من المطبخ الهندي , وصفة صيفية لذيذة كتير و تحضيرها من اولها لأخرها مع الفرم و التحريك و الطبخ أخد معي ربع ساعة , حسيت بعدها اني طالعة من شي دعاية , لما بتخلص ست البيت تحضير الغدا و بتبقى مبتسمة و فريش و منتعشة بس بتشيل المريول و بتدخل لجوا لتكمل فنجان القهوة قبل ما يبرد .

بالصيف هل النوعية من الاطباق كتير مناسب لان بتبقى خفيفة و الخضرة كلها تازة و بوقتها  و البندورة الها طعمة بندورة حقيقية مو كأن الواحد عم يعضله شي كاوتشوكة . اما للتقديم فعندك عدة خيارات , اما تقديمها مع الشباتي تغميس أو مع الخبز العربي اذا مو مشتهية تلتي و تعجني . و فيك كمان تقدميها مع رز بسمتي مفلفل و انا هيك قدمتها .

بالوصفة الهندية بيستعملو سمنة , انا قلت عم حضر وصفة خفيفة و عم حضر خليني كمل معروفي لصحتي و قلبي لهيك استعملت زيت زيتون , بقى هل القصة حسب الي بيريحك . و كمان شي تاني ان الوصفة بدها حمص مسلوق , انا بيومها كان عندي حمص مسلوق و جاهز من وصفة كنت محضرتها قبل , بس ما رح قلكم شو هي خليها سر . اذا انتي ناوية تحضري طبق سريع فممكن تستعملي حمص المعلبات و اذا عندك وقت اكتر فأكيد الحمص الي سالقتيه انتي على ايدك بيكون اطيب و انفع .

بالصحة و الهنا

ملعقة كبيرة سمنة أو ملعقتين زيت زيتون
بصلة متوسطة
2 فص ثوم مهروس
ملعقة صغيرة زنجبيل مبشور طازج
نصف ملعقة صغيرة كمون
نصف ملعقة صغيرة غارام ماسالا
رشة بهار مشكل
3 حبة بندورة
حبة كبيرة باذنجان
حبة كبيرة بطاطا
2 حبة كبيرة كوسا
نصف كوب حمص مسلوق
نصف كوب بازلاء خضراء
كوب مرق لحم أو مرق دجاج
2 ملعقة كبيرة كزبرة خضراء

تعليقات (10)

1  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-07-2009 12:34 بالفعل اكله زاكية كتير ويمكن خفيفة شوي عالمعدة ما فيها لحمة ولا دجاج ، عنا بنعملها بفلسطين بس مع لحمه غنم او دجاج وبدون حمص كمان زاكية كتير ، يسلمو دياتك اختي منى

2  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-07-2009 12:36 نسيت اسأل عن الشباتي هو نوع خبز هندي يعني ؟؟ وبعدين بالنسبة لاسم الوصفه ككل ، احنا عنا الكاري هو نوع بهارات طيب وحراق

3  الكاتب منى, on 14-07-2009 18:39 هلا حنان   الله يسلمك و لو تجربيها من دون لحمة و مع الحمص كمان رح تعجبك كتير ان شاء الله و خصوصا مع هل التشكيلة الطيبة من البهارات     الشباتي نوع خبز و بتلاقي وصفته على هل الرابط و الاسم مضبوط , و هو اضافة الى انه نوع بهار كمان بيسموه الهنود على طبخاتهم الي فيها البهارات الهندية المميزة , يعني نفس فكرة اليخنة بس بيصير اسمها مع البهارات كاري

4  الكاتب dado, on 16-07-2009 03:07 لك إي شو هاد يا منوش؟   3 ضربات على المعدة في صفحة واحدة   عنجد الوصفات التلاتة الجدد كلن بياخدو العقل.. واليوم (مدري بكرة.. حاكم شغالة بالليل اليوم) كنت ناوية حضر وصفة الباذنجان والبطاطا بالكاري.. بس هي اكتسحت الساحة.  هي وصفة على المزاج تمام التمام.. تسلمي منوش

5  الكاتب منى, on 16-07-2009 08:42 هلا دالو   ايه هي اختي لهديك , نفس المبدا بس كل واحدة طعمتها شكل .    ابوسك انت و المزاج , ان شاء الله دايما عال و يا رب تجربيها و تكون متل ما بتحبي و اطيب , شنو ما بيهون علي يتعكر

6  الكاتب DOUHA, on 30-07-2009 15:22 اليوم صحيت معصبة من الشوبات واحترت شو بدي اطبخ فتحت البراد اذذذذذذذذذذذذذذ كوسا وبادنجان وبندورة ام الت يلا يا كوسيات ويا بادنجات ويا بندورات ادامي لاشوف بدي افرومكون فرم واو شو طلعت اكلة عنجد مافي منا وخلصت شكرا منى على الاكلات الخفيفة   دخيلك بدنا وصفات بلا لحم   الدني صيف وبدا شي خفيف    بامان الرحمن

7  الكاتب منى, on 30-07-2009 18:40 ضحى يا ضحى , يا حلوة يا ضحى الف هنا و عافية على قلبك و قلب العيلة الحلوة واحد واحد .    يا عيني شو انبسطت انها عجبتك و كانت متل ما بدك , هنا و الف عافية يا رب

8  الكاتب بدور, on 19-08-2009 20:35 يا سلام ايه والله وصفة بتجنن كتير لأيام الصيف و احلى شي فيها انها بتتحضر بسرعة سهلة وخفيفة وما بدها وقت و أكيد طيبة     يسلمو ميمو الحلوة على هالوصفات الخفيفة الله يزيد ويبارك

9  الكاتب منى, on 20-08-2009 14:32 هلا بدورة   الله يسلمك و يا رب تجربيها و تكون يممي و تناسب الراي العام العالمي عندك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved