ما في اكتر من الفتات في المطبخ السوري , فتة الحمص بزيت و بسمنة و فتة بلحمة و بدجاج . فتة المكدوس و فتة الباتنجان فتة شاورما و حتى في وصفة حلو منسميها عندنا في العيلة فتة الفتانغو , و هي بيحبها اخي بشار كتير و هو الي سماها هل الاسم , لك حتى في فتة الموز , شو بدكم بكترة الحكي نحنا شعب منحب نفت و نلت  .

اليوم وصفة جديدة و كتير طيبة حضرتها لضيوفي باخر عزيمة , بس من دون البصل و التوم لان ما كتير هنن صحبة معهم  . هيا فتة بس مو فتة عادية . فيكي تعتبريها مقبلات , و فيك تعتبريها وصفة غدا خفيفة و خصوصا اذا قليت الخضار على طريقة نور  , و انا لما بحضرها للبيت هيك بعمل , اما للضيوف بقلي الخضرة بطريقة عادية .

طيبة و مستاهلة تجربوها كتير و حتى الباشا الي ما بيعجبه العجب بيحبها كتير . و هل المقادير بتعطينا كمية كبيرة و لما بعملها للبيت بقلي حبة كوسا مع حبة بانجان و بطاطا و بقلل هيييك كل المقادير , بقى انتي كمان فيكي تقللي لحتى تصير مناسبة لعيلتك و فيكي تزيدي او تنقصي من مقاديرها حسب المتوفر عندك , هلا انا بحسها بهل المقادير اطيب الشي بس انتي ممكن تضيفي مخلل مفروم , بندورة , ذرة , كزبرة خضراء , شو بيجي على بالك و بتحسي ان عيلتك بتحبه .

بالصحة و الهنا

نصف كيلو كوسا
نصف كيلو بانجان
نصف كيلو بطاطا
كوب حمص مسلوق
نصف خسة صغيرة
رغيف خبز محمص
حبة متوسطة بصل
ملعقة كبيرة سماق مطحون
نصف باقة بقدونس

الصلصة :

2 كوب لبن زبادي
3 ملعقة كبيرة مايونيز
فنجان صغير طحينة
فص ثوم مهروس
رشة ملح
القليل من الماء





·         تقطع البصلة لجوانح رقيقة ثم تدعك بالسماق و تترك جانباً حتى اعداد بقية المقادير .

·         ترفع اوراق البقدونس عن العروق ثم تغسل و تترك حتى تجف . تخلط مقادير الصلصة و يضاف القليل من الماء إذا دعت الحاجة , الصلصة يجب أن تكون متوسطة السماكة .

·         تقطع الخضار لمكعبات ثم تقلى بالزيت كل نوع على حدة , ترفع و ترش بالملح و توضع على ورق ماص .

·         تقطع الخسة باليد لقطع كبيرة ثم تفرش في طبق التقديم .

·         تخلط الخضار المقلية مع الحمص و البصل المتبل و تقلب بلطف ثم ترتب فوق الخس , يوزع البقدونس و الخبز المقلي على وجه الفتة .

·         قبل التقديم مباشرة توزع الصلصة على الفتة و تقدم فوراً .

تعليقات (32)

1  الكاتب semo, on 17-09-2009 13:55 ياسلام شي كتير حلو    من يومين كان بدي اعمل فتة فروج قلت رح ادخل على موقع منى شوف طريقتها بعمل الفتة     دورت بكل الاقسام مالقيت ولا فتة موجودة     استغربت كتير وان شاء الله هي بتكون بداية الفتات    لان الموقع بحاجة الها متل فتة المكدوس والحمص والفروج واللحمة    او بالاحرى نحنا بحاجة الها     الله يخليلنا ياكي يارب نحنا طمعانين فيكي كتير بس هادا من عشمنا فيكي وكرمك اللي ما الو حدود    مبارح جربت صينية التوست وطلعت شي فخم كتير ودعيتلك بعدها كتير دعوة صافية من القلب     وعلى فكرة هي الفتة جديدة على    نحن بحماة ما بنعرفها اكيد هي حلبية رح جربها واعطيكي خبر ان شاء الله

2  الكاتب ام دانية, on 17-09-2009 14:41 شكلها حلو كتير وباينتها طيبة ان شاءالله رح جربها يسلمو هل الديات وعلى فكرة باينتا العزيمة كانت غير شكل الله يديم المحبة بيناتكن

3  الكاتب منى, on 17-09-2009 19:56 هلا سمسومة   ايه و الله تكرم عيونك و عيون كل الاخوات ان شاء الله رح نزل كل الوصفات , يا الله هل المطبخ شو ما حطيتي فيه بيبقى ناقص     هنا و الف الف صحة على التوست , كتير انبسطت انها عجبتك و انك جربتيها و اتمنى كمان تجربي هل الفتة , و هي الوصفة مو حلبية , هي جديدة و ابتكار جديد من وصفة أصلية

4  الكاتب منى, on 17-09-2009 20:00 هلا ام دانية   ان شاء الله تجربيها و تحبيها و ممنوتك انا كتير اختي للمرور , سلامي لاخواتك كلهم

5  الكاتب لارا مينا, on 17-09-2009 23:50 أنا بضم صوتي لصوت الأخت سيمو   فعلا بحاجة وصفات الفتات على أنواعها..   وأنا كنت ناوية أعمل فتة الحمص ودورت مالقيتها فبطلت أعملها مع إن عندي كتب طبخ كثيرة موجودة فيهاالوصفة   بس بصراحة ماصرت أثق غير فيكي خصوصاالوصفات السورية القديمة والشعبية مثل الفتات وغيرها.   تحياتي

6  الكاتب هنادة, on 18-09-2009 00:16 الأخت المحترمة منى :  شكراً على هالأكلة وأنا من هواة الأكلات الغريبةبالطعم و الشكل و المضمون و شكلها مغري و مكوناتها جداً طيبة كل واحد لوحدة فكيف إذا كانت مجموعة في طبق واحد .  بس بدي أعرف أختي الغالية إذا كان عندي وصفة لأقدمها لكم فقط ارسلها إيميل عادي وأنتم تقومون بعمل باقي الخطوات. لك مني كل الشكر و الاحترام.

7  الكاتب منى, on 18-09-2009 09:39 هلا لارا   تكرم عيونك الحلوة حبيبتي و انا كتير بشكر ثقتك في و كلامك الطيب , ربي يديم المعروف و يجمعنا في جنة عرضها السموات و الارض

8  الكاتب نور الأسلام, on 18-09-2009 14:21 السلام عليكم كيفك منى تحياتي الك ولكل الاخوات حبيت اسلم عليكي ويسلمو اديك هي فته جديده انا بعمل فتة الدجاج رح جربها انشاء الله وعزيمة السحور بتجنن والله يديم المحبه وبيتك عطول انشاء عامر بالحب والخير تحياتي وكل عام وانت بخير

9  الكاتب منى, on 18-09-2009 16:32 هلا هنادة   نورتي و شرفتي و اتمنى تجربي هل الوصفة و تكون متل ما بتحبي     اذا حابة تشاركي بايا وصفة فممكن ترسليها كرد عادي او تبعتيها كايميل و انا رح كمل الباقي ان شاء الله

10  الكاتب منى, on 19-09-2009 00:27 هلا نور   اشتقتلك صار الك فترة غايبة عنا , ان شاء الله تكوني مشغولة بالخير و تكون صحتك تمام انتي و كل العيلة     كل سنة و انتي كمان سالمة و بخير و يا رب تجربي الوصفة و تعجبك

13  الكاتب منى, on 27-09-2009 10:44 هلا ندوش   هي فتة باردة مو سخنة , او فيك تقولي فاترة , غير عن بقية الفتات بس يممم يمم

14  الكاتب منى, on 27-09-2009 10:47 هلا نوارة   يا رب يا رب تجربيها و تكون على زووءك , مستاهلة و انا رح استنى رايك بعد التجربة ان شاء الله , و صحة و هنا على قلبك و قلب محمد و البي بي

16  الكاتب رنا, on 28-09-2009 08:53 ياعيني شي طيب والله    ياستي وصفتك بتشبه وصفة لقيتها عالنت اسمها فتوش تركي ..طبقة خبز محمص وفوقها قطع باذنجان مقلية ...بعدين بقدونس وبصل اخضر مفروم وفوقها صوص اللبن نفسه ...كتير طيبة  ويمكن وصفتك اطيب واطيب لان فيها بطاطا ...لازم جربها

17  الكاتب منى, on 28-09-2009 12:18 هلاا ندوش   و الله و الله حسيت فيكي , مارق كتير على راسي اخت هل الموقف و بيكون البي على كفي ليقوم ينتزع مراق العيلة كلها على الغدا بسبب واحدة من تجاربي     الف الف هنا على البك و الب الباشا و ممنونة كتير ثقتك في و تجربت الوصفة و كمان الدعاية الي عملتيها

18  الكاتب منى, on 28-09-2009 12:18 هلاا ندوش   و الله و الله حسيت فيكي , مارق كتير على راسي اخت هل الموقف و بيكون البي على كفي ليقوم ينتزع مراق العيلة كلها على الغدا بسبب واحدة من تجاربي     الف الف هنا على البك و الب الباشا و ممنونة كتير ثقتك في و تجربت الوصفة و كمان الدعاية الي عملتيها

19  الكاتب منى, on 28-09-2009 12:20 هلا رنونة   اي هل الوصفة فيك تعمليها بالبانجان او بالكوسا او بالبطاطا حسب المتوفر و بالتلاتة اطيب الشي     جربيها و ان شاء الله رح تحبيها كتير

20  الكاتب رنا, on 28-09-2009 14:52 الف مبروك ندوشتي لنجاح الوصفة ...صايرة معلللللمة ياخيتو ....بكرا لازم جربها لشادي ....حاكم حماتي مسافرة وهو واقف عالدقرة والنقرة ذوقه مو كتير صعب بس انا مو كتير بعرف اطبخ ...هداك اليوم عملت سلق بزيت عطاني 4 من عشرة بس

21  الكاتب منى, on 28-09-2009 19:08 يا حبيبي , عنده كمان دفتر علامات , قوليلو لكن يحسن علاماتو و الا رح يفيق شي يوم و يعطيكي غياب و يبقى هو يورجينا عضلاته

22  الكاتب رنا, on 29-09-2009 06:48 ههههههههههه والله افكارك خطيرة مامنوشة ...وين كنتي مخبيتيها والله الخبرة الها دورها حتى بالزواج ...ياستي لنشوف اليوم قديش العلامة بالعجة من يومين عملت كوسا محشي مكشر على قولته ...لاني نسيت حط دبس بندورة بالحشوة ..بس طيب يعني مااشبه شي

23  الكاتب منى, on 29-09-2009 07:50 ايه طبعا الخبرة الها , خبرة تناعش سنة انا , سنة ورا سنة منتعلم فيهم نطنش و نكون ااقل حساسية و اكتر ثقة و عرفانين حالنا شو عم نعطي و اديه هو مهم و مو مستنين علامات من حدى

24  الكاتب ام نور, on 29-09-2009 21:44 يا سلام على هالفتة غير شكل سلم دياتك منى وبضم صوتي لا انصار الفتة

25  الكاتب منى, on 30-09-2009 07:20 تكرم هل العيون الحلوة ام نور     ان شاء الله تجربي هل الفتة و تعجبك كمان

26  الكاتب رنا, on 30-09-2009 14:30 يااااااااااااااااي كلامك بيجنننننن

27  استفسار الكاتب عاشقة البطاطس, on 04-11-2009 22:21 اختي كيف اكتب تعليق ووين وايش اضغط

28  الكاتب منى, on 05-11-2009 07:56 رنونة الحلوة

29  الكاتب منى, on 05-11-2009 16:51 أختي عاشقة البطاطس , تعملي متل ما عملتي تمام لمن كتبتي التعليق السابق

31  الكاتب منى, on 05-11-2009 16:49 الله يسلمك حبيبتي , معلش هادا لان لساك جديدة معانا و ما اتعرفتي على نظام الموقع مزبووك , مرة تانية شرفتي و نورتي و ميييية السلامة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved