عندي قناعة أن كل ما حدى من الأخوة أو الأخوات في الموقع بيجربوا شي وصفة و بتعجبهم , بتفشكل أنا كمان بشي وصفة بجربها و بتعجبني و هادا بحسه توفيق من رب العالمين .
و لما بيزيدوا هل الوصفات الي جربوهم و عجبوهم بيجيني كتاب كامل بشحمه و لحمه . و لو قلكم كم كتاب اجاني بهل الطريقة , يعني بمجرد ما الناس تعرف اني مهتمة كتير بالطبخ و الوصفات بتلاقيهم عطوني اما وصفة خاصة فيهم أو كتاب عندهم , طبعا اعارة مو عن طاول , و أهم مورد الي صديقتي العزيزة ضحى ,يمكن عطتني أكتر من عشرين كتاب سواء كتاب رسمي أو كتاب الكتروني . في كمان رفقاتي و رفقات خواتي و كمان رفقات حماتي , جيراني , و لحتى مرة الباشا اجاني من شغله و معه صرة من السعودية وصلانة باسمي لمكتبه و طلعت كمان كتاب طبخ من صديقتي أسماء .
و كل هل الكتب الها علاقة بالموقع , من قريب أو بعيد . أو الها علاقة بناس اتعرفت عليهم عن طرق الموقع . لهيك بحس أن كل وصفة من الوصفات هون هي لحدى فيكم و انا بس ربنا سخرني لحتى عرفكم عليها . كأن دخلنا بالفلسفة و دخلتكم بالحيط , بس هادا هو احساسي .
لهل السبب بنبسط كتير بس ما أعرف أن واحدة فيكم جربت الوصفة و عجبتها , لان هي المقصودة بنظري و هي الي عليها العين . She is the one . أخر وصفة كانت لكويتية , بقى يا ترى الوصفة اليوم لمين ؟ و مين رح تجربها أول واحدة ؟
امبارحة شفت عمتي رغيدة بجمعة رح احكيلكم عنها بعدين ان شاء الله , بعدها اجا حديث الأكل أكيد و حكينا عن المايونيز و أديه بيضاين بالبراد ؟ خبرتني انها ما بتشتري المايونيز الا لتحضر فيه سندويش تونا , و عطتني الطريقة .
هلأ أنا ما بحب أكل المعلبات و لو كان في بحر جنبي أكيد بحياتي و عمري ما رح فكر اشتري علبة تون , بس هادا الموجود . جربت السندويش و طلع كتير كتير طيب , و ما دامه من حجة رغيدة فمعناه لازم يكون مدعوم و فيه لمسة حلبية , لهيك بوصفتها في جوز بالحشوة , الكبارية حبوها كتير أما الصغار النكاشيين فضوا كل الجوز من السندويش , يعني اضافة الجوز اختيارية , بس حسيتها فكرة جديدة و طيبة و خلت سندويش عادي ساندويش مميز .
نفس الفكرة فيكي تحضري فيها سندويش دجاج , صدر دجاج بتكوني سالقتيه و مقطعتيه و بعدها ادامك على الصحن و بنفس المقادير .
الوصفة عطتني ثمان ساندويشات من الحجم الظاهر بالصورة , بقى ممكن تتحكمي بالكمية حسب مزاجك و ممكن تقلليها اذا حبيتي تجربي الساندويش لأول مرة لتجسي نبض .
مثل اليوم :
ما بفضح البيت الكبير الا الكنة و الإجير
بالصحة و الهنا
2 علبة تون 3 – 4 ملعقة كبيرة مايونيز 3 ملعقة كبيرة جوز مفروم 3 ملعقة كبيرة ذرة أو جزر مبشور عصرة ليمون فص ثوم كبير مهروس ورق خس مفروم 8 صمون من الحجم الصغير
·يصفى التون من الزيت ثم يوضع في طبق و يضاف له المايونيز و الجوز و الثوم و الذرة أو الجزر و يقلب .
·يضاف عصير الليمون حسب الرغبة بالحمض , عصرة أو عصرتان تكفي .
·يفتح الصمون و يغطى بالخس المفروم ثم بحشوة التون و يقدم .
, و أهم مورد الي صديقتي العزيزة ضحى ,يمكن عطتني أكتر من عشرين كتاب سواء كتاب رسمي أو كتاب الكتروني . في كمان رفقاتي و رفقات خواتي و كمان رفقات حماتي , جيراني 
تعليقات (22)
