L2ma.com | لقمة طيبة | L2ma.com | لقمة طيبة | كعك العيد على الطريقة اللبنانية | صغيرة, كيلو, نضيف, ملعقة, حتى | L2ma.com

القائمة الرئيسية

الأكثر تصفحاً

كعك العيد على الطريقة اللبنانية

الكاتب/ ام نور

15/10/2009

سلمن ام نور

السلام عليكم جميعا رح قدملكم وصفة رائعة وناس بيسموها كعك العيد وناس مرقد المهم بالعيد لازم تكون موجودة وبيضيفوها مع باقي الحلويات .
وبتذكر من شي عشر سنين كانت كل ست بيت تعمل كعكاتها ببيتها وتتباهى فيون وكل وحدة تقول كعكاتها اطيب ولكن مع الاسف بهل زمن صاروا قلال الستات الي عم يعملوهون على ايدون وصار كل الكعك متشابه بالطعم والشكل لان بيشتروا مننفس المحل :) وطريقتي من البابا طريقة محلات اصلية صرت عاملتا اكتر من عشرين مرة ومين ما اكلا عندي بيقلي شو هالكعك اعطيني الوصفة ميشان هيك رح افيدكون فيا ولعيونكون عملت كيلو و صورتوا بالخطوات لان وصفة بتستاهل التجربة

كيلو طحين
نصف كيلو سميد ناعم
كوب حليب بودرة
ظرفان باكينغ باودر
ظرفان خميرة خبز
كوب زيت
نصف كيلو سكر
100 غرام زبدة
3 ملعقة صغيرة سمسم
ملعقة صغيرة يانسون ناعم
حبة السودا نصف ملعقة صغيرة
3 بيضات
كبايتان حليب سائل او ممكن نستبدلهم بالماء
ملعقة صغيرة قرفة ناعمة
نصف ملعقة صغيرة جوزة الطيب
نصف ملعقة صغيرة قرنفل ناعم
طريقة التحضير

· نضع كيلو طحين ونصف كيلو سميد في قدر غميق مع بعض ونحركهم بملعقة خشبية .

· نضيف كوب الحليب البودرة ونحرك ثم نضيف الباكينغ باودر وخميرة الخبز والبهارات والسمسم والحبة السودا ونحرك جيدا .

· نخفق البيض في الخلاط نضيف الزيت ونخفق ثم نضيف الحليب السائل او الماء ونخفق واخيرا نضيف السكر ونخفق حتى يذوب بعدها نصب المزيج فوق قدر الطحين ونعجن جيدا بيدنا حتى يتشرب الطحين كل السائل .

· نذوب الزبدة ونعجن مرة اخرى حتى نحصل على عجينة متماسكة كما في الصورة نتركها ترتاح حوالي 6 ساعات او ممكن نحضرها في الليل وهكذا ترتاح بشكل كافي .

· بعدها نشكل كريات صغيرة وندهن المطبع بالحليب حتى نعطي لمعة ونرش عليه قليلا من السمسم لاعطاء شكل جميل للكعكة ونضفهم بصينية وندخلها الفرن حوالي 15 دقيقة على درجة 200 المهم نراقب الكعك وكل فرن مختلف عن الاخر , انشالله تجربوها وتدعولي .

أضافة إلى المفضلة (0) |

أقتباس | مشاهدات : 8121

تعليقات (50)

1 الكاتب منى, on 15-10-2009 08:53
ياااا سلام , شي بياخد العقل و شغل بيشهي , الله يعطيكي الف الف عافية ام نور , انت و البابا و الله يخليه و يديمه بصحته و عافيته ..

القالب هادا عندي منو , ان شاء الله يصحلي جربها قريب

الف شكر الك للصور الواضحة و الوصفة المرتبة :zzz

2 الكاتب ام محمد, on 15-10-2009 10:30
الله يسلم دياتك ياام نور مبين هاالكعك شي بشهي ان شاء الله بدي جربه انا عملت من وصفاتك الصفوف والبتيفوروكانوا طيبين وكل ماحدا اكلهم عندي بياخد المقاديرالله يعطيكي العافية مرة تانية ويخلينا منى الله عرفتنا على هاالناس الطيبة

3 الكاتب لارا مينا, on 15-10-2009 12:16
يسلم إيديكي أم نور مجهود وتعب كبير
وياليت أي وصفات مميزة مثلها ماتنسينا منها
لأن كثير أحب الوصفات القديمة وكثير تستهويني مثل الأجانب إلي يدوروا على كل شيء قديم ومابيلفت نظرهم الجديد يمكن لأن القديم بدأ ينقرض ويندثر من دون مايكون موثق وأصحابه الحقيقين راحو وراحت معهم كل الأسرار.
والله يخليلك الوالد يااااااااااارب على طول ..
بس لو تقوليلي إذا ممكن : الكيلو كم كوب يساوي تقريبا.
والخميرة كمان كم ملعقة صغيرة بيطلع في الظرف الواحد لأن بنشتريها في علب مش ظروف.
وأتوقع أخت منى إن عدد البيض سقط سهوا ياليت تتأكدي.
تحياتي للجميع.

4 الكاتب نادين, on 15-10-2009 14:45
يسلم هالايدين والله معذبه حالك ... مممممممم وشي طيب كمان والله هي الوصفه كان بدها تنزل عالعيد
يعطيكي الف عافيه

5 الكاتب منال, on 15-10-2009 17:57
:zzالسلام عليكم كيفكم يا كل اخواتي بالموقع الوصفه كتير ظريفه وقريبه جدا من اقراصنا بس عنا بس بنحط محلب ويانسون بتطلع الطعمه كتير طيبه على كل حال نحن ولبنان سوا ربينا مشان هيك اكلاتنا كتير متشابهه الله يديم المحبه

6 أنا من محبي الوصفات القديمة
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-10-2009 18:55
أنا أبحث دائما عن وصفات الجدات حتى بالنسبة للوصفات الأجنبية لأن كل المقادير من مواد طبيعية وغير مصنعة، وأنا أكره المواد المصنعة والمعلبة لأن لدي حساسية منها.
هذه الوصفة رائعة لكن هل بالإمكان تفادي إضافة الحليب البودرة لأنني كما سبق وقلت أحاول تفادي استخدام مثل هذه المواد، وشكراً للجهود الرائعة في هذا الموقع.

7 الكاتب ام عمر, on 15-10-2009 21:49
لك الله يسلم هالايدين يا رب

متل ما قالوالك الصبايا لا تنسنا من كل وصفة تراثية حلوة عندك :eek

هيك منى بدنا منك الوصفات بالخطوات المصورة الله يجبرك

8 الكاتب ام نور, on 15-10-2009 21:50
كلك زوء يا منى شو ما عملت ما بيجي شي اد وصفات بتمنى تجربيا وتعطيني رايك وفي ملاحظة يا ريت فيكي تكتبي 3 بيضات

9 الكاتب ام نور, on 15-10-2009 22:02
بالنسبة لا القالب متوفر بالعديد من الموديلات شي خشب شي بلاستيك او حجم صغير او كبير بس كلون مناح وبالنسبة لا البهارات ممكن نزيد الكمية حسب الرغبة او اذا نوع ما منحبوا فينا نلغي ونزيد من نوع من منحبوه وكمان ممكن نعمل كمية ونجلدا ووقت الي بدنا او منطلعون قبل بوقت او مندوبون بالميكرويف انا دايما عندي 20 وحدة احتياط ومع فنجان حليب الصبح او شاي غير شكل وفي ناس بدل الزيت بيستعملوا الزبدة او السمنة بس انا لقيت الزيت مع شوية زبدة اخف وبالنهاية الاكل زوء كل ست بيت بتشوف شو بيناسب عيلتها وبتعملوا

10 الكاتب ام نور, on 15-10-2009 22:05
والله ما بعرف شو بدي الك يا ام محمد خجلتيني :roll

الله يبارك فيكي بتمنى انشالله تجربي كمان هالكعكات وينجحوا متل الصفوف وتدعيلي

11 الكاتب ام نور, on 15-10-2009 22:27
ودياتك يا اخت لارامينيا ولو لا تعب ولا شي ما في اعز منكون المهم تجربيا وتعجبك انا متلك سبحان الله كتير بحب كل شي قديم وبيعز علي وخصوصي الاكلات القديمة الي متل ما قلت بلشوا بالانقراض وبالنسبة لا الكيلو كم كوب والله ما بعرف لان انا بزين عالميزان بالغرام والوصفة اخدتا معيرة بالكيلو بركي منى عندها فكرة لان الله اعلم 5 كوب ماني متاكدة وحسب كمان حجم الكوب والخميرة الظرف في 15 غرام بيطلع ملعقة كبيرة واي سؤال انا جاهزة

12 الكاتب ام نور, on 15-10-2009 22:32
الله يبارك فيكي اخت نادين شو هالعذاب يا ريت العذاب هيك عشر دقايق عجن العجينة وساعة مدون بالصينية وشوي ولا اسهل بس اكيد تركتون يختمروا انشالله تجربيون ويعجبوك

13 الكاتب ام نور, on 16-10-2009 15:32
وعليكم السلام اخت منال الله يبارك فيكي يا رب ذكرتيني بالمحلب انا حاطة محلب بالوصفة بس سقط سهوا كتابته يا ريت الاخوات الي حابين يجربوا الوصفة لا ينسوا يحطوا نصف ملعقة محلب صفيرة

14 الكاتب ام نور, on 16-10-2009 15:38
شكرا على مرورك اخت قمر على الوصفة معك حق تبتعدي عن المواد المصنعة وفيكي تستغني عن الحليب البودرة ما في مشكلة انا احيانا اذا مانو متوفر عندي ما بحطه بس حبيت نزل الوصفة على اصولا وبعدان كل وحدة بتعدل حسب ما بتحب

15 الكاتب ام نور, on 16-10-2009 15:43
ودياتك يا رب يا اخت ام عمر انشالله تجربي هالوصفة وتعجبك على فكرة هالكعك بيعملوا بفلسطين مرة اكلتوا عندي صديقتي فلسطينية بس هني بيحشوا بتمر وكتير طيب ومميز سبحان الله كل مرة بقول بدي جرب احشي بس قلة مروة انشالله شي مرة بجربوه وبخركون

16 الكاتب ام عمر, on 16-10-2009 15:48
نسيت اسالك ,,,, بتتركيهن يتخمروا !!!!!!!
بادهني الصينية او لاء الصينية يلي بتخبزبهن فيها؟؟؟؟؟؟؟؟
مشكورة :zzz

17 الكاتب DOUHA, on 17-10-2009 13:52
ام نور جد وصفة بتجننن رح جربا بس مارح خبرك شو رح يطاع معي لاني عارفة النتيجة سلفاً

شكراً

18 الكاتب ام نور, on 17-10-2009 17:08
اكيد ام عمر بتركون يختمروا اقل شي 6 ساعات او الليل باكمله حتى النكهات تتمازح وترتاح العجيتة واذا صينية تيقال ما في داعي تدهنيا بس اذا صينية عادية ادهنيا احسن ما تلزء ولا يهمك انشالله بيزيطوا معك

19 الكاتب ام نور, on 17-10-2009 17:11
تسلملي عينك يا دودو شو مهضومة وينك وين هالغيبة لا حس ولا خبر عاكل حال سالي نداء عن هالكعكات اكلتون عندي من زمان وكتير حبتون

20 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 17-10-2009 19:08
لك يسلمهم ياام نور ياجماعة انا بشهد انه بعد ام نور ماحدا يعمل اكلات حلوة الله يرحم ايام العزايم والبسط شلونك ياام نور ابعتيلى ايميل بالتفصيل سلام ياحلوة ويسلم ايديك بقيتى شطورة مثل عوايدك :cry

21 الكاتب ام نور, on 18-10-2009 08:50
ولك ابوس قلبك يا ندوش تسلميلي على هالحكيات الحلوين والله خجلتيني كلو من زوءك والايميل وصل انت بتئمري امر

22 الكاتب منى, on 18-10-2009 11:08
لك ندوشة و الله بعد زمان , اشتقتلك كومات , ان شاء الله كله تمام :zzz

23 الكاتب DOUHA, on 18-10-2009 12:53
منى ونداء وام نور وانا بموضوع واحد ياعيني
الرابعي المرح

كيفك ام نور والله انا ما عم فوت على الماسنجر لاني جهازي معطل والجهز هيدا ما فيو نسخة
المهم كيف وضعك؟ تمام؟ يلا رح ابعتلك ايميل

نداء شو رياك تنزلي الوضفة يلي بتطير العقل يلي اكلتا عندك يميميميمييم

باسمي وباسم الشعب اطالب نداء بالمشاركة

الوصفة يلي بالي بالك :grin

سلام صبايا :zzz

24 الكاتب وسيلة, on 18-10-2009 18:05
الله يسلمك على هاد الوصفة الرائعة ,اختكم وسيلة .

25 الكاتب ام نور, on 18-10-2009 18:33
وانا عم قول هالبنت وين غاطة انشالله تصلحي الجهاز بسرعة يالله ناطرطك دودو وانا بخير الحمدالله الاولاد متعبيني شوي مرض وغلاظة ودلع يالله ما بيكبر جسم حتى يفنى جسم هيك بيقولوا الحمدلله يا رب

26 الكاتب لارا مينا, on 18-10-2009 20:02
هذا أخت منى الحديث بعد ماتأكدت منه:
قال رسول الله صلى الله عليه وسلم -(عليكم بالفواكه في إقبالها فإنها مصحة للأ بدان مطردة للأ حزان وألقوها في إدبارها فإنها داء
للأ بدان).

27 الكاتب منى, on 19-10-2009 04:35
صار لي زمان ما طالعة مسيرة شعبية , هياته هلا وقتها .
و انا كمن اضم صوتي لصوت الشعب :grin

28 الكاتب nidaa84, on 19-10-2009 09:23
لك تسلموه يارب والله خجلتونى وكرمال عيونك ياست ضحى احلى وصفة والوصفة هى السلطة الفرنسية وانشالله تعجبكم

29 الكاتب DOUHA, on 19-10-2009 17:06
نداء مع الصورة ها مابرضى بس وصفة

ياجماعة سلطة بتجننننننننن

ليكي نداء رح نعمل اعتصام بالموقع كرمال وصفتك انتي حرة :grin

30 الكاتب منى, on 19-10-2009 18:57
انا معك :roll

دقيقة لجيب قهوة و كيك , لزم الاعتصام المتحضر يعني :zzz

31 الكاتب ام نور, on 20-10-2009 11:19
منى ندوش عم تقول انها ارسلت الوصفة وبدها تعرف اذا وصلت ولا لاء

32 الكاتب DOUHA, on 20-10-2009 23:39
اكيد وصلت مو

33 الكاتب رفيف محمد, on 07-01-2010 09:39

الله من أحلى الوصفات إنشاء الله أجربها

34 الكاتب رامو, on 14-02-2010 19:31
اللللللللللللللللللللله يامجودة على هالوصفة مبارح ساويتها وطلعو الكعكات بيجننو ومابتتخيلي اديش طلعو طيبين وحتى ولادي من وقت اللي عجنتهن صارو يدوقو العجين ويقولولي كتير طيبة لحتى خبيتهن لبين ماترتاح العجين وبعدها شكلتهن وخبزتهن وصارو ياكلو منهن وهن سخنات وبنصح كل اللي بيحب انواع البهارات اللي فيها يجربهن وماراح يندم

35 الكاتب رامو, on 14-02-2010 19:35
عنجد تسلم ايديكي ويعطيكي الف عافية يامجودة

36 الكاتب ام نور, on 19-02-2010 10:40
صحة وهنا على قلبك وقلب عيلتك رامو كتير انبسطت انك جربتيون وعجبوك الله يبارك فيكي خجلتيني على هالكلام الحلو

37 ..............
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-10-2010 20:13
السلام عليكم
ممكن بدي اسألك سؤال ام نور
بدي أعرف كيف بينعمل معمول مد بالقشطة
اختي داقتو بلبنان
و كتير حابة جربو
و شكراً مقدماً

7ayah Dayyen

38 .............
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 10-11-2010 19:54
:cry

ما حدا رد عليي
بدي أعرف طريقة معمول مدّ بالقشطة بليـــــــز :zzz

كتير حكتلي عنو اختي و شهـّتني عليه
و خايفة يطلع بعين البيبي :grin

مع إني ما بعرف كيف شكلو :zzz

على كلّ أنا عم استنى

7ayah Dayyen

39 الكاتب منى, on 11-11-2010 19:51
ييي حياة مشان الله قرصي بطنك

هو انا كنت ساعدتك , بس ما بعرف الوصفة :roll

شو الحل

40 ...................
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-11-2010 20:56
و الله ما بعرف
شكلا ام نور ما عبتدخل عالموقع لحتى تشوف السؤال
شو نساوي

7ayah Dayyen

41 الكاتب منى, on 11-11-2010 21:14
هلا ببعتلها رسالة ان شاء الله

و ان شاء الله تشارك بالوصفة :zzz

42 ...................
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-11-2010 21:20
ان شاء الله يااااا رب

43 الكاتب ام نور, on 11-11-2010 22:44
السلام عليكم لا تواخذوني بالصدفة كنت عم ابعت رابط وصفة الكعك لا صديقة فانتبهت على تعليق الاخت 7ayah انا اسفة على عدم الرد السريع بس كنت باجازة بلبنان والي كم يوم راجعة وبالنسبة لا وصفة المعمول مد بالقشطة فاسم الوصفة ملوكية وفعلا كتير كتير طيبة يمممممم واكلت منها كتير بنزلتي واد ما طيبة جبت طريقتها وكنت ناوية جربها بس يصرلي وقت بس بتحبي جربها ونزل الطريقة ولا بنزل الطريقة وانتي جربيا

44 الكاتب ام نور, on 11-11-2010 23:11
خلص رح اكتبها ميشان ما تطلع بعين الصبي :grin

حرام الملوكية سهلة كتير وهي عبارة عن وصفة المعمول فيكي اتطبقي هيدي الوصفة تاعة منى
http://www.l2ma.com/content/view/311/2/
بتمدي بصينية فرن طبقة معمول بعدان القشطة وهي عبارة عن قشطة مطبوخة كمان هيدا الرابط تاع منى
http://www.l2ma.com/content/view/218/2/
بتجهزي القشطة ولما تخلص بتحطي معها كمشة فستق حلبي اختياري فيكي ما تحطي بس اطيب وبتتركيا تبرد وبتمديا فوق الطبقة الاولى من المعمول وبعدان بتمدي طبقة معمول على كيس وبتقلبيها على الوجه بشكل تغطي كل الوجه وبتدخليها الفرن واهم شي ما تكون طبقة المعمول سميكة ولما تطلع من الفرن تقطع مكعبات وفي ناس بيضيفولا قطر حسب الرغبة وصحة وهنا انشالله تكون وضحة الفكرة رح اعملا عن قريب وابعتها لا منى

45 الكاتب منى, on 12-11-2010 10:46
مممم و الله مو صعبة ابدا و فكرة لتسهيل شغل المعمول

رح استنى الوصفة الاصلية منك و على ااقل من مهلك , ايمتى ما صحلك ابعتيها

46 .................
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-11-2010 14:24
ياااااااااااااااااي :zzz

يا سلام عليكي
شكراً كتير إلك
و اليوم ان شاء الله أو بكرة بالكتير بجربا

و شكراً مرة تانية لإلك و لـــمنى
سلااااامي

7ayah Dayyen

47 الكاتب منى, on 12-11-2010 19:42

48 الكاتب ليان 2009, on 09-12-2010 21:25
يسلموا ايديكي على الوصفة الكعكات شكلهن كتير طيب وحابة اجرب الوصفة بس حابة اسئلك ازا بنقدر نحشيهن تمر معجون ويلا ما بيزبط وشكرا كتيييير الك ولمنى ولكل وحدة بهالموقع اللي كتييير حلو وعنجد عم نستفيد منكن

49 الكاتب منى, on 12-12-2010 08:10
الله يسلمك ليان , منورة حبيبتي

ما عندي فكرة , ان شاء الله بتجاوبك ام نور لان هي ادرى

50 تجربتي مع هذ الوصفه
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-12-2010 14:07
عملت نصف المقادير ولكن أثناء العجن عانيت كثيرا لأن العجينه كانت تلتصق بالوعاء واضطريت لإضافة كثير من الطحين والزيت حتى استطعت أن أجعلها تنفصل قليلا عن الوعاء ومع أنني خمرتها طوال الليل إلا أنها لم ترتفع إلا بضعة ميليمترات، أثناء الخبز كان علي أن أضع الزيت على يدي مع كل قطعه، النتيجه كانت جيده وخاصة أنني ضاعفت البهارات وأثناء الخبز ارتفع الكعك قليلا وكان طري والسامولينا ساعدت على ذلك.
المشكله أنني أريد تكرار الكعك لكن خائفه من مرحلة العجن فهل لديك نصيحه؟ وهل يحسن الوضع إذا تخليت عن البيض وخاصة أن الوصفات التقليديه للكعك لا تحوي بيض؟
أرجو النصيحه أو تعديل المقادير.

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 20/10/2009 )

التالى >

[ عودة ]