L2ma.com | لقمة طيبة | L2ma.com | لقمة طيبة | كبة حميس | الكبة, · , اللحمة, دبس, يضاف | L2ma.com

القائمة الرئيسية

كبة حميس

الكاتب/ منى

06/12/2009

كبة حميس

سلام عليكم يا صبايا ,اشتقت الكم خيرات الله و صار الي حوالي الشهر من وقت ما نزلت أخر وصفة الي بالموقع , كنت مشغولة بكذا قصة , و ما دام طولت الغيبة فلازم تكن الرجعة محرزة لهيك رح نعمل اليوم نوع كبة جديد و بيشهي : كبة حميص أو حميس متل ما بتحبوا سموها و هو نوع طيب كتير و مقبل بس مو معروف كتير بحلب و أنا مو متاكدة من أصله بس الي بعرفه انه بيشهي و مستاهل التجربة .

تتحضر الاقراص متل أقراص اللبنية و تنحشى باللحمة و الجوز , في ستات بيوت بيحبوا يقلوا اقراص الكبة قبل اضافتها للمرقة , انا بحب ضيفها من دون قلي , بحسها أطيب و أخف .

شو كمان , ايه . هل الوصفة بالعادة بتتحضر بمرقة سلق اللحمة من دون قطع اللحمة , بس مع قطع اللحمة طلعت أفخم و أنكه و غير شكل . بقى فيكي تحضريها بلحمة او من دونها حسب رغبتك .

واحدة من رفقاتي من نواحي الساحل خبرتني انهم بيحضروا الكبة حميس بغير طريقة , من دون دبس بندورة و لا عصير رمان , بيحمسوا بصل مع قطع لحمة وبعدها بيغمروها بالمي و بيتركوها لحتى تستوي و بعدها بيضيفوا اقراص الكبة . و رفيقة تانية خبرتني انهم بيحضروا الاقراص و بيسلقوها و بعد السلق بيحمسوا الاقراص بزيت زيتون لهيك فيكن تقولوا ان بعد ما اتعلمت هل الطريقتين الجدد علي فتت بالاول بالحيط و بعدها قررت الف كتاب عنوانه " ألف طريقة و طريقة لطبخ الكبة الحميص "

بالله شو رايكم ؟, يا ترى لو كنت بتحضري هل النوع من الكبة , شو هي طريقتك ؟

قبل ما روح رح خبركم أخر أخبار الموقع و هو انه بتشجيع كتير كبير من ضحى , تم نشاء جروب للقمة طيبة على الفيس بوك .

فيكم تشوفوا صورة الوصفة في الجروب قبل ما تنزل بيوم على لقمة طيبة و كمان أتمنى أن كل الاخوات في الموقع و الي مشتركين بفيس بوك ينضموا لالنا لحتى نعرف بعض اكتر و نقرب اكتر و اكتر . عنوان الجروب على الفيس بوك .

بالصحة و الهنا

حوالي 40 قرص كبة
1 – 2 ملعقة كبيرة سمنة
كيلو لحمة مقطعة لقطع كبيرة
3 حبة كبيرة بصل مقطع جوانح
3 – 4 ملعقة كبيرة معجون البندورة
4 ملعقة كبيرة دبس رمان
ملعقة صغيرة دبس فليلفة ( اختياري )

طريقة التحضير

·         تحضر أقراص الكبة ثم تسلق , المقادير والطريقة بالتفصيل موجودة على الرابط التالي .

·         تقلى اللحمة بالسمنة على نار متوسطة , تقلب حتى يتغير لونها و تمتص كل مرقها .

·         تهدى النار و يضاف البصل و يقلب لبضع دقائق . يضاف معجون الطماطم و يقلب لبضع دقائق أخرى .

·         تغمر اللحمة بالماء و يضاف دبس الرمان و دبس الفليفلة و بعد أن يغلي تهدى النار و يغطى القدر و تترك حتى تنضج اللحمة .

·         يضاف الملح و تذاق الصلصة و يضاف المزيد من دبس الرمان حسب الرغبة .

·         تضاف أقراص الكبة المسلوقة لمرق و تترك لتغلي لمدة دقيقتين أو ثلاثة دقائق .,تقدم بعدها الكبة فوراً .

أضافة إلى المفضلة (0) |

أقتباس | مشاهدات : 1410

تعليقات (30)

1 الكاتب ام محمد, on 06-12-2009 09:41
ياالله شو اشتقتلك يامنى وبصراحة الموقع مالونكهة من دونك مثل اذا واحد دخل على بيت وما شاف اصحابه فيه والله كتير صعبة حمد لله على سلامتك ونورتي موقعك وكمان اشتقت لاخواتي ام نور وغيث وايمان(صاحية وصفة فرك الكنافة)يلي بحسهم من اصحاب هدا البيت الله يديمكم ويجمعنا دائما على ما يحبه ويرضاه

2 الكاتب ام نور, on 06-12-2009 12:19
بتعرفي منوش اليوم لا انتبهت انو في كبة بالوصفة مع انو مبارح عالفيس بوك ما شفت الا شقف اللحمة :grin

فخطرلي تكون شي وصفة باللحمة ودبس الرمان عاكل حال سلم دياتك واشتقنا لا وصفاتك المميزين وهالوصفة جديدة علي وانشالله رح جربا اكيد

3 الكاتب ام نور, on 06-12-2009 12:27
تسلمي يا ام محمد كلك زوء والله يخليلك محمد يا رب

انا كمان اشتقتلك واشتقت لا هاللمة الحلوة ولا كل الاخوات الكريمات وبالمناسبة فكرة الفيس بوك كتير حلوة وهيك منتعرف على بعض اكتر ومنتشارك بافكارنا فاهلا وسهلا لا كل البتحب تنضم النا وشكرا لا ضحى ام الافكار الحلوة الله يوفقك حبيبتي ويرزقك ويعطيكي على اد نيتك

4 الكاتب بشرى, on 06-12-2009 13:51
يا سلام رجعة قوية متل عادتك يسلم ايديكي يارب على الكبة الحميس ما جربتا انا قبل هالمرة بس مرة ولا دقتا من قبل بلكي بتشجع وبعملها ما دام حطيتي الطريقة يسلمو ايديكي

اشتقنالك والله ومتل ما قالت الاخت ام محمد الموقع بدونك مالو نكهة

5 الكاتب سلاف, on 06-12-2009 16:04
كل عام وانتي والاخوات بالموقع بألف خير منى
اشتقتلك واشتقت لأكلاتك وللموقع
وألف مبروك زواج اخوكي الله يسعدهن وعقبال ماتفرحي بشهادات اولادك العليا
صرلي زمان مافتت سفر وتعب وصارو 3 اولاد بس هلأ الحمد لله رجعنا للاستقرار ورجعت للكمبيوتر يللي حسيت حالي يتيمه بدونه الفتره اللي راحت
يسلم ايديكي عالكبه هي اول مره بسمع فيها بس شكلها بتشهي وحلوه كتير فكرة الفيس بوك
منى لاتغيبي كتير متل ماقالو الموقع بدونك مالو نكهه ولا لون ولاطعم

6 الكاتب منى, on 06-12-2009 17:59
هلا ام محمد

تشتاق الك العافية يا حق و هل الرد الحلو من زووءك يا احلى ام محمد

ان شاء الله تجربي الوصفة و تكون يممي و لا تنسي تخبريني :zzz

7 الكاتب منى, on 06-12-2009 18:02
هلا بشورة

الله يسلمك يا قمرو يا رب , و معك حق مو كل هل الاد معروفة عنا بحلب , بس مستاهلة ان شاء الله ,
ان شاء الله تجربيها و تكون على زوءك و لا تنسي تاكلي عني كم لقمة

كلك زووء بشورة , انتو كمان من اهل البيت :zzz

8 الكاتب ام جنى عبيدات, on 06-12-2009 18:17
دماااااااااااار هالوصفه... حرام عليكي كل ما ابلش برجيم بفتح موقعك بلاقي وصفه تدمر كل شي.. بكره ان شاء الله رح اعملها مو مشكله كيلو او تنين زياده مو قصه :grin

يسلم ايديكي عزيزتي

9 الكاتب منى, on 06-12-2009 19:59
هلا ام نور

معقولة ما شفتي الكبة :eek

يا ستي الي اخد عقلك يتهنى , الله يهنيكم ببعض انتي و هل العيلة الحلوة

ان شاء الله تجربيها و تكون متل ما بتحبي و اكتر

10 الكاتب منى, on 06-12-2009 19:32
هلا سلوفة

ان شاء الله الف مبروك البي بي الجديد يتربى بعزكن و دلالكن ان شاء الله و ان شاء الله يكون ولد صالح و تشوفوا منه و من اخوته خير كتير .
الحمد لله على السلامة و ان شاء الله تجربي هل الكبة و تعجبك و هادا بس من زووءك حبيبتي :zzz

11 الكاتب منى, on 06-12-2009 19:42
هلا ام جنى

الله يسامحك شو ريجيم و ما ريجيم , اعوذ بالله , هون نحنا منتهنى بحياتنا و ما منقص شي على حالنا بس باصوله :zzz

يا رب تجربيها و تحبيها و مية هلا فيك اختي

12 الكاتب منى, on 06-12-2009 19:56
صبايا ما حدا فيكن بيطبخ هل الكبة في بيته لحتى يخبرنا عن طريقته :roll

13 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-12-2009 01:48
الحمدلله على السلامه منى الحلوه ووصفاتا الاحلى. كل عام انتي و كل احبابك بخير حبيبتي. اشتقتللك على قولتكم كومايات كومايات ههه ما بقى تغيبي كتير علينا. الف مبروك زواج اخوكي الغالي. الله يسعدهم و انشاالله كل ايامكم افراح. بعيد كمان على الاخوات كلهم. ام محمد تشتقلك العافيه يا مزوقه حبيبه انتي والله كل عام و انتي بخير و ام نور و غيث و سهى و رنا و سلاف الف مبروك المولود يتربى بعزكم. و كل الاخوات بدون تسميه فردا فردا اي والله اشتقنالكم. موسم اعياد هون انشغلنا شوي و من غير شر الموقع بدون منى كان متل مهجور بس هيو رجع احلى من الاول. وصفه لذيذه يا منى اول مره بسمع فيها. للتجريب قريبا. فكره الفيس بوك عجبتني كتير علشان نتعرف مع مين عم نحكي. كل الحب للجميع.

14 الكاتب شيرين, on 07-12-2009 11:25
السلام عليكم وكل عام و أنتم بألف خير.مبروك علينايا منى رجعتك إلنا و للموقع .و الله (متل ما قالت الأخت أم محمد الموقع بلاك ما له نكهة)بس ما تفكريني قاعدة ؟كنت عم أطبق وصفاتك الرائعة وعن جد كل مرة بتبيض الوجه و ترفع الراس.جربت كاتو البرتقال بحشوة البرتقال(رائعة بكل معنى الكلمة)والبارحة رجعت عملته و بنفس الروعة و النكهة.و الله أدعيلك كتير . لا تحرمينا أبدا من وصفاتك و طلتك و كلامك الحلو.كتير عجبتني فكرة الفيس بوك و انشاء الله للأحسن دايما. :zzz

15 الكاتب أم الهدى, on 07-12-2009 13:21
الحمد لله ع السلامة منوش ومبارك ما عملتو بعرس أخوك وعقبال فرحتك بولادك
بتعرفي هي اول مرة بسمع بهل نوع من الكبة بس شكلها طيب تسلم دياتك
عندي سؤال مالو علاقة بالوصفة وهو شو الفرق بين معجون الخردل العادي والديجون وأي واحد فيهم أطيب ( علما اني ما كتير بحبو ) واذا بدي أخلي عندي نوع واحد ينفع لأغلب الوصفات شو بجيب
وفي كمان سؤال تاني موجود بوصفة تشاينيز نودلز من بعد أمرك كمان بدي جواب
وألف ألف شكر الك والله يجزيك كل خير

16 الكاتب ميساء, on 07-12-2009 20:51
عزيزتي منى كل عام وأنت بألف خير أنت وجميع الأخوات في الموقع أنا عايدت عليكي في وصفة كعك العيد الرائعة ما بعرف اذا قرأتيها وانشاالله ألف مبروك زواج أخوك ويا رب بالسعادة والرفاه والبنين أنا صار لي زمان ما شاركت بالتعليق بسبب بعض الظروف ولكن كل يوم لازم أفتح الموقع واتصفح الأكلات اللي فيه وجرب منها لأنو بدون مجاملات وبعد البحث والتجريب بيضل لقمة طيبة وصاحبتو الحلوة ميمو number one وصرت مدمنة عليه وهلق بالنسبة للكبة الحميس ممكن يتقدم معها رز مفلفل ولا لحالها و شكرا كتير

17 الكاتب منى, on 08-12-2009 11:29
هلا امونة

الله يسلمك و يحفظك و يخليكي و كل سنة و انت و كل عيلتك بالف خير و ربي يبارك بعمرك و عقبال ما تفرحي بزينة و عزيز بشهاداتهن و زواجهن و ولادهم و كل شي بتتمنيه الهن

ان شاء الله تجربي الوصفة و تكون متل ما بتحبي او اطيب و لا تنسي تخبريني

18 الكاتب منى, on 08-12-2009 11:54
هلا شيرين

الله يبارك بعمرك و ببدنك يا زووء يا قمر

مممم , الف صحة و هنا على البك على الكيك هل المرة و كل مرة , هيك الشطورات و الا بلا :zzz

ان شاء الله الك متل الدعوات الي عم تدعيها و اكتر , هناااا شيرينو

19 الكاتب سمسمة, on 08-12-2009 21:42
يسلموا ايديك منى آكلة غير شكل بس صايرة عم طولي
علينا الغيبة
لاتحرمينا منك ومن وصفاتك المميزة
حبيبة قلبي منى في كتير منا بيشوف قناة فتافيت
شو رأيك نفتح موضوع يكتبوا فيه البنات
شواستفادوا من القناة واذا جربوا شي منها

20 الكاتب منى, on 09-12-2009 07:54
فكرة سمسومة

قايمة حطها على الصفحة الرئيسية

21 الكاتب ام نور, on 09-12-2009 21:53
منوش اليوم جربت هالكبة شو طيبة غير شكل طلعت وحسيتها كتير سهلة ليش لان انا دايما عندي كبة جاهزة بالتلاجة فكتير عجبتني حسيتاا بتبيض الوج قدام الضيوف وصورت صحن رح ابعتلك صورة

22 الكاتب ام رومل, on 10-12-2009 14:15
يسلمو ايديكي يا منى على هالاكله تعرفي نحنا بالرقه منعملها تقريبا نفس الشي بنسميها كبه حميس او كبه يهود بس عجينه الكبه بتختلف شوي بدها تلت الكميه برغل والتلتين التانيين برغل جريش هيك اسمه منشتريه من السوق بيدبق كتير بشكل ما يحتاج هبره مع البرغل يطحن مع بعض 3 مرات وتشكل الكبه متل اشكال الحجب او مثلث بعدين نسلقها بمي فيها دبس رمانودبس فليلفله مشان تعطي شفه حمار وتقدم ناشفه بدون مرقه لذيذه جدا جدا ومو الكل بتضبط معهن يمكن بس الكبار الخبيرين فيها مشان هيك كل ماانزل اجازه اقولن يعملولي ياها

23 الكاتب غيث, on 10-12-2009 19:12
بالاول بحب سلم على كل الاخوات الغاليات بالموقع وارحب واعيد على ا لحبيبة ام محمد وايمان اللعزيزات اللواتي تذكروني بسلام واقول لهم فيكم الخير عزيزاتي وانتو بالقلب دوما وكل الموقع الغالي طبعا وهذا من ذوقكم والان نجي عالوصفة اشو هذا ميمو بتجنن اكيد على التجريب والله انا اول مرة بسمع فيها الله يسلم ايديك ويجزيك الخير انت وجميع الاخوات المخلصات لاسرة الموقع

24 الكاتب منى, on 22-12-2009 07:15
هلا ام الهدى

ان شاء الله تجربيها و تعجبك , سهلة و تغير شكل :zzz

اختي خردل ديجون نكهته أخف من الخردل العادي و هيك بتحسيها معتدلة و لطيفة على اللسان لما الواحد بيدوقه , و التنين طيبين حسب المطلوب .

هلا رايحة للتشاينيز نودلز , اسفة للتاخير :roll

25 الكاتب منى, on 22-12-2009 07:32
هلا ميوسة

و انت بالف الف خير يا حق , شكرا كتير لكل الكلام الحلو و الرد المزوء , هادا بس من لطفك ميوس :zzz

الله يديم المحبة و المعروف دوما .

هلا هل الكبة بالعادة بتتقدم من دون رز , بس كمان فكرة , ما دام صار فيها لحمة صارت كتير مناسبة لان يتقدم معها رز

26 الكاتب منى, on 22-12-2009 07:48
هلا ام نور

الف هنا و صحة و عافية و انا متلك بشوفها من الانواع السهلة و الطيبة , رح استنى الصورة حبيبتي :zzz

27 الكاتب منى, on 22-12-2009 09:24
هلا ام رومل

هادا هو الرد الي عم استناه , و هي كمان طريقة جديدة للكبة الحميس و شكلها بيجنن , ممم .

ناوية ان شاء الله وصلي على الجريش من الرقة لان عندي كتير وصفات بدها الجريش و باذن الله رح جرب طريقتك , الله يسلمك يا رب للمشاركة بالطريقة

28 الكاتب منى, on 22-12-2009 09:36
هلا غيوثة

يا رب تجربيها و تعجبك , طيبة و سهلة , رح استنى رايك غيوث

ابوسك عيونك على المحبة ربي يديمها دوما

29 الكاتب مزهرة, on 23-12-2009 23:55
:grin

اشكرك منى على الرد السريع بس ياريت كنت سائلتك السؤال اللي بدي اياه وهو : ممكن نحط الفطاير بالفريزر بعد مانخبزهم ولا قبل الخبز يعني مشان اذا اجاني ضيف على غفله

للطوارئ يعني

ارجوكي تردي بسرعه لاني فعلا مزنوقه كتير

30 الكاتب منى, on 24-12-2009 06:03
قبل الخبز أختي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 22/12/2009 )

< السابق		التالى >

[ عودة ]