غربة جوانا بتطلع لبرانا . كلو شالح جلدوا و عم يدور على جلد لا بيلبقلوا و لا بيشبهوا .

غربة و نحنا بين ناسنا و أهلنا , و الي مو حابب يتغرب بيغربوه غصب عنه و الا بيصير " أوت أوف فاشن "و ما له ابدا " أب تو ديت "  .

في الشارع  ارفع راسي و أقرأ " توينكل " للتحف . و أديره على الطرف التاني و أقرأ bee cool للاكسسوارات . اروح اتغدى في " الغراند ستيشن " أو تعزمني رفيقتي على " اوريانتو " و أشتري هدايا لأولادي من عند " غيفتي " و بقية اغراض بيتي من " نيو مول ". ارفع الموبايل فبتطلعلي البنت الي بالي بالكم المتكلمة الرسمية باسم " mtn " أو " سيريا تل " و ام في الشارع عم تصرخ على اولادها "  هايدي , داني لا تتقاتلوا  " . في المكتبة واحد عم يقله للتاني " شو هل" الببيلوتك " الي عندهم , اي الي عندي في بيتي اكبر منها . و عند الكوافيرة واحدة عم تقلها بدي اطلع اليوم  " او لا لا  " لان عرس رفيقتي " الأنتيم " . و في الزيارة واحدة عم تحكيلي عن تانية انيقة  : يا ريت يا منى لو تشوفيها كتير " جيليت مان " و مرتبة . و فلانة قلبت عن خطبة فلان لان اكتشفت انه كتير " فولجير " و مو من " ستايلها " . حتى لما رجعت على بيتي و طبقت بابي , اخدتلي نفس عميق و بعدها فتحت التلفزيون طلعتلي واحدة مدهونة بكل الالوان ما بعرف شو شغلتها عم تحكيلنا عن " الاكسبيرينس " تبعتها و الكلمات ما عم تسعفها و المذيع كل ما عكت عند كلمة بينجدها بالترجمة العربية .

لك ولي على قامتي و لي على بعضي ولي على طولي .

كنت حابة أن ما علق على الفكرة , هيك اكتب ببساطة لا تعليق بعد كل الحكي الي مر و كان مر , بس بعدها في فكرتين براسي ما قدرت ما بقهن , أول فكرة  و على فكرة الـ bee  و " جيليت مان " ما هنن اغلاط املائية , هيك قرات و سمعت , لك حتى التقليد ما عم يعرفوا يقلدوه منيح . و الفكرة التانية انه صح الأغلب راكض ورا الشي الي ما بيشبهله و لا بيلبقله بس بيبقى دوما بين أمواج ضياع الهوية في ناس متمسكين بحقيقتهم . و اذا رح نحكي عن الأسماء فهي كم اسم لمحلات بلغتنا و بنفس الوقت اسماء مميزة و فيها " ان " .  محل بصلاح الدين اسمه " خبزة سخنة " و التاني بنزلة ادونيس كان اسمه " زيت و زعتر " و التالت بالجميلية اسمه  فلافيلووووو " و الرابع ادام القلعة و اسمه " أريكة "  و الخامس كان بالعزيزية اسمه " صدمة " و السادس كمان بالعزيزية اسمه " أفكار "

و اذا رح احكي على أسماء البنات حلو أن في أمهات لحد اليوم بتحب تسمي اولادها و خصوصا البنات اسم حقيقي اله معنى , مو بس صوت حلو . واحدة بتحب اسم ترتيل و التانية سمت بنتها سلمى و التالتة عالية في الزمن الي في ناس بتسمي أولادها و بناتها بايا شي المهم ان ما يكون اله شبهة العلاقة باللغة العربية .

اييييه , خليني احكي عن وصفة اليوم أطيب , الوصفة من اكلات زيت الزيتون المميزة , سهلة و طعمتها ما بينشبع منه . و هي وصفة سورية بس مو الكل بيعرفها بس كل الي بيدوقها " بيوقع في غرامها " فوراً .

بالصحة و الهنا

كيلو كوسا مقطع لشرائح رقيقة نوعاً ما
2 ملعقة كبيرة زيت زيتون
حبة كبيرة بصل مقطع جوانح
نص كوب طحينية
نص كوب عصير ليمون
2 كوب ونصف ماء بارد
فص كبير ثوم مهروس
رشة كمون
نصف ملعقة صغيرة فليلفة حمراء ناعمة
ملح حسب الرغبة

زيت للقلي






·         يقلى الكوسا بالزيت حتى يشقر ثم يرفع على ورق ماص . يرتب الكوسا في صينية فرن .

·         يقلى البصل بالزيت حتى يشقر ثم يوزع فزق الكوسا .

·         تمزج الطحينية مع الماء بالتدريج و تقلب حنى تصبح ناعمة . يضاف عصير الليمون و الفليلفة و الكمون و الملح و الثوم المهروس ثم يوزع الصوص على الكوسا .

·         تخبز الصينية في الفرن لمدة نصف ساعة ثم تقدم فاترة أو باردة مع الخبز العربي .

تعليقات (13)

1  الكاتب semo, on 05-10-2009 19:10 اول شي يا منى انا بدي عاتبك عتاب محبة واحتلاام    صرت باعتلك اسئلة على فطيرة الشاورما واسئلة بكرات الدجاج المقرمشة وما عم لاقي منك رد    انتي زعلانة مني شي؟؟    لو اني اخطأت بشي كلمة انا بعتذر منك قدام الكل    كل ماعم اكتب رد الصفحة ما بيعود بيدخلها حدا حاسة حالي متل انفلونزا الخنازير الكل عم يهرب منها        بالنسبة للمقدمة عندي مأساة مع هالموضوع     كل مرة بشوف وحدة بلشت تتفشكل بلغة هي اصلا بتنطقها غلط ومشان ما يخرب البرستيج بتعرفي انت    بقطع علاقتي فيها فورا يعني الواحد بدو رفيقة يتقرب منها ويرتاح معها مو يقعد يتحمل التصنع والمبالغة بالالفاظ وأغلبها بتطلع غلط على فكرة    بيوم من الايام تعرفت على وحدة بدل ما تقول t.v بتقول طي في يعني شي بيخجل وبيحبط بصراحة    وقيسي على هالقصة كتير قصص     اما بالنسبة للكوسا فاكيد كتير طيب على فكرة هو بيشبه الكوسا المطبق بس بدون لحمة ودبس الرمان وهون باضافة البصل    يسلمو ايديكي والله يرزقك على نيتك الصافية كل شي بتتمنيه واكتر    وياليت لاقي اجوبة عالاسئلة اللي طرحتا بفطيرة الشاورما وكرات الدجاج واهم شي سؤالي اذا كنت زعلانة مني

2  الكاتب منى, on 05-10-2009 20:14 له له يا سمسوم , معقولة ازعل منك او من ايا حدا هون من الاخوات , لك انتو عيلتي الديجيتل و انا لا بزعل و لا بقدر على زعلك او اي اخت تانية       انا هلا زعلت           كتير كمان                         ساويلي فنجان قهوة تاني بركي بتصالحيني و جيبي معه حبة شوكولا بقهوة               طيب هلا هيك مشي الحال                     انا اتاخرت عليكي لان مشغولة و كمبيوتري فيه ان , بقى لهيك ما عم فوت الا سرقة و سلحبة من هون و من هون , بس هلا ان شاء الله مش الحال , و انا على فكرة جاوبت عن اسئلتك في كرات الدجاج قبل ما اقرا ردك هون     هي لسا ما سمعتها من شي واحدة شغلة الطي في , بس بتصير , نحنا شعب نهفة و الله اسهل الشي علينا نبطل نصير نحنا       هلا رايحة لفطيرة الشاورما و مرة تانية انا اسفة كتير اذا اتاخرت عليك بس نحنا خوات و منقدر ظروف بعض

3  الكاتب غيث, on 05-10-2009 21:55 سلامة ميمو هههههه انا الان فارطة من الضحك لاني كلامك مزبوط الف بالميةخيتو كلو كوم والريمون كونتروم(ريموت كونترول)كوم سمعتهاعن وحدة صارت اكابر من جديد الله رزقها وسكنت بحارة الاكابر وعوجت لسانها وخدي ضحك على غشم البعض مع احترامي لكل الطيبين الاصيلين اللي مهما غنيو او درسو وتثقفو ما بيتعالو على حدا وكمان ما بينسو اصلهم اللي كلنا بنعتز باصلنا الحمد لله ونتصرف طبيعي يا اختي انا اكره التصنع بشدة يا ستي الله يهديهم شعب مو شايف شي بس بيفتح التلفزيون وبيبدأالتقليد الله يكون بالعون ولا الاسامي اللي مالها طعمة ولا معنى واووووف حطيتي ايدك على الجرح بنقلد بس على عماها هلق نجي عالاكلة انا اخدة مقاديرها من صديقة وجارة لي بحلب الله يذكرها بالخير وعم انتظر اجربها لانزلك ياها عمرك اطول من عمري يسلم ايديك منى شجعتيني اجربها مادام ام الذوق نزلتها لنا على التجريب بدون تردد او خوف شكرا منى واسفة عالاطالة

4  الكاتب ميساء, on 05-10-2009 23:10 مسا الخير منى   والله مقدمة حلوة كتير لك والله هدول العالم مصيبة شوفتهم والقعدة معهم بس المصيبة الأكبر هنن الجماعة اللي بيلفظو الكلمة غلط متل كلمة بلوتوث أو غوغل أوغيرها كتير يعني والله الواحد بيخجل يحكي الكلمة اذا مو متأكد من لفظها وهنن بتلاقيهن مصرين والله بعرف وحدة بتقول عن المافن بفل والتيراميسو ترامستو ومع هيك مصرة تبين للعالم ثقافتهاالفريدة بس لحتى تطلع من توبها مو أكتر من هيك على كل حال بيكفي رح تنقلب معي الحكاية على نميمة يا رب تسامحني وبالنسبة لهالأكلة ميمو كتير بتشبه الوصفة رقم 453 بس هون الكوسا مقلي ولا أنا غلطانة وبتعرفي منى أنا صار عندي ادمان عليها من كتر مو طيبة يسلم ايديكي الحلوين ويشدك بتوب العافية والصحة يا رب

5  الكاتب منى, on 06-10-2009 10:48 هلا غيوثة   و انا كمان فرطت من الضحك على الريمون , اتذكرت واحدة كنت اعرفها , لما كنت اقول بيك اب على السيارة تضحك علي و تقلي لك يا بنتي اسمها بيكام     ان شاء الله تجربي هل الصفة و تكون يممي و على زووءك , عن جد طيبةةةةةة و مستاهلة

6  الكاتب منى, on 06-10-2009 11:17 هلا ميوسة   معك حق , بس القعدة مع هل الناس بتعب بتلاقيهم كلو عم يتمنظر على كلو , نحنا ما عم نحكي عن حد معين بقى هي مو نميمة , و كمان في نوع هل الطريقة الحكي عندهم مو تصنع , اتعلمت هيك يمكن من امها و رفقاتها و قرايبينها و صار عندهم عادي       صح ميوس هي بتشبه لهديك , بس هي وصفة اصلية و هديك تطبيق من عندي ز الطعمات قريبات على بعض بس فيهم اختلاف     الله يخليلي ياكي على هل الدعوات الحلوة , ربي الك متلهم و احسن

7  الكاتب gsm, on 06-10-2009 14:01 السلام عليكم منى كيفك وكيف القطاقيط يللي عندك انا صرلي غايبة عن الموقع فترة بسبب ظروف وبعدين لحقتها الإجازة على حلب آآآآآآآآآآىىخ يا منونة ضربتي على الوتر انا بالذات هي النزلة إنصدمت بالعالم والله ليش هل العالم عم تتغير انا مشتاقة لحلب وحاراتها القديمة وسوق المدينة وهن بتلاقي العالم بس بدها تروح على النيوتاون طيب والله هيك شوي شوي عم نصير متل الغرب لاحقين وراهن من دون تفكيير ليش شبها لغتنا العربية ليش الواحدة فينا لازم تعوج لسانها لحتى تصير أكابر ليش المقاييس كلها عم تنقلب آه بس صار الواحد يحس حاله غريب حتى ببلده والله يجيرنا أحسن شي هادا اولا   ثانيا :  مو معقولة يا منى أديشك بنت حلال مصفي إمبارح زوجي جبلي كوسا وما عم اعرف شو اعمل فيه ماني مشتهي لا على محشي ولا على أكلة لحمة حابة كنت اعملها أكلة بزبت الزيتون بس ما عندي أي وصفة للكوسا قمت قلت لحالي يا بنت إدخلي وشوفي بلكي بتلاقي ضالتك وإذ بلاقي الوصفة بالصفحة الرئيسية ولو تعرفي شو إنبسطت إن شاؤ الله رح اعملها اليوم وبخبرك عن النتائج   ما تواخذيني طولت كتيير بس والله كتيير مشتاقتلك ولكل أخواتي الإنترنتيات   سلام عليكم

9  الكاتب منى, on 07-10-2009 07:37 وعليكم السلام و رحمة الله وبركاته gsm  بعد زمان القمر الحلو ما بان , ما دامه خير فالحمد لله     الناس عم تتغير و بسرعة كمان , بغيب عن رفيقة من رفقاتي لفترة بعدها بشوفها بتصير كانه واحدة تانية و المشكلة يا ريت يا ريت لو عم نقلد بشي مفيد , يا ريت مثلا لو نحترم الدور على الانتظار , يا ريت ما نرمي وسخ من على البلكون او السيارة او في الطريق , يا ريت لو نحترم المواعيد . اااااايه       ان شاء الله تجربي الوصفة و تحبيها و في كمان اختها علىهل الرابط    بالعكس لا طولتي و لا شي , و انا كمان مشتاقتلك كتير و فرحت على رحعتك و بردك , نورتي مرة تانية اختي

10  الكاتب semo, on 07-10-2009 18:55 كل شي الا زعلك منمونتي اه لو تجي لعندي الك مني احلى دولة قهوى بالهيل والمستكة كمان    تؤبشيني شو قلبك طيب رضيتي بسرعة     خلص وصلني الجواب اناشفت صورة البهار ونزلت عالسوق وفتلت ورحت عالعطار وسألت وبالاخير لا انا لقيتو ولا حدا بيعرفو هون بالسعودية الا لو الو اسم تاني هون ما بعرف    خلص ببقى لما انزل عسوريا بشتري منو وبجيبو معي لهون    اما بالنسبة للريمون كونتروم فهي سمعة والله

11  الكاتب منى, on 09-10-2009 08:08 هلا سمسوم الله لا يجب زعل ابدا .    سمسوم اكيد معروف باسم تاني , لان هو من اساس ايا بهار , شفتي شكله متل الفلفل الاسود بس على اكبر , على كل مو مشكلة ..      سمعنا سمعات و الله , اله يكون بالعون    لا تنسي التمر مع القهوة و انا بشرب فنجانين عند الي بحبهن

13  الكاتب منى, on 11-10-2009 12:35 هلا ارام   ان شاء الله الف صحة بكل لقمة و كل تغميسة , هياتك متلي , انا لما بيمون عندي " شغلى بزيت " بالبراد ممكن افطر و اتغدى و اتعشى منها .    كتير انبسطت انها عجبتك و كانت على زووءك , هنا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved