L2ma.com | لقمة طيبة | L2ma.com | لقمة طيبة | صينية التوست على طريقتي | الصمون, حتى, ملعقة, كبيرة, · | L2ma.com

القائمة الرئيسية

صينية التوست على طريقتي

الكاتب/ منى

15/08/2009

صمون بس غير شكل

الوصفة اليوم فيني اعتبرها وصفة رمضان الجديدة و المميزة . متل ما السنة الماضية كان عندنا بوصفة لقمة تشكن , هل السنة هل الوصفة . الفكرة خطرتلي لما زاد عندي صمون و بطل طري و صار ناشف شوي , حبيت اعمل فيه حركة جديدة عوض عن البقسماط . خطر ببالي أن جرب غمس الصمون متل البودينغ الانكليزي بس بمكونات كانت متوفرة عندي و لحتى يطلع معي طبق مالح .. و أول ما جربتها كانت بحشوة نباتية , طلعت طيبة , و حتى ابو الشباب الي زوءه صعب عجبته كتير . المرة التانية جربتها بحشوة دجاج و كمان طلعت أطيب , المرة التالتة جربتها باللحمة المفرومة و طلعت وواااو مو معقولة . الصمون بيشرب من الخلطة و بيصير طري و طعمته مميزة و ما رح تعرفي شو هو . بجمعة رفقاتي سألتي واحدة منهم , شو هل البطاطا البيوريه الي بتجنن , كيف عاملتيها ؟ رح يصر طري و ناعم و بيدوب دوبان

الفكرة هي بالصمون و أو التوست الخلطة تبعته , بس انت فيك تستعملي ايا حشوة بتعجبك , انا عني بعد التجربة شفت ان اللحمة مميزة اكتر الشي و أسهل الشي . و كمان نفس الطريقة ممكن تطبقيها على التوست و بتطلع نغم . بس في ملاحظة صغيرة . إذا كان التوست أو الصمون ناشف فبيشرب صلصة أكتر و إذا انت ناوية تجربي الطبق بالتوست أو الصمون الطري يمكن ما تحتاجي كل الخلطة . هل المقدار عمل الي صينية بايركس أكبر قياس . و بعد التجربة لما بتكون الصينية مخبوزة تازة و بتقدميها فوراً هيك بتكون منفوخة و مرفوعة كيف لما الكيك بينفش و شكلها و طعمتها بتجنن , أما اذا تركتيها شوي فرح تخسري هل الشكل المغري .

الصورة هي لأول مرة جربتها فيها , كانت من دون علبة قشطة على الوج , بس هلا لو رح تجربيها بالقشطة رح يطلع منظرها احلى لسا .

بالصحة و الهنا

4 – 5 صمون متوسط الحجم , أو شرائح توست حسب الحاجة

الحشوة :

2 ملعقة كبيرة زبدة
حبة بصل مفروم ناعماً
نصف كيلو لحمة غنم مفرومة
رشة زنجبيل
نصف ملعقة صغيرة كاري
نصف ملعقة بهار مشكل
حبة صغيرة جزر مفروم مكعبات
حبة فليلفة خضراء مفرومة مكعبات
نصف كوب فطر
نصف كوب ذرة
2 ملعقة كبيرة صويا صوص
1 ملعقة كبيرة مايونيز
2 ملعقة كبيرة كتشاب

خلطة التغميس :

2 كوب حليب
3 ملعقة كبيرة مايونيز
2 ملعقة كبيرة جبنة كريم ( أو 2 مكعب من أي نوع متوفر عندك )
ملح و فلفل أبيض

لدهن الوجه :

1 علبة قشطة
3 ملعقة كبيرة جبنة قشقوان أو مزتزاريلا مبشورة
direction

·         تحضر الحشوة , يقلى البصل بالزيت حتى يطرى ثم تضاف اللحمة و تتبل بالبهارات و تقلب و تفكك بالملعقة حتى يجف مرق اللحمة و تنضج .

·         تضاف الفليلفة الحمراء و الجزر و الفطر و صلصة الصويا و يقلب الكل مع اللحمة حتى تطرى الخضار و تنضج .

·         تبعد المقلاة عن النار و تضاف الذرة ثم تترك الحشوة حتى تبرد , بعدها يضاف المايونيز و الكتشاب , أصبحت الحشوة جاهزة .

·         تمزج مقادير خلطة التغميس بالخلاط العامودي حتى تصبح ناعمة و تسكب في طبق متوسط . تدهن صينية بايركس أكبر قياس بالزبدة .

·         يقطع الصمون لدوائر بسماكة نصف سم باستخدام سكين حاد ثم تغمس الدوائر بخفة في الخلطة و تصف في الصينية حتى تشكل أول طبقة .

·         توزع الحشوة على الصمون المقطع ثم تغطى بطبقة أخرى من الصمون المغمس .

·         تمزج مقادير طبقة الوجه ثم توزع على الصمون كأخر طبقة و تخبز الصينية في فرن محمى على درجة حرارة 180 درجة مئوية حتى تحمر من الأسفل و تشعل مشواة الفرن لمدة دقيقة أو دقيقتين حتى يحمر وجه الغيوم ثم تقدم فوراً .

أضافة إلى المفضلة (2) |

أقتباس | مشاهدات : 11119

تعليقات (43)

1 الكاتب منال, on 15-08-2009 13:03
:zzz

مرحبا منى انا عضوة جديدة بالكتابه معكم بس صرلي اكتر من سنه عضوة معكم بس كنت ما علق مع اني كتير حبيتكم دلتني على الموقع اختي اسمها متلك منى متجوزة حلبي وعايشه بالسعوديه دخلت وقرات كتير وجربت وصفات كتير وكلها طلعت تمام يا ستي بس اكتر شي عجبني الجو العائلي والمرح بالموقع الله يعطيكم العافيه وعندي كتير وصفات انشاء الله بنبقى نحكي فيها من الوصفات الي جربتها عجينة السمبوسك طلعت بتعقد على قول اللبنانين وعجينة العشر دقايق والعوامه وحفظالذرةومارياوالسلام يتبع في العدد القادم حسيت كتبت جريدة

2 الكاتب ام سما وسارة, on 15-08-2009 16:37
رووووووووووووووووعة تسلم الايادي اللي تتلف بحرير بكرا جاي ابن عم زوجي يتغدا معنا وان شاء الله راح اعملها .. وبخبرك النتيجة ..

3 الكاتب DOUHA, on 15-08-2009 16:38
اول شي هلا بمنى الجديدة نورتي الموقع كتير شي حلوو اننا كلنا صبايا وعلى قلب واحد والحمد لله الشغلة الحلوة اننا نفس الزوء بالاكل
كتير فرحيتني اني الوصفات يلي موجودة نالت رضاكي

حاسة حالي منى ههههههههههههه
رح الك شي احلى شي بالموقع هون هو الثقة بيلي موجود يعني انا بطبق الوصفة وانا عارفة اني رح تنجح واذا ما نجحت بيكون انا ناسية شي او ........... الخ

منى هلئ هي الوصفة يلي انا ما اكلتا؟؟؟ الله يسامحني على هل الغلطة بئا اسما بين غمتين وعم ئول ليه عيوني عم تدمع طلعت عم تمطر من الزعل لاني ما اكلتا هههه

ستي شكرا لانك نزلتيا

هلئ عندي شوية اقترحات مو ضروري هلئ تصير طبعا

مثلا موضوع عن: هلئ في صبايا من السعودية وصبايا من كافة الدول العربية والاوربية هلئ اكيد كل وحدة عندا بالمطبخ شكل صحن مو تقليدي نوع اكسورات للمطبخ او للسفرة او نوع طنجرة غريبة معالق صحون كاسات اي شي مميز فينا نحطوا بصفحة خاصة من صفحات لقمة احيانا بنشوف بالسوبر ماركت اشيء ما منعرف ليه بجوز اذا حدا حطا وشكر منا نشتريا

صفحة تانية خبرات
هلئ كتير منسمع اذا شفتي الطبخة مالحة حطي بندورة لانا رح تسحب الملح
يعني تجاربنا وخبراتنا :zzz

شغلة اخيرة هلئ منى انتي حطيتي وصفة صوص السلطة بموضوع الجمعية هلئ بجوز بعد فترة ننسا وين كانت المطلوب مني ومن الصبايا اذا وافقتي على الفكرة اي اضافة لوصفة او لخبرة موجودة بين الوصفات نعطكي الرابط كرمال تنسخي المحتوى بصفحة الوصفات بس مو انتي يلي رح تقراي طبعا كل وصفات الموقع نحنا بالصدفة اذا شفتا شي رح نبلغك
حاليا خلصت ههههههههههههه
شكرا كتير

4 الكاتب منى, on 15-08-2009 16:51
هلا منال

شرفتي و نورتي الموقع , مية اهلا و سهلا فيك

الف صحة و هنا و عافية على الوصفات الي جربتيهم , اختياراتك موفقة كلها , الف هنا يا رب

و انا رح استنى الوصفات التانية الي جربتيها و كانت على زووءك أو الي حابة تحكي فيها .

سلامي لمنى الحلوة و يا ريت لو تشارك هيا كمان , و بكل الاحوال نورتي انتي و ياها

5 الكاتب منى, on 15-08-2009 17:44
هلا ام سما

يا رب تعجبك و تعجب ضيوفك و هي كتير مناسبة للعزايم , يلا عم استنى رايك

6 الكاتب منى, on 15-08-2009 17:45
هلا ضحى

الله يديم المحبة دوما و الثقة و ان شاء الله بتزيد كمان و كمان يا قمر

و لا يهمك , انا ناوية حضرها بجمعية رفقاتي التانيين غير الجمعية الي حضرتيها بتبقى بتدوقيها اذا ربنا يسر :zzz

أفكارك التانية كل واحدة أحلى من التانية , هيأتي يا ضحى صار لازم نعمل منتدى لان عيلتا كبرت و الكل نشيط و عنده شي مهم و جديد , رح اطرح الفكرة على محمد و ان شاء الله ربي بيسر الخير

هلا رح اعمل موضوع للخبرات و بنفس الموضوع ممكن الواحدة تضيف أفكارها و كلنا نستفيد

7 الكاتب غيث, on 15-08-2009 19:57
يا ستي الصمونات جاهزات عندي وبايتات وما عم اعرف شو سوي فيهم يالله مباشرة على التطبيق بكرة اذا راد الله الله يجزيك الخير يا ام الافكار والذوق بتعرفي صار مصورة عندي بالكاميرا 3 اكلات منشان رمضان والصور جاهزة بس العترة على كتابة الوصفات الهيئة اني كسلانة :sigh

لا والله بس الوقت كتير ضيق صار لي شي 10 ايام مجهزة الصور وما صار لي اقعد بهدوء منشان ابعتهم اذا في نصيب رح تتيسر الامور قبل رمضان وعذرا على قلة مشاركاتنا بس اعتقد انا بالذات بتقدري وضعي وشكرا لذوقك منى

8 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-08-2009 22:49
مرحبا يا منى شو هالافكار اللي بتجنن هذه ما شاءالله عليك يعطيك الف الف عافية يارب شكلها كثير مشهي ولذيذ ان شاءالله راح اجربها

9 الكاتب منى, on 16-08-2009 07:56
هلا غيوثة

يلا على فضاوتك و مهلك كتبيهم , لسا بقيان اسبوع ان شاء الله , بدنا ياهم كلهم :zzz

الله يكون بالعون و ييسر عليك و يبارك بوقتك و يومك كله . و انا رح استنى رايك بعد التجربة و يا رب يكون يممي

10 الكاتب منى, on 16-08-2009 07:58
هلا هيا

ان شاء الله تجربيها و تحبيها و تعجب العيلة و اكيد رح تخبريني :zzz

11 الكاتب gsm, on 16-08-2009 13:13
السلام عليكم منى واخيرا عرفت الوصفة السرية :grin

بس عن جد كتيير شكلها ظريف وطيبة لأ وكتيير سهلة يعني دائما بزيد عندي توست وما بعرف شو اعمل فيه بقوم بعمله بقصمات بس كان بدي اسالك سؤالين اول شي بصبر استعمل التوست تبع القمح الكامل لأنو هاا على طول متوفر عندي والسؤال التاني يا ترى فيني استغني عن المايونيز لأنو ما بحبه ابدا وما بحب استعمله الا إذا رح تفرق الطعمة كتيير
ما تواخذيني حاسة حالي كتبت جريدة
شكرا كتييييييييييييير منونة

عم اغلبك معي كتيير

12 الكاتب منى, on 16-08-2009 14:14
هلا فيك

و لا يهمك يا عسل .. هلا التوست الكامل اتوقع بيصير , بس انا مو مجربة , اما المايونيز رح تتغير الطعمة من دونه , ما بعرف , بخاف تجربي و ما تطلع تمام , بعدها تزعلي .. بس بكل الاحوال كل شي تجربة و هل الوصفة من اولها لاخرها تجريب بتجريب , فشو خسرانة

13 الكاتب dado, on 16-08-2009 14:16
هاي منوش
ظريفة كتير هالفكرة لحتى ما ينرمى الخبز البايت وتغيير شكل عن فكرة الفطيرة المصنوعة من عجين.
أنا عادة بعمل طبق حلو لما بيزيد عندي خبز.. بغمس شرحات الخبز بالحليب المغلي مع السكر وماء الزهر وبخلطها مع مكسرات وزبيب وبحط على الوجه قشطة وبدخلها على الفرن.
عالتجريب القريب ان شاء الله
شكرا منوش..

14 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-08-2009 18:38
هلا اخت منى ان شاءالله راح اجربها واكيد بخبرك بس بدي اعرف منك اذا عندي صور لوصفات كيف بدي ابعثهم لك ياريت تخبريني وبكون شاكرة الك لأنه في وصفة انا بعثت لك اياها قبل هيك اللي هي لحمة بالبرتقال فكثير حابة اني ابعث لك صورتها بس مو عارفة كيف

15 الكاتب سلاف, on 19-08-2009 12:48
صباح القشطه والعسل والنور والأنوار لاغلى منى بالدنياولكل اهل الموقع
اشتقتلكن كتير مع العلم اني كل كم يوم بفوت من موبايلي وبشوف شو فيه شيئ جديد عالسريع بس مافي وقت لا اكتب تعليق ولا سجل دخول بتعرفي الصيف وعجقته والحمل والتعب
يسلم اديكي منى حبيبتي منظر الاكله شيئ بجنن مبدعه من يوم يومك الله يحميكي يارب
لساتي بسوريا لسه لبعد العيد لارجع من اجازتي بصير فوت كل يوم ان شاء الله وكون مع العيله اللي بحبها كتير

:zzz

16 الكاتب بدور, on 19-08-2009 20:16
ما شاء الله عليكي من وين بتلمع براسك هالافكار السحرية وبتخترعي هالاكلات المحروفة الله يحميكي يارب و يكتر هالاختراعات هدول و تغنينا فيون يارب :zzz

والله شكلها كتير مشهي و مكوناتها بتجنن يسلمو كتير ميمو الحلوة

17 الكاتب nsz, on 22-08-2009 02:47
السلام عليكم
الله يعطيكم العافية الموقع بيجنن عنجد وخاصة الحوار
أنا صار لي شي سنتين بفوت علموقع بس اليوم صرت عضو
حابة قول الله يجزيكم الخير على هلموقع
أنا تزوجت على أمريكا من شي سنتين وأنايادوب بعرف أقلي بيضة وكان موقع لقمة هو الدليل كنت دائما ألجألو لما كنت عمأتعلم الطبخ أو لما بدي فكرة جديدة وخاصة أنو بلفعل كل أكلة على أصولهامتل مابحب ...
والأحلى "تعالو نحفظ حديث" بلفعل الله يجزيكم كل خير آمين
وهلأ عم قول لكل رفقاتي علموقع وبتمنى شارك إنشاء الله..

18 الكاتب منى, on 22-08-2009 11:57
هلا دالو

ان شاء الله تجربيها و تكون نممي و على زووءك
و هي فكرة الفطيرة بتشهي , اكيد طيبة كتير :zzz

19 الكاتب منى, on 22-08-2009 11:59
هلا هيا

ان شاء الله تجربي الوصفة و تكون يمم .

الصور بتحمليها على ايا موقع و بعدها بتبعتيلي رابطها

20 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 27-08-2009 18:41
مرحبا منى جربت الوصفة اليوم وكانت رااااائعة جدا بكل معنى الكلمة بجد الكل عندي حبوها كثير تسلم هالايادي يارب والله يبارك لك ويبارك فيك وان شاءالله بتشوفي هالموقع يكبر ويكبر يارب

انا كنت كثير حابة شارك بالمسابقة بس سبحان الله ما الي نصيب لأني كنت مسافرة ولما رجعت لقيت المسابقة بدأت فزعلت كثير لكن قلت مش مشكلة خيرها بغيرها ان شاءالله وشكل الوصفات اللي منزليها الاخوات كثير طيبة اكيد راح ابدأ اجرب منهم واحدة واحدة والله يبارك بالجميع يارب وشكرا الك علي هالموقع الحلو اللي جمعنا كلنا مع بعض وعمل روح المنافسة بينناوشجعنا على انو نعمل وصفات جديدة مرة ثانية بقول لك يامنى شكرا الك والله يبارك لك يارب

21 الكاتب larooo, on 27-08-2009 23:11
السلام عليكم ورحمة الله وبركاته
اليوم جربت الوصفة ..وطلعت فخمممممة جدا

يسلمو ايديكي منى .. ورمضان مبارك عالجميع
ولو متأخرة شوي

22 الكاتب منى, on 28-08-2009 11:22
هلا سلاف

اي شو هل الصباح الحلو , ريتك تسلميلي يا قمر
الحمد لله اطمنت عليكي و ان شاء الله دايما بصحة و عافية , سلميلي على الاهل و ربي يديم عليكم اللمة الحلوة و الناس الطيبة و ديري بالك على حالك و البيبي الجديد :zzz

23 الكاتب منى, on 28-08-2009 11:28
هلا بدورة

ان شاء الله تجربيها و اكيد بتعجبك باذن الله , بتخطر ببالي على اد ما بهدس بالطبخ
اذا جربتيها خبريني , رح استنى رايك

24 الكاتب منى, on 28-08-2009 14:51
هلا فيك اختي nsz

شرفتي اختي و نورتي الموقع , مية هلا فيك
و الف شكر لكل كلامك المزوء و الحلو و ان شاء الله جازة الدهر و كمان ان شاء الله مية صحة و عافية على كل لقمة اكلتوها من الموقع و كانت على زووءك و زوء ابو الشباب :zzz

اتمنى تبقي معانا على طول اختي , يا هلا فيك

25 الكاتب سارونات, on 30-08-2009 03:11
لسلام عليكم و رحمة الله و بركاته

منووش الوصفة شكلها كتير حلو ما شاء الله و استعمال حكيم للخبز انا ما فيني حط لا صويا صوص و لا قشطة فهل بتنفع او لا و اذا ما حطيتهم هل بستبدلهم بشي تاني و هل بتعرفي شي حشوات تانية للوصفة

--- منووش بدي اسالك اذا بتعرفي طريقة عمل موس الشوكولا

--- كمان في عندي كمية مخلل خيار صغير كيف فيني احتفظ فيها لاطول مذة و هل ممكن فرزها مع العلم انه مصفى من مائه

بالتوفيق
سلام

26 الكاتب منى, on 29-09-2009 07:49
هلا هيا

الف صحة و هنا اختي , على البك و الب كل مين داقها و كتير انبسطت انها عجبتك و عجبت العيلة و كانت على زووءكم

و لا يهمك هيا الجايات اكتر من الرايحات ان شاء الله , و يا رب تكون الوصفات الي عم تجربيها عم تعجبك

27 الكاتب منى, on 29-09-2009 08:24
هلا لارو

الف الف صحة و هنا على كل لقمة و بكل فرفوطة
الله يسلمك اختي , مية اهلا و سهلا فيكي

28 الكاتب منى, on 30-09-2009 20:26
هلا سارونات

انا هيك جربت الوصفة و هيك طلعت طيبة , بتعرفي بهيك وصفات ما فينا نغير كتير شي و الا رح تبطل الوصفة طيبة , اذا مو متوفرة القشطة فما انصحك تجربيها :roll

بعرف طريقة موس الشوكولا و ان شاء الله بنزلها بس ما بعرف ايمتى , الخيار المخلل ممكن تعمليله نقعة من خل و ملح و مي و تحفظيه في البراد , ما بينفع من دون مي و لا بينفع بالفريزر

29 الكاتب بشرى, on 10-11-2009 22:03
منامينو يسعد أوقاتك
بدي إسألك حبيبتي المرة الماضية أنا جربت هالأكلة وكانت روعة وكتير طيبة وما أخدت وقت أبداً بس بوقتا ما كان عندي ولا نوع قشطة وساويتها بدون القشطة
هلأ بكرا ان شاء الله رح ساويها بس عندي قشطة معلبة " قشطة نستله " بينفع استخدمها ولا لازم القشطة الفريش ؟ ما عرفت أنو قشطة لازم نستخدم :roll

ويسلمو ايديكي يا عسل على هالأطباق الرائعة

30 الكاتب بشرى, on 13-11-2009 08:18
منون أنا خايفة يكون التعليقات ما عم تظهر عندك ؟ آسفة عالنق :sigh

31 الكاتب ام سوسو 2009, on 08-02-2010 11:32
يسلموا ايديكي يا منى انا طبعا معكن بقروب الفيس بوك ومشتركة بهاد الجروب من فترة بس عنجد بجنن لانو صاحبتو بتجنن والبنات الي فيه كلكن حبابين وما شاء الله عليكن

يعطيكي العافية ميمي

32 الكاتب ام سوسو 2009, on 08-02-2010 11:43
والله باينتا بتجنن يا منى عنجد يسلموا ايدكي

33 الكاتب dentamaniac, on 17-03-2010 09:05
انا جربتها و طلعت روووووووووووووعه
كتير كتير طيبه و عجبت كل البيت
الله يا رب يجزيكي كل الخير يا منى

34 الكاتب منى, on 18-03-2010 11:42
هلا بشورة

اسفة للتاخر بالرد , معلش ازرعيها بدقني

انا لهل الوصفة استخدمت القشطة المعلبة , ما بعرف اذا ممكن تصير بالفريش :roll

هنا و الف الف صحة و عافية يا رب بكل لقمة

35 الكاتب منى, on 18-03-2010 11:44
هلا ام سوسو

من زووءك اختي و نورتي هون و بالفيس بوك .

ان شاء الله تجربيها و تحبيها و تكون مستاهلة

36 الكاتب منى, on 18-03-2010 11:48
اهلا و سهلا سوسن

ان شاء الله صحتين و عوافي على البك و الب كل العيلة الحلوة واحد واحد
خليلي عينك على هل الدعوة , ان شاء الله انتي كمان يجزيك كل الخير و يوفقك وين ما مشيتي

37 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-06-2011 18:24
Halaaa bel jami3. 3anjad ekht Mona Allah yjaziki kel kher 3a kel shi 7elo bet2admilna yah, o aham shi 3a toulet balek 3alena :zzz

Allah ysallem ideki o ya3tiki el 3afyeh.
Kent bedi as2alek 3al khabez.. momken asta3mel el baguet o a7adra abel byom?? ana 3ayshe bi Espania o 3adatan huwe elli bashteri menno o bsara7a bizid 3andi!! Shokran ktir o 3abastana jawabek bi faregh el saberrr la2ano farat ri2i 3a hal wasfeh :cry

38 الكاتب شفاء, on 15-09-2011 09:34
جربتها وطلعت لذيذة وشكلها كتير حلو
يسلمو ايديكي

39 الكاتب منى, on 15-09-2011 19:35
الله يسلمك و يحفظك بصحتك و عافيتك و ممنونةثقتك في

40 الكاتب منى, on 15-09-2011 21:58
هلا ام جلال

الله يعافي البك حبيبتي , شكرا كتير على تواجدك الطيب معنا , منورة يا جميل
فيكي تستعملي الباغيت اكيد , بس مهم انو تقطعيه ليكون سماكته بسماكة التوست المقطع لان رح يسمك بعد ما تحطيه مع بقية المقادير. فيكي تحضري الحشوة قبل بيوم بس التطبيق بنفس اليوم

ان شاء الله تجربيها و تكن نممممم

41 يسللللللللللم ايديكي
الكاتب amoula, on 16-12-2011 12:44
عملتها اليييييييييوم وكنت مستعجلة بدي طبخة سريعة ما بعرف شو خطرلي جربها طلعت بتجنننن , عن جد ما خطرلي انو هيك رح تطلع الطعمة المايونيز مع التوست وكلو بجننن , وطعمة الحشوة رهيبة بلمسة الصويا صوص والكاتشب , الله يسلم ايديكي يااارب ويجزيكي كل خير , وصفة بتستحق التجربة

42 الكاتب منى, on 17-12-2011 11:08
الف صحة و الف الف هنا , كتبير انبسطت انك جربتيها و كانت على زووءك

عوافي حبيبتي و شكرا لتعليقك

43 الكاتب هديل85, on 09-02-2012 11:45
لحد الآن ما عرفت شو هوه الجبن كريم ؟ وما لقيت منه ولامرة ؟؟ بدي المساعدة فيه

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 21/12/2009 )

< السابق		التالى >

[ عودة ]