L2ma.com | لقمة طيبة | L2ma.com | لقمة طيبة | تشاينيز نودلز بالدجاج و الخضار | كبيرة, ملعقة, على, · , لمدة | L2ma.com

القائمة الرئيسية

الأكثر تصفحاً

تشاينيز نودلز بالدجاج و الخضار

الكاتب/ منى

08/10/2009

يمكن لو واحد صيني عم يقرا هلا الوصفة رح تطق خواصره من الضحك متل لما بقرا وصفات على النت باللغة الانكليزية و بيكون مكتوب عليها وصفة سورية و هي ما الها علاقة بسوريا .( طيب طيب يا عم جاكي شان , طول بالك علينا ). هلأ الوصفة مو صينية حقيقية , هيا وصفة استخدمت فيها مقادير و مكونات صينية بس بنفس عربي , المهم ان الطبق مستاهل كتير بغض النظر عن جنسيته و اصله و فصله .

انا استعملت لتقلية الخضرة زيت زيتون و زبدة , انتي فيك تستعملي زيت عادي أو الي بيناسبك و حسب رغبتك .و كمان عوض ما استعمل النودلز استعملت السباغيتي الايطالية ( عمي جاكي شان شايفتك انا , بلاهل هل الضحكة , ما الها داعي ) .احم ..

طيب تركوه و خلونا نكمل حديثنا , شو كنت عم قول , ايه بعد ما تقرائي مقادير الوصفة رح تكتشفي ان بدها شي اسمه الاجينموتو , و هو شي متل الملح بس في طعمة طيبة , دايما نستعمله في المطبخ الاسيوي و هو بيعطي طعمة يممي بس لازم نستعمله بمقادير قليلة

بالصحة و الهنا

عبوة سباغيتي ( بوزن 350 غ )
2 صدر دجاج مخلى من العظم و الجلد
2 ملعقة كبيرة خل الأرز
ملعقة صغيرة زيت سمسم
4 ملعقة كبيرة زيت ذرة
1 حبة كبيرة فليلفة حمراء
1 حبة كبيرة فليلفة خضراء
1 حبة كبيرة جزر
1 حبة كبيرة كوسا
1 حبة كبيرة بصل
نصف ملعقة صغيرة زنجبيل
نصف ملعقة صغيرة ملح الاجينموتو
ربع ملعقة صغيرة فلفل أبيض
1 – 2 فنجان صغير كتشاب , حرّ أو عادي
فنجان صغير صويا صوص
2 كوب مرق دجاج
2 ملعقة صغيرة دقيق الذرة

طريقة التحضير

·         يقطع الدجاج لشرائح رقيقة و يتبل بالخل و زيت السمسم لمدة ساعة .

·         تقطع الفليلفة الحمراء و الخضراء و الجزر و الكوسا لشرائح رقيقة ثم تقلى في مقلاة غير لاصقة أو في الوك الصيني ان وجد بثلاث ملاعق من الزيت على نار قوية و لمدة بسيطة كي تبقى مقرمشة و لذيذة .

·         ترفع الخضار من الزيت على طبق أخر و يضاف باقي الزيت و البصل و يقلب حتى يطرى . يضاف الدجاج و يقلب على نار قوية حتى يشقر من كل الأطراف .

·         يتبل الدجاج بالبهارت و يقلب لمدة دقيقة ثم يضاف المرق و الكتشاب و صلصة الصويا و يترك حتى يغلي المرق ثم يترك على نار هادئة لمدة 10 دقائق .

·         يذوب دقيق الذرة بالقليل من الماء البارد و يضاف للصوص مع الخضار الملوحة و يترك حتى يغلي مجدداً .

·         تسلق المعكرونة لمدة 10 دقائق في ماء مملح ثم ترفع من مرق السلق و توضع على الصوص و يضاف القليل من ماء السلق إذا دعت الحاجة .

·         تغلى السباغيتي مع الصوص قليلاً حتى تأخذ من نكهته و يغلفها الصوص ثم تقدم ساخنة .

أضافة إلى المفضلة (0) |

أقتباس | مشاهدات : 4518

تعليقات (27)

1 الكاتب نور الأسلام, on 08-10-2009 18:32
مرحبامنى طالعتلك انا بكل صفحه :grin

ازهقتي مني :roll

الوصفه كتير عجبتني لكن شو هدا الاجينموتو

مابينفع بالملح العادي بس مايزعل جاكي شان :grin

تسلميلي يا احلى منى

2 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-10-2009 19:43
مرحبا يا منى تسلم ايدك على هالوصفة شكلها لذيذ واولادي كثير بيحبوا اي شئ اسمه معكرونة ان شاءالله راح اجربها بس بدي اسألك لازم استعمال ملح الاجينوموتو لأني سمعت انه ضار ياريت تفيديني وشكرا الك

3 الكاتب ام نور, on 08-10-2009 21:07
السلام عليكم
طبق بشهي سبحان الله من يومان اشتريت نودلز وكنت عم دور على طريقة تكون طيبة فرح جرب وصفتك بالنودلز بدل السباغتي بس بدي اعرف الفرق بين خل الرز والخل العادي لان بشوف انواع كتير من الخل بس ما بجيب الا خل التفاح وبدي منك اذا ما في ازعاج منى حطي صورة الاجيموتو ميشان اعرف اشتري

مشكورة

4 الكاتب منى, on 09-10-2009 07:51
هلا نور

معقولة تقولي زهقتيني , اي انا عم استنى هل الرد الحلو

خلي جاكي شان ينفلق , بينفع من دونه اكيد و انا جربتها اكتر من مرة من دونه :zzz

5 الكاتب منى, on 09-10-2009 07:51
هلا هيا

ان شاء الله تجربيها و تعجب الجماهير الجائعة .
انا مجربتها من دون الاجينوموتو و بتطلع طيبة كمان

6 الكاتب منى, on 09-10-2009 07:57
هلا ام نور

اكيد في فرق بالطعم بين الخل العادي و خل الرز و على كل اذا مو متوفر عندك فيك تستعملي الخل العادي
رح حط الصورة الي طلبتيها و كمان صورة لبقية المقادير الغريبة , بس يوم السبت اذا ربنا راد :zzz

تكرم عيونك

ان شاء الله تجربيه و تحبيه و يعجب القطط

7 الكاتب gsm, on 09-10-2009 15:23
اهلين منونة لك انا بموت شي إسمو نودلز صيني لما كنت عند اهلي كان في مطعم بيعمل نودلز بطير العقل كنت على طول اروح لعنده وما اطلب غير هل الوجبة بس هنن كانو يضيفو الربيان بس انا ما بحبه من شان هيك كنت اطلب بلا ربيان بس يا ترى إذا عملتها رح تزبط معي لأنو نص المكونات ما عندي ياها لكان رح استنى لحتى اعمللي نزلة واشتري هي المكونات من شي محل ببيع اكل صيني يسلموا إيدك يا منونة عن جد كل مرة عم تفاجئينا بتنوع اكلاتك لك نيالو زوجك وولادك عليك إنتي كنز ثميين

8 الكاتب soma, on 09-10-2009 18:20
السلام عليكم
سبحان الله اليوم أكلت نودلز صيني بمطعم صيني بس شلون بيعملها طيبة أنا ما بعرف عندهم سر لأني بعملها بالبيت متل هالطريقة تبعك بتطلع طيبة كتير بس غير طعمة المطاعم
وبالنسبة لملح اجينو موتو والله هديك اليوم اشتريته مشان هالأكلة لأن بالعادة ما بحط منه بس ما عرفت قديش لازم حط لأني دقته فكرته ملح عادي بس الله لا يورجيكم شو صار معي من طعمته الله لا يدوقها لحدا بس وقت ينحط بها لأكلة بيعطيها طعم يمي يمي يسلموا اديكي اخت منى عنجد شي بيشهي

9 الكاتب منى, on 11-10-2009 12:32
هلا gsm

يا رب تجربيها و تطلع على زووءك و متل الي كنتي تاكليها اوقريبة عليها

بس لازم تجيبي المقادير الناقصة

انا بانتظار رايك بعد التجربة

10 الكاتب semo, on 20-10-2009 10:28
شو هاد ياام الميم والله ضحكتيني

وذكرتيني مرة في وحدة طلعت بالتلفزيون هي الظاهر ممثلة كانت بايطاليا وطلبت اكتر شي مشهورة فيه ايطاليا وهو البيتزا

ولما اجاها صحن البيتزا وبدها تدوق اول لقمة ماقدرت تكملها من كتر مو طعمتا موطيبة مع انها دخلت افخم محل بايطاليا

فلما رجعت على بلدها اول شي عملتو راحت على محل بيتزا واكلت اطيب بيتزا

وبيقولو انو الاكل الصيني بالصين شي مو طيب ابدا مع انو هون اذاجوزي شافني مدايقة بياخدني عالمطعم الصيني لان بطلع منو بنفسية تانية من كتر مو الاكل طيب والاكل الطيب متعة كبيرة :grin

لازم جرب هالاكلة لما جيب النواقص منها وبخبرك

11 الكاتب karroshi, on 20-10-2009 16:07
تسلم ايديك على هل الوصفة وصحة وهنا يلي بدو ياكلها للاسف انا مافيني اطبخها لأني عزابي ومش مستعد اني غامر مشكوووووووووووووووووورة

12 الكاتب منى, on 20-10-2009 20:28
هلا سوما

ان شاء الله اذا جربتي هعل الوصفة تكون قريبة على الشي الي بدك اياه

الله يسامحك على هل الدوقة , ان شاء الله مرقت على خير :roll

عم استنى رايك اذا جربتيها و هنااا مقدما

13 الكاتب منى, on 21-10-2009 10:46
هلا سيمو

ايه بتعرفي كلامك مزبوط , الانسان دوما متعود على شي معين و نمط معين بالاكل ما فيه يغير زووءه .

ان شاء الله تجربي هل الوصفة و تحبيها و انا رح استنى رايك

14 الكاتب منى, on 21-10-2009 10:52
هلا اخي karoshi

الله يسلمك يا حق و هي ما فيها مغامرة , المقادير على التطة و الطرقة تمام , بقى اتمنى انك تتشجع و تجربها

15 الكاتب عاشقة البطاطس, on 04-11-2009 04:57
ماشاء الله عليك الله يحفظك من العين يارب

16 الكاتب منى, on 04-11-2009 13:40
مية السلامة اختي , شرفتي الموقع و نورتيه و ما دامك عاشقة البطاطا معناها وصلتي للمكان الصح ان شاء الله

17 الكاتب أم الهدى, on 14-11-2009 21:49
مسا الخير منوش اشتقتلك واشتقت للموقع كتير كنت في إجازة في حبيبتي حلب ومن فترة قصيرة رجعت تسلم دياتك على هيك وصفات كاعادة لازم أسأل الصويا صوص يلي بتستعمليه طعمتو بتميل للملوحة أكتر ولا للحلاوة ، أنا بستعمل عادة صويا صوص مكتوب عليها ( حلوة ) وبتكون سميكة شوي قوامها بيشبه قوام دبس الرمان ، بس في سوريا ما شفت منها يلي لاقيتها مريقة وطمتو مالحة ، فهل شي بأثر على النتية النهائية وبرأيك أي واحد أطيب وألف شكر الك

18 الكاتب منى, on 22-12-2009 07:32
هلا ام هدى

تشتاق الك العافية يا رب , الحمد لله على السلامة :zzz

اختي انا الي استعمله هو النوع العادي المريق الي ما فيه حلاوة , اذا انتبهتي في بالمقادير كتشاب و هي رح تعطينا الحلاوة , بقى اذا ناوية تجربي الوصفة بالصويا الحلوة لازم تغيري مقدار الكتشاب

اسفة للتاخير :roll

19 الكاتب أم الهدى, on 22-12-2009 23:52
ولا يهمك منوش لا تعتذري ولا شي ، تسلمي حبيبتي على ردودك والله كلك ذوق ونحن ع طول متعبينك معنا

وان شاء الله دائما بتكوني انت والموقع وأخبارك من حسن لأحسن

20 الكاتب منى, on 23-12-2009 05:24
ابوس عينك ام هدى , الله يديم المحبة و المعروف دوما , و انا من فضل الله منيحة كتير :zzz

21 الكاتب ام ادم, on 11-02-2010 09:51
مرحبا منى
انا جديده على الموقع والموقع عجبني كتير كتير
وفي اكلات طيبة

بس مش عارفه كيف اضيف موضع جديد لانه ببالي وصفات طيبة وبدي ابعتلكم اياها

22 الكاتب منى, on 11-02-2010 19:32
مية هلا فيك اختي

ان شاء الله تجربي شي و يكون كمان طعمته طيبة و متل ما بتحبي .

اذا عندك ايا وصفة فيك تبعتيها كرد و انا رح ضيفها باسمك ان شاء الله

23 الكاتب razan.3m, on 30-10-2010 00:11
تسلم ايد بس من وين بدنا نشتري زيت السمسم والملح المشكلة في كتير مواد لا تتوفر عندنافي السوق انابحاول دائما اشتري من عند كنان او العقاد في محل ثالث متوفر عندة هل اشياء لانه في معظم الاوقات حتى عندهم لايتوفر طلبي

24 الكاتب منى, on 09-11-2010 07:38
هلا بالمولات صار في كل شي , بس اظن ان الملح مو متوفر عنا :roll

على كل كتير عم اسمع انه فيه اذى و هلا ما عدت جبت منه

25 الكاتب حلا البسآط, on 08-02-2011 15:29
شكرراا احلى طبخه سلمت الايادي والى الامام

26 الكاتب حلا البسآط, on 08-02-2011 15:30
شكرا

27 الكاتب منى, on 08-02-2011 19:37
الله يسلمك حلا

نور الموقع اختي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 12/10/2009 )

< السابق		التالى >

[ عودة ]