L2ma.com | لقمة طيبة | L2ma.com | لقمة طيبة | الرز بالخلطة المميزة | الله, على, حتى, كمان, الي | L2ma.com

القائمة الرئيسية

الأكثر تصفحاً

الرز بالخلطة المميزة

الكاتب/ منى

23/07/2009

من فترة خطر ببالي فكرة , ان يكون اجتماعنا مو بس على وصفة طيبة اشتهيتكم فيها , يكون كمان على كلمة طيبة نستفاد كلنا منها و نتعلم شي جديد ممكن ينفعنا بحياتنا أو نتذكر شي قديم مر علينا و نسيناه . صح الحكمة هبة من عند الله , بس كمان هي شي ممكن نشتغل عليه و شوي شوي ربنا بيسره النا و بيصير شي من صفاتنا , ببساطة الحكمة اشياء صغيرة نتعلمها من هون و هون و بعدها نحولها من معرفة نظرية لعادة عملية . ما رح يكون الحكي كتير , هي بس ومضة لحتى تلمع الفكرة براسك و تشوفي انت وين على مقياس الصح ؟ و نيتنا و هدفنا ان شاء الله هو حسن الخلق لحتى نصير من الي بينطبق عليهم حديث رسولنا الكريم " إن المؤمن ليُدرِكُ بحسن خُلُقِهِ درجة الصائِمِ القائمِ "

اليوم حابة احكي عن صفة منتشرة بكل مجتمعنا , و خصوصاً المجتمع النسائي للأسف . اسمها باللغة العربية النميمة و باللغة المحكية القال و القلنا , و اللت و العجن .

كلمة صغيرة بينقلها حدا أو حدايياية الك , ييي فلانة هيك حكت عليك , ولي عليها شو شرشوحة , اسمعي " وت وت وت " مو بس هيك قالت كمان " وت وت وت " . و الله انا لو ما بحبك و بخاف عليك ما كنت قلتلك شو قالت و ما كنت وصلت الحكي . و بعد هل الجرعة الزيادة من المحبة القاتولية رح يتعكر يومك كله مع ان بدايته كانت تبشر بخير . يا ترى مين الي زعجك ؟ الي حكى عليك و الا الي وصل الك الحكي ؟ و يا ترى الحق عليه لان وصلك و الا الحق عليك لأن فتحت اله مجال يوصل ؟ .. و الأحلى من كل هل الشي انك تكوني انت مثلاً الي عم توتوت بادن التانية و انت مفكرة ان عم تعمل خير بحقها ! أو نسيانة حالك و مفكرة انك عم تتسلى .

- قال الله تعالى :

يَا أَيُّهَا الَّذِينَ آمَنُوا إِنْ جَاءَكُمْ فَاسِقٌ بِنَبَإٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ

- قال رسول الله صلى الله عليه و سلم :

من حسن إسلام المرء ، تركه ما لا يعنيه

و حديث أخر :

من كان يؤمن بالله و اليوم الأخر فليقل خيرا أو ليصمت

.. انتهى ..

الوصفة اليوم كتير مميزة و فكرتها غريبة , بس بالتجديد دايما أحلى و بيصير في شي مميز بمطبخنا و على سفرتنا . الغريب هو استعمال السكر لطبخ الرز , صح ما كتير رح يتقبلوا هل الاضافة . بس عن جد رح تعطي لون مميز كتير و طعمة مميزة كمان من دون ما يخطر ببالك ان هل الشي كله طلع من السكر .

الوصفة مناسبة للتقديم جنب المشويات الديك الرومي و كمان الفروج المشوي و بيطلعوا مع بعض هيك كانه طبق خرج يتقدم للملوك .

بالصحة و الهنا

كوب رز بسمتي
بضعة حبوب كاملة من حب هال و القرنفل و القرفة و ورق الغار
ملعقة سكر
كوب و نصف مرق
ملعقة سمنة بلدي
direction

·         يغسل الرز و ينقع بالماء البارد لمدة نصف ساعة .

·         يقلب السكر على نار هادئة حتى يتحول لونه للكراميل ثم يترك جانباً حتى يبرد . يضاف المرق على السكر و يترك حتى ينقع الرز .

·         في طنجرة اخرى تقلب البهارات الكاملة بالسمنة حتى تظهر رائحتها اللذيذة .

·         يصفى الرز جيداً ثم يضاف للبهارات و يقلب لبضعة دقائق .

·         يضاف ماء الكراميل و بعد ان يغلي مجدداً تهدى النار و يغطى القدر و يترك حتى يمتص الرز كل الماء .

أضافة إلى المفضلة (0) |

أقتباس | مشاهدات : 4793

تعليقات (31)

1 الكاتب نور الأسلام, on 23-07-2009 21:42
السلام عليكم كيفك منى

اي وين هالغيبه الطويله والله اني اشتقتلك كتير الله يجعل ايامك كلها خير وسعاده

شو هالمقدمه الحلوة الله يجزيك الخير ويعطيك الف عافيه يارب :zzz

2 الكاتب منى, on 23-07-2009 22:15
خليلي عينك نور , سالت عليك العافية دايما يا قمر , انا منيحة بس مشغووولة .. بالخير ان شاء الله

ان شاء الله تجربي الوصفة و تكون على زووءك

3 الكاتب لارا مينا, on 24-07-2009 09:31
أهلا وسهلا برجعتك أخت منى زي ماقالت نور اشتقنالك .. والكلام إلي قلتيه مزبوط وفي نفس الوقت خطير لأن ممكن وحدة تخسر دنياها وآخرتها علشان شيء مايسوى لأن فيه مثل دايما بنقوله عندنا ( من إلي بلغك ؟ عدوك ) ومعناه إلي وصلك الكلام هو عدوك لأن نيته إنه يغيضك ويخرب علاقتك بالناس ولو كان خايف عليك ويحبك ماكان وصلك الكلام المزعج يلي بيضرك , وفيه مقوله أظنها للرسول الحبيب يقول ( من حسن إسلام المرء تركه مالا يعنيه ).
وبالنسبة للوصفة منظرها بيشهي بس عندي دايما تحفظ على الوصفات إلي فيها سكر بس رح أجربها اليوم إن شاء الله بنصف كوب رز وأكيد رح أخبرك . تحياتي .

4 الكاتب gsm, on 24-07-2009 12:58
السلام عليكم شو هل الكلام الحلو اخت منى والله عم تضربي على الوجع وكلامك كله مزبوط والمشكلة انو هل الغيبة والنميمة منتشرة كتيير بين النسوان وخصوصي بالاستقبالات والجمعات والصبحيات الا من رحم ربي
بالنسبة للوصفة هي غريبة شوي بس يا ترى رح يعطي طعم حلو للرز لأنو انا مو من مشجعين الاكل الحلو بالطبخ ما كتيير تزبط بعي ولا يا ترى بس عم يعطي لون حلو وجذاب لأنو حابة اجربه بس خايفة يطلع الرز حلو :roll

5 الكاتب ام ناصر, on 24-07-2009 20:24
يعطيكي العافية اختي هده الوصفة معروفة عندنا بالخليج وتؤكل مع السمك وهي اصلها تنعمل مع دبس التمر بدل السكر اما الان قليل من يستعمل الدبس ويستعمل الماء بدل التمر اسمها "المحمر"

6 الكاتب ام احمد الغالي, on 25-07-2009 15:33
ماشاء الله اختي منى مقدمه رائعه وكتير كلام حلو وبمحلو
الله يجزيكي الخير ويجعلو بميزان اعمالك الحسنه والله اشتقنالك لا تتاخري علينا :roll

7 الكاتب سارونات, on 26-07-2009 12:59
السلام عليكم و رحمة الله و بركاته
لون الوصفة و شكلها حلو بس استعمال السكر :roll

ما بعتقد راح يتقبلوه بس يمكن جربها قوليلي اختي منى راح تطلع طعمة حلوة بالوصفة او لا ان ادا راج يطلع حلو ما قي داعي جربو لان ما راح ياكلوه

بالتوفيق
سلام

8 الكاتب منى, on 26-07-2009 20:40
هلا لارا

تشتاق الك العافية و تكوني دوما بخير و صحة و هنا .
بالفعل القصة خطيرة كتير و لازم الكل ينتبه منها , ممكن كتير الواحد فينا توقع فيها من دون تشعر حتى , يا رب علمنا و فهمنا و تقبلنا عندك يا رب
لارا لا تاكلي هم السكر لان ما رح يعطي طعمة ابدا , و من جهة تحفظك فانا معك لان نفس الشي خطر ببالي اول ما سمعت عن السكر , بس لما ستي جربته و عجبها كتير و عجب الراي العام العالمي عندها قمت اتشجعت و حضرته و طلع بيجنن

9 الكاتب منى, on 26-07-2009 20:40
هلا gsm

و عليكم السلام و رحمة الله و بركاته , اختي جربيه و رح يعجبك كتير لان ما رح يعطي طعمة حلوة ابدا , بس لون مميز و طعم مميز , بس مو طعمة حلوة .. رح يعجبك ان شاء الله كتير , لا تنسي تخبريني :zzz

10 الكاتب سمسمة, on 27-07-2009 09:49
يعطيك العافية منى على كل شي بتقدميه دائما مبدعة وآكلاتك لايعلى عليها
اليوم خطر ببالي شغلة وهي عمل جدول بآكلات رمضان وبيكون مرجع سهل وكلنا بنتساعد فيه شو رأيك ياست الستات بهالفكرة

11 الكاتب ام نور, on 27-07-2009 23:06
السلام عليكم ورحمة الله وبركاته
كيفك منى سلم دياتك على هالوصفة لون الرز كتير حلو وبيشهي وفكرة حلوة

وانا بضم صوتي لا الاخت سمسمة يا ريت فينا نحضر شي لا شهر رمضان الكريم

12 الكاتب منى, on 30-07-2009 13:10
هلا ام ناصر

ممم , بتعملوها بالدبس , و الله فكرة بتجنن . بس خسارة دبس التمر مو متوفر عنا بسوريا .. على كل الاحوال الف شكر الك للمعلومات الي بتضيفيها دوما للوصفة و بتكشفيلنا اصلها و فصلها

13 الكاتب منى, on 30-07-2009 13:18
هلا حبيبتي ام أحمد

هادا بس من زووك يا قمر , ان شاء الله يتقبل منك هل الدعوة الحلوة و يا رب نستفاد كلنا

و اخر الشي ان شاء الله تجربي الوصفة و تكون يممي :zzz

14 الكاتب منى, on 30-07-2009 18:52
هلا سارونات

لا تخافي , السكر ابدا ما رح يعطي طعمة او يغير نكهة الرز , اللون رح يكون الغالب و الطعمة رح تكون طيبة كتير بس مو حلوة , على ضمانتي ان شاء الله

15 الكاتب منى, on 30-07-2009 20:39
هلا سمسومة

يا رب تجربيها و تكون طيبة و متل ما بتحبي

و الله فكرة ممتازة جدا , ان شاء الله رح حط الها موضوع مستقل على الصفحة الرئيسية

16 الكاتب منى, on 30-07-2009 20:51
هلا ام نور حبيبتي

و كمان طعمته طيبة كتير ,ان شاء الله تجربيه و يكون متل ما بتحبي

ان شاء الله في المسابقات قبل رمضان , لحتى الكل يشارك و يكون عندنا اطباق جديدة لرمضان

17 الكاتب منى, on 30-07-2009 20:51
هلا ام نور حبيبتي

و كمان طعمته طيبة كتير ,ان شاء الله تجربيه و يكون متل ما بتحبي

ان شاء الله في المسابقات قبل رمضان , لحتى الكل يشارك و يكون عندنا اطباق جديدة لرمضان :zzz

18 الكاتب نور الأسلام, on 05-08-2009 16:14
مرحبا منى الله يسلم دياتك يارب عندي سؤال لو سمحت ليش نقع الرز بالماء البارد

19 الكاتب منى, on 05-08-2009 17:27
بقصد بالمي الباردة مو مية البراد , لا مي الحنفية بس من القسم البارد

20 السلام عليكم
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-08-2009 09:41
السلام عليكم اختي منى وعاشت يديك على الاكل الطيب.. هذه الوصفه فيها ملح او لا ؟؟؟

21 الكاتب بدور, on 19-08-2009 20:28
والله افكارك و خواطرك كتير حلوة الله يجزيكي الخير يارب..
حكيك مظبوط وللأسف كتير كتير منتشر!
الله يبعدنا عن هالأجواء يارب و يقدرنا على رضاه ويسرلنا علم ننتفع به وننفع الناس يعني متل ما عمتعملي انت :zzz

بالنسبة للوصفة يعني هاللون الأصفر الحلو السر كلو من السكر :eek

وصفة غريبة كتير بس بتستاهل التجريب بصراحة صار عندي فضول اكتشف الطعم

يسلمو كتير ميمو الحلوة على هالوصفات المميزة كتير كتير كتير

22 الكاتب منى, on 20-08-2009 21:09
هلا منى

هلا المرق فيه ملح لهيك ما بضيف ملح زيادة , الخلاصة ان فيها ملح بس من المرق

23 الكاتب بشرى, on 30-10-2009 10:37
صباح الخير منون
حبيبتي بقدر استخدم السكر البني ؟
وهل بينفع قدم هالطبق مع السمك ؟
يسعد أوقاتك يارب

24 الكاتب بشرى, on 02-11-2009 10:19
منون حبابة جاوبيني على سؤالي :sigh

25 الكاتب بشرى, on 02-11-2009 10:23
رجعت قريت المقدمة مرة ومرتين وتلاتة
فعلاً يا منون كلامك جواهر ودهب
اللوص أبشع شغلة ببني آدم وبتخلي كل الناس تكرهو يا لطيف الله يجيرنا من هيك بشر
في إلي قريبة لواصة "العفو منك " الكل بيتجنب انو تعرف شي لحتى ما تنشرو والله شي بيزعل هيك الواحد يكون الله يهديناويصلحنا أجمعين

26 الكاتب منى, on 02-11-2009 12:31
الله يعينك بشورة على هيك قربة , اذا كانت رفيقة الواحد بيحاول يبعد عنها , بس القربة أصعب :roll

بشورة لو فيكي تطبقي الوصفة احسن لان انا مو مجربتها بالبني , بس نظريا بينفع , و هل الوصفة كتيررر بتلبق للتقديم جنب السمك و الدجاج كمان , رح تعجبك كتير ان شاء الله

27 الكاتب om ehab, on 16-11-2009 18:46
هلا حبيبتي منى اكلاتك اكتير طيبه انا سجلت اجديد ومني عارفه كيف بدي شارك في وصفه :grin

28 الكاتب منى, on 20-11-2009 10:58
هلا فيك اختي

شرفتي الموقع و نورتيه و ممكن تبعتي ايا وصفة متل رد عادي و انا اذا ربنا راد رح انشرها باسمك

29 الكاتب Diala, on 22-10-2010 11:42
Salam 3aleikom

ana hal wasfe 3endi 3al nar halla2.. very beautiful smell w el hay2a tal3a taybe kteer..i added some vegetables bas... w hay mish awal akle bjareba min houn, thank you Mona 3anjad this website is more than great! yeslamo hal edein ya rab

30 الكاتب منى, on 10-11-2010 19:53
و عليكم السلام ديالا

الف الف صحة و هنا على البك , الحمد لله انها كانت على زووءك , ان شاء الله عوافي

نورتينا و ان شاء الله تبقي معنا على طول :zzz

31 مساءالخير
الكاتب laimuna, on 12-05-2011 18:07
هالوصفة جربتها وفعلا كتييييير مميزة وكتييير طيبة وريحتها بتشههههههي والله وعملتها مع دجاج مشوي ...يسلم ايديكي منى على هالوصفات الطيبة والمميزة جدا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 23/07/2009 )

< السابق		التالى >

[ عودة ]