إذا جيتي شي مرة على سوريا و بهل السفرة اذا صح الك تزوري حلب و بهل الزيارة إذا رحتي على شي مطعم فأكيد على المنيو رح تشوفي اسماء غريبة شوي متل توشكا , ماريا , مروش و بعد سطر أو سطريين رح  تقرأي جبنة مسقسقة , جبنة كردية ! قبل ما تسألي الكرسون شو هي ماريا ؟ و مين هي توشكا ! اتذكري انك شفتي هيك شي مرة بلقمة طيبة و كمان شفتي طريقة تحضيرهم .

هل السندويشات كتير بتذكرني بطفولتي و بايام الصيفية , لمن كنا نروح كل كم يوم على نقابة المهندسيين , يقعدوا الكبار على الطاولة و نركض نحنا على الألعاب و الزحليقات و المراجيح و الدويخات , بوقته كان كله ببلاش , عن جد الدنيا كانت ابسط من هلأ و أبسط هون الها معنيين .

على الأغلب بعد اللعب لازم نكون علقنا قتالة مع شي حدا اخد النا دورنا بشي لعبة , و بعد ما نتقاتل و ننتف بعض , كان لازم نركض لحتى نتحامى بالكبارية و نجيب شي واحد منهم يورجي هل القليل الترباية على حاله . بس نحنا نوصل على الطاولة , و نشوف العشا نزل ( و اكيد فيه توشكا و ماريا ) و تطلب مننا ماما أن نروح و نصوبن و نرجع بسرعة قبل ما يبرد السندويش , ليش بوقتها ننسى كل شي عن القتالة و نركض ركض ما حدا بيعرف

هلا يمكن كل الصبايا هون بتعرف قديه بحب دور على أصل الوصفة و فصلها , و كتير انبسط لمن أعرف قصتها . بس هل الماريا ما عرفت الها أصل من فصل لهيك رح خبرك شو كنت دايما اتخيل سبب التسمية و هل الخيال مستند على الحقائق , خيال علمي يعني    


السندويش معروف عندنا باسم ماريا , معناه أكيد أصله اما من اخوتنا المسيحية أو الأرمن و كنت و انا صغيرة فكر ان في واحد معلم سندويش اما بالسليمانية أو العزيزية مو متأكدة عسوا و كان عنده جارة حلوة و مو عرفان كيف بده يلفت نظرها . بعد تفكير خطر بباله ان يسمي أطيب سندويش عنده باسمها و هيك صار . لهيك كل ما بسمع اسم ماريا و بيكون القصد هل السندويش بيخطر ببالي صبية طويلة , شعرها طويل و سبل و متل الليل  و لابسة فستان أحمر بروتيل , احم احم . أفكار الطفولة عجيبة بتكون احياناً .

الوصفة اتعلمتها من رفيقتي بشرى لما عطتني دفترها المليان وصفات طيبة لحتى صوره من شي اربع أو خمس سنين و كل ما بجرب شي منه بيطلع و لا أطيب . شكراً بشرى .

بالصحة و الهنا

نصف كيلو لحمة غنم مفرومة مرتين
نصف ملعقة صغيرة بهار مشكل
بهارات مشكلة حسب الرغبة ( أنا أستعمل رشة قرفة و زنجبيل و فليلفة حمراء ناعمة )
2 حبة بندورة
حبة فليلفة خضراء
حبة بصل
3 ملعقة كبيرة بقدونس مفروم
ملعقة كبيرة نعناع مفروم
2 ملعقة كبيرة دبس رمان
4 رغيف خبز عربي
زبدة و زيت زيتون لدهن السندويش





·         تقشر البندورة و يتم التخلص من بذورها ثم تفرم ناعماً جداً , تفرم الفليلفة و البصل ناعماً جداً و يمكن استعمال فليلفة حرّة أو عادية حسب الرغبة .

·         تدعك اللحمة و البهارات و الملح و البندورة و الفليلفة و البصلة و البقدونس و النعناع و دبس الرمان , و يفضل تركها لبضع ساعات لتمتزج النكهات ببعضها البعض .

·         يدهن الخبز بالقليل من الزبدة ثم تمد فوقه الحشوة و يدهن الوجه بزيت الزيتون .

·         تشوى السندويشات على الفحم لأطيب نكهة و يمكن شويها على طواية تيفال و تقليبها على الوجههين حتى تنضج و يمكن أن تشوى في الفرن حتى تنضج اللحمة و يتحمر الخبز .

تعليقات (30)

2  الكاتب منى, on 19-06-2009 15:13 و لا فرق الخيال بيخلي هل الصبية مو حلوة     بقى اسمها مارينا بحماة , مم . بس بتبقى طيبة شو ما كان اسمها هل الضرسانة     ان شاء الله بتشوفوا الخير على الشغل الجديد و لا تاكلي هم , نحنا هون كلنا رفقاتك و صاحباتك     نورتي سيمو

5  الكاتب dado, on 19-06-2009 16:19 لو كنت شب ... عفوا لو كنت باكل لحمة كنت دبت بغرام هالـ ماريا   بصراحة أول مرة بسمع فيها.. بعرف التوشكا وبعرف المسقسقة "أكلتها بمطعم قبال القلعة بحلب" .. بس شكلها ظريفة كتير هالسندويشة.   يا ستي شو ضحكت على التفسير.. بس قبلها فرطت من الضحك على كلمة "نصوبن إيدينا" من شي خمسطعشر سنة ما سمعتها  تسلم إيدك منى

6  الكاتب رنا, on 19-06-2009 17:42 ههههههه شو ظريفة هالاكلة عن جد ذكرتيني بطاعم سوريا واكلاتها الطيبة ..واحلى شي بحثك المنظم عن اصل وفصل الاكلة بس اكيد تفسيرك بمحله لكان شو ممكن يكون ؟؟لانه اسمها ماريا يعني مبين اسم صبية وحلوة كمان   وبالنسبة لكلمة( نصوبن ) شو كانو يضحكو علينا ولاد خالي الشوام وقت نروح لعندن ومع انه ماما شامية بس بحكم شغلها وقعدتها بحلب صار حكيها حلبي وكل مانقوم من السفرة تقول يلا يارنا وري روحوا صوبنو ...انا اتطلع على امي بعدين عليهن ولاقيهن عم يتكركروا شو كنت اخجل لاني حلبية بس بعد ماكبرت صار معي العكس تمام

8  الكاتب سمر, on 20-06-2009 00:56 تسلم ايدك ياست منى انا بصراحة بحب هي الاكلات الجاهزة وشقد بتمنى انزل على حلب حتى اكلها بس للاسف هالسنة نازلة برمضان واول مرة بعد جازتي فاكيد رح اخجل واطلب هيك اكلات من بيت حماي وخصوصي اهل جوزي مابحبو المطاعم وانا بالعادة كنت انزل كل سنة مدلله طلبي واتمني ياسوسو من مطعم لمطعم اخواتي بس بدون يدللوني لاني كنت اخر وحد عذابية بس هلق مافيني غير قول هاد كان وبكل الاحوال تسلم ايدك ياميمو

9  الكاتب ام محمد, on 20-06-2009 07:29 ياسلام شوطيبة انا بعملهابس بدون زنجبيل   الله يعطيكي العافية ويخلينا ياكي  يااحلى صبية حلبية

10  الكاتب نور الأسلام, on 20-06-2009 16:39 السلام عليكم جميعا تسلم اديك منى شي بابن انو طيب ولذيذ انا لما قرات اسم الوصفه قبل مافوت على التفاصيل خطر على بالي انو تكون وصفه الاخوانا المسيحيه ليش عم يضحكو البنات على كلمة نصوبن نحنا عنا كمان منقولا تسلميلي وتحياتي للجمبع

12  الكاتب منى, on 20-06-2009 20:33 هلا ام نور   يا ستي و انا متلك كتير احيانا بعملها على الكباسة أو بالتيفال , بس غذا كان في فحم و كش و شوي بيطلعوا و لا أطيب شي نغم

13  الكاتب منى, on 20-06-2009 20:33 هلا لموسة   يا رب توصلي بالسلامة و تعجبك المحلات الي قلتلك عليها و تكون على زووءك   أحلى الشي هو الطفل الي نايم جوى كل واحدة مننا هو الي بيجدد الحيوية لمن بيطلع

14  الكاتب منى, on 20-06-2009 20:34 هلا دالو   خليلي قلبك , هيك بتاكليها و من دون ما تعزميني و انت بتعرفي المسقسقة مع كاسة شاي كبيرة سخنة قديه غالية علي     اكيد نصوبين و لازم بصابون غار , هدولة بيت الصابوني بيموتوا على الصابون و بعرف واحدة عز المعرفة كانت تاكل رغوة الصابون بحملها على أثر الوحام , يعني صابوني قلبا و قالبا   عرفتي مين

15  الكاتب منى, on 20-06-2009 20:39 هلا رنونة   شايفة شو بياخد هل البحث من وقت و جهد , الله يعطيني العافية و يلبسها الي تلبيس     لشو الخجل , احلى الشي الواحد هو بطبيعته و من دون تصنع , نحنا هيك و الي ما عجبوا اما يكب حالوا او يسد داناته

16  الكاتب منى, on 20-06-2009 21:10 هلا أمونة   بتعرفي بعد ما قرات ردك انتبهت على اللون الاحمر الي حواليها و الي عن جد بيشبه الفستان , هادا اكيد العقل الباطن اه خيو اشتغل شغلو قبل التصوير     يمكن هي نفسها العرايس , بس انا مو متاكدة , انتي ادرى حبيبتي     على فكرة انا دايما عندي حكي و كل وصفة الها حكاية , بس ان شاء الله انتو ما تملوا

17  الكاتب منى, on 20-06-2009 21:11 هلا سمورة   ليش تخجلي , اسمعي بنتي اذا ما اتددلتي و انتي عروس عند بيت احماكي معناها راحت عليكي , سمعيها كلمة من ختيارة     الله يسلمك و توصلي بالسلامة ان شاء الله

18  الكاتب منى, on 23-06-2009 17:42 هلا ام محمد   و من دون زنجبيل بتطلع طيبة كتير , هي بقى انتي شو بتحبي بهارات و شو بتحبي تستعملي   هادا بس من زووءك يا قمر , شرفتي الموقع و الله

19  الكاتب منى, on 20-06-2009 21:12 هلا نور   ان شاء الله تجربيها و تعجبك كتير.  هلا هنن عم يضحكوا لان شافوا الكلمة مكتوبة و أكيد لما بتقرايها بتكون بتضحك اكتر من لمن بتقوليها , يا ترى انت من وين

20  الكاتب منى, on 20-06-2009 21:13 هلا غيوثة   ابوس الحلبيات لما بيتحاموا لحلبيتهم يا خيتو   سبحان الله رفيقتي نفس الشي تمام صار معها , بس بالمسلسلات بيزودوها كتير و بيفز عصبي الصراحة , بكرة حضرت وصفة و المقدمة كلها على اللقش الحلبي و كلامك كله انا ذاكرته فيها , يعني توارد افكار غير شكل

21  الكاتب رنا, on 20-06-2009 21:19 هههههههه دخيل عينك غيوثة شو اشتغلت الحمية على اللقش الحلبي ...منيح الي كنت حلبية لانه حسيت بكلامك قديش معصبة من قرايبيني ياستي بشكل عام الشوام بيضحكو على حكينا بس بيحبوه اكيد ...بعدين بالنسبة لسؤالك شو بتقلهن امهن لما يصوبنوا بتقلهن قوموا اغسلوا ايديكن هي صوبنووو حصريا ل اهل حلب يلي هنن عالراس اكيد

23  الكاتب dado, on 21-06-2009 23:24 والله يا منوش حقك عليي.. بس أكيد لو كنت بعرفك ما كنتي فلتي من عزيمتي عالسندويشة بنوب   يا ستي أنا بعرف وحدة يمكن هاه.. يعني مو متاكدة من عيلة الصابوني.. وبتحب تصوبن.. وفيها مواصفات صابونية متعددة وأهمها:  - بياض القلب كالصابون  - نظافة السريرة كالصابون  - خفة الدم كرغوة الصابون..  واسمها تلاتة بواحد.. قصدي تلت حروف.. وأنا بحبها كتير..   عم نحكي عن نفس الشخصاية شي؟

24  الكاتب منى, on 23-06-2009 09:48 هلا هيا   عرايس بتنفد على ماريا لان ايد ماريا صارت بعدها عروسة   الف صحة و هنا على قلبك و كل ما اكلتي العرايس اتذكريني بشي لقمتين تلاتة

25  الكاتب منى, on 23-06-2009 09:49 هلا دالو   يلا خيرها بغيرها و العزيمة علي و ادام القلعة بس من دون اراكيل لان بتدايق من ريحتهم     كاني عرفتها هل الشخصاية , يمو أديشك بنت حلال و من شوي كنا بسيرتك انا و اياها و قالتلي انها كمان بتحبك كتير و معزتك عندها انتي بتعرفيها

27  الكاتب منى, on 14-10-2010 18:48 خليلي عينك سمسومة على هل الدعوة الغالية , ان شاء الله انت و كل مين اله معزة عندك     الف الف صحة و هنا على البك حبيبتي , فكرة الفحمة حلوة كتير

28  تسلم إيديكي.. الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 24-10-2011 19:39 تسلم إيديكي على هذا الموقع الرائع جداً جداً جداً..  الصراحة أنا ما عرفت وين لازم إكتبلك هالشكر.. لإنو كل وصفة بهالموقع أطيب وأحلى من التانية..  تسلم إيديكي مرة تانية....  وشكراً جزيلاً...

29  الكاتب منى, on 24-10-2011 20:18 مية هلا فيك , منورة اختي و انا مبسوطة كتير ان الموقع عجبك و انك انضميتي لعيلتنا     ان شاء الله بتبقي منورة على طول

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved