الفراولة أو الفريز من الفواكهة المفضلة عندي , مزة الحلاوة مع الحموضة الخفيفة فيها أعشقها و بس ما بدي الربيع و بديت سلات الفريز البلدي تزين عربيات البياعين , بتلاقي الفريز ما بينقطع من عندي و شو ما عملت فيه بيطلع طيب و حلو و لونه مغري .
المشكلة في الفريز أو يمكن الحلو ان وقته قليل , هيك لحتى يبقى تقيل مو متله متل بقية الفواكة و لحتى ابقى حاببته دوما و مشتاقتله دوما . و قبل ما يخلص حضرت فيه شارلوت و هو نوع من أنواع الحلويات الفرنسية الي بيتحضر ببسكويت الليدي فنجرز مع كريما و فواكهة , شي طيب كتير و مناسب كتير لهل الوقت و الشكل و الطعم ما فيني اوصفهم . شي قطايف .
بوصفتي استعملت الكريم الفريش و اذا مو متوفر فيك تستبدلي مقدار الكريم فريش بعبوة كريما دريم ويب مع ثلاث أرباع كوب حليب بارد جداً و لازم تستغني عن السكر البودرة و اكيد بالكريم فريش اطيب . المعادلة كالتالي كريم فريش + سكر بودرة = علبة كريما دريم ويب +حليب بارد جداً . شو كمان , اه لما حضرت الوصفة خبصت خبصة و غلطت غلطة خلت الجيلو الي غطيت فيه الوجه مو شفاف , بعد ما حضرت الجيلو و خليته يبرد , التهيت شوي فبرد الجيلو و جمد , قمت انا متل الحلوين حطيته على الخفاقة و ضربته فصار شي على زهري و ما بقى شفاف , و حتى لما وقفت الخفق ما رجع لونه للشفاف , بالأخير طلع منظره ماشي حاله , بس لو شفاف رح يطلع احلى لأن رح تبين قطع الفريز على وجه الشارلوت .
على سيرة الشارلوت , من شي 3 سنين درستني انسة فرنساوية اسمها شارلوت , كانت من أفضل المدرسين الي عدوا علي في حياتي , في تفانيها و اخلاصها للعمل و حبها للطلاب و عطائها الي بلا حدود وصبرها . و مع انه درسني فرنسي اكتر من مدرس و مدرسة بس ما عدا علي متلها . كان منهم الممتاز متل سارة و منهم المنيح متل ايمانويل و باسكال و منهم العادي متل فابيان و ليتيسيا و منهم السيء جداً متل دافيد الله يسعده و يبعده شو كان فاشل بالتدريس . لاحظت أن لمهنة التدريس الصبايا بيكونوا أفضل بصورة عامة يمكن لطولة بالهم و سعة صدرهم و المزايا الطبيعية الي ربنا عطاها للمرأة و ميزها فيها عن الرجل و كأن بهل المزايا عم يعدها للمهمة الأمومة . اليوم كل ما بعمل شارلوت بذكر شارلوتي , شو بحبها و بتمنى ترجع لسوريا و ارجع شوفها مرة تانية .
هلأ اذا قلنا شارلوت نوع من أنواع الحلويات و هو عند الفرنساويية اسم لبنت بقى إذا طبقت هل الفكرة على اللغة العربية رح يطلع معي أسماء لبنات متل كنافة مثلاً أو شعيبية . أأأه , أتاريهم المصريين أخديين هل العادة من الفرنساية لما بيسموا بناتهم أو بيدلعوهم اسماء الها علاقة بحلوياتهم المفضلة متل بسبوسة أو مهلبية أو قشطة
كيلو فريز 2 ملعقة كبيرة نشاء ذرة ( كورن فلور ) 2 ملعقة كبيرة زبدة ثلثي كوب سكر بودرة بشر ليمونة كوب كريم فريش
للوجه :
باكيت جيلو فريز نصف كوب ماء مغلي
يغسل الفريز ثم تنتخب الحبات الجميلة ذات الحجم المتشابه و تترك لتزيين الوجه , سيلزمنا تقريباً نصف الكمية .
توضع بقية قطع الفريز في الخلاط و تضرب مع ثلث كوب من السكر و نشاء الذرة حتى تنعم و تصبح متجانسة .
توضع بيوريه الفريز على نار متوسطة و تقلب بمضرب سلك حتى تغلي و تسمك .
تضاف الزبدة و بشر الليمونة لمزيج الفريز و تقلب حتى تذوب و يصبح لدينا مزيج متجانس ثم يغطى و يترك حتى يبرد .
يوضع الكريم فريش في وعائه في الفريزر و يترك لمدة نصف ساعة حتى يسهل علينا خفقه .
يخفق الكريم حتى يصبح كالغيمة , يضاف ثلث كوب السكر الباقي و يخفق لبضع دقائق أخرى حتى يصبح كريم شانتيه . يجب أن لا يخفق الكريم لفترة زيادة .
يضاف الكريم شانتيه لكريم الفريز و يقلب الكل حتى تتجانس الكريما .
يغلف قالب من النوع الذي ينفتح من جوانبه بورق نايلون . للجوانب سيلزمنا نصف مقدار بسكويت الليدي فنجرز أو أقل بقليل و لبسكويت الجوانب يقطع طرف البسكويت بحيث يكون طول البسكوتة بنفس قياس القالب المجهز . ثم يرتب البسكويت الأصابع على الأطراف .
تغمس نصف كمية بقية الأصابع بالحليب بخفة و يرتب كأول طبقة ثم تغطى بنصف مقدار الكريما .
تغمس باقي كمية الأصابع بالحليب بشكل بسيط و تصف فوق الكريما ثم يغطى ببقية الكريما ثم توضع في البراد لمدة ساعتين أو ثلاثة .
يذوب الجيلو بالماء المغلي ثم يوضع جانباً و يترك حتى يفتر قليلاً .
ترتب قطع الفريز على وجه الكريما ثم يسكب الجيلو على قطع الفريز و يوضع في البراد حتى يجمد الجيلو .
تفك جوانب القالب و يتم التخلص من ورق النايلون ثم يوضع الشارلوت على طبق التقديم و يفضل تقديمه و هو بارد جداً .
. أأأه , 
تعليقات (40)
