الوقت رمضان من شي اربع او خمس سنين , قبل الافطار بربع ساعة . طلعت على الطاولة كل شي جاهز .. ممم تقريباً
اتذكرت ان ما حضرت خبز مقلي لشوربة العدس و هيك ما رح يتهنوا الحلويين على الافطار و اذا قمت و اتشاطرت و قليت قبل الافطار بكم دقيقة رح ينتزع مراقي . شو الحل ؟
خطر ببالي ان حمص الخبزات على الميكرويف مع شوية زيت زيتون , و مع اني مو من انصار الميكرويف بس هادا كان حل اخر دقيقة .
المهم حمصته و يا سلام شو طلع طيب , و مقرمش و نكهته مميزة كتير لان اتحمص بزيت الزيتون و حتى مع كمية الزيت الي استعملته فيني قول انه بديل صحي للقلي العادي .
الطريقة صارت معتمدة عندي من وقتها لأن سريعة كتير و ما الها ريحة , يعني ما في حمام و لا في فرك و تنظيف الفرن بعد القلي و كمان الطريقة صحية لأن بزيت الزيتون و بتاكل زيت قليل , و صرت بهل الطريقة بحمص خبز الفتات و خبز الفتوش و خبز الشوربات .
بعد الاقبال الشديد على هل الخبز من الأولاد , خطر ببالي ان خلي شكل الخبز جذاب لحتى يقرمشوا منه الأولاد عوض عن البطاطا شيبس الي بيحبوها كتير و ما بخليهم ياكلوا منها الا في المناسبات لأن مليانة مواد حافظة و اشيا ما بيعرف فيها غير ربنا . هل المثلثات بيموتوا عليها الاولاد و عن جد فكرة لتعويضهم الشيبس .
بالصحة و الهنا
رغيف خبز عربي 3 – 4 ملعقة كبيرة زيت زيتون ( حسب حجم الرغيف )
·يقطع الخبز لمكعبات أو مثلثات ثم يوضع في طبق مسطح و يقلب مع الزيت حتى يتبلل , يرتب الخبز بحيث يكون طبقة واحدة أي أن لا تكون قطع الخبز فوق بعضها البعض .
·يوضع الطبق في الميكرويف و يشعل على أعلى طاقة لمدة 2 – 3دقائق و يخرج كل 20 ثانية و يقلب بالملعقة ثم يرجع للميكرويف و يشغل مجدداً و هكذا حتى نصل للون المطلوب , و قد يأخد معنا الخبز أقل من دقيقتان .
تعليقات (19)
