L2ma.com | لقمة طيبة | L2ma.com | لقمة طيبة | كبة ربيع | على, · , الكبة, كتير, حتى | L2ma.com

القائمة الرئيسية

كبة ربيع

الكاتب/ منى

21/06/2009

غروب الشمس على بوابة قلعة حلب , حزيران 2008

أتوقع أن أغلب الأخوات هون بيعرفوا اني حلبية احية مأصلة من الجديين و من فسط حلب متل ما بيقولوا . بالعادة لما بكتب شي باللهجة العامية ما بكتبه بالحلبي و بحاول بعد قد ما فيني عن الكلمات التقيلة , بس بأخر وصفة نزلتها , شفت ان كلمة " نصوبن " لفتت نظر اكتر من أخت لهيك رح يكون اليوم اللقش حلبي و أنا متأكدة أن لازم يكون في شرح للمفردات , بقى اذا في شي مفرداية استعصت على الفهم أنا مستعدة للشرح .

المسجد أمام قلعة حلب .. أية بعدي شوي روحتيلنا طرف النخلات

اللهجة الحلبية من اللهجات القوية بسوريا و بتفرق كتير عن لهجة الشوام أو الحموية و الحماصنة أو حتى أهل الساحل , و الي بيميزها عدة أشيا من أهمها لفظ الجيم و الطاء بقوة أو اخراج الحرف من مخرجه المظبوط . و في كمان لفظ حرف الشين في بعض الأحيان متل حرف ch في كلمة child متل ( شبونة , شنق ) و في كمان قلب الشين لسين متل سجرة بس هل الميزة بتخف كتير بالحكي الحلبي الخفيف . الشي التالت هو الإمالة , دايما في ميل من الحلبية لقلب الألف لياء متل جيمع ( جامع ) جيج ( دجاج ) و إذا ما انقلبت الألف لياء فرح يلفظوها و كأن الياء عم تجرها لتحت . هلأ ممكن البعض يعتبر لهجتنا مو كتير حلوة ( اشووو خيتووو ؟ ما حبيتها منك هشغلة طاوول طاوول) و أنا نسبيا معه و خصوصاً إذا كان مفكر اللهجة الحلبية هو الشي الي بيسمعه بالمسلسلات الحلبية العجيبة ( هيك سوا لقشك ) و للصراحة كتير قليل من الممثلين الي اصلهن مو حلبي أتقن اللهجة و قدمها مظبوطة و انا أكتر شي بكرهه بالمسلسلات الحلبية هو التصنع و المبالغة بلفظ الحروف و الامالة و المطمطة . بس مو كلهم فاشلين بالحلبي عندك بسام كوسا حكى الحلبي بلا يمين كأنه مربى جنب القلعة . أما الطرف التاني مليان فشل و ملكة الفاشلات بالحلبي بلا منازع سلمى المصري , لما بتحكي حلبي , يااا يوم بشتهي اشلف حالي من الشباك أو أحط اصبعتي بعيني .

بكل الأحوال بنفس حلب في فرق باللهجة من منطقة لمنطقة و من عيلة لعيلة , و انت ما فيكي تقارني صبية دارسة أدب فرنسي و من المحافظة , تمها صغير و اكلة شي معلقتين تلاتة عسل قبل ما تحاكيك بتاجر مرّ من تجار المدينة الكبار , كل الناس خير و بركة بس اللهجة بتختلف كتير . و حتى نحنا الحلبية بين بعض منقول على واحدة حكيها تقيل , يموو : حكيها عتيق .

في كلمات و تعابير كتيرة خاصة بحلب و منها بذكر ( كني , أبوس شناق وشك , أنجأ , جقجق الأراضي , انفكحت اجرو , مرّكنة , انكفخ كفخ من حرته, جقر و وشه نيشف , رعنة و مشرشرة , طاول , نضايفية , كويسة متل الكربوجة , فشلان بتمو ) و كتير غيرها و من أحلى هل الكلمات برأيي أو التعابير بشكل أصح , تعبير : أبوس روحك , عن جد الي اخترعه حلو . أبوس روحو شأد بيفهم .

أخر الشي أنا فخورة كتير بحلب و بحبها و بشبهها لدرجة التوأمة , ملكة المتناقضات بكل تفاصيلها و لهجتي و حكيي جزء مني , هيك انا بحكي و من دون تصنع , لهيك بعمري بحياتي ما سألت واحدة عن حالها و قلتاها : كيفك ؟ لشو كيفك و نحنا اتربينا و كبرنا مع شلونك . و أحلى شي لمن بيدمجوا العربي مع الانكليزي أو الفرنسي لزوم البروظة و للدلالة على المكانة الرفيعة للمتحدث . و أنا عن جد بس ما حدا دمج و خبص بيسقط من عيني . خالو تقي صار اله عايش في فرنسا 55 سنة عدا و نقداً و مع ذلك ما انعوج لسانه و لا شعراية و بيحاكيني من الحلبي كلام أول مرة بسمعه . و على سيرة الأخوال كمان خالو مروان خال زوجي اله كتاب ممتع و دمه خفيف اسمه اللقش الحلبي فيه أصل و فصل كل كلمة حلبية .

هلأ بما أننا عم نحكي عن حلب و اللقش الحلبي رح قدملكم اليوم وصفة قديمة قديمة كتير و ممكن اعتبرها من الوصفات المنقرضة الي ما بقى حدا يعملها اليوم و أصلا كتير قليل الي بيعرفوها و هي وصفة خاصة بحلب و نحشيها بجبنة حلب الخضراء الي ما في متلها بكل العالم .

الكبة اسمها كبة ربيع أو كبة الربيع و من اسمها رح تعرفي انها تتحضر بالربيع وقت الحليب و اللبن و الجبنة الفريش و الحشوة عبارة عن جبنة و جوز و فليلفة حمراء ناعمة فقط لا غير , من دون لحمة و حتى ممكن تحشيها بالجبنة و الفليلفة من دون جوز أو مكسرات و بتطلع خفيفة و تغير شكل كيف ما حبيتي تعمليها . الجبنة في الحشوة هي الجبنة الخضرا , أكيد مو لونها أخضر هي جبنية بيضا و معروفة بحلب و نستخدمها لهل الوصفة من دون تسنير لأن رح تتسنر مع الكبة و تغلي بقلب الفرن أو على الفحم , و الأخوات الي برة حلب و مو متوفرة عندهم هل الجبنة ممكن يحشوها بالجبنة الحلوم أو مزيج من الحلوم و القشقوان . و ممكن استعمال أي نوع من المكسرات لحشي هل الكبة , بس انا بحب الجوز أكتر الشي و هل الكبة ممكن تنشوى على الفحم و ممكن تنشوى بالفرن حسب الرغبة .

مثل اليوم :

لا تحط ابنك على الحيطان و تقول أمر الله و كان

بالصحة و الهنا

الحشوة :

كيلو جبنة خضراء
1 - 2 ملعقة صغيرة فليلفة حمراء ناعمة
صنوبر أو لوز محمص أو جوز مفروم

عجينة الكبة :

نصف كيلو هبرة غنم أو عجل ( هبرة خاصة بالكبة مطحونة لتصبح كالمرهم )
نصف كيلو برغل أسمر ناعم
حبة بصل
نصف ملعقة بهار مشكل
ملح حسب الرغبة
رشة قرفة

سمنة بقرية
direction

·         تقطع الجبنة لشرائح ثم تتبل بالفليلفة , يفرم الجوز خشناً , يحمص الصنوبر أو اللوز في حال استخدامهم ثم تضاف للجبنة .

·         يغسل البرغل و ينقع مع البصل و القليل من الملح بالقليل من الماء البارد مدة 10 إلى 15 دقيقة ثم يصفى جيداً .

·         يفرم البرغل مع البصلة على ماكينة فرم اللحمة ثلاث مرات .

·         تبلل اليدان بالماء البارد ثم تدعك الكبة باليد بشكل جيد و في حال توافر صينية فخارية ( غضارة ) تكون النتيجة أفضل .

·         تضاف اللحمة الهبرة و البهار و رشة القرفة و تدعك مع البرغل لمدة عشر دقائق على الأقل حتى نحصل على عجينة متماسكة و طرية .

·         تذاق الكبة و يضاف القليل من الملح إذا دعت الحاجة و تعدل البهارات حسب الرغبة .

·         يحضر صحنان بحجم متوسط واحد , تقطع الكبة لكرات بحجم مناسب لحجم الصحن ثم يقلب الصحن و يغطى بورقة نايلون مبللة بالقليل من الماء البارد .

·         ترق الكرة قليلاً باليد ثم يضغط عليها بصحن أخر للحصول على دائرة مستوية و رقيقة . يرق قرص أخر بنفس الطريقة .

·         توضع ملعقتان أو ثلاثة ملاعق من شرائح الجبنة المتبلة على أول قرص و يراعى عدم اقترابها من الحواف .

·         يوضع القرص الأخر بانتباه فوق الحشوة ثم يغطى بورق نايلون أخر و تسد أطرافه بشكل جيد .

·         يرفع القرص على راحة اليد المبلولة بالقليل من الماء البارد و يدار و حتى تغلق جميع أطرافه و تسد و يأخذ شكل القبة و يمكن الاطلاع على طريقة تحضير الكبة الصاجية للخطوات المصورة .

·         يوضع القرص المجهز على صينية مدهونة بالسمنة, تكرر العملية مع بقية الكبة حتى تنتهي كل الكمية .

·         توضع قطعة صغيرة من السمنة على كل قرص ثم تشوى الصينية في الفرن و تسقى بالسمنة من وقت لأخر حتى تنضج . في حال شوي الأقراص على الفحم يغط كل قرص بالسمنة المذوبة ثم يشوى حتى ينضج .

·         تقدم الكبة مع السلطة الحامضة أو اللبن العيران .

أضافة إلى المفضلة (0) |

أقتباس | مشاهدات : 5239

تعليقات (55)

1 الكاتب ام محمد, on 21-06-2009 18:41
لك ابوس شناق وجهك يا خيتو والله فرفح قلبي بهل الحكايات الحلوة مافي احلى من حلب واهل حلب واكل حلب انا مثلك يا منى بحس انو لهجتي ماعريضة بس وقت بحكي دغري بيعرفوني حلبية :grin

شلون ما بعرف
بتعرفي يا منى انو في عنا بحلب بعض الكلمات كانت ناناتي تقولهم وانا افكرها عم تحكي حلبي غميق طلعت عم تحكي تركي مثل مشنقةوشنق يعني صحن فرتيكة يعني شوكة ضنضرمة يعني بوظة وغيرها من كلمات والله نسيتني اقولك هل الكبه بتاخد العقل وهي اول مرة بسمع فيها مع اني حلبيةاصلية

2 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-06-2009 19:43
مرحبا منى كيف الحال احلى مقدمة اليوم بقرأها مع اني مو سورية لكن حسيت حالي كأني قاعدة معك بحلب وخاصة اني كثير بحب اتفرج على المسلسلات السورية ولما بيحكوا احيانا باللهجة الحلبية كثير بنبسط عليهم وعلى طريقة الكلام وانا على طول بعرف لهجتكم لأني عشت وسط سوريين كثير ومن ضمنهم الحلبية ومن دون مجاملة انا بحب الكلام السوري كثير وان شاءالله السنة هاي اجي على سوريا وازور حلب لأنك شجعتيني كثير وخاصة الصور اللي انت حاططتيها بتخلي الواحد يتحمس لزيارتها

وبالنسبة للوصفة شكلها كثير كثير رائع ومشهي خلاني اتشجع وان شاءالله راح اجربها بس بمجرد ما تتوفر عندي كل المقادير باذن الله وتسلم ايديك يا منى وان شاءالله تظلي هيك على طول بوصفاتك الحلوة والجديدة

3 الكاتب ام كريم, on 21-06-2009 19:59
اي لكن اهلييين وسهليين بست الستات فتحت الموقع وصرت اضحك لحالي لان في عندي العيلة عمتجقجق بلحلبي بما انو بنت حماي جاية زيارة من حلب لعنا واجتمعو الاخوة وبلشو وانا قاعدة وعماسمع وحاسة حالي بمسلسل كوم الحجر وبما انو عجبتني هلاكلة قايمة اعجن لان مو عرفانة شو بدي ساوي غدا شكرا حبيبتي

4 الكاتب لارا مينا, on 21-06-2009 20:11
ياسسسسسسسسسلام تسلم إيديكي أحب الكبة بأنواعها مع إني ماعملت غير نوع واحد لأن باقي الأنواع بدها برغل أسمر ناعم ولحد الحين وانا أدور عليه , وسبحان الله صرنا نحب حلب من ورا محبتك إلها وأكيد إذا صار فيه زيارة لسوريا بتكون حلب في مقدمة المدن إلي رح نزورها وأنا حبيتها أكثر من بعد ماقرأت مرة في النت إن حلب لها وقفات عظيمة في التاريخ في أكثر من حدث , ومدح التاريخ ناسها واكيد إنتو امتداد لأولئك الناس إلي كانوا بالماضي ومن أحفادهم وكانوا يرفعون الراس .. وانا عن نفسي ماأستغرب لهجتكم وأحسها مفهومة جدا لأن عندنا لهجات أصعب بكثير وممكن تكون أشبه بالهيروغليفية.. وكلمة نصوبن ماستغربتها مثل باقي الأخوات لأن في مدينتنا بنقولهاكثير ولحد اليوم بنستخدمها عادي يعني طلعت الكلمة مشتركة بينا, وعلى فكرة من سنة تقريبا كنت أبحث عن الأطعمة وتاريخ أصولها ولقيت في احد المواقع بحث عن المطبخ الحلبي أعده السيد حسان خوجة وطبعت البحث وكان رائع جدا وفيه معلومات قيمة وممتعة للقارئ وبالمناسبة دايما أسمع عن حلو بسوريا اسمه المحلاية والبوظة العربي وكان نفسي أعملها بس البوظة العربي شفت وصفتها في فتافيت وعملتهاوكانت طيبة ولو تنزلينها بعدين منك بتكون أحلى و أفضل أما المحلاية مالقيتها فإذا ممكن تحطي لنا الوصفة حتى لو في المستقبل البعيد إذا قدرتي طبعا ولكي خالص شكري وتحياتي .

5 الكاتب ام نور, on 21-06-2009 20:38
:grin

شو هالحكيات يا منى فرط قلبي من الضحك لما قريت المقدمة ماشالله عنك تاقني اللغة الحلبية وعارفة تشرحيا كتير منيح بس في بعض الكلمات منستعملون نحن بس اكيد اللفظ بيختلف متل نصوبن استغربت لما الاخوات استغربوها كتير منستعملا جقجق الأراضي كمان منقولا نضايفية , كربوجة كمان منقولون بس متل ما قلت كل منطقة الا كلمات خاصة فيا وكل الناس خير وبركة وبالنسبة لا هالوصفة شي بيشهي شكل الجبن رح يطلع من القرص يييييييييييممممممممممممممم عالجبن وباذن الله رح جربا بس بجبن قشوان سلم دياتك يا رب

6 الكاتب rose reem, on 21-06-2009 21:44
يا نسايم حلبية... سلام بالحب مجقجق يا منمونة الغالية :zzz

اشو اخبارك

انا عضوة طاول ماني نشيطة بس متابعة كويسة

زكرتيني لما اكون من زمان عند رفقاتي بالشام ويخبرو بعضهم (عنا ريم الحلبية)كنت احسها مسبة :eek

(صعي) منامينو بدي اسالك جاييتني بيضة نعامة وزنها 2ك شو اعمل فيها

بوسات كتيرة،وتصبحي على خير.

7 الكاتب dado, on 21-06-2009 23:19
لك إش هالمحاضرة يلي رقعتينا ياها لك منوش؟
شي بياخد العقل
على أساس أنا كمان عم بلقش حلبي

يا ستي أنا بحب الحكي الحلبي كتير بس مو من المسلسلات* ولما رحت على حلب انبسطت كتير بالحكي وكان في مقهى بالسريان الجديدة كنت روح عليه كل يوم بس لأنو صاحبه بالع راديو وما بيسكت وأنا كنت حابة اسمع أكبر قدر ممكن من الكلام.
لما شفت الصور اتحسرت لأنو بآخر نزلة ما صحلي روح على حلب.. انشالله المرة الجاية بمرق لأنو صار عندي مبرر أكبر لحتى روح

لما حكيتي عالجبنة الخضرا اتذكرت مرة رفيقتي الله يذكرها بالخير قالتلي إنها فطرانة قريشة خضرا وأنا عاد افهم شو يعني قريشة خضرا.. طول عمري بعرفها بيضا.. وصرت اتحزر.. بلكي عم تحكي عن شي نوع جبن متل الريكفور بيكون معفن وصاير أخضر :grin

عجبتني الوصفة كتير وممكن العب عليها لتصير نباتية.. بس بيني وبينك ما حابة اعملها بجبنة حلوم.. هداك اليوم عملت فيها فطاير قام طلعوا عبارة عن خبز بنكهة الجبنة.. اختفت كلها :upset

رح دور على جبنة بيضا وجربها فيها..بعتقد بتضل طيبة.

شكرا منوش على حكياتك الحلوين وعلى الوصفة

8 الكاتب gsm, on 21-06-2009 23:40
سلام عليكم يا الله يا منى شو ضحكتيني عن اللقش الحلبي والله تذكرت حالي يعني صحيح انا من فسط حلب بس للأسف بالهوية لأنو خلقانة وعايشة كل عمري بالإمارات وبعدين لما تزوجت صرت ببريطانيا بس عن جد على طول بقلي زوجي لازم يسحبوا منك الجنسية الحلبية :grin

بس والله الواحد لازم يكون فخور بلهجته وانا عم احاول اتعلم شوي شوي من زوجي يعني انا بالفعل بحس كتيير اللهجة الحلبية مميزة وحلوة بس مو تكون كتيير تقيلة

بنرجع لموضوعنا
ياااااااااااااسلام علي الكبة بتعرفي هي اول مرة بسمع بهل النوع من الكبة بس شكلها كتيير طيبة وحتى مكوناتها خفيفة يعني تغيير شكل عن اللحمة :zzz

يا ستي يسلموا إيديك والله يجزيك الخير عن جد انا كتيير معجبة بطبخك وبضل بقول لحالي يعني قليل بهل الوقت إنو تلاقي ست بيت بتعمل كل شي بإيدها :roll

ونيال زوجك وولادك عليك وعلى هل الطباخة المميزة
ما تواخذيني طولت كتيير عليك

9 الكاتب أم الهدى, on 22-06-2009 00:49
لك ريتو ما يبلى ولا يتخ هالتم والله عنجد مقدمة كويسة ومرتبة وموزونة ومزوزقة كتير
والله كل كلمة حكيتيه صح و بتعبر عن يلي جواتي

وتسلم ايديكي على هيك كبة المنظومة وبتعرفي هي أول مرة بسمع فيها، وآآآآآآآخ فرط ريقي عالجبنة الخضرا عنجد طعمتا غير المسنرة بس للأسف من وقت ما كترت الأمراض متل المالطية وغيرها الواحد ما بقى يسترجي ياكلها بلا تسنير

يا خيتو اش بدك بهل حكي
كلو عالصحة والعافية طيب

وكتا خالك عجبني لازم أقراه أنا روح قلبي هيك شي
أبوس روحك شقفة شقفة يا ألذ حلبية
وع راسي حارتك والله

10 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-06-2009 03:10
و النعم و السبع تنعام بحلب و اهل حلب و تاريخ حلب و اكل حلب. شكرا يا منى على درس المفردات الحلبيه. فعلا كلمه ابوس روحك من اكثر المفردات التى لفتت نظري في المسلسلات السوريه. خلتني افكر بالمعنى العميق لهالتعبير و اسال نفسي كيف انو في حدا فكر بهالتعبير و اديشو عميق. اما هالوصفه الذيذه عنجد اول مره بسمع فيها. هل يا ترى منقدر نعملا بجبنه نحنا مسوينا من الحليب? يعني اذا بتعملي معروف فينا اذاا ممكن انو تعطينا وصفه الجبنه الخضرا. على قوله اخواننا في مصر الحبيبه بتطلعي من حفره بتوقعي في دحديره معانا من كتر ما طلباتنا كتيره ههههه. بس شو بعمل بحب اعمل كل شي متل ما هوه في الاصل. الوصفه شكلا راااائع و الطعمه اكيد اروع. شكرا يا منى على كل شيء. فعلا موقع لقمه كتير مميز مش بس باكله بل بروح صاحبته خفيفه الظل و القريبه على القلب. و منى كل ما بتعطينا وصفات عتيقه من عمق التاريخ كل ما منكون مبسوطين اكتر. الله يعطيكي الصحه و يقويكي ويخليلك احبابك. و على قولتكم ابوس روحك :zzz

11 الكاتب لموسي, on 22-06-2009 10:32
ابوس معلاقتك وقلبك والله انك منفنفه ومركنه وطبيخهيه والله يهني جوزك فيك عجب في متللك بحلب؟
مابعرف يامنى كل اكله بتذكريني وبترجعيني سنين لورا بشم تراث حلب . ياستي عسيرة الجبنه لما كنت صغيره ويوم مونة الجبنه كنت امرض من ريحتها الدسمه وبتعرفي لازم كنا نشارك امهاتنا بصنع الجبنه المشلله وخدي انا على قلبان معده ويتهموني اني كسلانه ومابحب اتعب نفسي بشي واكل نصيبي من التهزيئ آآآآآآآآآآآآه عهديك الايام والله يهنيكم بخيرات حلب وعاداتها الاصيله وعاشو ايديك

12 الكاتب semo, on 22-06-2009 14:28
لك ابوس روحك وش وافا
والله وانا عم بقرا دمعو عيوني
صحيح انا حموية بس كانت دراستي واحلا ايام عمري بحلب
وجوزي كمان درس بحلب
والله اشتقت لحلب كتير ولازم كل سنة اول ماانزل عسوريا نزور حلب انا وجوزي
والنعم منك ومن اصلك ومن كل اهالي حلب يا اصيلة
يييييي كنت رح ابعت الرد من دون ما علق عالكبةخخخخخخخ :grin

معليش لا تاخذيني والله من كتر ما اتاخدت بحديث حلب
اليوم عند الصبح فتحت الموقع وما بتعرفي شو صار فيني بس من المنظر
وانا بموت عالكبب بكل انواعا بس هي ولا مرة دقتا
شكلا بيغوب القلب من كتر ما بيشهي
الله يعطيكي الف عافية

13 الكاتب نور الأسلام, on 22-06-2009 17:12
السلام عليكم تحياتي لكل اهل حلب ولكل اهل سوريه ووكل الوطن العربي وكل الطيبين :zzz

منى يسلموا اديك على الكبه انا كتير بحب الحكي الحلبي واكتر شي كلمة ابوس روحك ومية السلامه سالتيني انا من وين انا من درعا ومقيمه بالسعوديه ويسلمو كتيروبتمنى شي يوم زور حلب وفوت على القلعه تحياتي وابوس روحك يااطيب منى

14 الكاتب غيث, on 22-06-2009 19:43
لك مية اهلا وسهلا بهالمةالحلوة والله يخلي لنا هالموقع وصاحبة الموقع اللي جمعتنا فيه وان شاء الله دوما عامر بالاكلات اللذيذة والعضوات المذوقات ويا ستي اللي قلتي عنهم من الشهباء او المحافظة او الزهراء او حلب الجديدة او مابعرف شو من المناطق الجديدة بحلب معظم سكانهم من محدثي النعم اللي كانو يسكنو بمناطق حلب المعتقة متل باب الحديد وباب النيرب وباب قنسرين وووو وظنو انهم اذا قالو كيفك او شو او ياي او كم كلمة انكليزية رح يغيرو جلدتهم واصلهم وما لهم خبر اتهم رح يظلو باين عليهم انهم حلبية بقى ليش التصنع ما بعرف مو هيك التطور هلق كلنا درسنا ووبس ما تخلينا عن اصلنا بس بيجوز جيلنا الجديد عرب بعض الكلمات التركية التقيلة اللفظ اللي كانت موجودة عند اجدادانا لذلك عم تبدو حلبيتنا اخف بس مو تصنع انما من باب التعلم والثقافة الا بنظل بتقول شلونك واشو ووو هلق انا حلبية ابا عن جد بس ما سمعت بهالاكلة اللي فرط ريقي من شكلها بقى طعمتها الله يسلم ايديك بقي ان اقول نصيحة للي بده يستعمل الجبنة الخضرا بهالاكلة او للتسنير ان يلبس الكفوف ذات الاستعمال مرة واحدة لان المالطية وووبتنتقل عبر الجلد لذلك لا تلمسو الجبنة الخضراء بيديكم مباشرة انما بالكفوف وشكرا منى

15 الكاتب منى, on 22-06-2009 20:06
هلا ام محمد

عجب ليش بيحسوا عليك , الهيأة الحال من بعضه :grin

اكيد لازم يبكون في تاثير من الاتراك علينا ما نحنا كنا عيلة واحدة لمدة 400 سنة , مو قليلة هي ابدا و نحنا بحلب كنا اقرب جيران الهم .
ان شاء الله تجربي هل الكبة و تعجبك و تكون يممي

16 الكاتب منى, on 22-06-2009 20:07
هلا هيا

يا ستي بتنورينا و تشرفينا و يا رب اذا صح الك زيارة تعجبك المدينة و خصوصا الجزء القديم منها متل المدينة و القلعة و الجديدة كمان
اتمنى تجربي الوصفة و تكون على زووءك و تعجب العيلة

17 الكاتب منى, on 23-06-2009 20:21
هلا ام كريم

يا مية اهلين و سهلين بكل الحلبية و خصوصي لما بيجقجقوا :grin

ان شاء الله تجربي هل الكبة و تعجبك و تعجب العيلة كلها و خصوصا بنت احماكي , يوم ما بدنا تحكي علينا بس ما رجعت , و انا عم استنى رايك ( و رايها ) بعد التجربة

18 الكاتب منى, on 22-06-2009 20:08
هلا لارا

ان شاء الله تجربي هل الكبة و تكون تاني نوع , عن جد بتشهي و طيبة كتير . و على فكرة كل انواع الكبب بدها برغل ناعم
اتمنى تزوري حلب شي يوم و بتنور فيك يا عسل
يا ترى لارا انت من وين ؟ شي بيخطر ببالي انك من الخليج شي من العراق شي ما بعرف :roll

سبحان الله البحث الي قلتي عليه اطلعت عليه مرة , بس بصورة سريعة و بالفعل حسيته مميز كتير

المحلاية معروفة بالشام و انا مين ما سألت عنها ما بيعرف , حتى مرة دخلت و سالت صاحب المحل , فقالي هي بدها منفحة و شغلتها شغلة , اتمنى اعرف طريقتها و جربها و اذا شي يوم صار اكيد رح نزلها و كمان تكرم عيونك على البوظة , بنزلها يا رب يصحلي قريب

19 الكاتب أم الهدى, on 22-06-2009 22:51
منوش هلق فتحت ايميلي ولا قيت ايميل فيه مفردات حلبية مع شرحها كتير لذيذ حبيت أضيفه زيادة شرح للأخوات الغير حلبية

عوجة-----------كوع
سيوي ---------دغري
أنضرة-----------الكندرة
تاسومة----------السكربينة
دوينات-----------كفوف
لاصطيكة-----------مطاطة
مصراط -----------مصاري
خوته------------ -معه صرع
جدبة------------ ---مجنون
طاول طاول-----------أبداً
معلاق جلق------------الغليظ
خَلْء------------ ------عالم
خيت وخَيْتو------------يعني أختي
خاي وخيو------------ ----يعني أخي
أبويْ------------ ------أبي
ونانتي ------------ --- جدتي
يوم: معناها باللغة العربية وبكل اللهجات هو ال24 ساعة
بينما باللهجة الحلبية بتجي بمعنى ماما

سكرتون------------ -------خزانة
السلاتة------------ ------القشّاطة
السحّابة------------ -----الدرج
خولية------------ ------البشكير
أرمغان------------ --------- -هدية
وبتلاقي كاتبين عالمحلات يوجد لدينا (صمن) وبعد سؤال واستفسار ببين معكن
أنو معناها خبز السمون
جنق------------ -------هي الصحن
جمجاية------------ ----معلقة السكب
فرتيكة------------ ------هي الشوكة
الدءماءة------------ --------مدقة التوم
الدروبُس------------ ------البونبون إللي بتعرفوه
كما امتازت اللهجة الحلبية بأدوات إشارة خاصة بالحلبية ..
يعني العرب كلهون كوم .. وهنن كوم تاني
كوهنه------------ --------للمذكر القريب
كيهنه------------ --------- -للمؤنث القريب
كوهاك------------ ---------للمذكر البعيد
كيهاك------------ --------- -للمؤنث البعيد
كوهاكيي------------ --------لجمع المذكر البعيد
كيهاكين------------ --------- ---لجمع المؤنث البعيد
كوهنن------------ --------- -لجمع المذكر القريب
كيهنن------------ --------- ----لجمع المؤنث القريب
وطبعا للسهولة في اختصارات كمان
اختصار المذكر القريب .. كو
اختصار المؤنث القريب .. كي

ومن الاختصارت أيضاً
تاااا بدل من تعال
رووو بدل من روح
ما راي آجي بدل من ماني جاية

بروك------------ --------- ---اجلس
تشطّح:بدل من تسطّح (وما تسألوني ليش!!)
أبوس روحك : للمدح أبوس شنقات وشك بالشلمونة : للمدح البليغ
(الشنقات طبعاً هي الخدود متل ما بتعرفوا)
يبلاك بقتلك : دعاء بالقتل والضرب
إشْ ضاءلَّك------------ --------يعني شو بدي قلك
عجب------------ --------- -للدهشة
كنّي------------ --------- ----للاستفهام
ديه بقا------------ -------للتأفف
أَبَوْ------------ --------- -للتفاجؤ

20 الكاتب منى, on 23-06-2009 08:09
هلا ام نور

اكيد لازم كون تاقنتها , خبرة .... سنة أنا :grin

سبحان الله الكلمات نفسها بس اكيدة طريقة اللفظ غير , ما أتخيل اللبنانية رح يلفظوا جقجق الاراضي متل الحلبية
ان شاء الله تجربيها و تعجبك و اذا بتستني شوي في وصفة خاصة بالكبة مع جبنة القشقوان

21 الكاتب منى, on 23-06-2009 08:11
هلا ريومة

يا اهلين و سهلين ببنت حلب الي بتغط اكتر من ما تبين , بس دايما مكانها محفوظ و مبين

يا حبيبي شو رح تعملي بهل البيضة , ما عندي فكرة ..
و الا قلك شو رايك تعزمينا كلنا على فطور بيض مقلي و سلطة و البيض و الشاي عليك و السلطة و الجبنة و الخبز التازة علينا

22 الكاتب ميساء, on 23-06-2009 14:58
مرحبا ميمو ايييه شو هالصور الحلوة عن حلب يسلم ايديكي والله يعمر حلب والشام وسوريا كلها بكل جهاتها ويحميها يا رب نحنا بسوريا كلنا أخوة ومنحب بعض ولو اختلفت لهجاتنا بس بيضل لكل لهجة شي حلو بيميزهاوبيخلينا نعطي على بعض من باب الأخوة والمحبة :zzz

وبدي اتشكرك أخت أم الهدى على هالمصطلحات اللذيذة المهضومة وأنا كتير بحب الحكي الحلبي وعندي رفقات كتير من حلب و غاليين عليي كتير وهالكبة يا ميمو باين عليها بتجنن بكرا عالتجربة باذن الله وشكرا يا قمر حلب

23 الكاتب منى, on 23-06-2009 17:24
هلا دالو

لا تتحسري و لا شي , الجايات اكتر من الرايحات و المرةالتانية لازم تروحي على سوق النحاس وتاخديلك شغلة و لو بسيطة عربون حلب

ممكن تجربيها بالعكاوي أو ايا جبنة بيضاء ممكن تمط شوي مو كتير , و انا اكيدة انك ممكن تعدليها بذوقك لحتى ما تشوفيلك لا جاجات و لا خواريف بمنامك

ان شاء الله تبقى ايامك بيضا على طول و يا رب اذا جربتيها تعجبك :zzz

24 الكاتب لارا مينا, on 23-06-2009 17:32
مزبوط كلامك أخت منى أنا من الخليج وبالتحديد من السعودية ,بس سبحان الله السعودية بلد واحد بس كل منطقة لها لهجة وعادات وتقاليد خاصة مختلفة جذريا عن الباقين مثلا منطقةالشمال بتكون متأثرة بحدوده مع الأردن والعراق والجنوب يكون متأثر شوي بحدوده مع اليمن ومنطقة الشرق تتأثر بباقي دول الخليج أما منطقة الغرب تكون متأثرة بمصر والأجانب القادمين للحج حتى فيه أطعمة لذيدة جدا مشهورة فيها وشعبية بس لما يبحث في أصولهابترجع لروسيا أو تركمانستان أو إندونيسيا وغيرها كثير ومنطقة الوسط أيضا لها عادات مميزة وتختلف عن الأربعة الباقين. وحبيت أضيف إن فيه كلمات أو ألفاظ بنقولها في منطقتنا حتى أجدادنا وأصولها طلعت كلمات هندية كيف وصلت الله اعلم وبالمقابل فيه ضمن لهجتناكلمات إنجليزية من سنين بعيدة بس هاذي عرفنا أصلها وهو بسبب الأجانب إلي كانوا يشتغلون عندنا وحتى أختم ردي عندنا كلمات ننطقها بشكل طبيعي جدا وهي من عمق اللغة العربية الفصحى والعميقة كثير وموجودة في معاجم اللغة العربية الفصحى فسبحان الله كيف الإختلاف . وسلا متك .

25 الكاتب منى, on 23-06-2009 17:34
هلا اختي gsm

ان شاء الله دايما مبسوطة و ضحكانة ومروءة , بس من دون سحب و ما سحب , بتبقي حلبية لو شو ما صار و لو وين ما رحتي و لو وين ما عشتي

ان شاء الله تجربي هل الكبة و تعجبك و الكلام الحلو كله من زووءك و لطفك

26 الكاتب منى, on 23-06-2009 19:27
هلا ام هدى

ايه و الله غير , و انا ما بسترجي اكل من الجبنة و هي خضرا ابدا , بس بهل الكبة رح تتسنر بقلبها و ما رح يبقى اثر للمرض

ابوس روحك و قلبك على هل المعجم النهفة الي جبتيه , عن جد شقفة :grin

فرطت من الضحك و اناعم اقراه , سلم دياتك , و عن اذنك هلأ صار لازم اروو :grin

27 الكاتب منى, on 23-06-2009 19:51
هلا امونة

اكيد هل الكلمة لازم تلفت ناس مزوءة متلك يا عسل و اتمنى تجربي الوصفة و تكون على زوءك , لان انتي بالذات ازعل لو ما زبطت معك شي وصفة من وصفاتي

امونة هلا الصراحة نانتي كانت بتعمل الجبنة , و من خيرات المزرعة الي كانت عندهم , بس انا ما جربت لسا لان ما لقيت حليب متل العالم و الناس , كله مغشوش و صايت . الجبنة المطلوبة هي جبنة بتمط شوي عند التسخين مع المحافظة على شكلها و اقرب نوع هو نفس النوع الي بتستعمليه للكنافة

الف شكر الك لكل الكلام المكتوب و الغير مكتوب , الي بحسه دوما من ردودك , عن جد شكرا لكل هل المحبة و كل هل الثقة و ربي يديم المحبة والمعروف دوما و ابوس روحك و قلبك أمونة

28 الكاتب منى, on 23-06-2009 20:04
هلا لموسة

و الله خجلتيني بكل هل الحكي الحلو , ريتو يسلملي الزوء كله لاجلك

يا ستي انا بتمنى ان اعرف الجبنة المشلشلة كيف بتصير , لان و لا مرة من وقت ما وعيت على الدنيا حدا عملها ادامهي ,. بس هلا مشتهية اقنع عمتي نساوي شوي السنة الجاية اذا الله خلانا من الطيبين من باب العلم بالشي بس .

الله يسلمك و يحفظك و ان شاء الله توصلي بالسلامة

29 الكاتب منى, on 23-06-2009 20:18
هلا سمسومة

مسحي دمعاتك , شو بزعل لما بشوف واحدة من الاخوات هون الغاليات كتير على قلبي مدايقة لا سمح الله . ان شاء الله بترجعي سالمة و غانمة انت و زوجك و كل عيلتك الصغيرة الحلوة واحد واحد
و لازم لما تجي لحلب تدوقي الكبة على اصوله لان ما في اطيب منها و يا ريت يكون فيك شي مرة تحضريها لعيلتك

30 الكاتب منى, on 23-06-2009 20:33
هلا نور

ان شاء الله بتزوري حلب قريب و تزوري كل المناطق الي نفسك فيها و تعجبك
و كمان اتمنى شي مرة تجربي هل الكبة و تحبيها و مية السلامة فيك دوما

31 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 24-06-2009 03:10
منى حبيبتي انا سالتك عن الجبنه الخضرا ما كنت عارفه شو هي اول مره بسمع جبنه خضرا بس بعدين فهمت شو هي. في عندي الوصفه شكرا كتير مره تانيه.

32 الكاتب منى, on 24-06-2009 07:15
هلا غيوثة

لما الواحد بيشلح جلده بيبقى بردان لو شو ما عمل و بيجوز هل الكلمات القوية عم تخف بفعل الدراسة و المخالطة و لما رح يكون التخفيف طبيعي رح يبين و لما بيكون تصنع كمان بيبن :roll

و الله غيوثة اول مرة اعرف ان ما بيسوى نمسك الجبنة بايدنا لان الامراض بتنتقل عن طريق الجلد, الف شكر الك للنصيحة دكتورتنا و ربي يجزيك كل الخير عنا

و اتمنى انك تجربيها و تعجبك

33 الكاتب رنا, on 24-06-2009 14:08
جبنة خضرا ....اييييه الله يذكرك بالخير يابابا :roll

...خيتو اش هالكبة يعني حماتي تبلغ من العمر ستين عاما ونيفا وبعمرا ماسمعت عنا :grin

بس شوووو كبة وجبنة وصنوبر شو في شي مو طيب بالتاكيد رائعة ...واذا بتصير بالجبنة العكاوي رح جبها لانه هون مافي جبنا خضرا ...
اما بالنسبة لحلب واهل حلب يلي انا منن ياستي مافي اطيب من قلبهن والذ منهن بكل حكياتن انا امي شامية ومقضية فترة من عمري بالشام يعني حكيي مو كتير حلبي بس لما بحكي بيزبطوني متلبسة بالجرم المشهود بكلمة (حضرتك حلبية ) بجاوب ....ايه ..طبعا وبغاية الفخر

34 الكاتب آرام, on 25-06-2009 10:50
أول مرة بسمع بهالكبة مع أني حلبي من كذا ألف سنة .. مبدعة دائماً أخت منى .. من أهم مميزات لقمة طيبة تذكير الناس بالوصفات القديمة شبه المنسية وتوثيق هذه الوصفات وتدوينها بأدق تفاصيلها وهذا جهد كبير وعمل رائد له أهمية تاريخية يحسب لك .. الموقع بكل ما يحتويه من كنوز يمكن اعتباره تكملة (وتكملة ضرورية) لموسوعة خير الدين الأسدي الله يرحمه.
وعلى سيرة اللهجة الحلبية .. بحثت في النت عن كتاب اللقش الحلبي لخالك الدكتور مروان الرفاعي وقرأت مقطع منه .. أعجبني جداً .. الطريف أن المقطع الي قرأته من الكتاب يتحدث عن الأصول الآرامية للهجة الحلبية ويركز على أهميتها باعتبارها أكثر اللهجات السورية قرباً من اللغة الآرامية .. وأنا مغرم بالتاريخ الآرامي لسوريا .. لاحظي أني اخترت اسم آرام لما اشتركت في الموقع مع أنه مو اسمي الحقيقي.
نقطة أخيرة .. كانت مفاجأة كبيرة فعلاً أنك ما بتعرفي تعملي الجبنة المشللة .. ولاوو .. يعني مو حلوة بحقك طاول طاول :grin

35 الكاتب منى, on 25-06-2009 12:30
هلا ميوس

امين يا رب تبقى عامرة باهلها و ناسها و خيرها و خيراتها

يا رب تجربي الكبة و تعجبك و تكون غدا طيب , و لا تنسي تقوليلي شو بيصير معك

36 الكاتب منى, on 25-06-2009 12:32
هلا لارا

اتشرفنا و الله و الكلام الي قلتيه لاحظته , لان بتحسي البرياني من المطبخ السعودي على اد ما بيتقنوه و بيتفننوا فيه و مع انه هندي و هل الكلام بينطبق على كتير وصفات و أكيد الي بينقل وصفته رح ينقل معها لهجته .
معلوماتك مفيدة و التقسيم الي قسمتيه خلا الصورة توضح اكتر , شكرا لارا حبيبتي

37 الكاتب منى, on 25-06-2009 12:33
هلا رنونة

ما انا قلتلك انها كبة منقرضة و ما بقى حدا لا يعرفها و لا يعملها الا القلة القليلة من كبارية و عجايز حلب , و انا منهم :grin

بس طيبة و بتستاهل التجربة و اذا كانت الجبنة الي مستعملتيها مفتخرة , رح تاكلي منها و ما تشبعي .
على راسي حارتك الحلبية و الشامية يا طيبة

38 الكاتب منى, on 25-06-2009 13:00
هلا امونة

ان شاء الله تجربيها لكن بجبنتك و تطلع طيبة و متل ما بتحبي و اذا طلعت معك الجبنة طيبة فانا اتمنى ان تشاركينا بوصفتها :zzz

39 الكاتب منى, on 28-06-2009 18:58
هلا ارام , الف شكر الك لكل الكلام الي حكيته بردك . انا الوصفات القديمة بتأسرني و دايما بس ما شوف شي ست كبيرة بطلب منها تعطيني وصفة قديمة و على زووءها .
فكرت ان اسم ارام اسمك الحقيقي , على كل ما دامك مغرم بالتاريخ الارامي , فأتوقع هل الكتاب رح تحبه كتير , انا عني استمتعت فيه جدا و خصوصا الجزء الأول

احم يعني ما فاتتك شغلة ان ما بعرف اعمل جبنة مشلشلة , و الله كتير مشتهية , بس ماما ما بسترجي اطلب منها و الا جاوبتني جوابها المعروف و الي بتقصد فيه التهزيئ الكامل كل ما نكشت بشي اكلة صعبة " الناس وصلوا للقمر و حضرتك بدك تعمليلي هل الشغلة في البيت "
يلا خيو ان شاء الله سنة الجاية بتعلمني ياها عمتي حجة رغيدة لان فعلا مو حلوة بحقي طاول

40 الكاتب DOUHA, on 26-06-2009 09:35
هههههههههههه هلا منى على سيرة شلونك متل ما بيتعرفي اني اهل بابا من مصر ومرة اجا عمي والت شلونك عموو الي شو يعني؟؟؟

فكر ما لونك ؟ هههههههههههه

سبحان الله كلمات ولهجات

على سيرة الكبة ياريت ترسلي قرص واحد مسج الي ههههههههههههههههه وشكرا :grin

41 الكاتب منى, on 28-06-2009 18:57
:grin

حلوة , سبحان الله هل الفروقات شو بتعمل مواقف مضحكة و خصوصا لما بيجتمع اكتر من حدا بأكتر من لهجة

لك مو تكرم عيونك , بس حضري صحن أحسن ما تطب بحضنك و تلوصك بالسمنة :zzz

ببعتلك مسج فاضية اول لحتى تحضري حالك انو المسج الي بعدها دسمة :zzz

42 الكاتب BaSmAa, on 29-06-2009 16:15
يا عيني شكلها مغري جداً وبتشجع عالتجريب
وطعمة الحشوة اكيد أكيد مميزة
بس سؤال ست منى :
الفليفلة الحمرا حارة ولا حلوة
و رح جرب اعملها لما تعمل الوالدة مطابقات مشوية أو كبة صاجية متل ما بتقولو عنها
أكيد رح تطلع غير شكل يم يم
نحنا بنحب الجبنة الخضرا وما بناكلها إلا هيك بدون غلي إذا كان هاد قصدك لأنو ما عرفت شو التسنير

تسلمي عالأكلات اللذيذة والأطباق المميزة

43 الكاتب منى, on 29-06-2009 19:45
هلا بسمة حبيبتي

الفليلفة فيك تستخدميها متل ما بتحبي , بس لو كانت حرّة شوي بتطلع اطيب .
حكيك تمام , و هي هيك نحنا منعملها , لمن منحضر مشوية أو صاجية او اورفلية منحضرها معها لان بتعرفي الكرش العربي اذا شي مو مدعوم باللحمة بيصير مقبلات فوراً :grin

اقصد بالتسنير الغلي , بس مو غلي سادة , المي بيكون فيها محلب كتير و مستكة و حبة بركة لحتى تعطي نكهة مميزة كتير لجبنتنا

يا رب تجربيها و تعجبك و اي سؤال تاني انا تحت امرك و بالخدمة دوما ان شاء الله

44 الكاتب noha, on 04-07-2009 19:13
ما شاء الله عليكي يا ست منى ابدعتي من جهة الطبخ ومن جهة اللهجه الحلبيه
هذه اول مره بسمع بهيك كبه مع انه انا(اعوذ بالله من كلمة انا)حلبيه احييه من فصت حلب
ان شاء الله بس انزل لحلب رح تكون كبة ربيع على راس قائمة الطلبات طبعا بعد الكبه المشويه والسندوانات ومحشي عجور بالفريكه ومحشي الجزر
والمعلاق المشوي واش بدي اعدلك لاعدلك
يسلموا هل الايدين واتمنى لك التوفيق

45 الكاتب منى, on 08-07-2009 18:59
هلا نهى

متل ما قلت هادا النوع منقرض , بس على فكرة هلا الناس رجعانة عم تعمله بس بحشوة قريبة ببقى بضيفها اذا ربنا راد

الله يسلمك و يحفظك و نورتي الموقع اختي :zzz

46 الكاتب آرام, on 18-08-2009 15:34
مرحبا أخت منى
حبيت أخبرك إني اشتريت من فترة كتاب معجم اللقش الحلبي وكان فعلاً رائع جداً واستمتعت بكل كلمة فيه .. بس الغريب أن كل المكتبات قالوا لي أن الكتاب جزء واحد فقط وأنت ذكرت أنه جزئين .. حتى أني اتصلت بدار شعاع للنشر الي ناشرة الكتاب وأكدوا لي أن الكتاب جزء واحد بس!! فشو قصة الجزء التاني؟

47 الكاتب منى, on 20-08-2009 14:34
هلا ارام

الكتاب التاني هو بين ايدي هلا و اسمه بالكامل : معجم أصل اللقش الحلبي الكلمات الدخيلة .

الكتاب الاول ما بقى اذكر اسمه الكامل , بس رح اتاكد لاكون انا غلطانة و مفكرة انه جزئيين :roll

48 الكاتب omyosef, on 27-02-2010 17:11
اهلين خيتو ان بحب حلب واكلات حلب وحكيات حلب الله يسعدك ياختى على هل الاكلات الطيبه والله غرفتى قلبي على بلدى واشتقت اكون فيها ادعولي ارجع عن قريب واشوفك يا اختى منى لانو كتير حبيتك وياريت رقم تليفونك منشان بس انزل حلب اشوفك وتسلم ايديكى على هل الموقع

وبتمنى تردي علي حبيبتى جوعتونى كتير وشهتونى على هل الاكلات اللى نحرمنها من وقت ماجينا على مصر سلام

49 الكاتب منى, on 03-03-2010 12:13
اهلا و سهلا فيك اختي

نور الموقع باحلى حلبية , شرفتينا .

ان شاء الله تجربي شي من الوصفات الموجودة و تطلع متل ما بتحبي و ممكن تبعتيلي ايميل عن طريق اتصل بنا :roll

50 الكاتب بشرى, on 31-03-2010 08:09
لك صباح الورد يا أحل وردة حلبية ..
اشس هالللقش الكويس هاد ..

يعني شوقتينا لحلب يا خيتو ميكن ميكن

يا ستي إلنا الفخر إنو ولدنا وعشنا وتربينا بحلب .. أنا ما بحاول خفف من لهجتي أو اتصنع فيها لانو بمووووت بالحكي الحلبي .. وفوراً بيعرفونا حلبية .. حتى في بنات سعوديات قالولي إنو وشكن بيكون أبيض ومدور يعني مميزين :grin

بالنسبة لكتاب خالك الدكتور مروان عنجد يسلم ايديه على هالكتاب عندي ياه من زمان وكل ما بشتاق لحلب بقعد وبقرأ فيه .. هوه الكتاب واحد بس على ما اظن , اسمو معجم أصل اللقش الحلبي الكلمات الدخيلة .. لانو سألت عن كتب تانية بدار شعاع وقالو هاد بس ..

وبالنسبة بقى لكبتك .. يا ستي أول مرة بسمع فيها بس بتزكر هيك صورة إنو نانتي أم أبوي الله يرحما كانت تساويا وأنا صغيرة كتييييير

إن شاء الله رح جربها عن قريب وإذا احتجت أي مساعدة ما رح اتردد ..وفعلاً متل ما قال الأخ آرام هالموقع لازم ينحط بقائمة كتب التاريخ الحلبي الأصيل .. بتشكرك من كل قلبي على كل شي قدمتيه وانتي أثرتي فعلاً بايت بدون ما تعرفي

وأبوس روحك فعلاً

51 الكاتب منى, on 31-03-2010 11:57
سلام بشورة

اي صح , كتير بيميز الحلبيات البياض و تدوير الوج , يا اختي نحنا شقفة :grin

الكتاب طلع كتاب واحد و انا كنت فهمانة غلط و صاير في سوء تفاهم :roll

الله يسلمك و يخليك بشورة يا مززوءة و انا الي بشكرك على هيك رد و على هيك كلام طيب و حلو

52 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-09-2010 05:58
السلام عليكم ورحمة الله

آه يا خيتو إش دألق ؟؟؟ .. اشتأت لحلب كومايات كومايات :cry

الصور بتعقد .. بكمرتك ؟

الكبة ... بتنعمل مقلية ؟ ولا شرط شوي؟
وإذا مقلية .. أعمل العجينة متل المقلية واحشيها جبنة بيضا ؟ (آخر ما يمكن تسميته بالكبة الربيع ههه).

شكلها كتير كتير شهية ...

علوا كمان تحطي كلمتين شرح الفرق بين الأجبان العربية (صار عنا خبرة بالأجنبي بس بالوطني ..) .. يعني الحلوم والبيضا والخضرا والعكاوي والأنواع الأخرى ..
حماتي بتعمل عإيدها بالشام وبتبعتلي، بس ما بعرف هي شو، لونها أبيض وبتحطلها ملح كتير وقاسية.

والجبنة المقلية يلي بالصورة .. بتنعمل ضروري بالجبنة الخضرا ولا ممكن بيضا ؟

الله يعطيكي العافية :zzz

والسلام عليكم

53 الكاتب منى, on 16-09-2010 13:13
الصور بكاميرتي و الحقيقة احلى بكتير من الصور , ان شاء الله بترجعي قريب سالمة و غانمة

هي الكبة شوي اطيب , و هون ما فينا نستعمل نفس مقادير الكبة المقلية لان ما رح تطلع طيبة , كل شي و اله شي :zzz

ما عندي فكرة مفصلة عن الفروقات بالجبنة , لهيك ما رح ااقدر فيدك , اما الجبنة المقلية انا محضرتها بالجبنة الخضرا و انت فيك تستعملي الحلوم و حتى الموزاريلا لتحضيرها :zzz

54 الكاتب لينا74, on 13-03-2011 21:03
مرحبا اخت منى شلونك
بتعرفي منكتر مالك مهضومة ولذيذة حسيت حالي في حلب بين اهلي
هي اول مرة بدخل على موقع و بحس براحةكبيرة
وكمان الوصفات جميلة ويبدو انها سهلةسوف اجربها انا سعيدة جدا بمعرفتك واتمنى رؤيتك عندما اجي لسوريا لانني مقيمة في فرنسا وشكرا لكي

55 يامو ع الحلبية
الكاتب بنت دير عطية, on 17-05-2011 13:07
السلام عليكم:
اي خيتو شلونك وع سيرة القش الحلبي انا طاول طاول ما كنت بظن اني رح اتزوج حلبي المهم هيك كان النصيب والحمد لله بس يلي فاجئني انو نسوان حلب قلبون طيب كتير فوق العادة ورح تقوليلي ليش استغربتي !استغربت لان متل ما منشوفون بالمسلسلات قوايا وقادرين "بس اكيد مو الكل طبعاً"فيلي فاجئني انو الحمدلله كل يلي اجتمعت فيون من حلب قلبون طيب .وابوس روحك وش وأفى خيتو اشقد انكون طيبين "سامحينا ع تقليد اللهجة ولو ببعض الكلمات وبظن انك تسامحيني كون زوجي حلبي خيتو لكن"

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 08/04/2010 )

< السابق		التالى >

[ عودة ]