L2ma.com | لقمة طيبة | L2ma.com | لقمة طيبة | البـِصارة (الفول على الطريقة المغربية) | الفول, · , صغيرة, الكمون, النار | L2ma.com

القائمة الرئيسية

الأكثر تصفحاً

البـِصارة (الفول على الطريقة المغربية)

الكاتب/ dado

13/07/2009

البصارة من المأكولات المغربية الشعبية جداً.. وهي تعتبر من أكلات الطبقة الفقيرة.. وأبناء الذوات كانوا من قبل ما ممكن ياكلوها.. وفي بعض العائلات لحد هلأ ما بتقبل تعملها بالبيت على أساس إنها أكلة الفقراء.

ممكن اعتبار البصارة هي الطبق المغربي المقابل للفول المدمس بالمشرق العربي.

طبق مغذي وطيب وسهل وبيشبع.. لهيك هو غذاء البنائين والمياومين لأنو بيعطي طاقة كل اليوم.. وهو من نفس عائلة العدس المدمس إذا حبيتي تعتبريه هيك.

الكمية يلي ذاكرتها بتعطيكي صحنين متوسطات.. ممكن تغيري الكمية حسب حاجتك.

انشاء الله تجربيها وتعجبك

كوب من الفول المقشور
ملعقة ونصف صغيرة كمون مطحون
ملعقة صغيرة دبس فليفلة (اختياري)
1\2 ملعقة صغيرة فليفلة ناعمة
4-5 فصوص ثوم كبيرة مهروسة
ملح
ماء

للتقديم:

زيت زيتون
كمون
فليفلة حمراء
direction

·         ننقع الفول المقشور في الماء قبل بيوم من التحضير .

·         نقشر الثوم ونهرسه، نغسل الفول من ماء النقع، نضعه مع ملعقة من الكمون والثوم والملح والفليفلة اليابسة ودبس الفليفلة في حال استعماله في طنجرة ونغمره بالماء ونضع الطنجرة على نار قوية حتى تبدأ بالغليان.. نخفض الحرارة ونغطي الطنجرة.

·         نتركها على نار هادية حتى يستوي الفول تقريبا 35-50 دقيقة حسب نوع الفول.

·         نبعد الخليط عن النار ونطحنه بالخلاط العودي أو طاحونة البندورة اليدوية أو بالخلاط.

·         نعيد الخليط إلى النار حتى يسخن فقط دون أن يغلي.

·         نطفئ النار.. نضع 1\2 ملعقة الكمون المتبقية، نمزجها ونصب الفول في طبق التقديم ونزينه بزيت الزيتون ومزيد من الكمون والفليفلة اليابسة.

·         يقدم مع الخبز العربي والفجل والمخلل.وصحتين وهنا

أضافة إلى المفضلة (0) |

أقتباس | مشاهدات : 2360

تعليقات (9)

1 الكاتب منى, on 13-07-2009 12:58
دالو شي بيشهي و وصفة سهلة كتير و طعمتها تحت دراسي , حاسستها كتير طيبة و الصورة يمي و خصوصا مع الفجل :zzz

سلم دياتك و لا انحرم من هل الرفيقة الحلوة و طبخاتها الطيبة

على سيرة ان لهلا في عيلات ما بتعملها , بعد الاتحاد بين سوريا و مصر و التأميم الي لحقه , راح لجدي من امي املاك كتير , لهيك وصى بناته انه بيغضب عليهم اذا اكلوا فلافل , على اعتباره اخد موقف من عبد الناصر :grin

2 الكاتب ميساء, on 14-07-2009 12:21
يسلمو دياتك أختي الكريمة على هالأكلة باينتهاطيبة كتير بس هي أول مرة بعرف أنو في بصارة مغربية وكل فكري أنو البصارة أكلة مصرية وكمان فلسطينية والتنتين كتير كتير طيبين وبعرف أنو بيحطو فيها ملوخية ناعمة ويا ريت إذا ميمو بتعرف طريقتها أو واحدة من الأخوات في الموقع تقدمها وشكرا مرة تانية بس لو سمحتي الفول هل هو المصري الصغير أم الفول العادي الكبير

3 الكاتب منى, on 14-07-2009 18:09
هلا ميوس

تكرم عيونك رح نزل البصارة المصرية , بركي قريب اذا ربنا راد

4 الكاتب dado, on 16-07-2009 06:53
مرحبا منوش
أولاً كتير فرحت لأنك نزلتي الوصفة وفرحت أكتر لأنها خرطت مشطك.. عنجد وصفة كتير لذيذة وسهلة ومكوناتها بسيطة.
على سيرة المواقف من الأكل.. مرة رفيقتي هون كانت جاية لعندي وطلبت مني اعملها برغل بكوسا لأنو هي ما بتعرف تطبخ. وبكل براءة حكيت لأمي وأمي حكت لأمها وهديك انجنت.. قالتلها للماما: أنا بنتي بتاكل برغل بكوسا!!! مستحيل.. نحنا بعمرنا ما عملنا هيك أكلات شرشوحة :eek

مو تاريها رفيقتي صرلها 15 سنة بتاكلها بالسرقة عند رفقاتها وبتشحدهن ليعملولها الأكله لأنو أهلها أكابر :grin

5 الكاتب dado, on 16-07-2009 06:55
أهلين ميساء
انشالله بتجربيها وبتعجبك
أنا كمان ما كنت بعرف إنو البصارة موجودة بالمغرب.
هي أكلة كتير مشهورة عندهن وبتنعمل بالفول أو بالبازلاء اليابسة كمان والتين ظراف.
نسيت قول كمان إنو هي أكلة إلها محلاتها الخاصة.. يعني متل محلات الفول عنا.. مو دائما بتتحضر بالبيت

6 الكاتب منى, on 16-07-2009 08:22
دالو عندي فكرة عن هدول الستايل من برة , يلا صحة و هنا على قلب رفيقتك و الله يتوب عليهاو تصير مستقلة و تعمل شو جاية على بالها :zzz

7 الكاتب farah, on 07-12-2009 23:15
هالوصفة صار لها شي 5 شهور بس عندي استفسار يا ترى بلاقي رد عليه؟؟

هالأكلة بتصير بالفول اليابس بس يعني لازم ننقعه ونسلقه بعدين نقشره ولا بينفع الاخضر من الفريزر؟
لأن بيكون تقشيره اسهل

8 الكاتب منى, on 08-12-2009 11:25
اتوقع فرح ما بيصير , لان اصولها بالفول اليابس , بس كمان ان شاء الله تشوف دالو السؤال و ترد عليه لان هيا ادرى

9 الكاتب dado, on 06-04-2010 12:55
فرح انا آسفة عالتأخير
بس هلا حتى شفت سؤالك.
للأسف البصارة ما بتصير إلا بالفول اليابس. ولازم تستخدمي الفول المقشر أساسا.. لأنو ما ممكن يتقشر الفول اليابس بعد نقعه.

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 21/07/2009 )

< السابق		التالى >

[ عودة ]