L2ma.com | لقمة طيبة | L2ma.com | لقمة طيبة | دردشة حول قناة فتافيت | فتافيت, بيعجبك, ؟أيا, برنامج, متعلق | L2ma.com

القائمة الرئيسية

الأكثر تصفحاً

دردشة حول قناة فتافيت

الكاتب/ منى

09/12/2009

صباح الخير صبابا :)

اقترحت سمسومة انا نفتح موضوع نحكي فيه عن قناة فتافيت ..

شو استفدتي منها , جربتي شي وصفة و عجبتك ؟ و شو أكتر برنامج بيعجبك ..؟

أيا شي متعلق بفتافيت ..

بدي الشلي يا صبايا , حطينا فتافيت على المقلاية

أضافة إلى المفضلة (0) |

أقتباس | مشاهدات : 6007

تعليقات (19)

1 الكاتب ام محمد, on 09-12-2009 11:40
ياستي قصتي قصة مع فتافيت ما بتطلع عندي وحاولت عدة مرات اولفها بس للاسف مافي فائدة

وقت نزلت اجازة على حلب هلكت اهلي وكان ماحدا يقدر يستلم قيادة التلفزيون غيري وتابعت هاالفناة الحلوةبس الوصفات يلي ناسبتني هي وصفات حورية المطبخ

2 الكاتب منى, on 09-12-2009 12:18
رح ابدا بحالي , أول ما فتحت القناة صار عندي مشكلة و هي اني ما بقى فيني فارق التلفزيون الا وقت اعادة الحلقات , القناة فكرتها كانت جديدة و ما عدا البرامج المفيدة حسيت ان القناة فيها تقدير و احترام لفن مهضوم حقه , هي اكتر شي عجبني في القناة ..

بتعجبني كتير برامج منها برامج نايجيلا و حورية و كمان برنامج تسلم الايادي و اكيد برنامج جاك توريس , عدا انه لذيذ و فيه افكار مفيدة كتير , بحب كمان طريقة حكيه و تكسيره بين الفرنسي و الانكليزي :grin

و كمان احيان بشوف برنامج اندرو , هو صح احيانا بيفوت بالحيط , بس كمان بيعجبني طريقة تقديم أندرو و البنوتة الي معه

ممم , جربت مرة سلطة للمقدمة اللبنانية ببرنامج تسلم الايادي و كانت كتيرر لذيذة و بصورة عامة بجرب كتير اشيا من البرامج الاجنبية , بس بغير فيها لان دايما بيكون بالوصفات اما شي مو متوفر او شي حرام :roll

هلا ما بقى شوفها متل قبل , بعرف انا الخسرانة , بس ما عندي وقت للتلفزيون متل قبل ..

برنامج و لا في الاحلام بحسه رااايق و مقدمته طيوبة و هادية كتير , و انا مرة لطشت من عندها فكرة تقديم تمر منيون

ممم , في حكي كتير بس هادا الي خطر على بالي

3 الكاتب رنا, on 09-12-2009 13:10
والله هالقناة مابحس بالوقت وقت بقعد بشوفها ..كتير بتعجبني وبحسها رايقة ...اخدت وصفات متعددة منها بس ماجربتهن واغلب الشي الي بيعجبني وصفات حورية المطبخ لانه بحسها عن جد مثقفة وواعية ورايقة..اخدت منها مرة مقادير بسكويت التشيز كيك واعتمدت مقاديرها لانها كتييير صحيحة...بحب طريقة تقديمها وشغلها بحسها ست بيت مو شيف عادي
وكمان برنامج ولا بالاحلام رايق كتير وعن جد ولا بالاحلام ...تعلمت منه تزيين الكاتو بورق ورد حقيقي مطلي ببياض البيض حتى يحافظ ع شكله..
وبرنامج صحبة طيبة كتيييير بحبه وبحس حالي بزيارة نسوانية بحتة ومقدمته بتنحب
اما اندرو افندي ...اكتر واحد بيخبص بالتاريخ بوجهة نظري :zzz

اما عن برنامج سكر مزبوط ...فيه معلومات غذائية مفيدة خصوصي عالحمية والريجيم
والبرامج الاجنبية بشكل عام بتبقى حلوة كطريقة تقديم اما عن الوصفات خصوصي الطبخ مابيخطرلي جرب لانه هديك المرة في وصفة فخذ بقري بالشوكولا والكرز :eek

شو كماااان . ...اجمالا صايرة ماكتير عم تابعها لانه دائما التلفزيون يا على براعم ...او طيور الجنة ...او كراميش :grin

شو بدنا نعمل

4 الكاتب محبوبة, on 09-12-2009 18:51
والله الحال من بعضو يا أخت رنا أنا الأولاد عندي مسيطرين على التلفزيون والمعركة دائما محتدمة بين الصغيرة اللي بتحب كراميش وطيور الجنة أو أي قناة أناشيد يعني عندها أذن موسيقية والكبار بيحبو براعم وأنا بحب فتافيت كتييييييير وأكتر برنامج بحبه هو حورية المطبخ لأن بحسها مو مقدمة برنامج لأ معلمة وبتعطي نصائح وما بتبخل بمعلوماتها وبتحافظ على النعمة وبتنبه أنو ما لازم نرمي شئ من الأكل
وعلى فكرة تذكرت هلأ بدأ برنامجها وبدي قوم شوفو :grin

بحب الوصفات البسيطة واللي ما بيطلع منها جلي كتير

وبحس وصفات ولا بلأحلام إجمالا بدها وقت كتير وجلي أكتر وأنا بكره الجلي لكن الحقيقة مبدعة
تسلم الأيادي كتير ظريف وخاصة دعد
نايجيلا بتشهي الواحد يطبخ هي صحيح بتوسخ كتير وهي تطبخ بس روحها مرحة وبتاخد الأمور ببساطة

بالمختصر أنا بتابع كل البرامج بس ما جربت وصفات كتير بركز أكتر علي طريقة وترتيب مراحل الشغل خاصة في الحلويات والمعجنات
وفي حركات وملا حظات صغيرة بتخفف وقت وجهد المطبخ أو أسرار نجاح الوصفات وطرق التقديم وأكتر شئ بتعلمه فتافيت هو حب الطبخ والأستمتاع في المطبخ وكأن الواحد بيعمل لوحة فنية مميزة

أنا برأي أي صحن تعمله الأم بإيدها هو لوحة فنية وكيف ماكان هو أحسن من الجاهز بكتير وهدا رأي الشخصي
وبحبكن أخواتي :zzz

5 الكاتب ام رومل, on 09-12-2009 19:25
سلام هلق جينا على فتافيت سمعت السنه الماضيه عنا من اختي ضلي انق على جوزي لحتى ولفلي ياها بعدين كل مايصر عندي وقت احط عليها يكون اما البرنامج عم يخلص او طالع دعايات بس يعني لحقتلي كم حلقه شوفو افكار الشيفه الانكليزيه الرايقه حلوه وطريقه ترتيبهن للمشويات حلوه بعدين جوزي ماعاد يخليني اتفرج عليها قال ليش بحياتي ما سويتلن شي منها

6 الكاتب سمسمة, on 09-12-2009 20:12
يسلموا هالأيدين منى على فتحك للموضوع وهلأ رح اكتبلكن تجاربي مع هالقناة
بحب تابع حورية المطبخ وبرنامج ولابلأحلام وبعض الأحيان برنامج طاجن لأن الأكل المغربي لذيذ وبحب جرب آكلاتهن هاد على الصعيد العربي
أما البرامج الأجنبية بشوف مارثا وتايلر وبيرفوت كونتيسا وجيمي أوليفر
أما الآكلات يلي جربتها فكانت سلطة التوناومغربية مع الروبيان لجيادا
وكيك الجزر وكيكة اليقطين وكيك الملائكةوقالب اللحم لمارثا
يخنة اللحمة لتايلر
وعدة أنواع من شوربات حورية وكانوا طيبين كتير
كل هالبرامج يلي متابعتهاوبنتي الصغيرة دائما حاطة على سبيس تون وطيور الجنة شلون عم تظبط معي مابعرف

7 الكاتب سوزان, on 09-12-2009 21:13
مرحبا منوش كل عام وانت بخير ولوانو متأخرة

هلأ كنت عم بقرمش مخللة لفت على طريقتك ويا عيني شو طيبة يسلم ايديك يا رب على هالتعب وهالوصفات الطيبة :roll

بالنسبة لقناة فتافيت اول ما فتحت هالقناة كنت متابعتها على طول وجوزي كل ما فتح عيونو بالليل بشوفني عم بتفرج عليها بس بعدين مليت منها وحسيت انو معظم اكلاتها ما بتزبط معنا يعني قناة للفرجة بس وشم ولا تدوء
:grin

يعني يا اما الاكلة ما منعرفها وبحسها تخبيص يا اما المقادير مو واضحة بس للامانة في برامج كويسة وبيحسن الواحد يستفاد منها ويطبق وصفاتها متل حورية انا كتير بتعجبني وفي كمان برنامج لدالية الخطيب كانت مع شيف هندي وعملوا برياني مع انو ما قالوا كمية المقادير بالزبط بس انا جربت وعملت البرياني وكان بيجنن اطيب من المطاعم بكتييير :zzz

اكتر شي بيعقدني جاك توريس يا الله بس للنظر مبدع هالزلمة فنان بكل معنى الكلمة وبتحسر لانو ما فيني اعمل متلو :zzz

بس بشكل عام الواحد فيو يستفاد بكم شغلة او فكرة او يعدل بوصفة من فتافيت :zzz

8 الكاتب ام نور, on 09-12-2009 21:18
السلام عليكم ورحمة الله انشالله تكونوا بخير جميعا يا رب بالنسبة لا قناة فتافيت الصراحة اول ما سمعت عن هالقناة من ضحى ومع الاسف ما بتجي عندي بس مرة فتت على موقعون بالانترنت بس ما استهواني كتير بس برنامج الطبخ الي بحبوه وبنطروا بانتظام هو برنامج منال العالم على قناة ابو ظبي كنت تابعوا برمضان والان كل خميس وجمعة الساعة 2 على توقيت فرنسا الصراحة هالمراة كتير بتعجبني وجربت اكتر وصفاتها وكلون بينجحوا وسهلين ما فيون تعقيد وعندها منتدى عالنت سجلت في بس مع بعرف ليش ما عم يفتح معي في مشكلة بس لسا ما عرفت من مين والبرنامج عابو ظبي بهل ايام بس عن الحلويات سدقوني يا جماعة عم تعمل كيكات وتورتات شي بيشهي فدغري بصور الوصفة وبروح بجربا مباشرة فصرت مشهورة بالحلويات

بنصحكون تابعوها ولا تواخذوني طلعت عن موضوع فتافيت بس حبيت اعطي راي

9 الكاتب ام عدنان, on 09-12-2009 21:40
شلونك منى ؟؟
من بعد زمان هالقمر ما بان

طيب انا عن حالي بتابع فتافيت على طول

وبالاخص برنامج ريك ستاين للاكلات البحرية لما كان يطلع من فترة وجربت كتير اكلات من وصفاتو وكتير طلعت طيبة
وكمان اخدت منو افكار عن طبخ السمك وقليو وتتبيلو
وبالاخص الفيليه بالصلصة الحمراء (موجودة بالموقع )
وما علمتها لحدا الا عجبتو كتير وحبها

وكان في واحد اجنبي في الهند بعمل اكلات هندية والتوابل الهندية
واستفدت منو كتير وتعلمت برياني الدجاج و بعض التوابل

حورية المطبخ وما ادراك ما حورية المطبخ
عشق العجن والشوربة
تعلمت كتير وصفات منها وافكار عن العجين
وطريقة عجنها اللي هي سر نجاح العجين اللي ما كنت بعرفها
وانا عشت في الجزائر سنتين ولاحظت عليهم انهم كتييير بحبو العجن بالبيت حتى حلوياتها اللي بتستخدم فيها اللوز وجوزعلى طول ..... كتير طيبة وفخمة

وانجيلا وجيادا اخدت منهم افكار متل تشريح الباتنجان والبطاطا والكوسا والجزر
ونحط عليهم زيت زيتون ونسفهون ونشويون على شواية الكهرباء بدل ما تقليون بيصيروا اقل دسم
وبينطبخ فيون مقلوبة وباتنجان مطبق بزيت ومنزلة على طريقتي

وصحبة طيبة فيه افكار حلوة

وطازة يا مشاوي بما انو انا بحب الشوي تعلمت منو افكار كويسة للشوي

جزاكم الله كل خير
وسقاكم الله من انهار الجنة

تحياااااااااااتي ..... ام عدنان

10 الكاتب ام نور, on 09-12-2009 21:48
ضحكتني رنا بالاخر لما قالت التلفزيون دايما عاطيور الجنة او براعم او كراميش الحال من بعضوا رنا بس انا ما بتجي عندي الا براعم الجزيرة اطفال واذاعات فرنسية لا الاولاد ما عم تابع شي كرمالون لو ما بيكونوا بالمدرسة ما فيني احضر منال العالم شو بدنا نعمل الله يحميلنا ياهون يا رب

11 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-12-2009 23:09
انا وقت اكتشفت هالقناة صارت عندي هوس تابعت اول فترة معظم البرامج فيها بعدين صرت اترقب بس ناجيلا و بيرفوت كونتيسا والبنت الايطالية طار اسمها من راسي :zzz

بس اكلاتها بتشهي بتستعمل الجبنة كتير واجمالا الاكل الايطالي لذيذ كتير وجيمي ما حدا ذكره هلأ هو كتير معجوووء بالمطبخ واحيانا بيفعس وبيخبص بس بتاخدي منه افكار لابأس فيها تعلمت منه شراب الليمون بالزنجبيل والنعناع مع السبرايت بس لسا ما جربته
ماما جربته وقالتلي طلع تحفة وبتحسي ان اكله صحي بيستعمل خضار كتير بطرق مختلفة اما من البرامج العربية فحورية المطبخ هي حبيبة ماما بتعشقها كتير وانا جربت من وصفاتها شوربة البصل وشوربة البطاطا طبعا كنت تابع الوصفات عالنت قبل ما اكتشف ملكة المطبخ منى خانم فبطلت فوت موقع فتافيت وصار لقمة طيبة موقعي المفضل
هلأ اندرو متل ما قالت رنا ما بلاقيه الا بيخبص وبيخترع وبلاقي بصراحة اختراعاتي اظرف منه :grin

اما صحبة طيبة بيذكرني بايام الغربة اللي قضيتها وبحنلها مع صديقاتي . ولا بالأحلام جدا راقي ورايق وبتحسي انه بيهدي الاعصاب وبتحسي بعد متابعته انك بحاجة لشي أكلة مالحة من كتر الحلا اللي فيه

بصراحة في برامج كتير بتنشاف بس هاتو وقت في برنامج شهية صحية ظريف وبيعطيكي بدائل صحية ووصفات خفيفة
وصاروا الاولاد كلما شافوني فاتحة على هالقناة بتبلش الاحتجاجات والاعتراضات مع انهم احيانا بيتابعو معي وبيتوحموا على كل اكلة :zzz

12 الكاتب Mays, on 10-12-2009 08:20
فتافيت .... ذكرتوني بالذي مضى
يمكن إلي أكثر من ست شهور مو فاتحة عليها ، من بعد ما رجعت عالشغل.
بعد ولادتي ببنتي الاخيرة أخذت إجازة أمومة طويلة شي 3 شهور و كنت أقعد اتفرج عليها من الصبح لحتى يرجعوا الأولاد من المدرسة.
بس هلق التلفزيون موجود لأصمد عليه تحف صغيرة و صور لإنو ما حدا فاضيله.
بصراحة عجبني شغل جاك توريس بالشوكولا مع إني ما كثير صحبة معها بس كان شغله بيعقد .
نايجلا شاطرة و تعلمت منها بودينغ الشوكولا مع الإجاص المعلب ( طيب و تغيير شكل)
كنت حب برنامج cook yourself thin لإني وقتها كنت مهتمة بالريجيم و بالبدائل الخفيفة في الأكل و هو بيعطي معلومات مفيدو عن السعرات في الأكل.
أندرو ما بحبه أبدا و لا بقدر شوفه عم يطبخ.
جيمي كان عندو برنامج اللي بيطبخ من الخضرا المزروعة بحديقته ، بيقطفها و دغري ع الطبخ ، أنا كان يطير عقلي لإن حلم حياتي يكون عندي مزرعة صغيرة غيها ( حاكورة خضروات) و كام شجرة فواكه و دجاجات و بقرة و كام غنمة.
بحب الأكل الإيطالي تبع جيادا و حلويات بيرفوت كونتيسا.
طبعا البرامج الجديدة اللي عم تحكوا عنها كلها ما بعرفها ، يمكن هي جديدة.

سلامات للكل

سؤال لمنى قبل ما إنسى :
أنا عقدتي الوحيدة بالطبخ هي عجينة الشو اللي منعمل منها الإكلير و البروفيترول و الباريس برست ، ما بدها تظبط معي أبدا و يمكن عندي إلها وصفات صاروا بيعملوا مجلد بس للإسف و لا واحدة صارت معي ، أنا متأكدة إنو في شي غلط عم إعملوا يا بالعجن يا بالخبز بس الله وكيلك جربت كل الوسائل و ما في فايدة ، أي نصيحة؟؟؟؟؟؟؟ :cry

13 الكاتب semo, on 10-12-2009 14:23
يالله شو مشتهية تطلع عندي هالقناة

كتير حاولت ولفها عالتردد 12341 عالنايل سات وماطلعت عندي

ياليت لو حدا بيعطيني غير تردد

14 الكاتب نور الأسلام, on 10-12-2009 15:28
مرحبا منى كيف حالك وين هالغيبه الطويله انشاء الله امورك تمام والله اني اشتقتلك كتير كتير كتيييير صارلي فتره ما دخلت عاى النت لانو الشبكه عنا كانت معطله واول ما اشتغلت فورا فتت للموقع تحباتي الك يا اغلى منى

15 الكاتب gsm, on 10-12-2009 16:38
السلام عليكم صبايا بالاول كل عام وانتو بخير ما تواخذوني اجت متاخرة شوي بس والله كنت بزيارة عند الاهل وما صرلي يومين راجعة بالنسبة لقناة فتافيت انا ما الي بشكل عام مراق بالتلفزيون بس كنت اشوف كم حلقة لجاك توريس وكمان لنايجيلا هادا قبل ما اسافر لأنو هون عندي ما بتطلع قناة فتافيت بس بصراحة يلي عنده ملكة الطبخ العالمي الشيفة منى ما بده لا فتافيت ولا غيرها :grin

16 الكاتب souha, on 10-12-2009 20:01
السلام عليكم
ممم عم تحكوا عن فتافيت قناتي المفضلة الحقيقة أنو عاملة بالبيت حظر تجول على التلفزيون دائما على فتافيت
أما بالنسبة للبرامج فبحب حرية المطبخ و بحس حالي و أنا عم تابعها كأني في درس أكاديمي و كمان بحب تابع جاك توغيس كتير بحب لما بيلفظ الراء غين و بتشر عيني على صحون الشوكولا يلي عم يشتغل فيها و مرة جربت و زينت كاتو بشي من التقنيات يلي بيستعملها بس المقادير من عندي
أما أندرو ما بعرف ما بحب هالبرنامج و كمان ace of cakes ما بحبو أما صحبة طيبة ظريف و بتحسي حالك مع صاحباتك أو جاراتك و برنامج و لا بالأحلام ظريف و المقدمة باينتها فهمانة و شطورة بس الديكور باهت و مرة وحدة روسية رفيقتي حضرت البرنامج معي و قالتلي مطبخ بس ديكور حمام و برنامج تسلم الأيادي ما كتير بشدني طبعا مو ضروري الوحدة فينا ما يعجبها البرنامج لأنو المقدمين مو كتير شاطرين بس شغلة أذواق.
كأني حكيت كتيييير
سلام

17 الكاتب karmen, on 11-12-2009 23:57
السلام عليكم افضل برنامج عندي صحبه طيبه سوزان بتقدم الاكل بصوره مبسطه وجميله معلش منى بدي اسالك عن مخلل الزيتون والجزر اذا ممكن تفيدني لو سمحتي

18 الكاتب ام جنى عبيدات, on 12-12-2009 08:47
صباح الخير للجميع.. هلا قناه فتافيت عامله عندي بالبيت مصارعه.. انا ما بحضر غيرها وزوجي اكيد بده المباريات .. بس الها فتره ترددها ضعيف شوي وما عم تزبط كتير عندي...بالنسبه للبرامج بحب صحبه طيبه كتيييير سوزان كتير الها نفس بالاكل وبتعمل الاكل برقي مع انه بسيط. وباريفوت كونتيسا بحب حلوياتها والتارت مميز بتعملو.وجيادا الايطاليه خلتي اعرف انه المعكرونه بتنعمل بميه شكل ولون.. هلا بحضر الكل بس هدول بستمتع بشوفتهم :zzz

19 الكاتب ocean7, on 19-01-2011 10:16
كتيررررررر حلوة هالتعليقات
انا بدي كتب رأيي ولوا ني متأخرة و يمكن سكرتو هالموضوع من زمان

انا ما بطيق اندرو - لا هوي ولا البنت يلي معو - يل يتما بيفوت فيه مفروشات البيت - و لا بقدر اتفرج عليهم بالمرة
بحب اكتر شي جيمي اوليفر يلي بيضل معجوق و نايجيلا يلي بتضل بتلحوص اصابيعها و بحب شهية صحية - بتقدمها هي الحلوة يلي عيونا زرق و شعرا قصير - بحب صوتا التخين شوي ههههه
اما سكر مزبوط لا يمكن وقف عندو ولا ثانية - ما بحبو منوب
و بحب جاك توريس هوي و هاللغة المهضومة تبعو
و بالاجمال بحب الاجانب - اما من العرب ما بيعجبني الا حورية
وانا ما عندي اولاد - لذلك ما فين منافسة عالتلفزيون و بقعد عليها كل وقت فراغي - حتى باللي بصلي الفجر و بفتح عليها ههههه

شكرا عالموضوع الجميل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 12/12/2009 )

< السابق		التالى >

[ عودة ]