تعليقي على الوصفات :

الهمبرغر نسيته في الفرن , كالعادة , فنشف شوي و شريف ما لاقى صمون مدور صغير لهيك ما كان ادامي غير اني قص كل قرص بالنص و احشيه بصمون عادي . اليلانجي خارق , عم يدوب دوبان , و انا هل الاكلة لو ااقعد بجزيرة و يكون ما فيها الا يالانجي ما بقول لا و لو كان البحر الي جنب هل الجزيرة الافتراضية دبس رمان و زيت الزيتون سوري كمان ما بقول لا ابدا  . كرات الدجاج شغلة و هي وصفة جديدة و بتشبه فخدات الدجاج الكذابة , بس هل الطريقة حسيتها أسهل هيا كرات على السريع بتصير و كمان اطيب لان بكل لقمة رح تاكلها رح تكون القرمشة من برة و الجبنة عم تدوب دوبان من جوى . فتة المقالي انا كتير بحبها و الصوص تبعها مليق و بيشهي . الي صار معي اني نسيت الملح فطلعت دلعة شوي , على كل احسن ما تكون مالحة .

فطيرة الشاورما اختراع جديد , كنت ناوية اعمل سندويش شاورما بس انا حضرتلها السندويشات لماما بعزيمتها و العزيمة كانت باول رمضان , هلا الكل أخد مني الطريقة و الكل ساواها , لهيك ما حبيت ارجع اعملها فقدمتها بطريقة و فكرة جديدة , يمممم . البيتزا خبزتها قبل ما يجوا الضيوف بشي ساعة , بس تركت الجبنة للاخير  . الكوسا بالطحينة انا بموت عليه , بالعادة بخبزه بالفرن بس هل المرة ما كان عندي وقت فخليته يغلي شوي على النار عوض عن الفرن  , نووو ما بقى اعيدها بالفرن اطيب بكتير .

وصلنا للحلويات , القالب الملك بلا منازع كاتو البوظة , هل المرة حضرته على شكل نجمة على اعتبار اننا برمضان , شايفين الزيق الي نصه مغطى بالكريما البيضا ! المفروض ان يتغطى كله بيطلع شكله احلى بس الكريما الي تركتها على طرف ما كفتني . كاتو الكراميل بيجنن , ممم و الحشو فكرة جديدة و غرام . تمر منيون هو وصفة قريبة كتير على وصفة سوكسيه التمر الي نزلتها نورا بالموقع بس طبقت عليها فكرة شفتها لنرمين على فتافيت , كتير طيب و مغذي و مع القهوة طلع يمممي  .


قبل ما روح رح اتشكر كل الصبايا الي شاركوا بوصفاتهم بمسابقة رمضان و كمان كل الي صوت و ان شاء الله رح اترك التصويت لبعد رمضان و العيد لحتى نحتفل بالربحانات على رواق .


هادا كل شي لليوم , اللهم ادمها نعمة و لا تجعلها الى زووال و الله يرزقه لشريف الرزق الحلال الطيب المبارك و يرزقه حب اهل بيته و الله يديم علينا الصحة و العافية . اتمنى ان تكون السفرة عجبتك و اخدتي منها كم فكرة لعزيمتك الجاية و ان شاء الله كل الوصفات الي مو موجودة بالموقع رح نزلها قريب .

في امان الله