بديت استعدادات شهر رمضان و بهل الفترة بتلاقي كتير من ستات البيوت عم تحضر اشيا و تشيلها للفريزر , و الي بيرتاح لهل الطريقة فالحقيقة بتسهل عليه وقت كتير و الي ما بيعجبه الا الفريش و التازة عوضه على الله و ربنا بيسرها عليه بالصيام . شو استعداداتي لرمضان ؟  و لا شي . لان رمضان متله متل غيره بالنسبة الي من ناحية ترتيب السفرة و تنوعها . الي بيفرق بس هو طبق الشوربة . بس لازم يكون عندنا بلقمة طيبة شي مميز لرمضان . و المميز هو شغلتين أو بالاحرى مسابقتين . الأولى مسابقة اشهى وصفة : وصفة مميزة خاصة فيك أو بعيلتك أو ببلدك , شي طيب و مجرب اكيد . ما بتفرق سواء اكان شوربة او سلطة او مقبلات او طبق رئيسي او حلويات , شو بيخطر على بالك و حابة تشاركينا فيه فسفرتنا ممدودة و بتسع الكل . بس في شرط واحد صغنون , اقترحته علي ضحى . الوصفات لازم تكون مصورة . مو ضروري جودة الصورة المهم ان تعطينا فكرة عن الطبق و شكله النهائي . هلا مو كلنا عنده كاميرا بس كلنا عنده ( او عند جوزه او اخوه ) موبايل بكاميرا . شو رايكم ؟

المسابقة التانية هي الحلقة التانية من شو الوصفة , بعد المسابقة الاولى و اللمة الحلوة الي صارت فيها اجا وقت المسابقة التانية و رح تبدأ المسابقة اذا ربنا راد يوم السبت الصبح , انا بنزل صور و انتو عليكم تعرفوا الوصفة و رابطها و صورتها ,, شو ؟ حلو الكلام  او نو ؟

هلا وصلنا لوصفتنا و ما دام رمضان على الابواب فرح نتوج سفرتنا بأطيب سلطة , سلطة بلازم تكون دوما على سفرة رمضان : الفتوش . و قبل ما احكي عن الوصفة لازم اعترف بشي , انا دورت في قسم السلطات عن وصفة الفتوش لحتى غير صورتها و اااذذذ اتفاجأت و اكتشفت انها مو موجودة , يعني موقع سوري عن الطبخ بس ما في فتوش , لك شو هل الحكي الي ما بيسوا , سامحوني على هل النسوة !

لو حدا طلب مني ان اعطي مثال واحد و واحد بس عن المطبخ العربي لعطيته وصفة الفتوش من دون تفكير كتير , لان فيها كتير مقادير خاصة بالمطبخ العربي من اول جهة و من الجهة التانية بتدل على الجود و الكرم العربي لكترة مقاديرها و تنوعها . هي سلطة كل شي كل الخضرة الي في الحديقة و كل الحمض الي ببيت المونة . كل شي فريش و اخضر و مقرمش و بيشهي فيها . بعد اجراء الابحاث عن اصل الكلمة ما طلع معي شي هيك حللتها و دورتها في مخي بعدها رديتها للمخيلة فطلع معي اصلها ( فت و شوف ) لان الخبز بينفت فيها و الخضرة الورقية ما بدها فرم بدها نتف أو قطف . و مع ان الوصفة يمكن الكل بيعرف يعملها , بس حبيت خبركم طريقتي و المميز فيها هو الصوص , يمم يمم , يعني لما بتنوجد عن السفرة ما بقدر بعد عنه هل الفتوش  .

الفتوش مقاديره كتيرة و بده فرم كتير و انا بحب افرم الخضرة متل مو طالعة بالصورة يعني كلها بنفس الطريقة و بنفس الشكل تقريباً . البندورة مو مكعبات , ما بعرف اذا بينت عليكم , فارمتها كأنها شرحات . الخيار ما بقشره , بنقيه صغير و بقطع شرايح بحاله و الخس بقطعه بايدي بيطلع احلى بالشكل و اطيب بالطعمة , حتى واحدة مرة من ضيوفي قالتلي يعني و الله شكل سلطتك انك فارمتيها بحب , ايه عن جد انا بحضر وصفاتي بحب , بكون عم اتغزل باللون و الريحة و بقدرها كتير لان نعمة ربنا غامرتنا و طامرتنا . و لحتى الخبز بحضره و بقطعه بالسكين او المقص , مو بكسر الخبز بايدي و بشلفه في صحن الفتوش , لمسات صغيرة بس بتخلي اي طبق أنيق , حتى الاطباق بتعرف تتأنق و تتغنج .

على فكرة المقادير المذكورة بتعطيكي صحن كتير كبير للفتوش خرج عزيمة أو ممكن تسبحي فيه , لهيك اذا عيلتك صغيرة ممكن تعملي نص او ربع المقدار .


قبل ما خلص لازم ارجع ذكركم بالمسابقات , اتمنى من الكل يشارك في التنتين . يلا شدوا الهمة و ارفعوا اكمامكم و ادامي على المطبخ . و اخر وقت لاستلام الوصفات ان شاء الله هو اخر يوم بشعبان , في عندكم وقت كتير للتفكير و التنقية و التطبيق , و ان شاء الله رح يصير التصويت برمضان لحتى الكل يستفيد و الي جاي على باله يجرب شي جديد يلاقي سفرة بتشهي ادامه .


في امان الله

·         تمزج مقادير الصلصة و توضع جانباً حتى اعداد الخضار .

·         تجهز الخضار و تفرم . يقطف ورق النعناع و البقلة و البقدونس و الزعتر عن العود ثم يقلب مع بقية الخضار .

·         قبل التقديم يضاف الصوص للخضار و يقلب ثم يذاق الفتوش للتأكد من الطعم و الحمض .

·         يرش السماق على السلطة ثم يوزع الخبز المحمص و تقدم فوراً .

تعليقات (35)

2  الكاتب ام احمد الغالي, on 28-07-2009 22:22 اول وحده برد مو مصدقه يسسسسسسسسسسسسسسسسسس  بتجنيني يا منى انا عندي خس وناويه اعمل بكرى فتوش لانو انا وزوجي بنحبو كتييييييييييييييييييييييير يسلم دياتك  وكنت صفنانه شو الوصفه اللي ممكن شارك فيا

3  الكاتب ام احمد الغالي, on 29-07-2009 07:06 منى يا احلى منى بلعالم   عم دور من الصبح على اللوبيه وما عم لاقيا   بيت احماي باعتين لوبيه من سوريا وزوجي بيحبها كتير وانا ما كتير بعرف كيف بتنعمل خطي اللوبيه والله حبابه وبنت ناس   يسلم ايديكي الحلوين

4  الكاتب dado, on 29-07-2009 10:25 مرحبا منوش يا أم الفتوش   ياستي من يومين عملتها.. وقبل ما بلش حبيت شوف طريقتك وجربها لأنها أكيد طيبة... وصعقت إنو الفتوش مو موجود!  بعدين قلت حتما نسوة.. يعني على كتر ما الوحدة بتتفنن وبتنوع بالأطباق.. بتصير بتنسى الأطباق الأساسية والشائعة كتير.  انشالله المرة الجاية رح جرب وصفتك.. هي المرة بس جربت تحميص الخبز بالمايكرويف وطلع روعة واقل لبكة وريحة ... كتير كان لذيذ.  بخصوص الفتوش.. التسمية اجت من "التفتيش" لأنو الفتوش اساسا وصفة الفقراء.. والواحد لما بياكل بيفتش وما بيلاقي شي محرز. وكانت من قبل بتنعمل بالمي والسماق والملح وبس وببتغمس بالخبز.. بعدين صار ينفت فيها الخبز اليابس...  حتى بفترة السفر برلك كان الفتوش هو الطبق اليومي لمعظم العائلات الدمشقية بسبب انقطاع الطحين والخبز عن الناس. وفي بواحد من المسلاسات الشامية ذكروا انو الفتوش صار الطبق الوحيد.. حتى بتجي بنت صغيرة بتحكيلها لأمها: شو هاد... كل يوم فتوش!!! فتّش قلبنا من الفتوش      وبدأت الزيادات مع ازدياد الخيرات.. وصار ينضافلها الزيت والخضار والتفنن بمكونات الصلصة... متل كتير من أطباقنا. "المحاشي على سبيل المثال ما كانت تنعمل الا ببرغل وبصل وشوية بهارات لأنو الرز غالي جدا واللحم مو متوفر الا عند سليل الاقطاع   شكرا منوش .. وآسفة على الاطالة

6  الكاتب نور الأسلام, on 29-07-2009 18:04 السلام عليكم كيفك منى تحياتي الك يسلموا اديك على الفتوش فعلا هو برمضان خاصه لازم يكون متواجد كل يومك انا كنت اعملو كل يوم لما كنت اتوحم بابني مرتين اوتلات كنت ضل ورا الطبق حتى خلصو والمسابقه كتير فكره حلوة بالتوفيق

7  الكاتب منى, on 30-07-2009 18:39 هلا ام نور   ايه و الله ما في اطيب من الفتوش جوى رمضان و براته , حباب و ادمي بس بده شغل كتير     يا ترى شو مشان المسابقات

8  الكاتب منى, on 30-07-2009 18:54 هلا ام احمد     يا رب تجربي الفتووش و يكون يممي و على زووءك بس لا تنسي تاكلي عني شوي , ايه و نقيلي محل الخس     اللوبيا بتنطبخ بنفس طريقة الفاصولياالخضراءبس من دون بندورة و بتتقدم مع سلطة حامظة أو مع مخلل حامض و ممكن مع لبن للي بيحب , و فيك تطبخيها باللحمة الشقف او الناعمة حسب ما بيخطر على بالك . باللحمة الناعمة اسهل و بالشقف افخم

9  الكاتب ام احمد الغالي, on 31-07-2009 01:13 شكرا كتير منى والله يخليكي يارب   طبخت اللوبيه وطلعت طيبه كتير والحمدلله متل ما قلتي متل الفاصوليه الخضرى بس بيت احماي بيحطولا بندورة حبتين بس   الحمدلله طلعت تمام واليوم عملت الفتوش وزوجي قلي شو هالفتوش بيجنن عملتو متل كل مرة بس اهتميت بتقديم والتفنن   الله يخليلينا اياكي يا منى

10  الكاتب منى, on 31-07-2009 14:31 هلا دالو يا قطة   هنا و الف عافية على الخبز المحمص و سماح على هل النسوة , ان شاء الله المرة التانية تعمليه و يطلع طيب و على زووءك    ممم , المعلومات الي ذكرتيها عن الاسم اول مرة بعرفها , جديدة علي , بس اذا هيك اصله معناها معهن حق يفتش قلبهن من الفتوش فتوشنا اطيب من فتوشهم و كل على فتوشه يغني     شو مشان المسابقة , ما في فكة منها

11  الكاتب ام انس وسلمى, on 05-08-2009 06:41 مرحبا يامنى انا جديده هون وعجبتني كتيير وصفاتك مشالله عليكي بتجنني الله يحرسك يارب وعلى فتوشك مميز كتير وعجبني فيه الخضرة متنوعه كتير انا ما بحب الفليفله ما بحطها يسلمو دياتك .

13  الكاتب منى, on 06-08-2009 11:12 هلا وداد   ان شاء الله توصلي بالسلامة و ميسرة ان شاء الله سفرتك و تشوفي كل الاحباب و هنن بصحة و عافية و خير يا حق   ان شاء الله تجربي الفتوش مع الزعتر و الخل و يكون على زووءك     وواخ يا وداد , الصراحة ما عندي فكرة , بعرف ان في محلات بتعمل صحن مشكل فيه تبولة و يلنجي و توابعه و بعرف في محلات فيها شي جاهز و انت بس بتخبزيه بس محل يستلم عزيمة ما عندي فكرة .    بكل الاحوال اذا حابة ممكن اسالك , انا بعرف ست بتعمل طبخات بيتوتية منيحة و طيبة و نظايفية , اذا بتحبي ممكن اجيب الك رقمها , و عندك كمان مهروسة بيساوي خروف مع فريكة و هي بتسد كتير بالعزايم الكبيرة و بيجي الاكل سخن , بس و الله ما عندي فكرة عن التوصيل و كمان ما عندي و لا فكرة اذا في هيك محلات بالمعرة     ما كتير فدتك , اذا حابة اجيب الك رقم مهروسة او هي الست او المحل الي بيعمل اكل بده خبز انا تحت امرك

14  الكاتب منى, on 06-08-2009 15:27 هلا اختي gsm   مممم , اضافات لذيذة كتير , و متل ما قلتي فيه الواحد يتحكم بالفرم الناعم او الخشن على مزاجه , نحنا عندنا بيحبوه هيك لتفرقيه عن التبولة او السلطة الناعمة العادية     الله يسلمك يا قمر و نورتي أختي

16  الكاتب منى, on 07-08-2009 08:29 وداد رح دور علىالارقام و جيبها و ابعتلك اياها ايميل ان شاء الله

17  الكاتب أم جودي, on 07-08-2009 22:06 مرحبا اختي منى     الله يعطيكي الف عافية صحي انا كسولة بالردود ومقصرة بحقك ولازم اشكرك على كتير وجبات جربتا من مطبخك الفاخر والاصولي وعلى الاكلات المليقة على قولة الحلبية بس بجد كل كم يوم بفوت على الموقع وبتابع احدث الابداعات     يوم الخميس عيزمة أهلي وبدي اعمل كذا شغلة بس الطبق الاساسي هو القباوات او السندوانات وان شاالله رح صور الخطوات والشكل النهائي والطريقة ونزلون بالموقع         المهم انا بعرف الطريقة ورفيقتي رح تجي وتساعدني بس اذا عندك شي نصيحة او تعليمات او سر من اسرارك لهل الاكلة بتمنى تتحفيني فيها وشكراً سلف الك

18  الكاتب منى, on 12-08-2009 13:24 هلا نور   متل حكايتي ,. انا بس في فتوش او يالنجي أو كبة نية على السفرة ما بعود بشوف غيرهم و ببقى جنبهم , حبايب قلبي     ان شاء الله تنقي شي طبق على زووءك و تشاركي فيه

19  الكاتب منى, on 12-08-2009 13:45 هلا ام احمد   ريتو عوافي على اللوبيا و على الفتوش كمان و ان شاء الله يكون عجبوا الباشا الكبير و الصغير كمان

20  الكاتب منى, on 12-08-2009 13:53 هلا اختي ام انس و سلمى   مية السلامة بهل القامة , نورتي و شرفتي و انستي .  هي الخضرة فيك تبعدي الي ما بتحبيه او حتى الي مو متوفر , مو شرط كل مرة حضر الفتوش بنفس الخضرة ..    اناكتير مبسوطة فيك و ان شاء الله تبقي معنا دوما

21  الكاتب منى, on 13-08-2009 23:04 هلا ام جودي   الف صحة و هنا و عافية يا رب على كل الوصفات الي جربتيها و طلعت على زووءك , هنا ان شاء الله ما تكوني نسيتيني من دعوة حلوة     انا بانتظار الوصفة و ما عندي ملاحظات على الوصفة , ريتو هنا و عافية هي اكلة مدعومة و بدها شغل , الله يعطيكي الف عافية اختي مقدما

22  الكاتب بشرى, on 18-08-2009 16:16 يمممممم أطيب سلطة على الإطلاق .. حتى إنها تنافس التبولة على المركز الأول .. يسلمو إيديكي منوش .. عملت اليوم فتوش وتذكرت كلامك عن السلطة كوجبة رئيسية باليوم ..     وعقولة الشيف إنطوان .. لا فتوش بلا سماق ..

23  الكاتب بدور, on 19-08-2009 20:21 يا سلام على هالصورة كتير مشهية فعلا تصوير الوصفة بيعطيها طابع مميز خاصة اذا كانت هيك الصورة     انا كتير بحب الفتوش و السلطات بشكل عام ومع الصيف والشوب والنهار والطويل والصيام نشالله بتكون أحلى وجبة فطور     بالنسبة للمسابقة الأولى ميمو حصرا وصفة جديدة طبعا مو؟  من وين بدي دور على أكلات جديدة و مميزة حتى شارك وما كون كسلانة

24  الكاتب شيرين, on 29-09-2009 11:14 مرحبا و سلام للجميع.بعرف أنوالتعليق متأخر كتير بس حبيت أضيف شغلة صغيرة عالفتوش.أنا بحط معه جبنة بقطعها مكعبات و كمان زيتون أسود مقطع شرائح أو مع النوى (معلش بيستاهل نتعذب و نطالع النواة لأنو طعمه بيجنن مع الفتوش)و الصلصةأنا بعملهابنفس الطريقة و بتطلع بتجنن. صحة و عافية

25  الكاتب منى, on 30-09-2009 20:09 ممم يا بشورة , و انا بشوفها اطيب سلطة و وجبة مو ناقصها شي , اطيب من اطيب وجبة     هنا على الفتوش بكل لقمة , و ان شاء الله تكوني اكلتي كم لقمة عني و خصوصا محل الخبز

26  الكاتب منى, on 30-09-2009 20:26 هلا بدورة   كل ما اعمل الفتوش عم اتذكر حكيك و اديه عجبك و بقول بقلبي الف صحة يا رب على كل لقمة     شكرا بدورة هادا بس من زووءك يا قمر , نورتي

27  الكاتب منى, on 30-09-2009 20:30 هلا شيرين   فكرة و لا اروع و لا الذ , الله يعطيكي العافية للاضافة و يا ريت ايا وصفة عندك اضافة عليها لا تحرمينا من المشاركة

30  الكاتب منى, on 15-08-2010 11:25 هلا كرميلا   الف صحة و هنا و عواافي يا رب على البك . الحمد لله انها عجبتك و كانت يم يمم    الله يعينا عى رمضان و صيامه و ان شاء الله اكيد العزيمة على الطريق

31  الكاتب منى, on 15-08-2010 11:31 هلا لاروش   معك حق اكل المطاعم عم يشوه الوصفات و اليالنجي مثلا بحياتي ما دقته بمطعم على اصوله     الف الف صحة و هنا و عافية و بتعرفي ردك خلاني دخل وصفة الفتوش للكتاب بعد ما كنت كانسلتلها

32  الكاتب سندس, on 08-05-2011 17:52 طيب كثير الدريسنق    اكلت فتوش اليوم غداء وعشاء من كثر ماعجبني

33  الكاتب منى, on 09-05-2011 10:47 صحتين و عافية انا كمان اتغديت منه و دقت غيره , يممممم

35  الكاتب منى, on 28-07-2011 11:44 هلا حبيبتي   ان شاء الله تجربيها و تعجبك , شكرا لردك المزوء و الحلو و شكرا للدعوة الغالية على قلبي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved