مين ما بيحب التمر , و مين ما بيعرف فوائده ؟ كتز كامل مخبى بالمطبخ و المسكين الي ما بياكل من التمر تلات قطع يومياً على الأقل . مرة شفت برنامج بالتلفزيون على شي قناة بيحكوا عن تجربة عملوها بأميركا على طلاب أحد المدراس الابتدائية و تم تقسيم الطلاب لمجموعتين , مجموعة قدموا لها سبع تمرات كل يوم و المجموعة التانية بقيت على نظامها الغذائي العادي و كل يوم كانوا بيسجلوا ملاحظات و بأخر الاسبوع كانوا يعملوا اختبارات و بنهاية السنة الدراسية النتائج كانت مذهلة على كل الأصعدة , سواء من ناحية مستوى الذكاء أو النمو أو التحصيل العلمي . و الحمد لله رب العالمين نحنا ما بدنا لا تجارب و لا اختبارات , نعرف أن الشي الي حكاه و قاله رسولنا هو الأحسن و الأفضل و الأكمل و الأجمل . قال رسول الله صلى الله عليه وسلم: " يا عائشة بيت لا تمر فيه جياع أهله, بيت لا تمر فيه جياع أهله" رواه مسلم
في رمضان كلنا نفطر على التمر و لما بحب أكرم ضيوفي أكتر و أكتر بقدم الهم تمر مع الضيافة . و كنت قدم تمر مع فنجان القهوة و بس . بعدها سمسومة أختي بديت تتفنن بتقديم التمر و انا اتعلمت منها و صرت أعمل وصفاتها و بعدها بديت أعمل وصفات خاصة فيني . و اليوم رح قدملكم تلات طرق , أول طريقة طريقتي و هي سميتها تمر غيوم لان الجبنة رح يكون منظرها بين شقي التمرة متل الغيمة و بعدها رح تدوب بتمك كمان متل الغيمة .الطريقة التانية طريقة سيما و هي وصفتين بوصفة و سميتها سمسوم اما لأنها أولا وصفة من سمسومة و تانياً لانها رح تتزين بالسمسم . أخر طريقة هي طريقة رفيقتي و حبيبة قلبي نوارة الي علمتنا اياها من سنة لما اجت لسوريا باجازتها الصيفية من الامارات و اسمها نوار لأن الوصفة من نوارة زينة الحارة و كمان لأن رح يطلع شكلها و الوانها قريب على زهر النوار . طريقتي بدها اما بشر ليمون أو بشر برتقال و في فرق بالطعمة , بشر الليمون رح يضيف للتمر نكهة منعشة أما بشر البرتقال رح يضيف نكهة دافية . هيك ااقرب شي فيني اوصف الفرق بالنكهات .
قبل ما ابدى بالوصفة رح اعطيكي كمان كم فكرة للتمر , بسوريا منقدم التمر محشي بالقشطة البلدية و مغمس بالعسل و هادا بيكون فطور فخم و غير شكل , و في السعودية بلد التمور و البخور بيحشوا التمر بالطحينة و بعدها بيغمسوا الطرف المشقوق بالفستق المبشور . بيطلع الشكل حلو كتير و طعمة الطحينة مع التمر طيبة و تغير شكل . و أخر فكرة هو انك ممكن تحضري حشوة سهلة و سريعة : فستق مجروش مع لوز مجروش و الكمية قد بقد و بعدها بتضيفي عسل لحتى تقدري تعجني الكل مع بعض و بتحشي فيه التمر , و بس
بالصحة و الهنا
تمر غيوم :
20 حبة تمر من الحجم المتوسط 100 غ جبنة فيلادلفيا رشة قرفة بشرة ليمونة أو برتفالة 2 – 3 ملعقة كبيرة عسل
تمر سمسوم :
20 حبة تمر من الحجم المتوسط 20 حبة مكسرات محمصة حسب الذوق ( فستق أو لوز ) 50 غ شوكولا مرّة أو على حليب حسب الرغبة 4 ملعقة كبيرة عسل سمسم
تمر نوار :
20 حبة تمر من الحجم المتوسط 5 ملعقة كبيرة مربى بشر البرتقال 5 ملعقة كبيرة فستق حلبي محمص 100 غ شوكولا سادة او على حليب
·لتحضير تمر غيوم : تخلط الجبنة و بشر الليمون أو البرتقال و القرفة و العسل و توضع جانباً .
·تشق حبة التمر بسكين و ينزع عنها القمع و النواة ثم تحشى بحشوة الجبنة ثم يرتب في طبق التقديم .
·يمكن تزين التمر بالعسل عوضاً عن وضعه مع الحشوة .
·لتحضير تمر سمسوم : تشق حبة التمر بسكين و تنزع عنها النواة ثم تحشى بالمكسرات و تصف في طيق التقديم بشكل صفوف متجاورة .
·تذوب الشوكولا على حمام مائي ثم تغطى بها حبات التمر بحيث نغطي صف و نترك أخر و هكذا .
·الصفوف التي لم تغطى بالشوكولا تغطى بالعسل ثم ترش بالسمسم .
·لتحضير تمر نوار : تشق حبة التمر بسكين و ينزع عنها القمع و النواة .
·يمزج مربى بشر البرتقال مع الفستق المبشور ثم يحشى بالتمر . تذوب الشوكولا و تغمس فيها حبات التمر ثم تصف على طبق مسطح جميل و تقدم .
تعليقات (16)
