L2ma.com | لقمة طيبة | L2ma.com | لقمة طيبة | كوسا مطبق | · , الكوسا, على, وصفة, فيه | L2ma.com

القائمة الرئيسية

الأكثر تصفحاً

كوسا مطبق

الكاتب/ منى

11/06/2009

كوسا مطيق

من مدينة حماة في سوريا وصفة طيبة و نكهتها مميزة و تغير عن كل الوصفات الي بعرفها , و النكهة جاية من مزيج تلات أشياء , دبس الرمان و الطحينة و النعناع ..

في مطبخنا في وصفة واحدة بس من المطبخ الحموي و هي الباطرش الحموي , سبحان الله عن جد كل مطبخ هو انعكاس لشعبه . و ما بعرف كيف عبر عن هي النقطة بس في اشياء مشتركة بتميز طبخ كل مدينة و بتشبه اهل و ناس هل المدينة .

الوصفة سخنة و تازة و حضرتها اليوم على الغذا و اتعلمتها من من ديما من مدونتها ماء زهر البرتقال Orange Blossom Water . مبارحة أبو الشباب جاب لي كوسا و قال بده سلطة كوسا بلبن و مثومة . بس أنا طبعا بوجود الكوسا بيحكني جسدي , و لازم حضر فيه أشياء جديدة . قلبت بالكتب عندي و ما خرط مشطي و لا وصفة لهيك استسلمت و قلت يلا الصيف بأوله و هل المرة ما رح اعمل شي بجنب طلبات أبو الشباب .

الصبح فتحت ايميلي و إذ فيه رسالة من الغالية أمونة و فيه رابط لموقع فيه وصفات سورية . فتحت الموقع و ما حسيت الا اتصفحته كله , يعني عن جد كله صفحة صفحة و وصفة وصفة . ريحة الأصالة كانت عابقة فيه و صاحبته ديمة صبية من حماة عم تعرفنا عن الطبخ الحموي الي بتحضره ماماتها و على الصفحة الرئيسية كانت هل الوصفة .

ما شفت حالي إلا و أنا عم فرم الكوسا و دق التوم و حضر هل المطبق . طلع طيب كتير و مع السمنة الحموية نكهته و لا ألذ .

كمية الثوم الي مستعملتها ديمة حسيتها كتيرة على زوء عيلتي لهيك قللتها شوي و كمان استعملت سمنة بقرية عوض عن السمنة النباتية لان ما بطيقها للمذكورة أخراً , إما سمنة متل عادة العالم و الناس و اما زيت زيتون أما أنصاف الحلول ما بتمشي معي . و أنت فيك تعملي متلي أو متل ديمة الي بتحسيه انسب الك .

بالصحة و الهنا

كيلو كوسا
2 - 3 ملعقة كبيرة مليئة سمنة لقلي الكوسا
نصف ملعقة كبيرة سمنة للحشوة
ربع كيلو لحمة غنم مفرومة
ملعقة صغيرة و نصف نعناع مجفف
5 فص ثوم مهروس
2 – 3 معلقة كبيرة دبس الرمان
ربع كوب طحينة
ملح و رشة بهار مشكل
direction

·          يغسل الكوسا ثم يقطع إلى دوائر رقيقة و يقلى بالسمنة على الطرفين حتى يشقر . يرفع الكوسا على ورق ماص للتخلص من السمنة الزائدة .

·          توضع ملعقة من السمنة على النار و تحمى ثم تضاف اللحمة المفرومة و تقلب حتى تنضج اللحمة و يجف مرقها .

·          يُضاف الثوم المهروس و النعناع الجاف و رشة البهار المشكل و يقلب الكل لبضعة دقائق .

·          يضاف الكوسا المقلي ثم يغمر بالماء و يضاف دبس الرمان و الملح و يترك ليغلي لمدة 20 دقيقة .

·          يؤخذ القليل من مرق المطبق ما يقارب الثلاث أرباع كوب و تذوب به الطحينة بالتدريج في وعاء أخر و تقلب حتى تتجانس .

·          تضاف الطحينة للكوسا و يترك المطبق ليغلي لمدة ربع ساعة أخرى أو حتى ينضج .

·          يقدم المطبق فوراً في الرز الأبيض المفلفل .

أضافة إلى المفضلة (0) |

أقتباس | مشاهدات : 3869

تعليقات (32)

1 الكاتب ام نور, on 11-06-2009 22:05
سلمون يا منى وصفة مميزة خصوصي موسم الكوسا والوحدة بتحتار كل مرة شو تعمل بالكوسا

2 الكاتب Dimah, on 11-06-2009 22:06
مرحبا منى
صحة وهنا، انبسطت لأنك حطيتي الوصفة عالسريع، أنا بطيئة كثير لحتى حط وصفات على المدونة.
طالع معك بيشهي بس اسمحيلي بملاحظة
حسيتك قللتي سمنة القلي، هو عادة لازم ينقلى بكمية معتبرة مثل الكوسا المقلي العادي.
ماما قالت لي أنه اكيد السمنة البقرية أحسن، لكن لما عملنا الوصفة حطينا السمنة النباتية مشان سهلها على اللي بيزوروا المدونة من دول من خارج سوريا (المدونة العربية والانجليزية لأن الاجانب من وين بدهم يلاقوا سمنة بقرية).
وسلم دياتك، سعيدة جداً بزيارتك للمدونة!
Dimah
مدونة ماء زهر البرتقال - Orange Blossom Water

3 الكاتب منى, on 11-06-2009 22:49
هلا ام نور

الله يسلمك حبيبتي و ان شاء الله تجربيها و تكون على زووءك :zzz

4 الكاتب منى, on 11-06-2009 22:50
هلا دمدومة

مية اهلا و سهلا فيك في الموقع , شرفتي موضوعك أختي و الف الف شكر الك للمدونة الي ااقل ما بقول فيها انها رائعة و انا بانتظار وصفاتك , الله يخليليك ماماتك و يسلم ايدك و ايديها , يعني لازم تشدي الهمة و بدنا وصفات اكتر من هل الوصفات المميزة

السمنة كميتها كانت متل لمن منقلي الكوسا العادي و الكمية الي فوق غلط مطبعي , هلا رح عدل الوصفة .
اما عن استعمال السمن النباتية معك حق بهل النقطة , لان مو كل المقادير متوفر و خصوصا في اوربا و اميركا

انا الي سعيدة لاكتشافي مدنتك و اخر شغلة برافوا عليك لان مدونتك باللغتين , و هي بدها جهد و تعب اضافي , كتير انا فخورة فيك يا بنت بلدي :zzz

5 hi
الكاتب لين, on 11-06-2009 23:00
الله يسلم اديكي واديها يا ريت يكون عندي الجرءة جرب اكلات جديدة بس رح اوي قلبي لاني بعرف انو انتي اروع واشطر شيف

6 الكاتب Dimah, on 11-06-2009 23:07
منى
حاج رح شوف حالي من كثر ما عم تمدحيني... إحم إحم!ماعدت أعرف شو لازم قول، خجلتيني!
عن جد سلم دياتك وصحة وعوافي.

Dimah
مدونة ماء زهر البرتقال - Orange Blossom Water

7 الكاتب ميساء, on 11-06-2009 23:47
يسلمو يا منى مشكورة عالوصفة بكرة عالتجربة بإذن الله لأن أنا بس شفت أكلة فيها دبس رمان أو طحينة ما بقدر قاومها أبدا فكيف الحال إذا اجتمعوا الا ثنين سوا يمممممممممي يخليلي ياكي ويوفقك ويرزقك ويرزق زوجك و يفرح قلبك بأولادك ومية ألف بوسة يا قمر

8 الكاتب غيث, on 12-06-2009 01:17
الله يسلم ايديكم منى وديما ويجزيكم الخير انا البنات الحمويات اعطوني انطباع ولا اروع عن اهل حماه لما كانو معي بالجامعة فعلا كلهم لذيذات ورائعات والاكلة هي على التجريب بس لاجيب كوسا قريبا ان شاء الله وما شاء الله منى رح يكون موقعك مو بس مليئ باللذائذ كمان بالفوائد فانا قرأت عن انك رح تستعيني ب؟أخصائية تغذية برافو خطوة جيدة وجديدةوانا ممكن اقدم لك رأي من الناحية الصحية والطبيةاذا عندي ملاحظات وهيك بيكون مطبخك فريد من نوعه

9 الكاتب dado, on 12-06-2009 10:03
السلام عليكم..
شكلها ظريفة هالوصفة.. بس للأسف مالي نصيب بهي الوصفة ولا بشيخ المحشي مع إني بمون عالكوسا والباذنجان.. بس يالله خيرها بغيرها.. وانشالله رح جربها للعيلة.
تسلمي منوش

10 الكاتب JoJo, on 12-06-2009 12:25
يسلموو الايادي وصفة جميلة جدا وسهلة التحضير

11 hi
الكاتب لين, on 12-06-2009 16:53
والله ما عم جاملك you are superهونتي علي كتير وزوجي بحب الاكل الطيب لان حماتي شاطرة وماما ماكدرت تعلمني لان دراسة---وتزوجت وانا بل جامعة----وسافرت لهيك الك الفضل بعد الله وانا ممنونتك لانك بتعطي من قلبك شكرا

12 الكاتب نور الأسلام, on 12-06-2009 17:12

السلام عليكم كيفك منى وكيفكم صبايا تحياتي للجميع

الطبق كتير حلو وبشهي الله يسلم هالديات هدا الاسبوع عندي كوسا كتير الوصفه اجت بوقتها على التجربه انشاء الله

13 الكاتب سمر, on 12-06-2009 17:49
تسلم ايدك ياست منى منظرها شهي ان شاءالله رح جربها واكيد رح ادعيلك :zzz

على فكرة انا بتشكرك كتير على طريقة صنع كريم الثوم انا بحبو كتير مع الدجاج المشوي وعنا بالمانيا غير متوفر جربتو مرة على طريقتك طلعت ناجحة كتير وجوزي حبو كتير :grin

وانا ان شاءالله عازمة اختي ام علي وجوزها واخي جوعان بكرا على فروج مشوي ورح اعمل الثوم ومرة تانية بتشكرك :roll

14 الكاتب ام محمد, on 13-06-2009 07:05
مرحبا منمون

والله اشتقتلك كتير كان تلفوني معطل وصار لي اسبوع مضايقة لانو ماعم احسن اشوف الموقع ووقت دخلت
فرحت كتير على هاالاكلات الصيفية الخفيفة والطيبة
الله يسلم هاالديات ولايحرمنا منك :zzz

15 الكاتب منى, on 13-06-2009 12:54
هلا لنلونة

الله يسلمك يا زووء انت , عن جد لازم تجربي شغلات جديدة , بس ضروري تحسي انها بتناسب الرأي العام عندك و رح تنبسطي كتير بالتجديد

انا الي ممنوة ردودك و لطفك الظاهر فيها و بتنوري دايما لنلونة

16 الكاتب منى, on 13-06-2009 13:02
هلا دمدومة

شوفي حالك و اتدللي بس لا تنسي تنزلي كمان وصفات اصيلة :zzz

17 الكاتب منى, on 13-06-2009 12:56
ميوسة لو تعرفي شو غالية هل الدعوةالي قلتيها , ربي انت كمان و كل حبابك و الغاليين على قلبك :zzz

ان شاء الله تجربيها و تعجبك و تكون على زووءك و متل ما بدك

18 الكاتب منى, on 13-06-2009 12:56
هلا غيوثة

و الله بنت حلال اليوم كنت رح ابعت لك ايميل و اسال عنك , صار الك زمان مو مبينة و انا بقيان بالي عنك :roll

انا ما رح استعين باخصائية تغذية بشكل دائم , بس للوصفات الخفيفة
انا كتير ممنونة الك و بانتظار كل نصايحك الطبية و دايما بانتظارها

19 الكاتب منى, on 13-06-2009 12:59
هلا دالو

يلا خيرها بغيرها و ان شاء الله تجربيها لعيلتك و تعجبهم واكيد رح تخبريني

20 الكاتب منى, on 13-06-2009 12:59
هلا جوجو

الف شكر الك , ان شاء الله تجربيها وتكون على زووءك

21 الكاتب منى, on 13-06-2009 13:02
هلا نور

ان شاء الله تجربيها بهل الكوسايات الي عندك و يا رب تعجبك .
بانتظار رايك بعد التجربة

22 الكاتب منى, on 13-06-2009 13:03
هلا سمورة

الف صحة و هنا على قلبك و قلب كل العيلة , بقى اخوك جوعان :grin

و الله شو ضحكت لمن قرات اسمه
الف صحة و هنا و ان شاء الله تمشي امور عزيمتك بشكل ميسر

23 الكاتب منى, on 13-06-2009 13:04
هلا ام محمد

تشتاق الك العافية و تكون بسعادة و هنا دوما
الله يسلمك و ان شاء الله تجربي شي وصفة منهم و يكونوا على زووءك

24 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-06-2009 02:35
ما شاء الله. عم قول لحالي وين منى كنو ما شافت الايميل?? اتاريكي هون و نزلتي وصفه منو و صرتي صحاب مع صاحبتو هههههه و انا مثل اهل الكهف ههههه. شايفه شو اكلاتا طيبين?? انا حطيت موقع ديما على المفضله عندي لاني حبيت اكلاتا و حبيت اسم الموقع. ببعتلا تحيه من هون و اليوم للصدفه تركت عندا تعليق على احدى الوصفات. و بالنهايه بقول تسلم ايديكي يا ديما يا حلوه على هالبلوغ و هالوصفات الطيبين. و تسلم ايدين الغاليه منى على هالتطبيق الحلو والبيشهي.

امونه :zzz

25 الكاتب منى, on 16-06-2009 10:11
هلا امونة

ايه صباح الخيرات و الليرات و الكوسايات و المرقات :grin

هيدا النت عندي شكله انجن رسمي ,امبارحة بعتت الك ايميل , بس الظاهر و من ما فهمت عليك ان ما وصلك شي :sigh

اليوم رح ارجع رد

الله يخليلي ياكي على هل الاكتشاف و بالفعل موقع مميز , انا كمان جربت منه سلطة البطاطا و رح نزلها هل اليوميين :zzz

و لبقية الوصفات الي حاطة عيني عليها رح اعطيكي الحلوان اذا زبطت متل ما بدي

26 الكاتب semo, on 16-06-2009 10:13
ياستي يسلمو هالايدين
انا حموية وهي الاكلةالاكلة المفضلة عندي وخصوصا اذا كان جنبا بصل ابيض
مممممممممممممممممممممم
بتجنن
وانا بحبا بدون رز بحبا تغميس بالخبزة
شهيتيني عندي كوسا وقايمةاعملها

27 الكاتب منى, on 16-06-2009 11:31
هلا سيمو

حصللتلنا البركة يا ستي و كل اهل حماة على راسي .

ان شاء الله تحضريها و تاكليها بالهنا و الصحة , بالنسبة الي صارت من وصفات العيلة المغتمدة

28 الكاتب gsm, on 16-06-2009 11:44
يمي يمي باينتها اكلة كتيير طيبة وانا كتيير بحب دبس الرمان بالاكل بس المشكلة حاسة انو كمية السمنة كتيرة شوي يعني رح تطلع طيبة بس دسمة بس رح اجرب اعملها واخفف السمنة شوي من شان الريجيم بتعرفي على فكرة كنت حابة اضيف شغلة ,السمنة النباتية مانها صحية ابدا وتحتوي على مواد مسرطنة يعني إذا الواحد بده يستمل سمنة يا بقرية او زبدة بس يتجنب الزيوت المهدرجةلأنو متل ما قلت تحتوي على مواد مسرطنة انا قرأت تقرير عن الموضوع وحبيت افيدالجميع

29 الكاتب منى, on 16-06-2009 12:40
هلا اختي gsm

عن جد طيبة كتير و انت ممكن تعدلي كمية السمنة على مزاجك , بس من الاخر بتستاهل التجربة .

سمعت انا كمان عن المواد المسرطنة بالسمنة النباتية , لهيك ما بقى استعملها للطبخ نهائيا , حتى في دكتور مرة حكى ان الدهنة الي بتجي مع اللحمة صحية اكتر من هل السمون المهدرجة :eek

30 الكاتب نور الأسلام, on 16-06-2009 18:24
مرحبا منى

انا اليوم عملت هالطبق وطلع طيب لكن؟طلع شديد شوي والكوسه غطست بالصوص انا حسيت انو كترت طحينه يعني ما طلع نفس الصوره :cry

31 الكاتب منى, on 16-06-2009 18:56
هلا نور

اكيد السبب ان كانت كمية الطحينة شوي زيادة , كان ممكن تزيدي شوية مرق .

المهم يا ستي الف صحة و هنا و يا رب اذا اتشجتي و جربتيها مرة تانية تطلع متل الصورة و احلى و اطيب :zzz

32 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-06-2010 12:26
السلام عليكم اختي منى انا عضوه جديده لكن من فتره عم اتصفح موقعك وكتير حبيته واستفدت من نصائحك لاني جديده بالمطبخ نوعاما.
على سيرة الكوسه مطبق انا حمويه وكتير بحبه لهالطبق بس مامي بتحط مع الدبس الرمان والطحينه معلقة لبن لان متل مابتعرفي الطحينه تقيله شوي وبيعطيه طعمه كتير طيبه. :zzz

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 16/06/2009 )

< السابق		التالى >

[ عودة ]