إذا جيتي شي مرة على سوريا و بهل السفرة اذا صح الك تزوري حلب و بهل الزيارة إذا رحتي على شي مطعم فأكيد على المنيو رح تشوفي اسماء غريبة شوي متل توشكا , ماريا , مروش و بعد سطر أو سطريين رحتقرأي جبنة مسقسقة , جبنة كردية ! قبل ما تسألي الكرسون شو هي ماريا ؟ و مين هي توشكا ! اتذكري انك شفتي هيك شي مرة بلقمة طيبة و كمان شفتي طريقة تحضيرهم .
هل السندويشات كتير بتذكرني بطفولتي و بايام الصيفية , لمن كنا نروح كل كم يوم على نقابة المهندسيين , يقعدوا الكبار على الطاولة و نركض نحنا على الألعاب و الزحليقات و المراجيح و الدويخات , بوقته كان كله ببلاش , عن جد الدنيا كانت ابسط من هلأ و أبسط هون الها معنيين .
على الأغلب بعد اللعب لازم نكون علقنا قتالة مع شي حدا اخد النا دورنا بشي لعبة , و بعد ما نتقاتل و ننتف بعض , كان لازم نركض لحتى نتحامى بالكبارية و نجيب شي واحد منهم يورجي هل القليل الترباية على حاله . بس نحنا نوصل على الطاولة , و نشوف العشا نزل ( و اكيد فيه توشكا و ماريا ) و تطلب مننا ماما أن نروح و نصوبن و نرجع بسرعة قبل ما يبرد السندويش , ليش بوقتها ننسى كل شي عن القتالة و نركض ركض ما حدا بيعرف
هلا يمكن كل الصبايا هون بتعرف قديه بحب دور على أصل الوصفة و فصلها , و كتير انبسط لمن أعرف قصتها . بس هل الماريا ما عرفت الها أصل من فصل لهيك رح خبرك شو كنت دايما اتخيل سبب التسمية و هل الخيال مستند على الحقائق , خيال علمي يعني
السندويش معروف عندنا باسم ماريا , معناه أكيد أصله اما من اخوتنا المسيحية أو الأرمن و كنت و انا صغيرة فكر ان في واحد معلم سندويش اما بالسليمانية أو العزيزية مو متأكدة عسوا و كان عنده جارة حلوة و مو عرفان كيف بده يلفت نظرها . بعد تفكير خطر بباله ان يسمي أطيب سندويش عنده باسمها و هيك صار . لهيك كل ما بسمع اسم ماريا و بيكون القصد هل السندويش بيخطر ببالي صبية طويلة , شعرها طويل و سبل و متل الليل و لابسة فستان أحمر بروتيل , احم احم . أفكار الطفولة عجيبة بتكون احياناً .
الوصفة اتعلمتها من رفيقتي بشرى لما عطتني دفترها المليان وصفات طيبة لحتى صوره من شي اربع أو خمس سنين و كل ما بجرب شي منه بيطلع و لا أطيب . شكراً بشرى .
بالصحة و الهنا
نصف كيلو لحمة غنم مفرومة مرتين نصف ملعقة صغيرة بهار مشكل بهارات مشكلة حسب الرغبة ( أنا أستعمل رشة قرفة و زنجبيل و فليلفة حمراء ناعمة ) 2 حبة بندورة حبة فليلفة خضراء حبة بصل 3 ملعقة كبيرة بقدونس مفروم ملعقة كبيرة نعناع مفروم 2 ملعقة كبيرة دبس رمان 4 رغيف خبز عربي زبدة و زيت زيتون لدهن السندويش
·تقشر البندورة و يتم التخلص من بذورها ثم تفرم ناعماً جداً , تفرم الفليلفة و البصل ناعماً جداً و يمكن استعمال فليلفة حرّة أو عادية حسب الرغبة .
·تدعك اللحمة و البهارات و الملح و البندورة و الفليلفة و البصلة و البقدونس و النعناع و دبس الرمان , و يفضل تركها لبضع ساعات لتمتزج النكهات ببعضها البعض .
·يدهن الخبز بالقليل من الزبدة ثم تمد فوقه الحشوة و يدهن الوجه بزيت الزيتون .
·تشوى السندويشات على الفحم لأطيب نكهة و يمكن شويها على طواية تيفال و تقليبها على الوجههين حتى تنضج و يمكن أن تشوى في الفرن حتى تنضج اللحمة و يتحمر الخبز .
تعليقات (25)
