يوم الأحد الماضي من يوميين كان عندي جمعة لرفقاتي أو متل ما منسميها عندنا بسوريا , جمعية بنات , و كنت عازمة فيها رفقاتي من ايام المدرسة , من عهد الانكليز يعني . عملتلهم هل السفرة الخفيفة و الحلوة و حبيت شارككم فيها .

الصور ما كانت واضحة و انا بساعتها ما بقى فيني اعصاب و لا رواق لحتى امسك الكاميرا و صور بمزاج و هي هي الصورة الوحيدة من بين كل الصور الي ما فيها ارتجاح , منيح الي طلع في صورة منيحة  و الشكر لسيما و كمان لجوديتي الحلوة . بسم الله ما شاء الله لا قوة الا بالله ..

الوصفات من تحت و اليمين و نحنا ماشيين لفوق 

الجاط المربع فيه :

محمرة

متبل

حمص

سلطة مشويات



جنبه فخذات الدجاج


فوقه لقمة تشكن , بس باضافة جديدة


على يسارها صينية بيتزا بعجينة العشر دقايق و هي التبلة الي استعملتها للصوص


فوق لقمة تشكن في السلطة المقلمة , بتتبيلة جديدة


على يسارها سمبوسك بالجبنة البيضا و القشقوان


و على يمينها يلنجي بورق العنب و يالنجي البصل


فوق السلطة المقلمة كبة بس نوع جديد و حشوة جديدة  اتعلمتها من حماتي الله يديمها بصحتها و عافيتها


على يمين الكبة سندويش بطاطا


و فوق الكبة في صينية جديدة اختراع , لسا ما طلعت باسم يلبقلها


و بجنبها فيه بطاطا كوينز



الحلويات نسيت أصورهم بس لتجي ضحى بتحكيلكم عنهم


كاتو الايس كريم بس بشكل جديد


كاتو الكراميل كمان بلمسات جديدة




تعليقي على الوصفات :

لقمة تشكن و الصينية التانية المجهولة الهوية لحد هلأ كانوا بياخدوا العقل

السلطة شغلة و قالتلي أية هي اطيب سلطة بتدوقها بحياتها

يالنجي البصل عمل ضجة و الكل حبوه و يمكن كتير منهم بيدوقوه لأول مرة

سندويش البطاطا كمان روعة بس من العبطة التدع معي شوي

البطاطا كوينز هل المرة ما كتير نجحت معي لأن قشرت البطاطا و بعدها سلقتها فشربت مي كتير , عدت أنا كترت كورن فلور و هادا أثر على الطعمة و ما طلعت معي متل كل مرة

الحلويات كانت شي ناهي و قطايف و غير شكل و شو زعلت لان نسيت صورهم , لان شكلهم كااان بياخد العقل , بس معلش الجايات اكتر من الرايحات ان شاء الله .

مع أن الوصفات خفيفة كلها ما عدا الكبة بس أخدوا معي شغل و تحضير اكتر من يومين , بديت يوم الجمعة بس على خفيف و يوم السبت و الأحد كان الركض على أعلى عيار . أما من ناحية الفصولة الناقصة فهل المرة نفدت بريشي و ما صار معي أفلام كرتون متل أخر عزيمة من فضل الله علي , بتتذكروا شو صاار معي , ايييييه . هلا انا عملت خبصتين , الاولى أن حضرت كبة نية بزيت الزيتون , بس ما استعملت جوز شامي فاتح .  طلعت طيبة كتير بس لونها ما عجبني و لذلك احتفظت فيها في البراد حفاظاً على سمعة المحل و الغلطة التانية  أن تركت خبز الصواني لأخر شي و هيك اتاخرت شوي بالتقديم و من العبطة ما طلع خبز سندويش البطاطا متل ما بدي  

هادا كل شي لليوم و موعدنا في عزيمة جديدة و سفرة تانية ممدودة بنعم الله و بركة من عنده و ربي يديم نعمة علينا و يعرفنا ياها بدوامها لا بزوالها و كمان ربي يديم الصحة و العافية و الله يرزقه لأبو الشباب رزق حلال طيب مبارك و تبقى دياره عامرة .

سلام

تعليقات (55)

1  الكاتب dado, on 11-08-2009 19:01 كيفك منوش..  منيح يلي نفدتي بريشك هالمرة..   سبحان الله بتقولي بكل عزيمة لازم يكون في فصل ناقص... أو لأنو وحدتنا بتكون معجوقة لراسها بمليون شغلة وكل الأكل لازم يكون جاهز بنفس الوقت فـ بتفوت شوي بالحيط   السفرة كتير شكلها مشهي.. والغطا الزهري ناعم وشفاف وفيه حب كتير.. كأنو بيشبه شي وحدة أنا بعرفها   عجبتني فكرة سندويش البطاطا.. ولا مرة خطر على بالي تقديمها.. بس ظريفة للبوفيهات.. انشالله بأقرب عزيمة رح جربها.

2  الكاتب لارا مينا, on 11-08-2009 19:27 الله يعطيكي العافية والصحة وتسلم الإيد إلي طبخت وضيفت سفرة واضح عليها ومن لونها إنها أنثوية بحته وعلى فكرة نبغى الصينية المجهوله تصير معلومه وتسجل رسميا في الأحوال المدنية ويكون لها اسم وتاريخ ميلاد موثق و كمان التتبيلة الجديدة للسلطة   وعندي اقتراح بسيط ياليت مستقبلا أي وحدة فينا تعمل عزيمة تصورها وترسلها حتى البقية يستفيدون من تنوع الأفكار خصوصا رمضان على الأبواب وألف شكر للجميع .

5  الكاتب منال, on 11-08-2009 21:53 شي كتير ظريف ماشاء الله شطت ريالتي

6  الكاتب ام احمد الغالي, on 11-08-2009 22:17 امين يارب يا منى الله يسمع منك يارب  عزيمه حلوة ومفتخرة   وتعيشي وتعملي عزايم يارب حمودة جنبي وعم يقول ساسووو يعني اكلات طيبه (هو كل ما شاف حلو بيقول ساسو ) هو كمان بيقلك يسلم دياتك يارب

7  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-08-2009 23:39 اهلين منى. بسم الله ما شاء الله. يعني العزيمه شكلا من اولا لاخرها بناتيه . ابتداءا بالالوان و انتهائا بالاصناف. ما شاء الله كل شي احلا من التاني. تسلم الايدين اللي طبخت و اللي ساعدت. و الله يخليلك ابو الاولاد على راسكم و يرزقكم الرزق الحلال و يديم النعمه يا رب. اسمالله كل شي في منتهى الذوق كالعاده يا منى.   كل الحب

8  الكاتب أم جودي, on 11-08-2009 23:53 روعه ماشاء الله لا قوة الا بالله تسلم ايدك وبالنسبة للفصول الغريبة اللي صارت معك رح احكيلك نهفة صارة مع مرت اخوي كنت نازلة انا على سوريا زيارة وعزمتني على العشى وعملت بطاطا مع دجاج وششبرك وكبب وملوخية وهي بتعرفني بموت بشي اسمو ملوخية وبيوما من العبطة طلعت محمصة نعناع بدل ملوخية لانو بستعملها ناعمة وكان عندا انفلونزاوما ميزت بين ريحة النعناع وريحة الملوخية وشو كانت أكلة غير شكل

9  الكاتب DOUHA, on 12-08-2009 00:33 انا جيت    رح احكي على بساط احمدي هلئ  يوم الاحد كان موعد زيارة عند منى والله انا كنت حابة روح بس كان عندي ظرف المهم ماما اصرت اني روح  اول ما فتت على بيت منى استقبلتني منى باالوجه البشوش وكانت الجمعة بتجنن لاول مرة بصراحة بكون مع صبايا ومنحكي حديث مفيد انا ما بعرف اغلب الصبايا يلي كانت بس جد كان في مواضيع مختلفة عن ( الطفولة - الشباب - المعاقين - شوية تجارب طيبة )  يعني طلعنا بالاخير بشي مفيد لاسف اغلب المشاوير يلي عم كون فيا (تصنع - مبالغة بالمكياج وكاننا بعرس هههههه وحديث تافه ,,,,,,,,,الخ)  المهم صار موعد لقمة طيبة ولاقيت بنت منى جودي عم تحط المفرش الوردي على الطاولة وبلمسات زوءءء    ومحضرة حالا للتصوير   جهزت الطاولة كانت اصناف خفيفة وطيبة كتير   رح خبركون عن سر  نحنا بحلب اذا كنا بمكان فيو اكل مهمة صاحبة البيت انها تحلف على الضيوف انون ياكوا كتير        بس انا والصبايا ريحنا منى من هل المهمة ابدا ما كنا خجلانات      كانت الاكلات طيبة كتير انا اكلت لقمة تشكن وسلطة وافخاد دجاج  بطاطا كوننز مممممممم وسمبوسك بس كان فيو اضافة بس مافيني خبركون عنا سررررررررر     شندويش بطاطا ييميمييممي   يلنجي البصل هائل    ما اكلت الكبة والاكلة يلي مالا اسم لاني شبعت   المهم وقت الاكل الكل اجتموا على كلمة وحدة اممممممممممممممممممممممممم طيبة يسلموا يامنى  ومنى عم تعطيي شوية مقادير على الطاير    بعد ما خلصنا الاكل اجانا الحلوو    ويلي انا من كاتو الكراميل شكلوو كان مختلف شوية عن يلي بالموقع الكورن فلكيس كان على الداير بس الكراميل شوي بطريقة تانية وكمان فيو اضافات  كاتو جلاس على شكل وردة كان مغري كتير  بصراحة كانت سفرة حلوة وطيبة ودما خفيف  رح خبر عن شي انو بنت منى جود رح تطلع ست بيت ممتازة هية عم تساعد منى باغلب الاشياء وعم تساعد بغسل الصحون  كتير البنت مرتبة    الله يخليلا يارب    طبعا فرح وكريم هي حكاية بذاتا   كتير البنت حنونة  قبل ما انهي التعليق بحب ضيف اني طقوس رمضان بدي موسمو عند منى كانت البيت فيو فوانيس رمضان   مبروك للجميع برمضان الكريم  ومبروك لقمة طيبة .......    شكرا منى

10  الكاتب غيث, on 12-08-2009 04:59 الله يسلم هالايدين  يارب  تعيشي وتعملي عزايم  والله نورتيني في عندي مشروع عزيمة قادم ورح اعمل من هالسفرة شي بيشهي وبيبيض الوجه ويمكن ميمو رح تساليني وين كنت غاطة انا معكم وعم طل عالموقع بس اقل من السابق لاني مشغولة جدا عذرا منك منى بديي اسالك انا اذا حبيت ابعت وصفة منشان طبق رمضان بيصير اكون عاملة اكلة معروفة بس بطريقة محرفة وغير عن الطريقة التقليدية بشكل ابسط بتناسب الكسل الللي بيصيبنا برمضان عدا عن ضيق الوقت بهالشهر الفضيل وكمان الحر الشديد بيعطي وهن عام ولا حصرا لازم تكون اكلة جديدة بكل محتوياتها واخيراا شكرا لك وكل عام وانت واسرة الموقع بالف خير ورمضان كريم

15  الكاتب منى, on 12-08-2009 12:09 هلا دالو   ايه و الله لازم يكون في شي مو تمام و مو على كيف صاحبة البيت , بس المهم الصورة العامة تكون منيحة هلا انا ما فتت بالحيط فتت بالفرن و انا عم اقرا و انفخ عليه لحتى يشد همته شوي و يبيض وجهي     خليلي عينك دالو , كاني عرفتها لهل الحلوة الي عم تحكي عنها     اذا جربتي سندويش البطاطا رح يعجبك كتير , كاني متاكدة , و اذا بتحبي ضيفي مع المايونيز شوية توم , نمم نمممم

16  الكاتب منى, on 12-08-2009 13:56 هلا لارا  اي مو تكرم عيونك , هلا عم دور على اسم مناسب و بس ما لقيته ببقى بسجلها رسميا أما صوص السلطة فهو ليمون و بشرته و خل و خردل و ملح و رشة زعتر اخضر و بصل جوانح مفروم و نقعته بالصوص شي ساعة قبل التقديم     و الله اقتراح ممتاز , ان شاء الله تشركنا كل الاخوات بعزايمهم و نلطش افكار و نغني سفرتنا

17  الكاتب منى, on 12-08-2009 13:44 هلا منال   اتفضلي اختي و الاكل على اد المحبة   ان شاء الله تجربي شي وصفة و تكون على زووءك

18  الكاتب منى, on 12-08-2009 13:44 هلا ام احمد   الله يخليليك ياه و تعيشي و تعمليله ساسويات على زووءك و يباركلك فيه و تشوفيه متل ما بدك و احسن يكتيرر بكتير

19  الكاتب منى, on 12-08-2009 13:46 هلا سيمو   الله يسلمك أختي و الف شكر الك للدعوات الغالية و الكريمة    انا كمان مرة قرات عن عجينة فيها قشطة , عجبتني فكرتها بس و لا مرة جربتها , بس هي ببالي و الا ما شي يوم جربها ان شاء الله .    يمكن اللون من التصوير , على كل جربي عجينتي تبعة السمبوسك و ما بتكوني الا رضيانة و على مسؤوليتي ان شاء الله , ما بتعرفي هل الوصفة انا مشهورة فيها بين اهلي و قرايبني و طريقتي صارت معتمدة عند امي و خواتي و حتى ام زوجي و مين ما داقها بيقلي هل السمبوسك شفلة     لا تقلتي و لا شي , اسا سؤال او خدمة انا تحت امرك

20  الكاتب منى, on 12-08-2009 13:54 هلا امونة ام الكنافة   ايه و الله امونة , بناتية و لطيفةو كربوجة هل العزيمة , اشتهيت الحبايب معي     الله يسلمك يا امون و ربي الك متل هل الدعوات و اكتر و اغلى و تنولي كل الي في بالك , شرفتي حبيبتي

21  الكاتب منى, on 12-08-2009 14:01 هلا ام جودي   و الله نفس الفصل صار مع مرة خالي السنة الماضية برمضان , بس وين تمرق علينا , بقينا لاخر رمضان و نحنا عم نسمعها ان فطرتنا نعناعية

22  الكاتب رنا, on 12-08-2009 14:09 ياعيني والله شي طيييييييب   بس انا الي عليكي عتب ...ليش بقا بس بتعزمي ضحى ...طيب ونحنا شو بس هي من الاعضاوات يعني     اما الاكل عن جد كله انوثة لانه مافي رز ومحاشي تقيلة بتحسي اكل البنوتات غير شكل كله نعومة ويمكن مابعمري شفت بنت الا بتموت عاليالنجي والسلطات اما الرجال كبب وماشابه من السماقيات والزفر هادا الاكل بيعتبروه على قولة بابا تسكيتة جوعة   الاكل كله مرتب ولذيذ وبانتظار الوصفة الجديدة على نار بدنا شي جديد لرمضان والله يعطيطكي الصحة والقوة ويديمك على اهلك وعيلتك     بس من وين جايبة غطا الطاولة الزهري رجعتيني سنين لورا وقت كنا نلعب بالباربي ونجيب كل شي زهري

24  الكاتب ام حسين, on 12-08-2009 14:47 ماشاء الله سفرة دايمة يارب بتشهي  بتعرفي انا لما بيكون عندي عزيمة بنط فورا على مواضيعك تبعت العزومات  مشان اخد منها افكار الاطباق     وذكرتيني بسندويشات البطاطا بالماما على طول اذا بدها تاكل لازم يكونوا مقرمشين والا ما بتاكل وفكرتهم حلوة ولا مرة خطر على بالي اعملها بس ان شاء الله ضميتها لقائمة العزايم      ويسلموا يا ست منى واخيرا مشي حال التسجيل

26  الكاتب امونه, on 12-08-2009 19:11 يا عمي شي اكابر كتير و الله     دايما يا ست منى شغلك بعبي العين و القلب يسلموا هالديات ان شاء الله و انا بستنى وصفة الكبه الجديده الي عرفتيها من حماتك الله يعطيها العمر و الصحه و لا تنسي الطبق الجديد الي طلعتي فيه كمان هاتي لنشوف شو أبدعتي...    بس بجد كالعاده سفره بتفتح النفس ... يعطيكي الصحه و العافيه و يسلم ايديكي يارب...  و عفكره انا متل الاخت ام حسن لما تيجينا شي عزومه بركض على القسم تبع البوفيهات عندك و بصير الطش وصفات     يا رب تضلي بهالإبداع ع طول يارب ...    و تسلم دياتك مره تانيه ...

27  الكاتب ام دانية, on 12-08-2009 23:30 يسلم هل الديات يارب تعيشي وتعملي عزايم والله يديم الفرحة والمحبة بديارك بصراحة من حكي الاخت ضحى تمنيت كون معكن بس العز للرز والبرغل شنق حالووووووووو

28  الكاتب laraye, on 13-08-2009 01:36 فعلا ما شاء الله و كان  السفرة بتاخد العقل   انا اليوم عملت اكلة كتبر بحبا وطبعا الوصفة من عندك و هي الرز بالدجاج وطلعت بتاخد العقل كتير كتير طيبة  الله يجزيكي كل خير يا منى

29  الكاتب منى, on 13-08-2009 07:31 هلا ضحى   بالأول هنا و الف الف صحة و عافية على كل شي قتيه و الي ما دقتيه عتبان عليك , بس خيرها بغيرها , المرة التانية رح حط بطاقات و قطع لحتى ما في الواحدة تقوم من على السفرة الا و داقت من كل شي     ردك كله زووء متلك , خليلبي عينك و انا ممنونتك و لو كنت ما جيتي كنت رح ازعل     على فكرة مدري جوديتي مدرية فروحتي قالتلي , ماما رفيقتك الي لابسة.. ( انت يعني ) لطيفة كتير , قلتلها و الله صح

30  الكاتب منى, on 13-08-2009 23:04 هلا سوما   الله يسلمك أختي , هادا بس من زووءك

31  الكاتب منى, on 13-08-2009 23:05 هلا غيوثة   ان شاء الله تكوني مشغولة بالخير حبيبتي , و الله يكون بالعون على العزيمة الجاية     الوصفة شو ما بدك , جديد قديم , من السندويش للحلويات , ايا طبق بيكون على مزاجك و اذا كان سهل فأحسن و أحسن     ان شاء الله تعيشي و تعيدي علي و على كل حبابك أختي و الله يديم الصحة و العافية ..    شكرا للتنبيه , تم تصليح الروابط الي داخلة ببعضها

32  الكاتب منى, on 13-08-2009 23:28 هلا أختي قهوة   الله يسلمك أختي و ان شاء الله بيوت المسلمين كلها عامرة بالخير و المحبة و التقوى

33  الكاتب منى, on 13-08-2009 23:47 هلا سمسومة     معناها حضريلي حالك بأول عشر ايام من رمضان اذا ربنا يسر و عطانا عمر و كمان حضريلي طلباتك , شو حابة اطبخلك     الله يخليلي ياكي يا زووء و ربي يديم المحبة حبيبتي

34  الكاتب منى, on 13-08-2009 23:47 هلا رنونة     انت ارجعي على سوريا و خبريني لحتى تكوني اول واحدة من المعازيم يا قمر ..    الغطا جايبته من سوق القماش , بس كنت ناوية جيب واحد تركواز ليطبق مع ديكور البيت , بعدها غيرت رااي و جبته زهري لحتى رجع الصبايا كم سنة لورا و زكرهم بالطفولة , و تركت التركواز لسفرة رمضان اذا ربنا رتد و يسر

35  الكاتب منى, on 13-08-2009 23:48 هلا ام السوس     الله يعطيكي العافية و ييسر الشغل عليك و الله يسلمك و يحفظك ..    البصل عملته مع اليالنجي , بنفي حشوته و بنفس الطنجرة و هو الي ظاهر على اليالنجي , لا ليمون و لا بطاطا , و اتمنى تجربيه لان عن جد مممم     المفرش كان القصد منه ان الجمعة بناتية و كلها أنوثة و بالفعل حسيته لفت نظر , يعني فكرة الواحد ممكن يغير فيها شكل .    السلطة اللمشوية هي عبارة عن بندورة و فليلفة حمراء و خضراء و بصلة و كم فص ثوم كله مشوي في الفرن و بعدها قشرته و فرمته ناعم ناعم و ت لته بالملح و بس و بعدها على الوج حطيت زيت زيتون , سهلة كتير و طيبة كتير و ممكن تحضريها لما بيكون عندك شي طبخة بالفرن , تحطي معها هل الخضرة ليعطيكي طبق جديد من دون مجهود زيادة .

36  الكاتب منى, on 13-08-2009 23:49 هلا ام حسين   يا ستي نورتي و شرفتي و اسفة للمشاكل الي صارت .    ان شاء الله دايما تستفيدي و يكون في شي جديد يبيض وجهك ادام الضيوف و سندويشات البطاطا شي ناهي و بتعجب الكل من الكبير للصغير , اليوم كمان كان عندي جمعة و عملتها و عن جد الكل قال يمممم حتى ستي الله يخليها و هيا ست مقدرة و ما بيعجبها الا الشي الاصولي و التمام     هلا فيك مرة تانية اختي و مية اهلا و سهلا فيكي

37  الكاتب امونه, on 14-08-2009 01:11 ست منى لو بدي ابعت وصفات جديده أبعتهم على ايميلك؟؟

39  الكاتب منى, on 14-08-2009 08:54 هلا أختي وسيلة     نورتي و شرفتي و مية اهلا و سهلا فيك .    مشكورة للتواجد الطيب و اتمنى ان تجربي شي وصفة و تكون على زووءك

40  الكاتب منى, on 14-08-2009 08:55 هلا أمونة     الله يسلمك يا مزوءة و يا رب مون بيضت وجهك اذا جربتي شي و يكون يممي     تكرم عيونك على الكبة و الوصفة التانية ان شاء الله     الف شكر الك لردك و لكل الكلام الحلو الي فيه , نورتي يا عسل     هلا اذا حابة تبعتي وصفة تانية ابعتيها وين ما بتحبي , على ايميلي او كرد على ايا موضوع , وين مو حابة

41  الكاتب منى, on 14-08-2009 08:55 هلا أم دانية     الله يسلمك و يحفظك و يخليكي و يباركلك بدانية و اخوتها يا رب   ليش , ما في حدا شنق حاله .. ان شاء الله العزيمة التانية بتكوني بحلب و بتشرفي أختي

42  الكاتب منى, on 14-08-2009 08:56 هلا أختي laraye     الله يخليلي ياكي على هل الدعوة الحلوة و الكريمة كتير , امين اختي و انت كمان .    ريتو عافية و الف صحة و هنا يا رب على الرز و الدجاج و على كل شي جربتيه او ناوية تجربيه من لقمة طيبة

43  الكاتب منى, on 14-08-2009 11:37 هلا فيك أختي سما     شرفتي الموقع و نورتيه و صحيح و عسى أن تكرهوا شيئا و هو خير لكم , انا كتير مبسوطة انك تعرفتي على الموقع و لو كان عن طريق واحدة لاطشة وصفة منه .  الف شكر الك للكلام الي في ردك و اتمنى ان تعجبك الوصفات كمان و تجربي شي و يكون على زووءك    الله كريم أختي , ان شاء الله ربنا بيسر و بعمل كتاب فيه كل وصفات الموقع .    مية اهلا و سهلا فيك اختي مرة تانية و ان شاء الله تبقي منورة على طول

44  الكاتب gsm, on 14-08-2009 15:50 يا سلام ما شاء الله لا قوة إلا بالله شو ها منوشة شو هل السفرة والله لما شفتها قلت لحالي آخ بس لو كنت رفيقتك كنت اكلت من هل الأكلات الطيبة بس ما شاء الله مو بس أكل طيب لأ وزوق وشي مرتب واكابري ما شاء الله عليك والله لما اشوف سفرك بقول لحالي يا ترى خرج يطلع معي هيك شي بس عن جد صار عندي فضول اعرف شو هل الأكلة العجيبة والسرية   اكيد طيبة ومنفنفة متل باقي كل اكلاتك الطيبين على فكرة أنا غمبارح عملت شيخ المحشي كوسا وعلى طريقتك وعن جد طلع كتيير طيب زوجي كيف عليه مع إنو هي اول مرة بعمل هل الأكلة بس لو تشوفيني كيف انا وعم احفر المحشيات عم اقرأ على كل وحدة المعوذات بس شي ما تتشقشق وتنثقب لأنو هي اول مرة بحفر هيك حجم من المحشيات   ما تواخذيني طولت عليك كتييير

45  الكاتب منى, on 14-08-2009 16:06 هلا فيك gsm   الله يسلمك و يخليك يا قمر و اكيد بيطلع معك و حلى , لان الواحدة فينا مرة عن مرة بتتعلم و بتزيد خبرتها     اتذكرت حالي اول مرة حفرت فيها كوسا , بعد 4 5 كوسايات اتصلت بابو الشباب و قلتله اليوم بطل غدانا شيخ المحشي , صار غدانا متومة .. الله وكيلك ما طلع معي شي صاغ , كله مصافي     الف هنا و صحة على شيخ المحشي بكل لقمة و كل فرفوطة , و تكرم عيونك و عيون بقية الخوات على الوصفة السرية

46  الكاتب eman000, on 19-08-2009 12:20 انا مشتركة جديدة وكتير مبسوطة من الموقع وبصراحة كل يوم عم تابع اي شي جديد وعم بستنى طبخات للرمضان وبالنسبة لهاي السفرة شكلها ملوكية وكتير طيبة يا ريت نوصل لهادا الفن بالطبخ اسفة طولت عليكم بس انا جديدة وبطلعلي

47  الكاتب بدور, on 19-08-2009 19:36 يا سلام ما شاء الله على هالسفرة والأكلات ما أطيبون راحت على اللي ما أجوا بس شافوا     نشالله بالهنا الهي لكل مين كان حضران والله يسلم دياتك الحلوين ميمو الغالية والله بعدك ما حدا يعمل عزايم     والله يخليلك جودي و الاولاد كلون ويحميون ويبارك فيون على هالتوجيهات والتربية   كتير عجبتني لمسات الطاولة و الأرتي الزهري   الله يباركلك بكل خطوة يارب و كل سنة وانت سالمة والله يتقبل طاعتنا برمضان و يباركلنا يارب بما انو اجواء رمضان صارت حاضرة ببيتك

48  الكاتب منى, on 02-09-2009 16:16 هلا امونة الحلوة   ان شاء الله بتصير و بتعملي شي احلى و اطيب لان من شغل دياتك , شرفتي الموقع و نورتيه و مية السلامة بهل القامة يا حلو

49  السلام عليكم ورحمة الله وبركاته الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-09-2009 09:02 انا كتير مبسوطة انك رديت على يا ست منى والله انك عسل وكللك زوء ونفسي اكون زيك مع اني الي متزوجة من 5 سنوات بس جديد صرت اطبخ واعمل اشياءاات زاكية

50  الكاتب منى, on 03-09-2009 12:14 المهم انك حابة تعملي شي طيب و هيك رح يطلع معك ان شاء الله و على ايا وصفة بيكون عندك ايا استفسار انا تحت امرك و بالخدمة دوما

51  الكاتب منى, on 03-09-2009 12:51 هلا بدورة   هيك هيك زعلتيني منك , بس يلا ان شاء الله الجايات اكتر من الرايحات     الله يخليلي ياكي على هل الدعوات كلها , ان شاء الله انت و كل عيلتك و احبابك و الغوالي على قلبك يا عسل

53  الكاتب منى, on 06-09-2009 15:18 هلا فيك رضاب   هادا بس من زووءك و لطفك حبيبتي , ان شاء الله بتصيري احسن بمليون مرة و هيا بس بدها شوية صبر و طولة بال

55  الكاتب منى, on 11-10-2009 11:51 هلا مانو   الله يخليلي ياكي يا زووء , ان شاء الله تجربي كم وصفة من عندنا و يكونوا تمام .    اكلات عيد الميلاد الاحلى انها تكون خفيفية ممكن تلطشي من هون كم فكرة و كمان من عزيمة السحور الي موجودة على الصفحة الرئيسية     السؤال التاني انك تحطي كل شي على الطاولة او لا , ما دامه عيد ميلام معناها لازم تحطي كل شي على الطاولة , ممكن تكون الحلويات بقسم و الاكل العادي بقسم تاني بس كله مع بعضه احسن و اسهل الك كتير و على طرف الطاولة او على طاولة صغيرة بتحطي صحون كبيرة مسطحة للاكل و صحون صغيرة للحلويات و كاسات للعصير او الكولا مع محارم     ايا سؤال انا تحت امرك اختي , شرفتي و نورتي و مية هلا فيكي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved