامعة لازم نعمل حلف نحن الاربعة :zzz

بس حزرك بتفوتو لحج محمد الأتمتة بكرا بيجيب الأسئلة من المريخ

17 الكاتب نور الأسلام, on 22-12-2009 17:18
السلام عليكم بسم الله ما شاء الله الله يسسلماديك ويعطيك الف عافيه شي بشهي انشاء الله بيتك عامر والف صحه وهنا

18 الكاتب رنا, on 22-12-2009 19:27
بالنسبة لحج محمد مابظن رح يتغير شي ...يعني كنا نصفن نص مدة الفحص لنفهم عليه بسؤال واحد ...هلأ مابعرف كيف رح نقدر نفك شيفرة 50 سؤال او اكتر ....بس علينا بالتفاؤل :zzz

شو بشرى ..نزلتي على حلب ولا لسه ..خليني شوفك

اما الاخت gsmالله يصلحك لو عزمتينا كنا ساعدناكي بالاكل وماكان ضل عندك اكل بنووووووووووب :grin

19 الكاتب Iman, on 22-12-2009 19:42
اهلين منى و كل الاخوات و البنوتات الحلوين. ان شاء الله كل ايامكم اعياد. يسلموا ايديكي يا منى على هالسفره. و يعطيكي الصحه و القوه. ما شاء الله في منتهى الذوق و الترتيب. ببارك لك و للجميع بالسنه الهجريه الجديده و السنه الميلاديه. و ان شاء الله تكون سنه خير و صحه و بركه على الجميع. و يضل هالموقع المميز منور بوصفاته و بصاحبته المميزه.
كل الحب للجميع

20 الكاتب souha, on 22-12-2009 22:54
السلام عليكم

كيفك منونة شو هالسفرة الحلوة شي ملوكي و منيح الصورة كبيرة حسيت حالي جوا الغرفة بس ناقص أغرف و أكل
منونة قلتي بقيت الصور طارو لتكوني مخربطة أظن السفرة هي يلي طارت بالمناسبة ألف مبروك على المناسبات الحلوة يلي مرت الله يديم الأرفاح على الجميع

21 الكاتب شيرين, on 22-12-2009 23:03
مرحبا و سلام لكل الحلوين بالموقع الرائع. يسلم ايديك لحلوين يا منى على هيك سفرة و عن جد بتعطينا كتير دفع و حماس حتى شوي نحاول نقلدك(بحياتنا ما منصير بشطارتك). ما شاء الله عليك الله يهني زوجك و أولادك فيك.لازم أكون بعرفك ما دام أنت خريجة أدب انكليزي متلي .أنا مواليد78.و تخرجت 2002.الي الشرف أتعرف عليك و نشلي ع دكاترة الجامعة و خاصة على حج محمد اللي مشيب كل العالم.نحنالحمد لله نفدنا بس الله يعين العلقان. سلام للجميع

22 الكاتب snow whit, on 23-12-2009 00:56
صحيح شي بيشهي وسفرة بتفتح النفس

إذا ممكن أسألك شو نوعية الكاميرا اللي تستخدميها

والصورة تعملي عليها تغير بالفوتوشوب أو لا؟؟؟
لان الصورة كتير رووعة وصافية :roll

23 الكاتب منى, on 23-12-2009 05:48
ندوش غمضي عيونك الله يسترك لوقت ما توصلي لحلب و بعدها لكل حادث حديث

24 الكاتب منى, on 23-12-2009 05:48
هلا سوزان

الله يسلمك يا قمر و ان شاء الله تتيسر الحفلة و تنبسطوا فيها و عقبال المية سنة و انتي بالصحة و العافية .

هلا الكيك ما نفش معك كله و الا هل الوصفة بس ؟ اذا كله معناها في مشكلة بالفرن و اذا بس هل الوصفة فممكن يكون في مرحلة صارت غلط لحتى ما نجح الكيك .

انا فرني فرن غاز عادي , يعني مو بالضرورة ان الفرن الكهربائي احسن للكيك

25 الكاتب منى, on 23-12-2009 05:48
هلا ام جنى

رح نزلهن قريب باذن الله , بس يطيب الكمبيوتر , لان حاليا هو بغرفة الانعاش :cry

ان شاء الله تجربي شي وصفة و تعجبك , بوسات كبيرة لجنى القمر

26 الكاتب بشرى, on 23-12-2009 09:29
أهلا رنا , لسى ما نزلت يومين وبكون بحلب ان شاء الله وانتي ؟
ياريت والله لو نقدر نشوف بعض اذا بتقدري تاخدي رقمي من منونة بيكون كتير عظيم موفقة بامتحاناتك عيني

27 الكاتب farah, on 23-12-2009 10:49
كأن في حدا متجاهل سؤالي بكل مرة

28 الكاتب منى, on 23-12-2009 11:27
هلا فرح

الله يسامحك يا رب , معقولة يعني

اذا انتبهتي عم رد على كل اخت واحدة واحدة حسب وصول الرد , و كلكن على عيني و راسي و الله

الله يسلمك يا رب و عقبال كل شي بتتمنيه و يكون من احسنه

الف شكر الك للوصفة , وصلت اكيد و ان شاء الله رح انشرها بعد هل السفرة مباشرة و رح حاول جربها اكيد , الف شكر الك للوصفة و بانتظار وصفاتك , الله يسلم هل الديات أختي

29 الكاتب lolo, on 23-12-2009 12:44
تسلم الأيادي على النفس الجميلوان شاء الله يكون في ميزان أعمالك nullnull

30 الكاتب lolo, on 23-12-2009 12:46
شكرا لكي أخت منى

31 الكاتب farah, on 23-12-2009 21:09
تسلمي حبيبتي والله من باب الأملية بس
بعرف انك كلك زوووء والكل بيشهدلك بس انا حبيت هز الورد

رب يسعدك ويبعتلك ملائكة تعينك

32 الكاتب ام عمر, on 24-12-2009 12:02
ما شاء الله حولك يا منى ست بيت مرتبة :zzz

يا ريتني جارتك :grin

بسم الله حولك وحواليك

33 الكاتب ام رومل, on 24-12-2009 17:24
الله يسلم ايديكي يامنى عم تفسدي اخلاقنا وتخربي الميزان صار الواد بدو يمشي فتره مضاعفه عالتريد ميل مشان يلحق يحرق اكلاتك والا الوزن بدو يكسر الميزان
سالتك عالكنافه وماجاوبتيني رح اموت تااعملها مزبوطه ما تعضم معي
وتعرفي تعملي السينابون دورت عليه لقيتو بمواقع مصريه م عندي ثقه بمقاديرن اذا بتعرفي الله يوفقك ولادي بدن يكونو من الشاكرين وانا كما لانو القطعه الصغيره ب10 ريال

34 الكاتب gsm, on 24-12-2009 17:58
شايفة يا رنوش على هل النسوة ولا يهمك في الحلقة القادمة انتو معزومين ولو ما انتوا صرتوا اخواتي الانترنتيات على قولة منوشة

35 الكاتب نادين, on 24-12-2009 19:06
شو بشرى ورنا و منى قررتوا تجتمعوا وانا مو بحلب هيك هالمرة قررت ماانزل بصير اجتماعات من وراي ؟؟؟
رنوش صح صارت اتمته بس شبك ما فهمتي السؤال بتتحزري احسن ما نترك الدفتر فاضي حرام

36 الكاتب ام كريم, on 25-12-2009 19:10
اي ياعيني عليكي ياست الستات والله يعطيكي العافيةشكرا كتير على حل المشكلة تبع الدخول للموقع هلق صار فيني شارك

37 الكاتب منى, on 26-12-2009 11:23
هلا gsm

متل ما قلتي هل المناسبات الي بيحليها الجمعة الحلوة و الطيبة , لو كنتي عملتي متل ما قالت رنا ما كان صار عندك لبكة منوب :grin

الله يديم الافراح دوما بكل بيت , شرفتي اختي :zzz

38 الكاتب منى, on 26-12-2009 11:26
هلا بشورة

ان شاء الله توصلي بالسلامة يا رب و الله يوفقك بالامتحانات , يا ستي على حج محمد ما في شي بيمرق , واحدة من رفقاتي خبرتني انه جاب الهن سؤال على مشهد معين و كان انه شو لابسين الابطال بهل المشهد يمى الله يصطفل فيه و بامثاله

39 الكاتب منى, on 26-12-2009 11:27
هلا نور

الله يسلمك يا مزوءة و ان شاء الله الكم تل هل الدعوات الحلوة و اكتر

40 الكاتب ام رومل, on 26-12-2009 18:24
بكره 10محرم اذا مالقيت الكنافه بدي ازعل اليوم صمنا مرقناها بدون حلو قطر اكتفينا بالنواشف وغزل البنات جابولي يا ولادي لما اجو بالعيد خبيتو بالفريزر
على فكره لقيت السينابون سويتو طلع يجنن نفس الجاهز وصورتو بس اسال ولادي شلون طريقه تنزيل الصوره اقلكن عالطريقه
بكره صيام بدناكنافه تحلايه

41 الكاتب منى, on 26-12-2009 19:16
هلا ام رومل

الله يتقبل صيامك و طاعاتك , ما شاء الله لا قوة الا بالله

اختي الكنافة ممكن يكون الها عدة اسباب , اما ان عيار السمنة قليل او انك عم ترققي طبقة الكنافة او ممكن انك عم تخبزيها زيادة او على نار قوية :roll

وصفتي بالتفصيلعلى هل الرابطان شاء الله يفيدك

اي سؤال تاني تحت امرك و بانتظار السينامون

42 الكاتب بشرى, on 27-12-2009 02:24
الله يسلمك منونة ويخليلي ياكي .. بشوفك عن قريب ان شاء الله ..

وادعيلنا الله يسترها معنا من حج محمد وأمثاله :upset

43 الكاتب منى, on 22-01-2010 17:20
هلا امون

و انت بالف الف خير انت و كل عيلتكو ان شاء الله تكون هل السنة كلها خير علينا و على كل امة محمد يا رب .

هادا بس من زووءك يا عسل , و كمان من بعض ما عندكم :zzz

44 الكاتب منى, on 22-01-2010 17:23
هلا ام السوس

هيا السفرة طارت الف صحة و هنا , بس الصور طاروا و حرقولي دمي , الحمد لله على كل حال .

كتير انبسطت ان السفرة عجبتك و بالفعل الصور الكبيرة احلى .

كلك زوء سهى

45 الكاتب منى, on 22-01-2010 17:27
هلا شيرين

ان شاء الله بتصيري احسن بمية الف مرة , شو عم تحكي , كلنا هون عم نتعلم من بعض و كل واحدة عنا شي مميز بتعطي التانية , مممم انا من نفس مواليدك , بس قصتي مع الجامعة قصة . بقى ما اتوقع درسنا مع بعض :roll

نحنا منيح الي نفدنا , حسرة على الباقيين , الله يكون بالعون و يخلصهم بخير و سلامة و مية علامة :grin

عجبني السجع

46 الكاتب منى, on 22-01-2010 17:29
هلا سنو وايت

الكاميرا كانون جي 9 و اعمل تعديلات بسيطة عليها بالفوتوشوب , ان شاء الله رح ابعتلك اياها بايميل اذا ربنا راد و يسر

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 01/01/2010 )

< السابق		التالى >

[ عودة ]