L2ma.com | لقمة طيبة | L2ma.com | لقمة طيبة | تمر منيون | على, التمر, الوصفة, انا, اديه | L2ma.com

القائمة الرئيسية

الأكثر تصفحاً

تمر منيون

الكاتب/ منى

18/09/2009

تمر منيون

كمان وصفة للتمر , ما بعرف اديه سهلة و اديه طيبة و مغذية و بتتنقرش نقرشة و بيكون الضيف اكل كم تمرة و هو لسا عم يدوق . أنا حضرتها لضيوفي المرة الماضية و اتمنى انت كمان تحضريها لضيوفك هل العيد , ان شاء الله كل سنة و انت سالمة و ربي ما يجي العيد الا و نحنا كلنا من عتقاء الشهر .

الوصفة بالاساس وصفة نورا و هيا موجودة بالموقع من زمان , شفت نرمين على قناة فتافيت عاملة شي كتير بيشبهلها و مسميته تمر منيون , عجبتني طريقة تقديمها و انا حضرت وصفة نورا مع شوية اضافات و قدمتها بطريقة نرمين .

اذا كان عندك التمر مطحون و جاهز , أو متل ما منسميه عجوة , بيكون اسهل و احسن , انا حضرت الوصفة من التمر العادي . و كمان شي تاني, اختي سيما بتعمل نفس الوصفة بس باستعمال الحليب الساخن عوض الزبدة و بيطلع غيرر شكل , اتصلت فيها لاخد طريقتها على التمام بس ما كانت ترد و انا كنت مستعجلة لهيك حضرتها بالزبدة و ناوية المرة التانية حضره بطريقتها لحتى اكل منه و انا ضميري مرتاح .

هل الوصفة فيكي تتركيها على طاولة المطبخ كدعوة سرية لشي حلو , و رح تشوفي ان الاولاد عم بروحوا و يجوا و ياكلولها شي " كرة " على قولة كريم , ما بتعرفي اديه انبسطت على هل الفكرة مشان اولادي و خصوصا فرح و كريم لان اكلهم قليل و بيتعبني , و مع كم كرة من هل التمر رح يبقى بالي مرتاح و مطمن على غذاهم .

بالصحة و الهنا

نصف كيلو تمر
نصف باكيت زبدة ( 100 غ )
2 – 3 باكيت بسكويت سادة
ملعقة صغيرة مسطحة قرفة
ربع ملعقة صغيرة قرنفل

للتزيين :

فستق ناعم
سمسم
طريقة التحضير

·         تزال بذور التمر ثم يطحن على ماكينة فرم اللحمة مع الزبدة على الشفرات المتوسطة لمرة واحدة أو مرتان .

·         يكسر البسكويت ثم يضاف للتمر مع القرفة و القرنفل و يدعك الكل جيداً .

·         يشكل التمر بهيئة كرات ثم يغمس نصفه في الفستق و نصفه في السمسم و يقدم .

أضافة إلى المفضلة (2) |

أقتباس | مشاهدات : 3570

تعليقات (28)

1 الكاتب سوزان, on 18-09-2009 23:38
يسلمو ايديك عن جد شي بيجنن..هالاكلات الطيبة اللي الواحدما بيعرف شو بدويعمل ليعمل...اكيد رح جرب هالتمر منيون متل ما قلتي كتير مغذي خاصة للولاد...والله بكل وصفة بعملها بدعيلك كتير حتى اليوم عملت محشي كوسا وطلع كتير طيب ...
كل يوم بالليل بنيم ولادي وجوزي وبفتح الموقع مشان اقرا على رواء وما حدا يزعجني...

2 الكاتب منى, on 19-09-2009 00:27
هلا سوزان

انا كتير كتير مبسوطة فيك و بردك , بتعرفي انا متلك بحب الهدوء كتير و يكون الكل نايم و انا اما على النت او مع شي كتاب

الف الف صحة و هنا على المحشي و على كل شي جربتيه و ان شاء الله تجربي هل التمرات و يكونوا على زووءك

3 الكاتب dado, on 19-09-2009 11:42
هاي منوش
عجبتني كتير هالوصفة وانا بحب التمر كتيير وعندي عجوة.. وانشالله بحضرها عالعيد.
بس دخيل عينك.. إيمتى منضيف الزبدة عالوصفة؟

4 الكاتب منى, on 19-09-2009 11:56
هلا دالو

ان شاء الله تجربيها و تحبيها حبيبتي , الزبدة منديرها مع التمر وقت الفرم على الماكينة لحتى يسهل هل القصة

عم استنى رايك بعد الدوقان

5 الكاتب semo, on 19-09-2009 12:41
مع اني مو من عشاق التمر والعجوة بالذات

يعني في انواع معينة بحبها من التمر بس اضافة البسكويت الو اكيد رح يعطيه طعم كتير طيب

والواحد بيتشجع ياكل هالاكل اللي الواحد جهل هالايام فوائدو العظيمة

مرة قرأت مقال انواللي ما بياكل 7 تمرات باليوم رح يندم على كل يوممر بدون حبات التمر

من فوائدو العظييمة وخصوصا اللي عندها اطفال الطفل صعب ياكل التمر بس متل ماقلتي بهالطريقة بيرغب

بعرف ولد صغير الله يخليه لاهلو من كتر ما بيحب الكرة اي شي مدور بياكلو على اساس انو طابة :grin

يسلمو ايديكي يا منمونتي ويخليلك هالقطاط ويحميهن وكل عام وانت بالف خير وان شاء الله العيد الجاية بتكوني على جبل عرفة

6 الكاتب منى, on 19-09-2009 15:09
لك سمسومة ليكون عم تحكي عن مروان :roll

الله وكيلك الله وكيلك التلفزيون دوما على القنوات الرياضية , و بين اجرييه دوما في كرة , و لما بعصب من صوت الطرق و باخد الطابة الكبيرة بيلعب بطابة التنس و اذا خفيتها بيجيب كم ورقة و بيحطهم بجراب و بيلعب فيهم :grin

اللمبادير على شكل كرة قدم و الساعة و شو ما بدك

التمر فوائده لا تعد و لا تحصى و انا هلا صرت بحب التامر على اد مو مفيد , يا رب تجربيه و يكون على زووءك و الف الف شكر الك للدعوة الحلوة , ان شاء الله انا و انت و كل مشتهي يا رب :cry

7 زيزفونه
الكاتب فوزه, on 19-09-2009 21:32
شكرا كتير على هالوصفه انا بصراحه ماعندي اولاد بس بعمل اكلات بالتمر لما يكون رفقاتي و اولادهم عندي عم يزوروني و كل الاولاد بياكلوا و ثاني يوم الامهات بتتصل معي و بتاخد الطريقه

8 عساكم من عواده
الكاتب لارا مينا, on 20-09-2009 16:36
كل عام والأخت منى وجميع الأعضاء وكل حبايبهم بألف خير .. تحية من القلب إلى القلب بهذا العيد العظيم عيد الخير والعطاء والتسامح والتواصل وينعاد علينا جميعا أعوام وأعوام ... بااااااي

9 كل عام وانتم بخير
الكاتب ام احمد الغالي, on 21-09-2009 00:21
كل عام وانتو بخير
ويسلم دياتك منوشه العسل
على هالوصفات الطيبه

10 الكاتب dado, on 22-09-2009 07:38
كيفك منوش
كل عام وإنتي وكل الصبايا بألف خير.. آسفة تأخرت بالمعايدة.. بس ما صحلي.
جربت هالأستاذ منيون.. شي بياخد الأعل

جربته مع سمسم بس لأنو كنت عم حضره الساعة أربعة الصبح وما كان عندي فستق.
على فكرة عملته بالحليب المغلي مو بالزبدة وكتير كتير طلع ظريف ومتماسك.. ومريح للضمير

شكرا منوش

11 الكاتب منى, on 24-09-2009 16:21
هلا فوزة

الف صحة و هنا على الب رفقاتك و قطهم , باين جمعاتكم غير شكل .

نورتي و نور الموقع فيك اختي و اتمنى تجربي الوصفة و تكون على زووءك و تعجب كمان الضيوف

12 الكاتب منى, on 24-09-2009 16:37
هلا لارا يا قمر

و انت كمان ينعاد عليك بالخير و الطاعة و البركات تكون عليك و حواليكي و بقلبك و ببدنك و يا رب السنة الجاية نكون احسن من هل السنة بكتير في الدين و الدنيا

13 الكاتب منى, on 24-09-2009 16:38
هلا دالو القطة

انا الي اتاخرت , بس بتعرفي صار الي كم يوم حاسة حالي ما عم امشي عم طير من كتر العبطة و المشاوير و الروحات و الجيات , يلا ان شاء الله السبت بترجع الحياة للرتم العادي .

هنااا و الف الف عافية و صحة و بتعرفي متل ما عملتي , انا كنت مفكرة طريقة سيما بدها اختراع , طلع بس تكر و حليب مغلي و بعدها منشلف البسكويتات و خلصت خلصنا . بقى يا ستي هنا و الف عافية على البك و الب ضميرك و ان شاء الله رح اعملها انا كمان قريب بالحليب :zzz

14 الكاتب نوارة, on 26-09-2009 21:58
الله لا يحرمنا من وصفاتك
يعني جد وقت ما بعرف شو بدي اطبخ بدخل لهون
جربت هديك المرة دجاج بريمفيرا بجنن كتير كتير طيب
وبكرة رح اعمل شيخ اللمحشي مطبق
بس سؤال باكيت البسكوت بهالوصفة كم غرام
وسلام

15 الكاتب منى, on 27-09-2009 11:11
هنا و الف صحة نوارة

على كل لقمة اكلتيها او ناوية تاكليها عنا .

هل التمر ان شاء الله رح يعجبك , البسكويت حوالي 100 غ للعلبة الواحدة , هلا بتعرفي بسكويت سامي , كان وزن العلبة 100 غ بس هلا مع الغلا صار 80 غ , بقى انتي بتضيفي لحتى يطلع عندك شي بيشبه السوكسيه الي منعرفه

16 الكاتب رنا, on 28-09-2009 08:21
ههههههههه عن جد اول وصفة لمنى خانم بقدر اتحكم فيها بالمقادير ...بالعادة كله بيكون عالميلي :grin

وشفت ردك لدالو على طريقة سيما كيف بتشتغل وتذكرت اكلة قال بدها تعملها سلفتي برمضان مابعرف اذا بتعرفيها هي صايرة بسكويت شاي بتطحنية وبتحطي معه حليب مكثف بعدين بتقسمي العجينة وبتخلي نصها بالكاكاو بتبرمي العجينة السودا وبتغلفيها من النص التاني العسلي بتصير على قولة اهل حلب دقماق ممكن انك تدحرجيها بالمكسرا وتخليها تاني يوم بالفريزر بعدين بتتقطع ...المهم طحنت سلفتي شي 5 علب بسكويت وحطت فوقهن علبة حليب مكثف ...المهم ماصارت عجينة قابلة للتشكيل ابدا ...وياحرام طلبت مني مساعدة قال رنا حطلها حليب لبين ماتنعجن :roll

قلتلها لا ..المفروض تتقيدي بالوصفة ...قالتلي شو اعمل :upset

مافي حدا يجبلي حليب مكثف ...قلتلها ولا يهمك انا بساويلك ...المهم طبختلها حليب مكثف وقعدنا نكت ونعجن نكت ونعجن لبين ماصارت عجينة وزبطت بس شو القصة انه طلعت حللللللللللوة كتير ...بس طيبة يعني ماشي حالها اتصلت سلفتي باختها يلي عطتها الوصفة وقالتلها هيك طلعت حلوة كتير ...قالتلها ليش تتفالحو تحطو حليب مكثف حطوا حليب عادي وخلصت القضية :sigh

انا اتطلعت هيك وقلت يمكن مابقى تستشيرني بعمرها :sigh

الاحلى منها انه من كتر ماكترت الوصفة من ورا اختراعاتي زاد حجمها كتير وطلعت بالنهاية عصايتين بس كباااااااار كتير وطوال يعني بالزور وسعوا بالفريزر ...اجا جوزي المسا فتح الفريزر قال ولي شو هاد ...قلتله هي مشان اذا حدا فكر يعذب مرته :grin

يمكن حكيت كتير بس مابعرف فيقوني اليوم الصبح البنات وحدة بدها نونو ووحدة بدها ترضع قام فقست النومة وعملت صبحية عالموقع بقا بدك تتحملي :grin

وبالنسبة لوصفتك انشالله رح جربها باقرب وقت لانه عن جد بترضي الكبار والصغار

17 الكاتب رنا, on 28-09-2009 08:30
بس حبيت ضيف شغلة ....قريت كم يوم معلومة عن الحكمة من تناول عدد فردي من التمر وحبيت شارككم فيها

حذر الأطباء من الاكثار من تناول التمر للاشخاص المصابين بمرض السكري لانه يرفع نسبة السكر لديهم
كما حذر الاطباء المصابون بامراض الكلى من تناول التمر لانه يرفع نسبة البوتاسيوم لديهم
وحثت السنة النبوية على تناول التمر باعداد فردية (3 .. 5 ....7 )على سبيل المثال
فقد اكتشف باحث امريكي مؤخرا فائدة تناول التمر باعداد فردية اذ تبين له ان تناول التمور باعداد فردية تتحول السكريات الى كاربوهيدرات تكسب الجسم طاقة
اما اذا تم تناولها باعداد زوجية تتحول الكاربوهيدرات الى سكاكر وبوتاسوم مما تتسبب في التأثير على وظائف الكلى

18 الكاتب gsm, on 10-10-2009 11:59
سلامة عليكم منونة بجد هي الوصفة بتشبه وصفة ماما كانت تعملنا ياها بس كانت تحط توابل متل القرنفل وهيل وقرفة وتحطلها شوية زبدة بعدين تدعبلها وتحطلها يا فستق يا جوز هند يا سمسم بس انا إمبارح اخدت وصفة جاتو بالتمر والجوز انا كتيير بحب هل الجاتو من إيدين ماما بس رح اعملها وإذا نجح معي رح ابعتلك الوصفة لأنو عن جد كتيير مغذية طولت عليك ما تواخينا

19 الكاتب منى, on 11-10-2009 12:33
لك رنون ما بعرف وين طار ردي , المهم كتبتلك رد طويل عريض و كنت عم اشرب قهوة معك بالصبحية :zzz

الحليب المكثف المحلى مع البسكيت ما كتير حبيت طعمته , هيك حسيته صار شي بيشبه اكل الاولاد الي مو كتير طيب

دخلك بقيان عندك من هل العصاية :grin

بس مشان الاولاد , ما يروح فكرك لبعيد

ان شاء الله الك الاجر و الثواب على تربية الاولاد و اصبر عليهم , بهل العمر بيجننوا الي ما مشتهي يجن .

كمان الف شكر الك للمعلومات الي ضفتيها عن التمر , يا ستي شو ما اجا بالحديث او القران نحنا علينا ننفذ و بس لان منعرف انه صح :zzz

20 الكاتب رنا, on 12-10-2009 19:38
صح بيصير بيشبه اكل الاولاد شلون بتعرفي :grin

ياستي شفت بالموقع وصفة بتشبهها تبع كرات التويكس بس هديك بالتوفي وفي طريقة للتوفي انه بتحطيها ببمي سخنة للحليب بتصير توفي بس انا مو مجربة
ياستي شكرا الك على ردك واهتمامك والله يخلي ولادك يارب :grin

ويصبرني

21 الكاتب منى, on 16-10-2009 12:23
رنونة عرفت لاني بزمناتي مجربة وصفة لمنال بنفس المبدا :roll

الله يصبرك و ان شاء الله بتنفرج عليكي قريب , هل اصعب و احلى ايام , اتهني فيها :zzz

22 الكاتب منى, on 16-10-2009 12:36
هلا gsm

الله يخليلك ماما و يديمكم لبعض بصة و عافية :zzz

رح استنى منك وصفة الكاتو الي قلتي عليه و ان شاااء الله بينجح معك و يصير تمام

23 الكاتب gsm, on 27-10-2009 15:36
سلام عليكم منونة انا امبارح لجربت الجاتو التمر هو كتيير نجح معي بس المشكلة انو الجوز والتمر نزل للقاع مع انو اتبعت الطريقة من ماما بحذافيرها ما بعرف شو المشكلة على كل كمان اسبوعين نازلة لعندن زيارة ان شاء الله ببقى بشوف كيف بتعملها وبارسلك المقادير لأنو حاسة هلق في شي غلط يمكن عم تطلع معي الجاتو مريقة شوي

24 الكاتب نوران, on 07-11-2009 14:36
السلام عليكم
الله يعطيكن العافيه
انا صار مكتشفه هالموقع من كم يوم
بس جربت وصفات جدا رووووعه
جربت كاتو بحشوة السنكرز واخذت منه عالحديقه كتير كان طيب
وعملت اليوم معكرونه بالباشميل كانت تحفه يسلمو ايديكن كتيير
وبالنسبه لهالوصفهطيبه كتييير بس انا كنت اعملها بمعجون التمر بدون زبده ولا بسككوت واعملها كرات واحشيها جوز واغلفها بجوز الهندبس هاي حلوة كتير فيها اشياء منوعه خصوصا للاولاد وان شاء الله نستفيد منكم اكتر الله يعطيكن العافيه

25 الكاتب خولة, on 03-06-2010 06:03
أهلين منى

ممكن تستبدلي البسكويت بالكورنفلكس المجروش ويطلع الطعم مقرمش وحلو ..

وممكن نفس التمرة تفتحيها من النص وتحشيها ببسكوت مجروش مع الطحينية والمكسرات

بالهناء والعافية :zzz

26 الكاتب منى, on 03-06-2010 20:10
هلا غفران

ان شاء الله تزبط معك و انا بانتظار الطريقة ان شاء الله

27 الكاتب منى, on 03-06-2010 20:14
هلا نوران

مية هلا فيك اختي و الف الف هنا على البك بكل شي جربتيه .

ان شاء الله تجربيها و تكون كمان على زووءك , نورتي اختي

28 الكاتب منى, on 03-06-2010 20:17
هلا خولة

الف شكر الك للاضافة , ان شاء الله بجربه قريب

البسكويت و الطحينة جربتهم مرة و كانوا طيبين كتير
شكرا الك للاضافة و منورة اختي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 26/09/2009 )

< السابق		التالى >

[ عودة ]