الجو برة برد و مطر كتير الله يبعت الخير يا رب على طول و ضل ديارنا عامرة , عصرت الخل الي جهزته باواخر الصيفية على طريقة سهى  , صبايا مو معقول كيف طلع , على اد مو طيب صرت اشرب منه بالكاسة اول ما عصرته , انصح و اشجع الكل لتجريبه , جزاك الله كل الخير عنا سهى و ربي يديم عليك الصحة و على ماماتك كمان .


الخل البيتوتي طعمته مختلفة عن الخل الجاهز , طعمته فيها حلاوة خفيفة كتير طيبة و حموضته أخف من الخل الي نشتريه من السوق , كتير حسيته بيشبه خل البلساميك , و انا عملت متل ما نصحتني سهى , حمضت السلطة بالخل و الليمون , مممم .

المهم من كم يوم اشتهيت حضر سلطة جرب فيها خلاتي الي عصرتهن . ما كتير عندي مقادير محددة للسلطة , الي صار اني كنت مشتهية جرب خلاتي و كمان كان فاقس كيفي على الرمان قبل ما يخلص وقته , عندي شوية ملفوف و جزر و خس , كله على بعضه طلع بيجنن اكلنا السلطة و اكلنا اصابيعنا وراها .

جربتها مرة تانية بحمض الحصرم  و قدمتها مع الملوخية , كمان طيبة كتير , فرطت ريقي على سيرة الحمض .

قبل ما روح رح خبركم خبرية حلوة و هي ان لقمة طيبة اخد جائزة من العزيزة ارلييت و هي واحدة من محموعتنا وليمة و الي هي مجموعة من الناس الي بيحبوا الاكل و تحضيره و خصوصا المطبخ العربي و كل شهر في تحدي من دولة معينة . الف شكر الك ارليت و اتمنى ان اكون على اد الجايزة و مستاهلتها .

مثل اليوم :

الي بيعطي ولد زود عن ولد بوسة , اله بجهنم دوسة


بالصحة و الهنا

نصف خسة
2 جزر
فرط نصف رمانة
ملفوف , حوالي ربع حبة متوسطة

الصلصة :

4 – 5 ملعقة كبيرة خل بيتوتي
عصير نصف ليمونة
ملح و رشة كمون و فليلفة ناعمة
5 ملعقة كبيرة زيت زيتون

تعليقات (24)

1  الكاتب ميساء, on 09-01-2010 07:30 صباح الخير منى     انشا الله ألف مبروك يا رب عالجائزة والله أنت وهالموقع الرائع بتستاهلو كل جوائز الدنيا وبالنسبة للسلطة باينتها طيبة كتير واليوم انشاء الله عالتجريب ويسلم هالايدين الحلوين يا قمر النت

2  الكاتب gsm, on 09-01-2010 11:42 اول شي ان شاء الله الف الف مليون مبروك على هل الجائزة بس في سؤال يعني ما عرفت تعطيك الجائزة قبل هههههه والله انو هل الموقع من احلى المواقع يللي تعرفت عليها بحياتي وكل ما اتعرف على عالم جدد فورا بدلن على هل الموقع على قد مانه مفيد خصوصي للبنات يللي متح حكايتنا بالغربة وجايين ما بيعرفوا يقلوا بيضة تاني شي يممممممممممم يم على هل السلطة بس يا ستي انو سلطة خريف نحنا عندنا هون سقيع وجليد الله وكيلك كلمالها عندناا درجة الحرارة عم تنزل تقولي سيبيريا مو هيك بس الحمد لله على كل حال على كل انا رح اجرب هل الوصفة بس من دون الخل البيتوتي لأنو ما سبق وجربته وهلق لحتى اجرب اعمل الخل رح استعمل الخل الجاهز بس يا ترى ممكن استعمل الخل البلسمي بدال الخل البيتوتي ويعطي نفس النتائج او قريب منها   ما تواخذيني اخدني الكلام وطولت عليك كتيير   ومرة تانية ان شاء الله الف مبروك على الجائزة وعقبال الاحسن منها

3  الكاتب منى, on 09-01-2010 11:52 هلا ميوسة صباح الفل و الورد الابيض     الله يبارك بعمرك يا زووء ,ان شاء الله تجربيها و تاكلوها بالهنا و تكون طيبة متل ما بتحبوا

4  الكاتب نور الأسلام, on 09-01-2010 17:37 السلام عليكم تحياتي يا احلى منى الف الف مبروك الجائزه والله انك بتساهلي كل الجوائز الحلوة بالدنيا يسلمو اديك على هالسلطه بجربها انشاء الله

5  الكاتب Mays, on 10-01-2010 05:18 مبينة هالسلطة طيبة و سهلة، و سؤالي متل سؤالgsm فينا نستعمل خل البلسمي .    منى يعتلك رسالة على حسابك بالفيس بوك يا ترى وصلتك

6  الكاتب منى, on 12-01-2010 16:33 هلا gsm     الله يبارك بعمرك يا رب , هادا من زووءك يا عسل .    يا ترى انتي هلا ووووين     الحمد لله رب العالمين الجو عنا بسوريا منيح , البرد الكتير او ا شوب الكتير ما بيطول و الغالب اننا عايشين بنعمة , من فضل الله     ممكن تجربي السلطة اكيد بالخل البلساميك و حتى بالخل العادي , انا جربتها بكل الطرق , بس الكمية رح تختلف , ااقل شوي و حسب زوءك

7  الكاتب منى, on 10-01-2010 19:04 هلا نور   الله يسلمك يا ام الزوء و اللطف .    ان شاء الله تجربي السلطة و تحبيها و تدعيلي

8  الكاتب gsm, on 11-01-2010 14:00 اهلين منونة اليوم عملت هل السلطة وكتييييييييير طلعت طيبة حطيت شوية خل جاهز وشوية خل بلسمي وكتيير صارت النكهة لذيذة يسلموا إيديك   يا ستي انا عايشة ببريطانيا وهل الشتوية اجت كتيير قوية وعم توصل درجة الحرارة لل -18 برررررررررررد لأ وهي اول شتوية غلي بأوروبا بعد ما كنت بالخليج بقى شوفي على الفرق الفظيع   طولت عليك ما تواخذيني

9  الكاتب آرام, on 11-01-2010 17:46 مرحبا أخت منى  شكرا كتير على السلطة اللذيذة، أنا دائما بعمل سلطة ملفوف بس بدبس الرمان، وأحيانا بالليمون، ما خطر ببالي أجربها بالخل! وكمان ما خطر ببالي سابقا أحط معها فرط رمان.  المهم أنها طلعت لذيذة جدا .. خصوصا مع الخل البيتوتي

10  الكاتب منى, on 12-01-2010 16:34 هلا ميس   وصلتني و شي بيشهي , الله يسلم هل الدياات     ان شاء الله تجربيها بالخل البلسمي و تطلع طيبة , رح استنى رايك

11  الكاتب ام دانية, on 12-01-2010 16:52 ان شاءالله الف مبروك الجائزة والله بتستاهلي كل خير والسلطة شكلها طيبة رح جربها وخصوصاانو المقادير كلها متوفرة عنا بس ياريت تنزلينا شي وصفة لذيذة من دياتك تكون ساخنة حاكم البرد عنا غير شكل

12  الكاتب souha, on 12-01-2010 22:12 هلا منونة   ألف مبروك على الجائزة و إنشاء الله دايما للأحسن بس صورة الجائزة ما عم تطلع عندي حبيت شوفهايمكن عندي شي غلط   سلم دياتك على السلطة باينتها كتير ظريفة

14  الكاتب منى, on 21-01-2010 18:37 هلا gsm   هنا و الف صحة يا رب .  يا ستي مهونة ان شاء الله , و الغربة صعبة بالشوب و البر د و ما في شي بيدفي الواحد من جوى و برة الا بلده و لو شو ما كان     لا طولتي و لا شي , نورتي يا قمر

15  الكاتب منى, on 21-01-2010 18:40 هلا ارام   الف هنا و صحة اخي , بتعرف سبحان الله انا سلطة الملفوف بدبس الرمان صار الي شي 10 سنين ما دقتها , و نهار الي قرات تعليقك زكرتني فيها قل رح حضرها , بس كنت معزومة على الغدا عند اختي و اذ بتكون هل السلطة على السفرة     مرة تانية الف هنا و صحة على السلطة و على الخل كمان , نورت اخي

16  الكاتب منى, on 21-01-2010 18:44 هلا ام دانية   ان شاء الله تجربيها و تحبيهاو انا رح استنى رايك     تكرم عيونك اختي ام دانية

17  الكاتب منى, on 21-01-2010 18:47 هلا ام السوس   يمكن ما عم تطلع لان البلوج عنا ممنوووووع , سسسس , لا تقولوا لحدا     ان شاء الله تجربي السلطة و تطلع طيبة و الف الف شكر الك للخل يا قمر

18  الكاتب منى, on 21-01-2010 18:48 هلا امونة   جربيه و ما بتكوني الا رضيانة ان شاء الله , انا رح استنى رايك بعد التجربة و ان شاء الله تكون يمم يمم يممي

19  الكاتب أم علي, on 26-01-2010 23:29 السلام عليكم كيف حالكم ان شاء الله تمام شو اخبارك ست منى والله اشتقتلك كتير والف مبروك على الجائزة اعذريني انشغلت على   مراسلتك ابتعرفي البيت والاولاد بس انا من فترة لفترة كنت افتح الموقع وشوف كل شي جديد عندك وهلق ان شاء الله دائما رح اتواصل مع اكلاتك الشهية وتسلم ايدك على هالسلطة الشهية

20  الكاتب قهوه مُره, on 01-02-2010 12:01 السلام عليكم...كيف حالك عزيزتي ...يعطيكي العافيه ..تبارك الله كل أكلك لذيذ بياخد العئل..بدي أسألك عن شغله شفتها بالسوق..صواني بلاستيك للكاتو (يعني بتنحط بالفرن)بس ماني عارفه بتنحط بألب صينيه فيها مي بالفرن..خايفه حطها من غير شي .تسيح وتبهدل كلشي؟؟ أفيديني أفادك الله

21  الكاتب منى, on 02-02-2010 10:07 هلا ام علي   تشتاق الك العافية و الحمد لله ما دام كل امورك الخير ما في مشكلة المهم اطلطلي علينا كل فترة     الله يسلمك و يخليك و ان شاء الله تجربيها و تحبيها

22  الكاتب منى, on 02-02-2010 10:15 هلا مريومة   من زووءك اختي , الله يخليك و يحفظك دوما    الصواني الي قلتي عنهن هنن من السيليكون و ممكن استعمالهن للفرن , بس انا ما كتير حبيت الفكرة , ايه شو من قلة الصواني العادية   بس للفريزر ممكن تستعمليهن و عم يجي منهن اشكال حلوة كتير , بتعطيكي شكل حلو لكيك البوظة او الجيلو

24  الكاتب منى, on 02-03-2010 20:02 بتعرفي سمسم ردك و كل الدفى الي فيه حركلي قلبي من جوى , الله يخليلي ياكي و ان شاء الله كل دعوة حلوة دعيتيها الي ترجع الك احلى و تكون من نصيبك و نصيب كل عيلتك يا رب     الله يسلمك , بوسات كتير سمسوم

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved