L2ma.com | لقمة طيبة | L2ma.com | لقمة طيبة | سلطة البطاطا المقلية | على, الله, بحليب, كتير, الرز | L2ma.com

القائمة الرئيسية

سلطة البطاطا المقلية

الكاتب/ منى

27/06/2009

من فترة سألتني شذى واحدة من الأخوات في موقع لك عن طريقة تحضير الرز بحليب , بعتلها الرابط و جربته بس ما زبط معها متل ما بدها و ما سمك معها الحليب و حطت نشا و حالة الرز بحليب صار حالة . بعد كم يوم طلبت مني فرح حبيبة قلبي أن أعملها رز بحليب, و هي شغلة كبيرة لان فرح ما بتاكل الا بطلوع الروح و لما بجهز الغدا و بيصير الأكل على الطاولة بتقلي , ماما كمان اليوم رح اتغدى , مو اتغديت امبارحة . الله يخليكي ما لي جوعانة .

عملت رز بحليب و طلعت ريحته بتشهي في البيت و سمك و صار فرجة , بيني و بين حالي صرت قول , يا ترى ليش ما زبط معها , قصدي شذى , و الله سهل و ما بده شي , ييي ما شاء الله لا قوة الا بالله شو رح يطلع طيب و فرجة و من هل الحكي الي عم احكيه مع حالي طول ما عم حضره .

فروحة حبيبة قلبي عم تروح و تجي على المطبخ و تقلي , مم . ايمتى رح يصير الرز بحليب ,ماما انا جوعانة , ماما بصيرر اكل منه سخن , ماما حبيبتي انا بحبك كتير . و بالأخير جرت كرسي و وقفت تتفرج على الرز بحليب ليجهز و طلبت منها تفرد الصحون على الطاولة لحتى اسكبه لان خلص .

طالعت السكر و جهزت الما زهر الأصلي و طبعا فتحت الأنينة قبل ما حط و شميت ريحته و صرت اتنغم فيا, بسم الله الرحمن الرحيم , و هي فنجان تنين تلاتة سكر , و هي رشة الما زهر . ممم , يا حبيبي شي قطايف

بس بعدها حسيت ان الريحة ما طلعت متل دوما , استغربت و جبت ملعقة صغيرة لدوق , ولي شو هاد ! مين طفى الضو . اح اح اح .. لحقوني بكاسة مي الله يستركم . طلعت منيح بعد ما شربت كاستين تلاتة مي , مو تاريني حطيت ملح عواض السكر للرز بحليب .

ادوروا عيونها لفرح , وقفت دمعة صغيرة على طرفهم . و راحت على غرفتها و هي تجر اذيال الخيبة . و انا فكرت شوي , يا ترى شو خرج اعمل بهل الرز بحليب المالح لحتى ما كبه , يا ترى اذا خفقته و عملته بيشاميل بصير شي . بس بعدها استسلمت و قررت امحي اثار الجريمة قبل ما يكتشفها ابو الشباب , و كبيت الرز بحليب ادام عيون و تطليعات الاولاد المريبة .

باليوم التاني على الفطور كانت الطلبات سلطة و بيض مقلي , يلا بسم الله الرحمن الرحيم . هي البندورة و الخيار و هي صحن كبير ليوسعهم . طول ما عم افرم السلطة عم حاكي الاولاد و عم قرحلهن ادانهن , انتو لما بتعملوا السلطة بتقللوها كتير , يعني الشاطر فيكم بيفرملي بندورتين تلاتة و كم خيارة و ان شاء الله نحنا عمرنا ما نشبع , شوفوا شو بدها و ما اسهلها و من هل الحكي . يلا هي الزيت و الملح و الكمون , ماما لا تحطي فليلفة الله يخليكي لحتى ما تطلع حدة , اي تكرموا و تكرم عيونكم , بس لما رح تحضروا سلطة مرة تانية كتروها ها , شوفوا متل ما عملت انا اليوم بتعملوا انتوا . و انا عم حرك حسيت أن صار شكل السلطة غريب الأطوار , دقت اللقمة و نفس الموشح السابق , ولي كاسة مي مشان الله . مو تاريني حطيت بهار عوض الكمون .

اتبهدلت يا شباب ادام الاولاد , جودي قالتلي : ماما اذا حكينا له لبابا على هل السلطة أكيد رح يكتبها بالموقع المضاد ؟ و مروان طلع علي نظرته البريئة و قالي بصوت واطي و باللغة العربية الفصحى : ماما كأنك فقدتي مهاراتك بالطبخ . و فروحة طلعت علي بس ما حكت و لو كانت حكت كان احسن .

هيك صار معي و الله لا يكسرلنا مقاديفنا ادام الصغار لان ما بينسوا , و هلا كل ما بدي حط شي لشي طبخة , الكل بيطلع علي شو عم احط للتأكد بس

اااايييييه

لهيك اليوم الوصفة مو من مطبخي على اعتباري فاقدة مهاراتي فقلت خليني طبق احسن , الوصفة من مطبخ ديمة من مدونة ماء زهر البرتقال وصفة طيبة كتير و سهلة و لما حضرتها على الغدا الصحن انمسح بدقايق , يعني مشكلتها الوحيدة ان مقاديرها كانت قليلة على عيلتي الحلوة , ربي الف صحة و هنا

وصفة ديما ما فيها كمون و انا كتير بحب طعمته بالسلطة , بس طبعا اتاكد كمون مو غير شي , بس لهل الوصفة ما ضفته لان حبيت جرب السلطة متل ما مذكورة عندها من دون اضافات و هيك حبيتها كتير , و حسيتها تغير عن النكهة الي انا متعودتها , تغير كان في محله .

جربتها كمان مرة بالليمون متل وصفة ديما و مرة بالخل لان كان الليمون خالص من عندي و مرة بالتنين و كل واحدة فيهم طيبة و كمان حضرتها مرة بالبصل الأخضر و مرة بالبصل العادي و بالتنتين كانت طيبة كتير , و متل ما قلت من قبل بهل الشوبات أنا على الاغلب بتغدى صحن سلطة و معه شي تاني , الاساس سلطة لهيك هل السلطة مناسبة كتير الي بهل الايام .

بالصحة و الهنا

2 حبة بطاطا كبيرة
حبة بندورة كبيرة
1 حبة بصل أخضر أو بصلة حمراء صغيرة مفرومة ناعماً
3 ملعقة كبيرة بقدونس مفروم ناعماً

الصلصة :

3 – 4 ملعقة كبيرة عصير ليمون أو خل أو مزيج منهما
2 ملعقة كبيرة زيت زيتون
نصف ملعقة صغيرة فليلفة حمراء ناعمة ( حرّة أو حلوة حسب الرغبة )
فص ثوم مهروس
ملح
direction

·         تقشر البطاطا و تقطع لمكعبات ثم تفلى بالزيت حتى تشقر , ترفع على ورق ماص للتخلص من الزيت الاضافي . و يمكن اتباع طريقة نور لقلي البطاطا بطريقة خفيفة و صحية .

·         تمزج مقادير الصلصة في طبق صغير , يفرم البصل الأخضر ناعماً و يوضع في الصلصة حتى اعداد بقية المقادير .

·         تفرم البندورة لمكعبات بنفس حجم البطاطا و يفرم البقدونس ناعماً .

·         تقلب البطاطا و البندورة و البقدونس مع الصلصة ثم تقدم مع المشاوي أو كطبق مقبلات .

أضافة إلى المفضلة (1) |

أقتباس | مشاهدات : 1984

تعليقات (21)

1 الكاتب omtasneem, on 27-06-2009 14:47
السلام عليكم ورحمة الله وبركاته. ياستي جوزي اطيب ماعندو بطاطا في السلطة انا بعملها بالبطاطا المسلوقة تسلم ايديك وعندي سؤال ولوفيا غلاظة اديش عمر ولادك الله يخليلك ياهم

2 الكاتب kuwaiti_girl, on 27-06-2009 15:38
يا منمن شو طلعت هالسلطه طيبه

من اول ما شفتها ورحت طبقتها على طول ويم يم لذيذه

تسلم ايدج يا غاليه على هالطبق اللذيذ وتسلم ايد ديمه

سامحيني لاني مقله بالتعلقيات بس دائما اتردد على هالموقع واسعد جدا بالوصفات والكلمات والذكريات اللي تنبع من القلب

بالنسبه للوصفات لازم بيجينا يوم نخبص شوي بس لا تخافي لان منى الغاليه لازم ترجع تتفنن وتهندس بالاطباق الجميله والرائعه دايما ودوما

دمت بخير ومحبه :*

3 الكاتب رنا, on 27-06-2009 15:52
كل شي ممكن يصير الا انه تفقدي مهارتك بالطبخ هي شغلة مستحيلة لانه بحس حب الطبخ والمطبخ بيمشي بدمك وهادا شي صعب يروح بسهولة ومستحيل كمان ..بس بزمانه امي كانت تقول انه السنة 365 يوم وكل يوم طبخة معقولة كلن يزبطوا ؟؟بقا الي صاير معك عاااادي كتير وبتحصل مع الكل بقا دخيلك لايروح نشاطك وعزيمتك وخليكي متل ماانتي

بالنسبة للسلطة طيبة ومغذية وبتشبع وبتنفع للعشا او الفطور يسلم ايديكي ...بس ماشاء الله كيف اطفالك بيحضروا الفطور وشو بيصير بالمطبخ بعدين :grin

4 الكاتب نور الأسلام, on 27-06-2009 16:33

السلام عليكم كيفك منى يسلموا اديك وادين ديمه تسلملي الاموره فرح ضحكت على كلمتها اتغديت مبارحه الله يحفظهم ويحميهم انااخي لما نكون عالفطور لسا عم نفطر بقول ماما شو بدنا نتغدا اليوم :grin

الله يخليلك عيلتك ويخليك الهم

5 الكاتب منى, on 27-06-2009 17:43
هلا ام تسنيم

ان شاء الله لكن تجربيها للحجي و تعجبه و اكيد بتقوليلي .

يا ستي عندي قسمين الكبار 11 و 10 و الصغنونين 7 و 3 , تشكيلة الله يحفظهم شو حبابين و ظراف و امامير و اصواتهم ما بتطلع ابدا :roll

6 الكاتب Dimah, on 27-06-2009 19:11
مرحبا منى
لما شفتك حطيتي السلطة، اشتهيتها قمت فوراً رحت عملتها، كيف الواحد بتهف نفسه على الأكلات فجأة :grin

طالعة معك بتشهي !
صحة وهنا!

Dimah
مدونة ماء زهر البرتقال - Orange Blossom Water

7 الكاتب ام نور, on 27-06-2009 20:21
سلم دياتك يا منى على هالوصفة والله يبارك بالاخت ديما على فكرتا انا بعملا متل الاخت ام تسنيم ببطاطا مسلوقة هيك تعلمتا من الوالدة بس اكيد اذا البطاطا مقلية بتكون اطيب انشالله رح جربا

اليوم فتت على عنوان الاخت ديما بما انك يا منى ذاكرة العنوان ما شالله كتير عجبني وبشجعا وانا عم فتش ونبش لقيتا منزلة العجينة المورقة بالخطوات سبحان الله شغل معلمين نفس الطريقة التي اخذتا من والدي وهي العجينة رهيبة بتنعمل لا الاوزي لا عش البلبل وكمان لا الفطاير بجوز وبقشطة وكنت رح ابعتلك الطريقة يا منى تنزليا بس بما انو الاخت ديما منزلتا صار فيون الاخوات يشوفوها عندها

8 الكاتب منى, on 28-06-2009 14:02
هلا كوكو

يمو ريتو هنا و عافية و الف صحة على قلبك و قلب العيلة كلها , و انا فتت للبلوج تبعك و شفت الصورة , بس للأسف ما فيني علق عندك , مع اني اتمنى و الله , طيب كان بدي قلك ان النيو لوك للبلوج بيجنن و كمان الله يباركلكم بالقطة الجديدة و هلأ صرتي خالة و عقبال ما تصير ماما

كوكو انا ما بزعل منك ابدا و أخبارك الطيبة دايما بتوصلني , هنا كمان على العصير :zzz

بتنوري دايما أختي

9 الكاتب منى, on 28-06-2009 18:24
هلا رنون

هو الظاهر صاير معي فقر دم هل اليومين , بس عم اخد فيتامين لشد :grin

و انتو و كلامكم و تشجيعكم أحسن فيتامين .
بيحضروه لكن شو ؟ اتركهم طول اليوم عطالين بطالين , لازم يتحملوا مسؤولية , هو صحيح انا بعزل بعد ما يخلصوا , بس معهن معهن بيتحسنوا ان شاء الله

10 الكاتب منى, on 28-06-2009 18:32
هلا نور

ربي يحفظلك حبابك و الغاليين عليك , و الله هي فروحة معزبتني كتير بالاكل و ايمتى ما شفتيني بتلاقيني راكضة وراها باللقمة أو بكاسة الحليب , شو نعمل بيعين الله

ان شاء الله تجربي هل السلطة قريب لان طيبة و يمي

11 الكاتب منى, on 28-06-2009 18:44
هلا دمدومة

الف صحة و هنا و كتير منيح انها عجبتك , ما انا متعلمتها من واحدة مزوءة كتير و طبخاتها و نفسها بيعجبني و هي متعلمتها عن امها الي متل حكايتها :zzz

هلا عم دور و انكش لشوف الدور على مين هل المرة

12 الكاتب منى, on 28-06-2009 18:46
هلا ام نور

ان شاء الله تجربيها و اكيدة رح تعجبك لان تغير شكل .
يا ستي انا صار فيني هيك , لما دخلت للبلوج تبع ديما اول مرة تصفحته وصفة وصفة و و هي من اول الوصفات الي لفتت نظري و كنت ناوية ابعت الك اللينك لشوف اذا متل طريقة باباتك الله يحفظه و يخليه , تاريك سبقتيني .
ان شاء الله ناوية جربها , بس ما بعرف ايمتى

13 الكاتب ام نور, on 28-06-2009 18:57
سبحان الله القلوب عند بعضا بنصحك تجربيا باسرع وقت اول مرة جربي نص كيلو طحين وسدقيني مجرد ما اخدت ايدك عليا ما بتعودي تستغني عنها وبتستعمليا لا كتير شغلات وخصوصي اذا مستعملة زبدة منيحة بتطلع طعمة غير شكل بس الفرق عنها انو والدي بيستعمل الزبدة السمن ابدا ما بيستعملا بهل عجينة وبالنسبة لا الصور ما فتحوا معك يمكن ما عندك برنامج ادوب عا كل حال رح ارجع ابعتون

14 الكاتب منى, on 28-06-2009 19:37
ممم , رح جربها ان شاء الله , حمستيني و رح جربها بالزبدة .

الصور ما فتحوا معي , يا ريت لو تبعتيهم بشكل مرفقات عادية اذا ما فيها ازعاج :zzz

15 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 29-06-2009 07:08
هلا اخت منى شكل الاكلة كثير طيب وان شاءالله راح جربها بدي اسألك اذا بدي ابعث لك صور لبعض الوصفات او اذا بدي ابعث لك جدول بمعايير حرارة الفرن كيف بدي ابعثهم ياريت تفيديني وشكرا الك

16 الكاتب semo, on 29-06-2009 20:10
شو تفقدي مهاراتك بس احيانا الوحدة بتمر عليها اوقات حتى البطاطا المقلية ما بتزبط معها
ومتل ما بيقول جوزي انت كل شهر في ايام محددة منها بتصيري بتخبصي
طبعا فهمتي شو قصدي بهالايام
حتى كانت الي جارة كانت اذا جابت خيار او لفت للمخلل وكانت بهالايام بتقلي لخلص بعملها لان اذا عملتها هلا بيخرب
كنت قول هي خرافة لحتى صرت لاحظ عحالي كل شهر بهالايام ما بيطلع متل باقي الايام
بيقولوا هرمونات بالجسم كنت حسو خرافة هالحكي
بس بعدين تأكدت بنفسي
يمكن انت صاير معك هيك
بس اللي متاكدة منو انك اكيد مافقدتي ولا رح تفقدي مهاراتك بالطبخ باذن الله
الله يقويكي يارب
وبالنسبة للسلطة عالتجربة فورا
اسفة حكيت كتير :eek

17 الكاتب منى, on 01-07-2009 18:40
هلا هيا

الله يعطيكي الف عهافية انا بانتظار الصور, ممكن تبعتيهم على الايميل أو برد على كيفك

18 الكاتب semo, on 01-07-2009 18:42
اليوم جربت السلطة طلعت بتاخد العقل
الله يسلم ايديكي وايدين دمدومة
بتشهي وجربت فيها طريقة نور بالبطاطا المقلية
طلعت بتجنن متل البطاطا المقلية بالزيت بالضبط
وشغلت الفرن عليها من فوق وطلعت كتير بتقرمش

19 الكاتب منى, on 01-07-2009 20:26
هلا سمسومة

كان بعدتي , ما في شي من هاد هلا :roll

بس كلامك في كتير ناس بتعقتقد نفسه و انا مرة قرات ان اخواتنا المغاربة ما بيعملوا السمن البلدي و لا الحامظ المرقد الا و هنن متطهرات لحتى تزبط معهم ..

على كل الاحوال الف الف صحة و هنا يا رب على السلطة , كتيررر انبسطت انها عجبتك و كانت على زووءك سمسوم و هنا

20 يعطيكي الف عافيه
الكاتب لميا, on 11-07-2009 07:43
حبيبتي منى انا لبنانيه بس خطيبي حلبي وسمعت انو اكلكن شي فوق الوصف وبعرف لو شو ما عملتلو مارح تضبط معي وانو معود عا هالاكل الطيب شو اعمل دخلك ؟؟ لقيت موقعك وما صدقت

رح حاول اتعلم كل الاكل الحلبي ويعطيكي الف عافيه

21 الكاتب منى, on 11-07-2009 14:03
هلا لميا

بالأول نورتي و شرفتي الموقع ..

الاكل حلبي طيب , بس مو لو شو ما عملتي ما رح يزبط , ايه رح يزبط ونص و تلات ارباع . انت بس اتبعي الخطوات و رح تطلع معك الوصفة بتجنن ..

انا كتير مبسوطة فيك و اي سؤل انا تحت امرك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 01/07/2009 )

< السابق		التالى >

[ عودة ]