السلام عليكم و رحمة الله و بركاته ,

مرة تانية مسابقة شو الوصفة في الموقع . المسابقة فكرتها بسيطة .. وصفة قديمة و حابة ترجع تتغنج بصورة جديدة أو يمكن وصفة من دون صورة ..

انا علي ان حط الصورة الجديدة و انت عليك تعرفي الوصفة و تحطي رابطها . كل ما الواحدة حزرت الوصفة بتاخد نقطة و الي بيجمع أكبر نقط هو الي بيفوز ..

أتمنى الكل يتفاعل مع المسابقة و تصير لمة حلوة متل المرة الماضية او حتى احلى ...

بسم الله الرحمن الرحيم , يلا

الوصفة الأولى , سهلة كتير يا جماعة , روداج يعني لحتى نبدى تحماية و ندخل على الوصفات التقيلة . وصفة بأصلها مصرية و هلا صارت هويتها عربية , بكل العالم معروفة و الكل بيحبها : الفلافل و أول واحدة حطت رابط للوصفة هيا سوما .

الوصفة التانية من المطبخ السوري و التركي , انا بمووت عليها و في حدا مهم بعد ما داقها قال انها واحدة من الوصفات التوب , يخنة الحمص و الي حزرت و أخدت النقطة نور

الوصفة التالتة كمان وصفة سهلة , انا و نايمة بعملها و بعد التجربة خبرنا أرام أنها واحدة من أطيب المعكرونات الي داقها بحياته , سباغيتي الا بيستو و الي حزرت الوصفة اول الشي سوما و هيك صار عندها نقطتين .

الوصفة الرابعة  من أطيب و أفخم و أشهى وصفات المطبخ الدمشقي .. الأوزي و أول واحدة عرفته  سمسومة , يعني صار عندها 3 نقاط ..

الوصفة الخامسة وصفة تركية , سلطة و الا مقبلات على زووءك , نحنا بحلب نعملها دوما و امي بتسميها تبولة , و الوصفة هيا ايتش و الي حزرتها و أخدت نقطتها الرابعة , كمان سوما

بالوصفة السادسة طلعنا من تركيا و وصلنا لليونان , وصفة كتير مشهورة و كتير طيبة و لما بتنحط على السفرة بتبين كانها عروس بألوانها الحلو و ريحتها الي بتشهي , السلطة اليونانية و الي عرفتها و اخدت اول نقطة ميوسة

الوصفة السابعة شي سهل و طيب و خفيف ,  هي مو من مطبخ معين , وصفة الكل بيعرفها بس بحركة جديدة : بيتزا البطاطا و الي حزرتها و أخذت النقطة سوما :)

الوصفة الثامنة في المسابقة , من المطبخ السوري وصفة بسيطة و طيبة كتير , منعملها بالصيف و هي خفيفة و ما فيها لحمة , بانجان مكمور و الي أخدت اول نقطة الها امولة .


الوصفة التاسعة سندويشة و مو سندويشة . شرايح بالجبنة و المايونيز , و الي حزرت الوصفة و اخدت اول نقطة الها هي دكتورتنا الحلوة سوسن

الوصفة العاشرة يا حلوات شي طيب كتير , لحاله و مع سندويش و ممكن كمان مع مخلل و بندورة : مرتديلا حلبية و الي حزرت و اخدت اول نقطة الها ورد الياسمين

الوصفة رقم 11 الصورة مو الي , وصفة بتجنن طبقتها و رجعت ضحى طبقتها و هي الصورة .. اغراء و الله : حلى الكت كات الرائع و الصورة لحبيبتي ضحى و قالت انها ما زينت الوج بالكيت كات لحتى تخليه مفاجأة لضيوفها بقلي الحلى , الي حزرت الوصفة سمسومة

الوصفة رقم 12 , هل المرة كمان الوصفة تطبيق , بطاطا و بقدونس و كزبرة  ,المعقودة  و الي حزرتها و اخدت تاني نقطة الها أمولة .

الوصفة رقم 13 من المكسيك , حرّ و حامض و كزبرة , غواكامولي و الي اخدت اول نقطة لارا .

الوصفة رقم 14 , واضحة من الصورة كاتو التفاح بالقشطة و الي اخدت نقطته ميوسة  هي تاني نقطة الها

الوصفة رقم 15 من الصيف وصفة كتير طيبة , بتتاكل بالخبز و هي نطبخها من دون لحمة , فاصوليا بزيت و الي حزرتها اول واحدة ميوسة و هيك بتكون اخدت النقطة التالتة .

الوصفة رقم 16 من حلب بيت المحاشي و الكبب أفخم كبة و أطيب كبة , الكبة المبرومة و الي حزرت اول واحدة هي ام الهدى و هي اول نقطة الها

الوصفة رقم 17 , الدنيا شوب و كلكم تعبانين من اللفة و الدورة بين الاقسام , شو رايكم ضيفكم شي يبرد على القلب , لكل واحدة ابرد كاسة و في كتير و بيقدي الحبايب كلهم , اتفضلوا .. أطيب ليمونادة الي شربت أول واحدة لارا , و هي تاني نقطة الها ..

الوصفة رقم 18 , محشي ملفوف و الي حزرت اول واحدة لارا و هي نقطتها التالتة ..

هلا الوصفة رقم 19 , سمبوسك و الوحيدة الي عرفت لارا و هي رابع نقطة الها .

أخر وصفة في المسابقة الوصفة رقم 20 و هي من الوصفات المميزة في الموقع , خبز التوست الطري و الي حزرته ميوسة  و هي رابع نقطة الها ..

هيك خلصت مسابقتنا , بس ما فلت لمتنا , كلنا على قلب واحد و منحب بعض و الي أخذت أكبر عدد من النقااط سوما , برافو عليك و انت ملكة المسابقة اليوم . بعدها لارا و ميوسة , الف مبروك للجميع و هل المسابقة ما كانت بتصير حلوة لولاكم و لولا مشاركتكم الغالية ..

عقبال مسابقات تانية و الجميع بخير و صحة منيحة :)
 
 

تعليقات (135)

109  الكاتب منى, on 04-08-2009 15:29 كل الاجابات صح , يا عمي غير شكل المصحصحين , بس ام الهدى اول واحدة     ميوسة فيك تنسخي الرابط و بعدها تعمليله لصق عن طريق   ctrl+v      لارا حبيبتي غيرتهم و الصور الي طالعة هي الصور الجديدة

111  الكاتب منى, on 04-08-2009 15:38 شو هل السرعة يا لارا , استنى لحتى غير الصورة

116  الكاتب نور الأسلام, on 04-08-2009 17:01 f="http://www.l2ma.com/content/view/593/2/" الدولما التركيه

122  الكاتب منى, on 04-08-2009 20:33 هلا لارا حبيبتي , معك حق و من زحمة الصور و الوصفات نسيت غيرها , هلا مشي الحال       ميوسة الحال من بعضه , بس انا مقسمين على طول اليوم , الحمد لله هي ما بيصير بلاها بالصيفية , يلا شو رايك بالوصفة الجديدة       هلا صبايا هي سمبوسك حاف من دون هندية , لارا حزرت معلش خيرها بغيرها و هلا شو الوصفة      هلا summer  جوابك مزبوط بس كان بده رابط , نورتي اختي

128  الكاتب منى, on 05-08-2009 14:11 سمسومة هادا بس من لطفك يا قمر و الف مبروك , عن جد انت خيلتيني بسرعتك و معرفتك للوصفات و بدقة

129  الكاتب نور الأسلام, on 05-08-2009 16:59 مرحبا منى الله يعطيك العافيه وشكرا الك كتير وعلى هاللمه الحلوى الي جمعتنا وانا كتير انبسطت معكم ومبروك الف مبروك الك سوما وتحياتي للجميع

131  الكاتب DOUHA, on 06-08-2009 08:14 مبروك لسوما   بحب ضيف اني المسابقة مانت ناحجة كتير وحلوة وسهلة وخلتنا نفتكر طبخات طيبة بالموقع   ومبروك للكل طبعا  ومبروك لمنى على محبة الصبايا الك وعلى نحاج لقمة طيبة   منى انا بقترح تكون في صفحة اسما سجل الزوار وهي بس مخصصة للاعضاء ورح نكتب فيا انطباعنا على الموقع او شي شي بنحبو يكون بلقمة طيبة (اقترحات . اهداء. ... اي شي  وفيكي تسميه فسحة لقمة طيبة   المهم الموافقة اذا شفتي الموضوع مناسب وما بينختلف على الاسم ان شاء الله    وكمان بشوف لازم نعمل قروب اسمو لقمة طيبة على الفيس بوك     الي عودة

132  الكاتب منى, on 06-08-2009 11:15 هلا نور يا طيوبة   الشكر الك حبيبتي و لهل الوجود الدايم , ربي يديم المحبة دوما

133  الكاتب منى, on 06-08-2009 13:07 ممم , حلوة الفكرة كتير ضحى , رح حوالها محمد لحتى يتولاها ..    فكرة الفيس بوك انت عارضتيها من زمان , ما بعرف اذا حابة فيك انت تبدي الغروب لان انا مو كل هل الاد شاطرة عليه

135  الكاتب منى, on 23-08-2009 13:42 كمان اقتراح حلو , ان شاء الله اطبقه على المسابقة الجاية     كل سنة و انت سالمة دمدومة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved