L2ma.com | لقمة طيبة | L2ma.com | لقمة طيبة | متبل البستاني | حسب, الباذنجان, · , متل, على | L2ma.com

القائمة الرئيسية

متبل البستاني

الكاتب/ منى

23/06/2009

بديوا الشوبات عنا و الصيف و الحرّ و انا دايما بهل الوقت بحس حالي ما بقى حب الطبخ و المطبخ و الدخول اله لأن انقلب من متعة إلى ساونا . و مع أن الصيف هو فصلي المفضل بس من دون وقفة ادام الفرن . بس كمان شو بدنا نعمل , العيلة كبيرة ما شاء الله لا قوة الا بالله و كلهم بيحبوا الأكل المنفنف و اللقمة الطيبة و كل صحونهم معلقة بمغرفة المطبخ , يعني اذا ما شديت حالي مين الهم غيري يسال عليهم .

الوصفة اليوم مناسبة لكسلي , وصفة من الشام , سهلة , طيبة كتير , و بتبرد على القلب و متل ما بيدل اسمها , لونها و شكلها حلو كتير و متل البستان الأخضر

هل المتبل أطيب الشي تقدميه مع المشويات بكل أنواعها متل الكباب ببانجان و الشيش طاووق و الكفتة و غيره و أنا عني اتغديته هو شخصيا بس من دون شي جنبه مع خبز تازة و كاسة مي باردة , قصدي قنينة مي باردة و بعدها شبعت الحمد لله , اللهم ادمها نعمة و لا تجعلها الى زوال .

بالصحة و الهنا

2 حبة كبيرة باذنجان
عصير ليمون أو ليمونتان حسب الرغبة
2 فص ثوم
نصف باقة بقدونس مفروم
نصف ملعقة صغيرة كمون
ملح حسب الرغبة

للوجه :

زيت زيتون
جوز مفروم
direction

·         تثقب حبات الباذنجان ثم يشوى على البوتوغاز الرأس المتوسط و يقلب حتى تسود قشرته من جميع الأطراف , يحتاج من 5 إلى 10 دقائق حسب حجم حبة الباذنجان .

·         تترك حبات الباذنجان حتى تبرد ثم تقشر و يجرف لبها بملعقة أو طرف سكين و يمكنك الاطلاع على الرابط التالي لمزيد من الصور التفصيلية .

·         يهرس الثوم و الملح بمدقة الثوم ثم يضاف الباذنجان المشوي و يدق حتى ينعم .

·         يضاف الحمض و البقدونس و الكمون و تعدل النكهة حسب الرغبة .

·         يصب المتبل في صحن التقديم و يزين بالجوز المجروش و زيت الزيتون و يقدم مع الخبز العربي الطازج و كطبق جانبي لكل أنواع المشويات .

أضافة إلى المفضلة (0) |

أقتباس | مشاهدات : 1324

تعليقات (15)

1 الكاتب semo, on 23-06-2009 20:28
اول شي الله يخليكي فوق راس عيلتك ولا يحرمن منك ومن اكلاتك الطيبين

وبالنسبة للمتبل طبعا المنظر كالعادة بيشهي
بس قصدك هو نفسو البابا غنوج اذا كان نفسو انا ما بعملو هيك ابدا
عندي طريقة مين ما اكلو عندي بياخد طريقتو انا بحط فيه بقدونس وليمون وبندورة مفرومة وجوز مفروم وشوية دبس الرمان وبصل وتوم وفليفلة خضرا ونعنع فريش وبكتر بقلبو زيت زيتون وعالوش كمان وجوز
بيطلع معي على قولة جارتي سيمفونية
وكمان رح جرب طريقتك اكيد كمان رح تكون طيبة
لاني انا وجوزي من عشاق البيتنجان

2 الكاتب منى, on 23-06-2009 20:39
هلا سمسوم

و الله هل الجارة عندك فنانة بالوصف

لان عن جد سمفونية.الوصفة الي ذكرتيها ممكن تشوفي طريقتي على هل الرابط

هل الوصفة غير البابا غنوج , هي شكل و هي شكل , و التنتين بينفدوا على بعض بس كل واحدة طعمة و هي كتير بتلبق للمشويات , الطعمات بتحسيها بتكمل بعض :zzz

يا رب تجربيها و تعجبك

3 الكاتب semo, on 23-06-2009 22:27
ايه صح ماكنت شايفة وصفة البابا غنوج وذكرتيني بالرمان لما بحطو يبعطي طعم بياخد العقل

فعلا انو البيتنجان متل ما بيقولو ابو العيال
شلون ماعملتيه بيطلع طيب
وقد ماعملتي فيه اكلات ما بيخلصو
واكيد رح جرب هذا المتبل وخصوصا انوكتير منيح للريجيم وصفة خفيفة

يسلمو دياتك

4 الكاتب منى, on 24-06-2009 07:24
ان شاء الله تجربيه سمسومة و يكون طيب و يعجب العيلة و اكيد رح تخبريني

5 الكاتب رنا, on 24-06-2009 13:44
ياستي هالاكلة هي نفسها بابا غنوج بيت اهلي بيعملوه بنفس طريقتك جنب الكبة المشوية

كتير لذيذ عن جد ...بس لماجيت على بيت حماي شفت بابا غنوجن متل طريقة سيمو باضافة خضار اكتر وبندورة
انا كتير بحب البيتنجان والوصفتين رائعااات

6 الكاتب غيث, on 24-06-2009 15:05
الله يخليك لاولادك ميمو ولزوجك والنا ونحن كمان ما بقى نقدر بلا اكلاتك المنفنفةوطلتك علينا يوميا ولو برد صغير على احدى الاخوات ويا عيني عليك على هالمتبل الرائع اه ها هي اكلات الصيف خفيفة ولذيذةانا كتيربحب المتبلات بكل انواعها الله يعطيك العافيةعلى فكرة وصفتك خفيفة بس غنية بيكفي التوم وزيت الزيتون وفوائدهم المعروفة اكيد للجميع لاني بدي عشر صفحات اذا بدي اذكرهم عدا عن البقدونس والليمون يعني فوائد هالاكلة عجيبة بشكل شكرا منى

7 الكاتب منى, on 25-06-2009 07:47
هلا رنون

انا اتعلمته من واحدة شامية , بس ما قالتلي اسمه بابا غنوج , و عن جد طعمته شو لابقة و طابقة للمشويات

صحة و هنا على قلبك و هلا ادامك الصيف كله تتهني بالبنجان

8 الكاتب منى, on 25-06-2009 07:50
هلا غيوثة

و الله يحفظلك عيلتك و كل الغوالي على قلبك يا عسل و ربي يديم هل الالفة و المحبة و المودة .
هل المتبل على اد ما فيه فوائد, بتحس الواحدة ان بشرتها انشدت بعد ما الواحدة بتاكل منه :grin

ان شاء الله تجربي هل المتبل و يعجبك

9 الكاتب Dimah, on 25-06-2009 19:54
مرحبا منى
طالع المتبل معك بيشهي.
ماماوبابا قالوا لي أنه المتبل البستاني كانوا جداتهم يعملوه بغير طريقة ومكوناته هي باذنجان مشوي - سمنة عربي (بدون ما نكويها- يعني سمنة عربي نية)- بقدونس وكله بيخلطوا مع بعضه، وبيحطوا على وجهه حب رمان.
وبعتذر منك لأني هالفترة مشغولة كثير فما عم أقدر دائماًأكتب تعليقات، بس متابعة وسلم دياتك على كل شيء عم تعمليه

Dimah
مدونة ماء زهر البرتقال - Orange Blossom Water

10 الكاتب منى, on 25-06-2009 20:18
هلا دمدومة

ممم , رح يطلع طيب كتير , بس ولي سمنة سادة بدها brave heart :grin

الف شكر الك لاضافة المعلومة و لا تعتذري , على شو . بينور فيك الموقع دوما حتى بس لو مرور :zzz

11 الكاتب BaSmAa, on 29-06-2009 16:20
ما شاء الله
وصفة لذيذة وبتستحق التجريب
إن شاء الله بجربها بأقرب فرصة
يعطيكِ ألف عافية يا رب

12 الكاتب منى, on 29-06-2009 19:45
ان شاء الله تجربيها و تعجبك بسمة و انا بانتظار رايك بعد التجربة

13 الكاتب آرام, on 01-07-2009 08:51
جربت هالمتبل البارحة وكان أكثر من رائع .. سهل ولذيذ وخفيف .. فعلاً الباذنجان طيب شلون ما انعمل .. مشوي مقلي محشي مطبوخ متبل مكمور مكدوس مخلل عجة سلطة وحتى مربى .. وعلى سيرة المربى .. صار لي شي ربع قرن ما أكلت مربى الباذنجان .. كانوا أهلي يعملوه كل سنة .. حبات صغيرة من الباذنجان مطبوخة بالكلس ومحشية جوز ومنكهة بالقرنفل .. دائماً ريحة القرنفل بتذكرني بهالمربى .. حلوى لذيذة وضيافة فاخرة ومن ألذ ما يكون .. أخت منى الغريب أني شفت بالموقع كل أنواع المربيات ما عدا الباذنجان .. معقولة ما بتعرفيه

14 الكاتب منى, on 01-07-2009 10:46
ممم , هنا و الف عافية يا رب بكل لقمة و كتير انبسطت انك جربته و كان على زوءك ..

له يا ارام , معقولة ما اعرفوا , بس السنة الماضية نزلت كتير انواع مربيات و ما كان مربى الباذنجان اله دور , هل السنة باذن الله رح نزله من طقطق لسلام عليكم

15 الكاتب ام رومل, on 21-11-2009 19:25
سلام الله يعطيكن العافيه تعرفو نحنا اهل الفرات يعملو المتبل ويسموه سوكلمه بس اشويه وبالشوكه مع سن توم اطحنيه بعدين سمنه مسيحه فقط مو مكويه عالوجه مع حبات رمان فرطوصحه وهنا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 01/07/2009 )

< السابق		التالى >

[ عودة ]